Atiing pinalpasan da ti Pablo duun tung Roma, ingkëlan na ti Timoteong namagliliw̓utun si tung duma-rumang banwa ang para mamagparakaw̓utun yang Matinlung Balita tung mga taung indi pa nag̓agngël. Pagkatapus, namansiangay ra tung sam pundaan yang mga tumatalig duun tung siudad yang Efeso. Pagkatapus atiing magliit da ti Pablo duun tung Efeso ang para magbalik da duun tung Macedonia, ti Timoteo ya ray piniaran nang mangërëngan tung anya duun tung Efeso ang para magtaraw̓angën tung sam pundaan duun. Atiing duun da ti Pablo tung Macedonia (1:3), nagsulat da tung ni Timoteo ang ya ra taang sulat ang naang primiru. Purisu yang pag̓asikad na tung sulat ang naa ay paktëlën na yang isip ni Timoteong magtuman yang sasang itinuw̓ul na ang yang dumang pagturuldukanën ta balaw̓ag tung ipinagtulduk na ra kang lag̓i atiing duun pa tanya, kaministiran ang ampalarën ni Timoteong indi ra magpadayun tung pagturuldukun nirang atia (1:3-11). Pati yang maling nag̓itulduk nira, dapat kang tadlëngën na (4:1-8; 6:3-5, 20-21). Dapat kang magpatayu-tayu tung palaksu yang sam pundaan duun ang para usuyun yang mga tumatalig yang tamang pitik (2:1-15). Lug̓ud da ka tung ubligasyun nang mamilik tung mga manigpadag̓ën-dag̓ën pati mga tumataw̓ang ang may mga impurtanting pitik ang dapat pausuyan nang mamilik (3:1-13; 5:17-25). Kumus may maling nag̓itulduk ta duma, kinunsiuan ni Pablo kung ya pag̓aring mag̓ing durug tinlung turuw̓ulun ni Jesu-Cristo (4:1-16). Dispuis pinakdulan na ka ta matinlung kunsiu natëtëngëd tung pagpakignunut na tung duma-rumang grupu tung sam pundaan ang atii, mag̓ing mga mamaëpët, mag̓ing mga taung aranëk ta idad tung anya, mag̓ing mga baw̓ay ang mga balu, mag̓ing mga manigpadag̓ën-dag̓ën tung grupu (5:1-25). Pati mga tumatalig ang mga kirëpën, may ipinaintindi na ka tung ni Timoteo kung unu pay matinlung ipatuman na tung nira (6:1-2). Pagkatapus pinaamanan na ka natëtëngëd tung mga ug̓ali yang mga manigtulduk ta mali ang pamanginguarta ilëm (6:3-5). Dayun na rang ipinadëmdëm ang yang mga tumatalig indi ra ëngëd mag̓amluk ta kuarta ang katulad ka tung nira, kung indi, asan da ilëm nga kuntintu yang isip nira tung kumpurming nag̓ipakdul yang Dios tung nira (6:6-10). Pinapangaku na ka dayun ti Timoteong magtuman dang puliduën na yang tanan ang atiang nag̓iurdin nang napabtang tung sulat ang atia (6:11-16). Baklu nga tapusay na yang gustu nang ianing, nagpaëtad da kung unu pay matinlung ipadëmdëm ni Timoteo tung mga tumatalig ang mga manggaranën (6:17-19). Pagkatapus tung pinagtapusan na, nag̓urdin da tung anya ang amlig̓an na ta mupia yang ubrang ipiniar yang Dios tung anya ang pirming saktung pisan tung pinag̓aralan na tung anya (6:20-21).