Atiing pagtaklib da yang ëpat ang takun yang pagsulat na tung primirung isinulat na tung ni Timoteo, ipinadëëp si kang uman ang ipinakulung yang Adi duun tung Roma ang nag̓aranan tung ni Nero. Ya ray uras ang ipinagsulat si ka ni Pablong uman tung ni Timoteong duun pa agpanirbian tung sam pundaan duun tung siudad yang Efeso. Yang nabtangan ni Pablong atii, mas maliwag kay tung primirung pagkaditini na. Tung uras ang atii, mapungaw ka yang isip na ay natëtëngëd durung mga putul nang mga tumatalig ang tag̓a duun tung parti Asia ang namanalyud da ilëm tung anyang namag̓ingwara. Pati ti Figelo durua ni Hermogenes, ya ka (1:15). Asta nganing ti Demas, ya ka (4:10). Ultimu ra ilëm ti Duktur Lucas ang nagpakiunung tung anya duun tung kaliwag̓an ang atii (4:11). Kapurisu durung kalëlyag na ang ti Timoteo tung makali, mangay duun tung anya (4:9). Kumus durung paglalangkag̓ën na tung ni Timoteo, madua rang bisis inulit na (4:9, 21) yang imbitar na.

Dispuis may mga ituyun nang impurtanti tung ni Timoteo. Dapat ang mag̓agwanta tung mga kaliwag̓an ang mapasaran na arangan da ilëm tung pangërëngan na tung ni Ginuung Jesus duun tung Efeso (2:1-13). Ipinagpaprusigir na ka tung anyang magpakbung tung sasang manig̓ubrang anday maëyakan na tung ubrang ipiniar tung anya (2:14-26). Ipinabantay na ka tung anya natëtëngëd tung sistima yang kadaklan ang mga tau tung uri ta kaldaw ang durug kalain (3:1-9). Pinaktël na ra ka dayun yang isip nang magpadayun tung pagparanangërën na tung kamatuuran ang para asan da magluang mas maktël yang panirbian na tung Dios (3:10-17). May ultimung itinuw̓ul na tung ni Timoteo ang talusun na ra ka ëngëd yang tanan ang ipinagpiar na tung anyang ubraën (4:1-5). Nagpakdëk da ka tung anya ang alëngët da yang uras ang ipagpablag na ang asan da nga kumplituay na yang pag̓irintrigaën na yang sadili na tung ni Ginuung Jesus (4:6). Dispuis sinambit na ka yang durug tinlung nag̓iëlat ni Ginuung Jesus tung anya natëtëngëd pinagtalus na ra yang kumpurming ipiniar na tung anya (4:7-8).

Tung kauri-urian yang sulat na, may duma-rumang itinuyun na tung ni Timoteo (4:9-15). Inulit na ka dayun kung unu pay nainabu tung primirung pabista tung anya ang maskin anday nangërëngan tung anya, indi ka ëngëd pinaw̓ayaan ni Ginuung Jesus ang asta yang puidi ra rin ang mainabu, indi nainabu (4:16-18).