Pamagpaampu Na Pablo Tung Nira Natëtëngëd Tung Pagparakaw̓utun Nira Tung Duma (3:1-2)
3
Simanyan,
mga kaputulan,
sigun tung mga bag̓ay ang nag̓aëpëd ang gustu pa ka yamën ang sambitën,
tukaw tung tanan,
pagpaampuami ka tung numyu ang para yang bitala ni Ginuu tang nag̓ipagpakaw̓ut yamën ay tung makali rang matëptëp da ig mapadëngëg̓an da ka ta mga taung panangërën ang katulad ka tung nainabu asan tung numyu tan taa.
2 Iampu mi ka tung anya ang ipalibriami ka anya tung mga malain ang mga tau tani ang matëtëg̓as ta kulu.
Maning tia yang ipag̓ampu mi ay kipurki bëlag̓an ang mag̓aning ang yang tanan ang mga taung nag̓apampakaw̓utan yamën ay manangëd.
Natëtëngëd Tung Nag̓ipag̓ampu Na Pablo Para Tung Nira (3:3-5)
3 Maayën ilëm ti Ginuu ta yay matalig̓an ta maskin unu pay mapasaran ta.
Ya ra kay magpaktël tung mga isip mi ang para pirming matëntën ang nunut da ka ta pagmanada na tung numyu ug̓ud indiamu maaklës ni Satanas tung malain.
4 Natëtëngëd pagpakigsasaamu ra ka tung ni Ginuung Jesus,
may talig yamën tung numyu ang magpadayunamu yang pagturumanën mi yang kumpurming ipinagpatuman yamën tung numyu tan taa may yang ipatuman pa yamën.
5 Yang nag̓ipag̓ampu yamën tung ni Ginuung Jesus ang manguluanamu ra anya ang para mas pang mamarësmësan mi yang kantidad yang gëgma yang Dios tung numyu ang para ya ëngëd ay pagbatuwan yang mga isip ming pirmi.
Yadwa pa ang paëyanganamu ra ka anyang pirmi ta ipag̓agwanta mi tung mga pinitinsiang mapasaran mi ang katulad ka tung pag̓aragwantaën na ang atiing taa pa rin ang tanya ka pa man yang pag̓aningën ang Cristo.
Nag̓atuw̓ul Na Pablong Pabëlag-bëlag̓an Da Kanay Nira Yang Mga Aruman Nirang Pamagbinulakbul (3:6-15)
6 Simanyan mga kaputulan,
natëtëngëd tung katëngdanan ang naang ipinagpiar ni Ginuung Jesu-Cristo tung yamën,
may sasang dapat ang ipatuman yamën tung numyu.
Yang mga kaputulan tang duma asan ang midyu pagbinulakbul,
maayën pa ta numyung kadaklan,
pabëlag-bëlag̓an mi ra kanay.
Ay yang sistima nirang atia bëlag̓an ka ëngëd uyun tung ipinagpatuman yamën tung numyu.
7 Ay ya pa ag̓ari,
yamu mismu ay nag̓askë ang dapat ming pasugtan yang pasais yamën atiing asanami pa tung numyu ang indiaming pisan nagbinulakbul.
8 Indiami ra ka nganing nagpasuitu maskin tung ninu pa,
kung indi,
law̓iig kaldaw nagpakabëdlayaming nagtrabaw basta indiami ilëm mapagpalbat tung numyua.
9 Bëlag̓an ang mag̓aning ang anday rasun yamën ang magpasuitu tung numyu,
kung indi,
indi ra ilëm sinikad yamën natëtëngëd gustu yamën ang magpaita ta sasang mulidung matinlung pausuyan mi.
10 Dispuis pa magkabag̓ay kang may ituw̓ul yamën tung numyu natëtëngëd tung bag̓ay ang atia ay kipurki atiing asanami pa rin tung numyu may sasang urdin ang ipinagpatuman da kang lag̓i yamën tung numyu ang bëlag̓an da ka ilëm minsang sinambit yamën ang kung may sasang putul tang indi malëlyag ang mag̓ubra dapat ang indi mi suituën.
11 Yang nag̓ipagpadëmdëm yamën tung numyu natëtëngëd tung bag̓ay ang naa ay may nabalitaan da yamën ang may duma unu asan tung numyu ang pagbinulakbul da.
Yang nag̓apaprusigiran unu nira bëlag da yang sadiling pagpangabui nira,
kung indi,
pagpasilaw̓ët tung indi nira pinakabëdlayan.
12 Kapurisu natëtëngëd tung mga putul tang maning tia yang sistima nira,
may sasang urdin ang nag̓ipatuman yamën tung nirang nag̓ipagpaprusigir natëtëngëd tung katëngdanan ang nang ipinagpiar ni Ginuung Jesu-Cristo tung yamën.
Kaministiran,
mamagpakatëntën dang mamandilëm ta sadiling pagparangabuiën nira.
13 Ta numyung kadaklan,
mga kaputulan,
indiamu ilëm magmataka tung pagburuatën mi yang matitinlu.
14 Kung alimbawa may sasang putul mi asan ang pagtamaran dang mag̓ubra ang pagkatapus indi ra manangëd tung urdin ang atiang isinulat yamën,
ya ray tandaan ming pabëlag-bëlag̓an da kanay ug̓ud basi pa ra ilëm asan da ngaëyangay ta ëyak na.
15 Ug̓aring indi mi ra ilëm kaw̓ig̓ën ang sasang kasuay mi,
kung indi,
pakigkësënan mi tung matinlung paamanën,
ay tia sasang putul mi tung ni Ginuu ta.
Yang Nag̓ipag̓ampu Na Pablo Ang Magkatirnung Pisan Tung Kaministiran Nira (3:16a)
16 Yang nag̓ipag̓ampu yamën tung ni Ginuu tang yay pinangapunglan yang kalimëngan ang tanya mismu ay magpaëyang tung numyu ta isip ming pirming malimëng ang nunut da ka ta pag̓uruyunan ming matinlu.
Yang Pagtapusan Yang Sulat (3:16b-18)
Buinu,
taa tung pagtapusan yamën yang sulat ang naa,
yang nag̓ipag̓ampu yamën ang yamung tanan asan mas pang maispirinsiaan mi yang pagpakigsasa ni Ginuu ta tung numyu.
17 Yuung ti Pablo pagpakikumustaw ra tung numyu asan ang ya ra ilëm ag̓isulatayu tung sadiling panulatu ang pariu ka tung pag̓abuatu tung pagtapusan yang tanan ang sulatu ug̓ud asan da nga siguruay mi ang yuu ka man yang nagpasulat tung sulat ang atiab.
Ay maning kang lag̓i tia yang panulatu.
18 Yang yëën ang nag̓ipag̓ampu ang mas pang maispirinsiaan ming tanan yang kanëëman ni Ginuu tang Jesu-Cristong pagpadag̓ën-dag̓ën tung numyu.
Ya ra ilëm tia ay maaning yamën tung numyu,
Pablo,
Silas,
Timoteo