Nag̓apapagbilug Na Yang Pinakaisi Yang Ipinagpasanag Na Tung 3:1-21 (4:1)
4
Mga putulung nag̓amaalung nag̓alangkag ta duru,
ag̓ampayanaw ra ta kasadyaanung duru natëtëngëd tung numyung pag̓usuy ra ta matinlu tung nag̓auyunan yang Dios.
Natëtëngëd tung baklu rang ipinagpasanag̓ung atia tung numyu,
ëltën ming ëltën yang pagtaralig̓ën mi tung ni Ginuung Jesus ig ya ra kay buatën ming pitik ang pausuyan mi tung tanan ang mga pag̓urubraën mi.
Gustu Nang Mag̓inulikay Ra Ta Makali Ti Euodia Durua Ni Sintique (4:2-3)
2 May sasang gustuung ipadëmdëm tung ni Euodia durua ni Sintique ang kung maimu ilëm,
tung makali mag̓inulikay ra tanira.
Ay ya pa ag̓ari,
magputul kang lag̓i tanira tung ni Ginuu ta.
3 Pati yawa,
ungkuy,
kumus pagsinasaayita ra ta kinaisipan,
may sasa kang nag̓aingaluku tung nuyu.
Padag̓ën-dag̓ënan mu ra kanay ta mupia yang durua nga baw̓ayan ang atia ang para maulikan da yang pagputulan nira tung makali.
Ay ya pa ag̓ari,
tan taa namagpakiunung da ta ustu tung yëën atiing pagparakaw̓utunu yang Matinlung Balita asan maskin durung mga taung namagpakigkuntra tung yamën.
Kasiraan da ka tanira ni Clemente pati yang kadaklan ang mga arumanung dating pamagtaw̓ang tung yëën tung pagparakaw̓utunu.
Maskin indi ra ingarananu tanira,
yang mga aran nira nasulat da kang lag̓i tung sasang paglistaan yang Dios yang mga aran yang mga taung kumpurming pinaëyangan na ta ipagpangabui nirang baklu ang anday pagtapusan naa.
Natëtëngëd Tung Duma-rumang Nag̓ipagpaprusigir Na Tung Nira (4:4-9)
4 Magpakasadyaamung pirmi natëtëngëd nag̓askëan mi ra ka ang anday dumang may anya tung numyu,
ya ra ti Ginuu ta.
Ulitënu pa ta minsa.
Magpakasadyaamung pirmi.
5 Kaministiran kang ipaita mi tung tanan ang mga masigkatau mi ang ta yamu mapinaurayën.
Ay kipurki yang uras ang ipaglëkat ni Ginuu ta nag̓aalëngët dang nag̓aalëngët.
6 Indiamu ëngëd magpakaliw̓ëg ta kulu,
kung indi,
maskin unu pay mapanawan mi,
ipag̓ampu mi ra ilëm tung Dios.
Iugtul mi ra ilëm tung anya kung unu pay kaministiran mi ang nunut da ka ta pagpasalamat mi tung anya natëtëngëd tung itaw̓ang na tung numyu.
7 Anday dumang pakaw̓utun na tia,
kung indi,
paëyanganamu ra anya ta kalimëngan yang isip mi ang maskin yamu,
indi mi ka ilëm maintindian kung ayw̓at nagkalimëng da ag̓ad tung kaliwag̓anamu pa.
Bilang yang kaalimbawaan yang kalimëngan ang atia yay maning pa tung sasang magmanada tung pag̓irisipën mi ang para indi ra ëngëd mag̓aburidu.
Ya ray ipaëyang na tung numyu natëtëngëd ilëm tung pagtaralig̓ën mi tung ni Jesu-Cristo.
8 Mga putulu,
nani pa yang sam bilug ang nag̓aëpëd ang gustuu pang sambitën tung numyu.
Kaministiran ang yang pabilug̓an ëngëd ta mga isip ming pirmi ya ra taa:
kung unu pay talagang matuud,
kung unu pay magkatama ang anday mansa-mansa nang malain,
kung unu pay talagang matinlu ig nag̓auyunan ta kadaklan pati yang Dios,
kung unu pay makasasadya ta isip ang talagang maayën ka man,
kung unu pay may pagkatinlu nang landaw,
ig kung unu pay magkabag̓ay ang dayawën,
yang mga maning tia ya ray ipabalay mi tung mga isip mi.
9 Dispuis pa,
kung unu pay ipinagtulduku tung numyu,
kung unu pay ipinagpalatayu tung numyung itinalig ëngëd ni Ginuu ta tung yëën,
maskin unu pay nagngël mi tung yëën,
ig kung unu pang mga pasaisay ang naita mi tung yëën,
ya ray dapat ang pausuyan ming pirmi.
Ay kung yay usuyun mi,
pakigsasaanamu ra yang Dios ig paëyanganamu ra ka anyang pirmi ta kalimëngan yang mga isip mi.
Natëtëngëd Tung Sasang Itinaw̓ang Nira Tung Anyang Ya Ëngëd Ay Pagsadyaan Yang Isip Na (4:10-20)
10 Duru rag sadya yang isipu,
ig duru ra kag kadakul yang pagpasalamatu tung ni Ginuu ta gatëd maskin nabuay ra ka man,
numanyan nadëmdëmanaw si ka numyung pinaëklan ta taw̓ang.
Piru bëlag̓an ang mag̓aning ang may nabtang tung isipu ang linipatanaw ra ilëm numyu.
Nag̓askëanu ka ang anda ilëm ay lug̓ar ming magpaita yang pagdërëmdëmën mi tung yëën.
11 Nag̓apagbitalaw ta maning tia bëlag̓an ang mag̓aning ang natëtëngëd ang bëgbëg da yang kuluu natëtëngëd tung mga kaministiranu.
Ay kipurki ta yëën,
maskin unu pay mabtanganu,
sanayaw rang manalunga ang kuntintu tung isipu.
12 Kung magkulangënaw ra nganing tung mga kaministiranu,
maskëaw rang manalunga tung masadyang kinaisipan.
Kung may bastanti man,
maskëaw ra kang maëklanu tung katamtaman ilëm yang isipu.
Maskin unu pay mabtanganu,
maskin nag̓abialaw,
maskin nag̓asuw̓ukaw,
maskin may bastanti,
maskin magkulangënaw,
maskëaw rang manalunga ang kuntintu tung isipu.
13 Maskin unu pay mapanawanu kayananung talungaën tung matinlung kinaisipan natëtëngëd ilëm tung ni Jesu-Cristong pagpaktël tung yëën.
14 Ug̓aring maskin bëlag̓an ka man bëgbëg yang kuluu tung mga kaministiranu,
piru durung pisan agkatinlu yang pagpaawat ming nagpakiunung tung yëën tung mga kaliwag̓anu ang yuu ra paëklay mi ta taw̓ang.
15 Ta yamung tag̓a Filipos,
nag̓askëan mi ra ka ang impisa pa atiing primirung pagparakaw̓utunu yang Matinlung Balita asan tung numyu ang asta nagliitaw ra ilëm asan tung sinakëpan yang Macedonia,
tung tanan ang mga tumatalig,
yamu ilëm ang sam pundaan ay nagpaëkël-ëkël ta mga taw̓ang tung yëën.
16 Maskin atiing duunaw pa rin tung siudad ang Tesalonica,
maduaw rang pinaëklan mi ta taw̓ang para tung mga kaministiranu.
17 Nag̓asambitu ilëm tia bëlag̓an ang mag̓aning ang may nag̓aintrisung pirmiaw ra ilëm ang taw̓angan mi,
kung indi,
yang pag̓asikaru ilëm ang mas pang dumakul yang iblës yang Dios tung numyu tung uri natëtëngëd tung pagtaraw̓angën ming atia tung yëën yadwa pa ang mas pang magwayang dang magwayang yang pag̓irintindiën mi tung kalëlyag̓an na.
18 Kung natëtëngëd tung mga kaministiranu,
anda rang pisan ay kakulanganu simanyan ay natëtëngëd yang ipinaëkël ming naa tung ni Epaprodito,
bastanti ra,
subra pa ngani.
Yang kaalimbawaan yang taw̓ang ming naa tung yëën,
maning pa tung sasang ipinirisintar mi tung Dios ang durug amut ang ya ra kay dinawat na natëtëngëd nag̓auyunan nang pisan.
19 Dispuis pa,
yang Dios ang naang pagpaturuw̓ulunanu,
inding pisan maluw̓us-luw̓usan ta itaw̓ang na tung yatën,
maskin unu pay kaministiran ta.
Purisu nag̓askëanung yay mag̓asikasu tung tanan ang mga kaministiran mi ang anday kulang natëtëngëd ilëm tung pagpakugmatay ni Jesu-Cristo para tung yatën ang asan da ag̓ipatiëlay na yang pag̓arasikasuën na tung yatën.
20 Kapurisu yang Dios ang nagyari rang Ama ta,
ya ray dayawën tang asta tung sampang anday katapus-tapusan.
Talagang magkabag̓ay ang pisan ang yay buatën ta.
Yang Pagtapusan Yang Sulat (4:21-23)
21 Pagpakikumustaaw ra tung tanan ang mga kaputulan ta asan ang binuat da ka yang Dios ang mga tauan na ëkël tung pagtalig nira tung ni Jesu-Cristo.
Pati yang mga putul tang mga ugpuu tani ang kasiraanaming pagpaturuw̓ulun tung Dios,
pamagpakikumusta ka tung numyu asan.
22 Asta yang kadaklan ang mga tauan yang Dios tani tung Roma,
pamagpakikumusta ka tung numyu asan.
Kapin pa yang mga putul tang naang pamanirbian tung palasiu ni Adi Cesar ya ëngëd ay pamagpakikumusta ta duru tung numyu asan.
23 Buinu,
yang nag̓ipag̓ampuu para tung numyu ang mas pang maispirinsiaan mi yang kanëëman ni Ginuu tang Jesu-Cristong pagpadag̓ën-dag̓ën tung numyu.
Ya ra ilëm tia ay maaningu tung numyu,
Pablo