4
Yamung may mga kirëpën,
patinluën mi ka yang pag̓ërëkëlën mi tung nira ang para pirming magkatama tung pagtërëlëngën yang Dios.
Ay kipurki nag̓askëan mi ra ka ang pati yamu,
may ag̓alën mi ka duun tung langit ang yay panuw̓alan mi tung uri.
Yang Nag̓ipagpaampu ni Pablo Para Tung Nira (4:2-4)
2 Kung natëtëngëd tung pag̓arampuën mi,
yag paawatay mi ang pirmiamung riparasiun kung unu pay dapat ang ipag̓ampu mi.
3 Igapilayaw ka numyung ipag̓ampu ang pakdulanaw ra ka yang Dios ta lugarung magparakaw̓utun natëtëngëd tung palaksu yang planu na sigun tung ni Jesu-Cristo ang indi pa ka man naintindian ta mga tau ta namagtukaw ang mga panimpu.
Kaministiran ang ya ray padërëpan mi tia ay natëtëngëd yang pagparakaw̓utunu yang bitalang atia tan taa,
ya ray nagakdanu yang pagkaditiniung naa.
4 Ya ray ipag̓paampuu tung numyu ang may lugarung magpasanag tung publiku ay natëtëngëd ya ka man ay ubligasyunu.
Natëtëngëd Tung Pagpakignunut Nira Tung Mga Aruman Nirang Indi Pa Nag̓atultul (4:5-6)
5 Yang pagpakignunut mi tung mga kaarumanan ming indi pa nag̓apagtalig yang mga sadili nira tung ni Jesu-Cristo,
gamitën mi yang isip ming mawayang ang magpaita tung nira ta mga matitinlung mga pasais.
Kada may lugar,
indi mi pataw̓ën-taw̓ënan,
kung indi,
atiang lag̓i,
buatan mi ra ta matitinlu.
6 Lug̓ud da ka asan ang pirming pakigkësënan mi ta matinlu.
Katulad tung pamangan ang yag pasaburay ta ta kasin,
paisa-isaan mi ka ta mupia yang pamëtang-bëtang mi ta gustu ming ianing mi tung nira natëtëngëd tung bitala yang Ampuan ta.
Amat-amatamu ra kang magkatinir ta ispirinsia mi kung unu pay matinlung matuw̓al mi tung nira sasa may sasa kung may talimaanën nira tung numyua.
Yang Pagtapusan Yang Sulat (4:7-18)
7 Buinu,
kung natëtëngëd tung tanan ang nagkarapanawanu tani,
atia ra ti Tikikob ang pinapag̓ëkëlu yang sulat ang atia,
ya ray magbaw̓alitaën tung numyu.
Tanya sasa kang putul tang nag̓amaalu ta duru ig sasa kang pagpaturuw̓ulun ka tung ni Ginuu tang talagang matalig̓an ta.
8 Yang katuyuanu ëngëd ang nagpangay tung anya asan ay ug̓ud maintindian na ra kung ya pa ag̓ari yang pagkarabëtangën mi asan ang nunut da ka ta pagpaktël na tung mga isip mi.
9 Ipinanunutu ra tung anya ti Onesimo ang sasa kang putul tang nag̓amaalu ang sarang ang matalig̓an ta ig tag̓a asan da kang lag̓i tung numyuc.
Kasiraan da ka tanirang magbaw̓alitaën tung numyu natëtëngëd tung tanan ang nagkarainabu tani.
10 Simanyan ti Aristarcongd sasa kang arumanung nag̓aditini ka tani natëtëngëd ka tung pagkërërëngën na tung ni Jesu-Cristoe,
pagpakikumusta asan tung numyu.
Pati ti Marcos ang pinsan ni Bernabe,
pagpakikumusta ka asan tung numyu.
Kung alimbawa,
mangay pa asan tung numyu,
asikasuën mi ta mupia.
Asta yang ipinagtuyunu tung numyu natëtëngëd tung anya,
dëmdëmën mi kang tumanën.
11 Asta ti Jesus ang naang nag̓aapiliduan tung ni Ustu,
ya ka,
pagpakikumusta ka asan tung numyu.
Nag̓asambitu naang tulung naa ay tanira ilëm ay mga tumatalig ang mga masigkanasyunung mga Judio ang mga katabyangung nagparakaw̓utun natëtëngëd tung palaksu yang paggaraëmën yang Dios ang baklu kung ya pa ag̓ari malg̓uran yang mga tau.
Yang pagpakiunung nira tani tung yëën,
ya ray nag̓alinaynayan da yang isipu ëkël tung pagpaktël nira tung isipu.
12 Asta ti Epapras ang naang sam bilug kang tag̓a asan ka tung numyu ang pagpaturuw̓ulun ka tung ni Jesu-Cristo,
pagpakikumusta ka asan tung numyu.
Muya-muyaamung ag̓imurasën nang nag̓apaawatan tung pag̓arampuën na ang mas pang mag̓atu rang mag̓atu yang mga ug̓ali mi tung ug̓ali ni Jesu-Cristo.
Kag yadwa pa ang pirming pag̓inëtëg̓an ta mga isip mi yang pinalanu yang Dios ang ipinagtulduk na tung numyu.
Bilang ya ray padanayan ming panangërën ang nunut da ka ta pagturumanën mi yang mga kalëlyag̓an na.
13 Puidiaw kang magsistigus tung anya ang yang nag̓ipagpaawat na tung pag̓arampuën na para tung numyu ay pirmiamu ra ilëm ang nag̓apanëëm-nëëman nang nag̓apasunairan kung unu ray pagkarainabu asan tung numyu.
Pati yang mga tumatalig duun tung Laodicea may duun ka tung Hierapolis,
ya ka,
nag̓apaawatan na ra ka ta pag̓arampuën.
14 Asta ti Lucas ang sasa kang nag̓amaalu,
pagpakikumusta ka tung numyu asan,
pati ti Demasf,
ya ka.
15 Yang mga kaputulan ta duun tung Laodicea,
ipakikumustaaw ra kanay numyu tung nira,
pati ti Nimfasg,
ya ka,
kasiraan da ka tanira yang mga tumatalig ang sam pundaan ang pamagsaragpun tung balay na.
16 Yang isinulatung atia,
kung mabasa ra nganing tung numyu ig mapagkërësënan mi,
ipablës mi ra kanay ang ipaëkël tung sam pundaan duun tung Laodicea ug̓ud kung mamagsaragpun da nganing,
mabasa ka tung nira ig mapagkërësënan ka nira.
Asta yang sam bilug kang sulat ang ipinaëkëlu ra tung nira,
ya kay bëlsan mi tung nira ang para mabasa ra ka tung numyu ig mapagkërësënan mi ra ka.
17 Kidispuis pa,
aningën mi ka asan ti Arquipoh ang mangaman ang indi na ra paw̓aya-w̓ayaan yang ubrang ipinagpiar ni Ginuu ta tung anya,
kung indi,
talusun na ra ka ëngëd ang tapusun.
18 Uay,
atia ra yang yëën ang sadiling panulat ang pagpakikumustaw ka tung numyu ang para may pruiba tung pagkamatuud ang yang sulat ang atia,
liit ka man tung yëën.
Kumus naniaw nag̓aditini,
dëmdëmayaw ka numyung ipag̓ampu.
Yang yëën kang nag̓ipag̓ampuu para tung numyu ang mas pang maispirinsiaan mi yang kanëëman yang Dios ang pagpadag̓ën-dag̓ën tung numyu.
Ya ra ilëm tia ay maaningu tung numyu,
Pablo