Yang nagpalikëd yang Matinlung Balita duun tung Colosas, bëlag ti Pablo, kung indi, ya ra yang sasang taung nag̓aranan tung ni Epapras. Tanya dating tag̓a Colosas (4:12), piru baklu ra ngagngëlay na yang Matinlung Balita atiing pag̓angay na duun tung Efeso ang nagkatuun da tung pagparakaw̓utun ni Pablo duun (1:7-8; Mga Binuat-buatan 19:8-10). Anday dumang pinakaw̓ut na, nanangëd dang nagtalig tung ni Ginuung Jesu-Cristo. Pagkatapus atiing pag̓ulik da duun tung Colosas, tanya ra mismu ay nagparakaw̓utun yang Matinlung Balita tung mga kaarumanan na duun. Yang linuaan na, may sam pundaan dang mga tumatalig ang minyang. Piru dispirinsia ilëm nalaktan da ta mga manigtulduk ta indi magkatama. Purisu naisip da ti Epapras ang mangay ra tung ni Pablo duun tung Roma ang para magbaw̓alitaën da tung anya natëtëngëd tung prublimang atia. Purisu pagkabalita ni Pablo, nag̓intra ra ampu para tung mga tumatalig duun (1:9-11) ig naisip da kang magpasulat ta ipaëkël na duun tung nira. Ay yang gustu na paktëlën na yang mga isip nirang indi ra mamagpadayun ang mamag̓intindi tung nag̓itulduk yang duma ang atiang indi magkatama.

Maning taa yang nag̓itulduk nirang mali tung mga tumatalig. (1) Dapat unung mamagtuman yang mga katuw̓ulan ang nag̓usuyun yang mga Judio natëtëngëd tung mga palanganën ang yang duma dapat unung liian nira. Pati mga katuw̓ulan natëtëngëd tung mga maal ang kaldaw dapat ka unung silibraën nira (2:16). Dapat ka unung magpabuat ta tanda tung mga tinanguni nira ug̓ud asan da unu tanira nga bilangay yang Dios ang mga tauan na. (2) May mga riglamintu ka natëtëngëd tung mga bag̓ay-w̓ag̓ay ang dapat unung likayan ay panliitan unu ta malain. (3) Kaministiran ka unung mamagtuu tung mga angil (2:18). (4) Ti Jesu-Cristo unu bëlag Dios. Yang nag̓itulduk nirang maning tia, ya ray binaliskad ni Pablo tung 1:15-20 may 2:8-10. Dispuis pamag̓intra paambug ang tanira unu may nag̓askëan nirang inding pisan nag̓askëan ta duma (2:18). Yang panalig̓an nirang atia pulus inimu-imu ta tau ka ilëm. Purisu kung tinu pay mag̓usuy, anday dumang pakaw̓utun na, asan da nga lakanay yang isip nang magpapsaw tung tanan ang mga kalëlyag̓an nang balaw̓ag tung kalëlyag̓an yang Dios (2:22-23).