Yang sulat ang naa ipinagpasulat ni Pablong ipinaëkël tung sam pundaan yang mga tumatalig duun tung siudad ang Filipos duun tung parti Macedonia. Yang grupu nirang atia ipinaëyang yang Dios ëkël tung pagparakaw̓utun na duun tung nira atiing primiru (Mga Binuat-buatan 16:6-40). Atiing pagpasulat na, nag̓aditini pa duun tung Roma natëtëngëd tung pagparakaw̓utun na yang Matinlung Balita natëtëngëd tung ni Ginuung Jesu-Cristo.

Yang sasang ipinagpasulat na tung nira ay gustu nang magpasalamat tung nira natëtëngëd tung taw̓ang ang ipinaëkël nira duun tung anya ang durug tinlu (4:10-20). Gustu na kang magpaktël tung mga isip nira ang para bëlag̓an ang yay panluw̓ayan nira yang nainabu tung anyang nag̓aditini yang gubirnu duun tung Roma (1:12-26). Tutal asan dang mas pang nagkatinlu yang palaksu yang Matinlung Balita duun tung Roma. Nagpaintindi ra ka tung nira ang yang impurtaën ëngëd nira ang yang mga ug̓ali nira, dapat ang pirming magkatunu tung nag̓adapatan yang Matinlung Balita ang nag̓ipagpakaw̓ut nira duun tung Filipos (1:27). Yang duruang atia ya ray prusigiran nira maskin ya ray magakdan nira ta pinitinsia (1:28-30).

Dispuis nagkunsiu ra ka tung nira ang yang mulidung ipinagpaita ni Ginuung Jesu-Cristong nagparanëk, ya ra kay kaministiran ang usuyun nirang magpurutul (2:1-11). Kaministiran ang yang ikaayën yang mga aruman nira ya ra kay pabilug̓an ta mga isip nirang intindiën bëlag̓an ilëm yang ikaayën nirang sadili. Yang pagpabëtang nira tung mga aruman nira ang tanira mas pang magkabag̓ay ang dayawën kay tung nira ang para asan da nga plëkay yang pagparaabwat-abwatan (2:3-4). Dispuis pinadëmdëm na ra ka ang kumus may kalibrian da nira, kaministiran ang papruibaan da nira tung mga ubra-ubra nirang magkabag̓ay tung sasang taung tinapnay ra ni Jesu-Cristo (2:12-18).

Dispuis, pinabantay na ra ka tanira natëtëngëd tung mga Judio ang durug kakatatalang yang nag̓irëg̓ës nira tung mga tau ang dapat unung magpabuat ta tanda tung mga tinanguni nira. Kipurki yang pinatiëlan yang Dios ang nagtapnay tung nira, bëlag̓an tung maning tiang papanaw, kung indi, suluminti ra ilëm natëtëngëd tung kanëëman nang makabëw̓ërëng ang pisan ang ya ray ipinaita na atiing pagpakugmatay ni Ginuung Jesu-Cristo. Maskin tanya ang tukaw maktël yang panalig na tung pagturumanën na yang sari-saring mga katuw̓ulan, may uras dang ipinlëk na ra ang para magtalig dang bug̓us tung ni Jesu-Cristo ug̓ud suluminti ilëm asan da nga tëlëngay yang Dios ang salu rang pisan tung pagtërëlëngën na (3:1-11). Purisu yang pag̓asikad na ëngëd ang tanya mas pang mag̓atu rang mag̓atu tung ni Jesu-Cristo tung tanan ang pag̓abuat na may tung tanan ang pag̓asikad na mintras pagpakbat tung ultimung kalibrian ang magkaw̓ut ang pati yang tinanguni na imakluën da ka ni Ginuung Jesus ang ipapariu na tung sadiling tinanguni nang timlat dang pisan ang para asan da mag̓atung pisan ti Pablo tung anyang anda ray pagkakulang na (3:12-21).

Tung 4:1-9 may mga impurtanting bag̓ay ang ipinaktël na tung nirang usuyun nira. Magdasun, ya ra yang pagpasalamat na tung nira natëtëngëd tung taw̓ang ang ipinaëkël nira tung anya (4:10-20).