Yang Pagpaaman Ni Pablo Tung Nira Natëtëngëd Tung Mga Taung Pamagtag̓am Ta Patalang Tung Nira (3:1-3)
3
Simanyan mga putulu,
sigun tung mga bag̓ay ang nag̓aëpëd ang gustuu pang sambitën tung numyu,
tukaw tung tanan,
magpakasadyaamung pirmi natëtëngëd tung kaampiran ming atiang baklu tung ni Ginuu tang Jesu-Cristo.
Kung tung bag̓ay,
yang gustuung sambitën numaan,
sinambitu ra kang lag̓i tung numyu tan taa pa.
Piru bëlag̓an ka mabëdlay tung yëën ang ulitënu si ang basi pa ra ilëm may mataw̓ang na tung numyung indiamu mapatalang ta duma.
2 Kuidaw!
May mga masigkanasyunung mga Judio asan ang dapat amlig̓an mi ta mupia.
Kipurki maning pa tung mga kirung durug kadilikadung palëngtana.
Ay pamagtulduk tung maning tung numyung tag̓a duma-rumang nasyun ang bakluamu ra unu nga risibiay yang Dios ang ultimung mga tauan na,
dapatamu unung magpabuat ta tanda tung mga tinanguni mi ang para ilaladuamu ra unu ang katulad ka tung nirang mga Judio.
Durug liwag yang pakaw̓utun na tung kumpurming tinu pay manangëd ay kipurki asan da nga rangga yang pagtaralig̓ën na tung ni Ginuung Jesu-Cristo ang bug̓us pa rin.
Yang pag̓urubraën nirang atia durung pisan agkalaway tung pagtërëlëngën yang Dios.
Ay katimbang nang pamagpanluka ra ilëm tanira tung mga taung nag̓akumbinyu nira.
3 Yang pagpabëtang nira tung mga sadili nira,
tanira unu yay ultimung mga tauan yang Dios ay natëtëngëd binuatan da ta tanda yang mga tinanguni nira.
Piru ta yatën ang mga tumatalig tung ni Jesu-Cristo,
itay matuud ang mga tauan yang Dios natëtëngëd tung Espiritu Santong pagtinir da tung yatën ang itag paktëlay nang para mapagtuuita ta ustu tung Dios.
Sulaminting nag̓apanalig̓an tang nag̓ipagpabantug,
ultimu ra ilëm ti Jesu-Cristo.
Andang pisan ay dumang panalig̓an ta,
mag̓ing sasang ubraën tung mga tinanguni ta,
mag̓ing sasang ubraën ta man tung sadiling puirsa ta ang para asanita ra rin nga risibiay yang Dios.
4 Kung tung bag̓ay,
ta yëën,
puidi ka rin ang yay panalig̓anu yang mga bag̓ay ang mga maning tia.
Ay kipurki kung yang duma may nag̓apanalig̓an nira tung mga pagturumanën nira yang mga katuw̓ulan yang Dios ubin tung pagkabëtang nira mismu,
yuu mas pa rin.
5 Sasa ra duun tung tandang binuat tung tinanguniu atiing yawalung kaldaw yang iparanganaën tung yëën.
Sasa ra ka duun tung nasyun ang natauanu ang yuu talagang sasang Israel.
Kung natëtëngëd tung pinanliit-liitanu ëngëd,
yuu sasang kanubli ni Benjaminb.
Yang kinaug̓alian ang napuawanu ultimung Hebreong pulutiku ig yang bitalang natauanu Hinebreo ka.
Kung natëtëngëd tung pagturumanënu yang mga katuw̓ulan,
sulipëtaung pisan natëtëngëd yuu kinasakpanaw yang partidu yang mga Pariseo ang yay pinakasulipët tung pagturumanën yang tanan ang mga katuw̓ulan.
6 Kung natëtëngëd tung kadërërëpën,
duruaung pisan agkadërëp ang nagkërëng tung pinanubli yamën ang atia.
Nagpamarasaw pa nganing tung mga taung pamagtalig da tung ni Jesu-Cristo ay tung pag̓intindiu ya rag diaduay nira yang dating natauan yamën ang atii.
Kung natëtëngëd tung pagkamatandësu tung pagturumanënu yang mga urdinansang atii,
andang pisan ay mapitikan tung yëën ang maning may nalampasanu.
Yang Dating Pinanalig̓an Na Nag̓ipabtang Nang Anday Kuinta Natëtëngëd Mas Maal Yang Pagkinapulitay Nira Ni Jesu-Cristo (3:7-11)
7 Piru yang tanan ang mga maning tiang kanisipung tukaw ang yay mataw̓ang tung yëën,
luw̓us dang ipinabtangung anday kuinta na natëtëngëd gustuu rang magpakigkapulit tung ni Jesu-Cristo.
8-9 Bëlag ilëm nuntukaw yang pagpabëtangung anday kuinta yang mga bag̓ay ang atia,
kung indi,
ang asta ra ilëm simanyan,
maskin unu pa man ang bag̓ayay ang midyu pag̓atëlëngan ta duma may ruma ang maayën ang panalig̓an,
luw̓us dang ag̓ipabtangung anday kuinta na natëtëngëd landaw rang pisan yang kamamaalën yang pagkinapulitay yamën ang naa ni Jesu-Cristo ang yay sadiling Ginuuu.
Arangan da ilëm tung anya pinaw̓ayaanu ra ilëm ta paplëk yang tanan ang atiang minaalu ra rin.
Ya ra ilëm ag̓ipabtangayung basura ug̓ud ti Jesu-Cristo mismu ya ray pakigkapulitanu kag yadwa pa ug̓ud masadiliaw ra anyang pisan.
Indiaw ra pagtalig ang puidiaung risibiën yang Dios natëtëngëd tung sadiling pag̓urubraënung pagtuman yang mga katuw̓ulan na,
kung indi,
bug̓us da yang pagtalig̓u tung ni Jesu-Cristo.
Kipurki yang papanaw yang Dios ang mag̓usgad tung yatën ang saluita rang pisan tung pagtërëlëngën na ay ëkël ilëm tung pagtalig ta tung ni Jesu-Cristo.
10 Yang gustuu mas pang magtinlung magtinlu yang pagkinapulitay yamën ang naa ni Jesu-Cristo ug̓ud masaliranaw anyang pirmi yang puirsa nang nagbungkaras ang yang pag̓irimakluën na tung yëën yay pirming maispirinsiaanu.
Pati yang pag̓aragwantaën na tung mga pinitinsia,
gustuu kang masaliranu ug̓ud kayananu kang agwantaën yang mga pinitinsia basta magtumanaw ilëm yang kalëlyag̓an yang Dios ang katulad ka tung anyang nag̓agwanta ka tung mga pinitinsia tung pagtuman na yang kalëlyag̓an yang Dios.
Gustuu kang bilug yang isipu ang kung kaministiran,
papatayanu tanya ang katulad ka tung anyang nagpakugmatay para tung yëën.
11 Ay kipurki may nag̓ipagpakisëw̓atu tung anya ang maskin mapatayaw,
pabungkarasënaw ra ka ëngëd anyang paliitën tung kamatayën.
May Sasang Linyang Nag̓ipausuy Na Tung Nira Natëtëngëd Tung Pagpaatu Nira Tung Ni Jesu-Cristo (3:12-16)
12 Indiaw ka pag̓aning ang nag̓atuaw rang pisan tung ni Jesu-Cristo ang maning timlataw ra tung tanan ang mga pag̓urubraënu,
kung indi,
ya pay pag̓asikarung nag̓imurasën natëtëngëd ya ra kang lag̓i ay ipinagpilik na tung yëën.
13-14 Mga putulu,
yang pagpabëtangu tung sadiliu,
talagang indiaw pa nag̓asalapay ang yuu atuaw rang pisan tung anya.
Piru katulad tung sasang maniglaksu tung karira ang anday balyëd-balyëd,
kung indi,
yang tinanguni na pagluw̓ag pa ta laksung pagrumbu duun tung kasapungan yang maglaksuën na ang basi pa ra ilëm mandëëg dang mapakdulan ta primyu,
ya ra kay nag̓apakbunganu.
Ay maskin unu pay nasalapayanu tan taa,
indi ra ilëm ag̓ipabtangu tung isipu,
kung indi,
yang sulaminting nag̓apabilug̓anu ay kung ya pa ag̓aring mas pang mag̓atuaw rang mag̓atu tung ni Jesu-Cristo tung tanan ang mga ubra-ubraw mintras buiaw pa.
Anday dumang luaan na tung uri,
imbitarënaw ra yang Dios ang magpasapën tung anya ang asta tung sampa duun tung langit natëtëngëd ilëm tung pagpakugmatay ni Jesu-Cristo may yang pagbungkaras nang nangërëngan tung yëën.
15 Purisu kumpurming tinu pa tung yatën ang pagtëg̓asan da tung pagtaralig̓ën na,
dapat ang usuyun na yang linyang naang nag̓ipagpasanag̓u.
Piru kung aparti yang pag̓irintindiën mi tung sinambitung atia,
ipasanag da ka ëngëd yang Dios tung numyu.
16 Ug̓aring yang dapat ilëm ang impurtaën tang tanan ang ita pirming magprusigir tung kumpurming unu pay ipinagpasanag da yang Dios tung yatën sasa may sasa.
Nag̓apaprusigir Nang Mamag̓usuy Tung Mulidung Ipinagpaita Na Tung Nira (3:17-21)
17 Mga putulu,
magsarasaanamu ra tung pag̓urusuyun mi tung mulidung ipinagpaitaw ra tung numyu.
Kung tinu pa asan ay pag̓usuy ra tung mulidu yamën yang mga arumanu,
ya ray paniiran ta kadaklan ang pasuaran,
bëlag̓an yang indi ra pag̓usuy.
18 Ag̓aningënamu ra yëën ta maning tia ay duru rang mga taung pamansianing ang tanira unu pagtalig ka tung ni Jesu-Cristo.
Piru tung pagpangabui nira,
bistu ra ang pamagpasuag tung nag̓ipagpakaw̓ut yamën natëtëngëd tung katuyuan ni Jesu-Cristong nagpalansang tung krus ang para ita mapaluasita ra anya tung pagpakasalak ta.
Piru tung pagpangabui nira,
bistu ra ang yang katuyuan ni Jesu-Cristong nagpalansang tung krus ya rag pasuag̓ay nira.
Yang mga taung mga maning tia,
nagkarasambitung tukaw tung numyu ta pira-pira rang bisis ig maskin simanyan nag̓ipanangitu pa nganing ta durung pag̓ulit tung numyu.
19 Ay ya pa ag̓ari,
yang panampëtan nira tung uri ya ra yang kalainan ang anda ëngëd ang pisan ay katapus-tapusan na.
Ay maskin unu pay nag̓iblën nira ya ray nag̓asikad nirang papsawan ang katimbang na yay Dios nira ang pag̓atalungaan nirang pirmi.
Yang mga ubra-ubrang dapat da rin ang ikaëyak nira ya pa kay nag̓ikadëngëg nirang nag̓ipagpabantug.
Anday dumang nag̓apagamënan ta mga isip nira,
kung indi,
ya ka ilëm yang pangkaliw̓utan.
20 Imbis mag̓usuyamu tung nira,
indiamu ra ëngëd.
Kung indi,
yang mulidu yamën yay usuyun mi.
Ay ya pa ag̓ari,
yang ultimung baw̓anwaan ta bëlag̓an yang kaliw̓utan ang naa,
kung indi,
ya ra yang langit.
Duru nganing ang pagpakbat ta tung Manigpanapnay tung yatën ang duun ka man tung langit manliit.
Anday duma,
kung indi ya ra mismu ti Ginuu tang Jesu-Cristo.
21 Ay kung maglëkat da nganing tanya,
ya ray mangimaklu tung mga tinanguni tang naang suitu pa ta kamatayën.
Ay saliranita ra anya yang katimlat yang tinanguni nang durug kasusulaw ug̓ud asanita ra mag̓atung pisan tung anya.
Ya ray masarangan na natëtëngëd tung puirsa na ang basin unu pang bag̓ayay luw̓us ang kayanan nang gaëman.