Yang Nag̓ikasadya Ni Pablo Tung Nira (2:1-4)
2
Tëëd mi tiag katinlu yang nag̓aispirinsiaan mi natëtëngëd tung pagrarampilan mi ni Jesu-Cristo.
Nag̓apaktël na yang mga isip mi.
Yang gëgma na tung numyu ya ray paglinga-lingaan yang mga isip mi.
Nag̓ataw̓anganamu ra ka yang Espiritu Santo ig nag̓aildawanamu ra ka ta maayën ni Ginuu ta.
2 Kumus parariuamung pagpakasadya tung mga maning tia,
pasadyaën mi rang pisan yang isipu ëkël tung pag̓uruyunan ming magpurutul may tung paggërëgmaan mi may tung pagbërëgkës-bëgkësan mi ang sasay kërësën mi.
3 Yang gustuung ianing,
mag̓amlig̓amu ta mupia ang andang pisan ay buatën mi ang para mapagpalandawamu ubin mapagpabug̓alamu.
Kung indi,
magpararanëkanamu ang yang pagpabëtang mi tung mga kaarumanan mi ang tanira mas pang magkabag̓ay ang mapadëngëg̓an kay tung numyu.
4 Sasa may sasa tung numyu,
bëlag̓an da ilëm yang mga sadili mi ay intindiën mi,
kung indi,
dëmdëmën mi ra ka yang mga aruman mi.
Kaministiran Ang Mamagpakbung Tanira Tung Ni Jesu-Cristo (2:5-11)
5 Yang pagpabëtang mi tung mga sadili mi asan da ipaatuay mi tung pagpabëtang ni Jesu-Cristo tung sadili na.
6-8 Tanya maskin sasay pagkadios nira yang Dios,
piru indi na ra sinikad ang yang kadëngëg̓an yang pagkapantay na tung Dios yay dapat ang awiran na,
kung indi,
pinalpasan na ra ilëm ang nag̓ingtaung bilug ig yang pagkabëtang yang sasang turuw̓ulun ka ilëm,
ya ray pinakbungan na.
Atiing pangingtau na pirmi ra ilëm ang nagparanëk ang nagpalalang tung pag̓aningën nang Ama na maskin kamatayën pa yang dangatën na.
Ang pagkatapus tung pagpalalang nang atia tung anya,
ya ray nagakdan na ang tanya duun da ilëm ipalansangay tung sasang krus ang midyu ra ilëm tung sasang kriminal ang pakaëyakan tung publiku.
9 Yang dinangat na ipinalandaw ra yang Dios tung sasang pusisiun ang abwat tung tanan.
Bilang pinakdulan na ta kadëngëg̓an ang indi ëngëd mapasiring-siringan.
10 Ya ray binuat na tung anya ug̓ud tung uri ta kaldaw,
yang tanan ang mga tau,
malëlyag kag indi,
luw̓us dang mamagluud tung katalungaan na.
Pati yang tanan ang mga angil asta yang tanan ang mga taung indi nag̓aita,
malëlyag kag indi,
ya ka,
mamagluud da ka ëngëd ang tanan tung katalungaan na,
mag̓ing mga langitnanën man,
mag̓ing mga tanëkanën man,
mag̓ing mga dalëmanën man.
11 Luw̓us dang mamag̓ilala tung ni Jesu-Cristong mamagdiklara ang tanya ka man yang pangultimung Dios ang asan da nga padëngëg̓ay nira yang Dios ang yay pag̓aningën ni Jesu-Cristong Ama na ang yag paglinukutay kang lag̓i tanira tung pagkadios.
Nag̓apaprusigir Na Tanira Ang Mamagtuman Yang Magkabag̓ay Ang Buatën Yang Sasang Tinapnay Rang Matuud Yang Dios (2:12-16)
12 Kapurisu mga putulung nag̓amaalu,
kumus maning tia yang pagparanëk ni Jesu-Cristo ig kumus pagtumanamu ra kang lag̓i yang kalëlyag̓an yang Dios atiing asanaw pa tung numyu,
kapin da ëngëd numanyan ang andanaw ra asan,
sasa may sasa tung numyu mas pang magpadërëpamung magtuman yang kumpurming magkabag̓ay ang buatën yang mga taung tinapnay ra yang Dios.
Dispuis yang pagprusigir ming atia nunut da ka ta pangaman mi ang muya mapaw̓aya-w̓ayaan mi.
13 Kayanan ming usuyun tia gatëd yang Dios mismu yay magpaëyang ta kalëlyag ming mag̓usuy tung kumpurming unu pay nag̓auyunan na pati yang këtël ming mag̓usuy,
ya ka.
14-15 Purisu maskin unu pang bag̓ayay,
indi mi ëklan tung pagburutung-butungun,
indi mi ka ëklan tung pagbaralalaan,
ug̓ud anday mapadatëlan ta dumang magsaway tung numyu,
kung indi,
asan tung mga ug̓ali ming limpiu ngaintindiay nira ang yamu talagang mga anaamu ra ka man yang Dios ang matuud.
Maskin makiklëp yang mga ubra-ubra yang mga masigkatau ming kadaklan natëtëngëd ka man tung pag̓irisipën nirang baliskad,
kaministiran ta yamu magpakbungamu tung mga dumakël ang sigi-sigi yang pagsiringgat-singgatan nira tung makiklëp.
16 Yang pagparakbungun ming atia tung mga dumakël,
panuntan mi ra ka ta pagparasanag̓ën mi tung nira yang bitala yang Dios kung ya pa ag̓aring maëyangan da ka tanira ta ipagpangabui nirang baklu.
Dispuis kung usuyun mi yang mga bag̓ay ang atiang nag̓ipag̓aningu tung numyu,
ya ray ikasadyang pisan yang isipu tung uras ang ipanginsapu ni Jesu-Cristo tung yëën yang pag̓ërëkëlënu tung katëngdananung naa ang ya ra ka man ay ipinagpiar na tung yëën.
Kipurki asan da tung numyu nga pruibaay ang yang tanan ang pinag̓imurasung pinakabëdlayan asan talagang may pinakaw̓ut na ka man ang matinlu.
Natëtëngëd Tung Pag̓irintrigaën Yang Mga Sadili Nira Ni Pablo Tung Dios (2:17-18)
17 Yang tukaw kung may nag̓idasag ang para iintriga ra tung Dios,
ang kaisan may irinëmën ang nag̓ibukbuk tung nag̓idasag ang para duun da nga kumplituay yang pagdarasag̓ëna.
Kung isip-isipënu,
midyu maning ka tia yang pananglitan ta.
Ta yamu,
yang kaalimbawaan mi,
maning pa tung sasang nag̓idasag natëtëngëd yang mga sadili mi ya ray nag̓iintriga mi tung Dios ang para magtumanamu yang mga kalëlyag̓an na.
Ta yëën tanya,
kung alimbawa ipaimatayaw pa ka ëngëd yang may mga katëngdanan tani tung Roma,
yang dug̓uu manulad da tung irinëmën ang atiang nag̓ibukbuk tung nag̓idasag.
Purisu kung mainabu ra ang ya pay buatën nira tung yëën,
ya ray ikasadya yang isipu natëtëngëd asan da nga kumplituayu yang pag̓irintrigaënu yang sadiliu tung Dios.
Pati yang pag̓irintrigaën mi yang mga sadili ming bug̓us ka tung anya ya ra kay nag̓ikasadya yang isipu.
18 Purisu pati yamu,
ikasadya mi ka yang pag̓irintrigaën mi yang mga sadili ming bug̓us tung Dios asta yang pag̓irintrigaënu,
ya ka.
Nag̓asambit Na Yang Planu Na Ang Ti Timoteo Ipaangay Na Duun Tung Nira (2:19-24)
19 Dakulu yang sarig̓u tung ni Ginuung Jesus ang indi ra ilëm buay tugtanaw ra anya ang ti Timoteo ipaangayu ra asan tung numyu ug̓ud bëlag̓an da ilëm yang mga isip mi ay këmtël da natëtëngëd tung mabalitaan mi natëtëngëd tung yëën,
kung indi,
pati yang isipu,
këmtël da ka tung mabalitaanu natëtëngëd tung numyu asan.
20 Tanya nag̓aisipanung ipaangayu asan ay anday dumang arumanu tani ang magkapariu tung anya ang talagang tëdëk tung isip na yang gustu nang magpadag̓ën-dag̓ën tung numyu ang pariu ka tung yëën.
21 Ayw̓a indi maaningu ay kipurki yang kadaklan ang naisipanu ra ka rin ang ipaangayu asan,
bëlag̓an yang kalëlyag̓an ni Jesu-Cristo ay pag̓asikad nirang tumanën,
kung indi,
ya ra ilëm yang kalëlyag̓an nirang sadili.
22 Piru naang ti Timoteong naa,
kunisidu mi ra ka yang ug̓ali na ang durug kapiadu yang panirbian na tung ni Ginuu ta.
Katulad tung sasang ana ang pagpakiunung tung ni tatay na tung mga pag̓urubraën na,
ya ra kay kaalimbawaan yang pagpakiunung na tung yëën tung pagparakaw̓utunu yang Matinlung Balita.
23 Purisu dakulu yang sarig̓u ang tanya ray magkabag̓ay ang ipaangayu asan tung numyu kung masiguruu ra kung unu pay mainabu tani tung yëën.
24 Yadwa pa may kumpiansaw ka tung ni Ginuu ta ang pati yuu,
indi ra ilëm buay,
tugtanaw ra ka anyang mangay asan tung numyu.
Nag̓asambit Na Yang Planu Na Ang Ti Epaprodito Ipabalik Na Rang Lag̓i Duun Tung Nira (2:25-30)
25 Kung natëtëngëd tung ni Epaprodito,
yang nabtang tung isipu ang talagang kaministiran ang ipabaliku rang lag̓i numanyan asan tung numyu.
Tanya sasang ungkuyung kasiraanami ra kang pagparakaw̓utun yang Matinlung Balita.
Yang kaalimbawaan yamën pariu tung mga sundalung pagkanunutan ang pag̓agwanta tung mga pinitinsia.
Ya ra nganing ay ipinangay mi tani tung yëën ug̓ud mapagpadag̓ën-dag̓ën tung mga kaministiranu.
26 Dapat ang ipabaliku ra asan tung numyu ay duru rang paglalangkag̓ën na tung numyu.
Yadwa pa,
durug kaaburidu yang isip na ang muya nag̓aliw̓ëg̓anamu ra ta pag̓isip natëtëngëd tung balitang nagngël mi ang tanya sinampi ra ta laru na tani.
27 Matuud ang matigbak ka man yang larung nagsampi tung anya,
ay puntu ilëm ang nadayunan.
Piru inildawan da ka ëngëd yang Ampuan ta.
Bëlag̓an ilëm tanyay inildawan na,
kung indi,
pati yuu ya ka.
Kipurki kung nadayunan,
mas pang nadulangan da rin yang kapupungawën yang isipu.
28 Purisu numanyan tung makali ipabaliku rang lag̓i asan ug̓ud kung mag̓iritaamu si nganing ang uman,
magkasadya ra yang isip mi,
ig pati yuu tani malinaynayan da ka yang isipu.
29 Purisu kung kumaw̓ut da nganing asan,
saptën mi ta mupia tung masadyang kinaisipan ang katulad ka tung dapat ang buatën tang magpurutul tung ni Ginuu ta.
Yadwa pa,
galangën mi ka ta mupia pati yang kumpurming magkapariu ta pasais tung anya.
30 Ay kipurki puntu ilëm napatay tung pagprusigir na tung itinuw̓ul ni Jesu-Cristo tung anya.
Ay ipinirinda na yang linawa na tung kalainan basta mangërëngan ilëm tung numyung magpakigkaw̓ut tung yëën yang mga taw̓ang mi.