Atiing pagliliw̓utun ni Pablo ang pagparakaw̓utun yang Matinlung Balita, duun nagpanaw tung siudad ang Tesalonica duun tung parti Macedonia, kasiraan da ka tanira na Silas ni Timoteo (Mga Binuat-buatan 17:1-9). Tung sëlëd tulung linggu nagparakaw̓utun tung mga tau duun. Matinlu yang pinakaw̓ut na ay dakëlë yang namanangëd ang namagtalig da yang mga sadili nira tung ni Ginuung Jesus. Yang kadaklan bëlag̓an mga Judio. Ug̓aring ilëm, may dumang mga Judiong indi ra namanangëd ig durung pangimun nira tung ni Pablo natëtëngëd tung mga kaarumanan nirang namaglaktëd da tung nag̓itulduk na. Purisu pinaliit da nira na Pablong kinaskas tung siudad nira. Purisu ti Pablo tanya, durung pagkëba-këbaan yang dëdlaan na natëtëngëd tung mga tumatalig ang nabutwanan na duun. Ay nabalitaan na ra ang pati tanira nag̓adëëg-dëëg̓an da ka yang namagpakigkuntra tung anya. Purisu atiing duun pa tanira tung Atenas, ti Timoteo ya ray itinuw̓ul nang magbalik duun tung Tesalonica ang para magpaktël tung mga isip nira duun (3:1-2). Ti Pablo tanya nagpadayun yang pagparanawën nang asta nakaw̓ut da duun tung siudad ang Corinto. Duun da ka nga kaw̓utay ni Timoteo ang ya ray kay nagbaw̓alitaën tung anya kung kumusta ra tanira duun tung Tesalonica (3:6; Mga Binuat-buatan 18:5). Purisu ya ra kay uras ang ipinagpasulat ni Pablo yang sulat ang naa tung takun ang 51.

Yang katuyuan nang nagpasulat tung nira ay ug̓ud magpaktël tung mga isip nira ig magpadëmdëm ka tung nira yang itinulduk na ra kang lag̓i tung nira natëtëngëd tung pag̓urusuyun nira tung nag̓ayunan yang Dios. Ig gustu na kang maintindian nira kung unu pay mainabu kung maglëkat da nganing ti Ginuung Jesus. Purisu tukaw tung tanan, nagpasalamat da tung Dios natëtëngëd tung pag̓urubraën na tung mga isip nira ang durug katinlu yang pinakaw̓ut na (1:2-10). Pagkatapus ipinadëmdëm na ka tung nira natëtëngëd tung mga pasais na pati mga pasais yang mga ugpu na ang pulus tung matinlu. Sinambit na tia ay puiding may nagkaragngël nirang ibinangdan yang duma tung na Pablo ang muya, kung panangdën nira, malpës dang maplëkan ta ipagtalig nira tung anya (2:1-12). Pagkatapus nagpasanag da tung nira kung ayw̓a indi ra nagbalik tung nira agkali (2:17–3:10). Pagkatapus pinadayunan na kang sinambit kung unu pay gustu nang ipagpaprusigir na tung nirang usuyun tung mga pagpangabui nira (4:1-12). Naa pala may nag̓apagkurian nira ta pag̓isip natëtëngëd tung mga putul nirang nagkarapatay ra kung muya indi ra mangasakëp tung magkarainabu kung maglëkat da nganing ti Ginuung Jesus. Purisu ya ray liniwayan ni Pablo ta maayën (4:13-18) ang para magrilinga-lingaan dang pamagdëmdëm tung dumang nagkarapatay ra. Gustu na ka ang tanira pirming riparasiun ang pamagpakbat tung uras ang ipaglëkat ni Ginuung Jesus, kung unu pang mga ug̓aliay ang dapat ang kaw̓utan na tung nira (5:1-11). Dispuis may iningaluk na tung nirang dapat ang intindiën nira natëtëngëd tung pagpurutulan nirang sam pundaan (5:12-22).