Yang Isinulat Ni Pablo Tung Mga Tag̓a FILIPOS
Yang Intrada Yang Sulat (1:1-2)
1
Yang nagpasulat yang sulat ang atia,
ya ra yuung ti Pablo duruaami ra ka ni Timoteo ang yami mga turuw̓ulun ka man ni Jesu-Cristo.
Yang sulat ang atia ipinaëkël da yamën tung numyung tanan asan tung Filipos ang kumpurming binuat da yang Dios ang mga tauan nang sadili ëkël tung kaampiran ming naang baklu tung ni Jesu-Cristo,
kasiraanamu ra ka yang mga manigpadag̓ën-dag̓ën asta mga manigtaw̓ang.
2 Yang nag̓ipag̓ampu yamën tung Ama tang Dios durua ni Ginuu tang Jesu-Cristo ang mas pang maispirinsiaan mi yang kanëëman nirang pagpadag̓ën-dag̓ën tung numyu ig mas pang ikasadya mi yang kaampiran mi tung nirang naang baklu.
Nag̓apasalamatan Ni Pablo Tung Dios Yang Pagtaraw̓angën Nira Tung Anya Tung Pagparakaw̓utun Na (1:3-8)
3 Kada madëmdëmanamu yëën,
durug dakul yang pagpasalamatu tung Ampuan tang Dios natëtëngëd tung numyung tanan asan.
4-5 Ay kada nag̓ipag̓ampuamu yëën,
ag̓ampayanaw ra ta kasadyaanung duru ay nag̓adëmdëmanu yang pagtaraw̓angën mi tung yëën tung pagparakaw̓utunu yang Matinlung Balita disti pa atiing primirung panangëd mi ang asta ra ilëm simanyan.
6 Purisu nag̓asiguruu ang kumus naimpisaan da yang Dios yang pag̓irimakluën na tung numyung durug tinlu,
ya ra kay dayunun na ang para mas pang mag̓atuamu rang mag̓atu tung nag̓auyunan na ang asta kaw̓utun da ilëm yang uras ang ipaglëkat ni Jesu-Cristo.
7 Talagang magkatamang pisan tiang pagpamalaru tung numyung tanan asan ay maskin yuug këkëdkëd ta kadina tani,
nag̓askëanu rang talagang nag̓adëmdëmaw numyu ta matinlu ig pirmi ka tung mga isip mi yang ubrang naang nag̓aprusigiranu tani ang yuu pagpamarikaw tung mga katadlëngan ang nag̓ipagbatuk yang mga tau tani tung Matinlung Balitang naang nag̓atag̓amanung nag̓ipagpaingmatuud tung nira.
Bistu ka tung yëën ang nag̓aispirinsiaan mi ra kang tanan yang pagpadag̓ën-dag̓ën yang Dios tung numyu ang katulad ka tung nag̓aispirinsiaanu tung anya.
8 Sistigus yang Dios tung pagkamatuud ang yuu duru rang paglalangkag̓ënu tung numyung tanan asan,
ay nag̓apaëyanganaw ni Jesu-Cristo ta ipaggëgmaw tung numyu ang magkapariu ka tung sadiling gëgma na tung numyu.
Yang Nag̓ipag̓ampu Ni Pablo Para Tung Nira (1:9-11)
9 Ya taa yang nag̓ipag̓ampuu tung Dios ang paintindiënamu ra anya ta mupia ug̓ud mamarësmësan mi ëngëd kung ya pa ag̓aring mas pang magkabag̓ay yang paggërëgmaan ming magpurutul maskin unu pay mainabu.
10 Maning tia yang nag̓ipag̓ampuu ug̓ud maskëamu rang magtimbang-timbang ta ustu tung mga isip mi kung ay pa ëngëd ay lusung dapat ang buatën mi ug̓ud kung kaw̓utun da nganing yang uras ang ipanginsapu ni Jesu-Cristo tung numyu,
limpiuamu ra tung pagtërëlëngën na ig anday mabasul na tung numyu.
11 Yang sam bilug pang pag̓asikarung pag̓ampu ta maning tia ay ug̓ud yang tanan ang mga ubra-ubra mi pulus tung magkatama ëkël tung pagpaktël ni Jesu-Cristo tung numyu ang ya ra ka man ay ikadëngëg yang Dios ta duru.
Maskin Nag̓aliwag̓an Ti Pablo, Durung Nag̓ikasadya Ëngëd Yang Isip Na (1:12-14)
12 Buinu,
mga putulu tung ni Ginuu ta,
gustuung maintindian mi ang yang mga kaliwag̓an ang naang nag̓apasaranu tani bëlag̓an ang mag̓aning ang asan da nga sagangay yang Matinlung Balita,
kung indi,
mas pang nagkatinlu yang palaksu na tani.
13 Ay yang dinangat yang pagkaditiniu,
yang tanan ang mga sundalung naang pamagbërëlës ang pamagbantay tung yëën tani pati yang kadaklan ang mga tau tani tung Roma,
luw̓us dang nangaakdëk ang anday dumang nag̓ipagkëdkëd tung yëën,
kung indi,
natëtëngëd ilëm tung pagparakaw̓utunu yang Matinlung Balita natëtëngëd tung ni Jesu-Cristo.
14 Yang sam bilug pang pinakaw̓ut na,
pati yang kadaklan ang mga putul tang mga tumatalig tani mas pang nagbakëd yang pagtaralig̓ën nira tung ni Ginuu ta natëtëngëd naskëan da nira kung unu pag katinlu yang pagtaraw̓angën ni Ginuu ta tung yëën tani tung pagditinian.
Purisu asan da nga dulangay yang balur yang isip nirang magparakaw̓utun yang bitala yang Dios ang andang pisan ay nag̓ëntëran nira.
Basta Nag̓ipagpakaw̓ut Da Tung Mga Tau Yang Natëtëngëd Tung Ni Jesu-Cristo, Ya Ray Nag̓ikasadya Yang Isip Ni Pablo (1:15-18a)
15 Kung tung bag̓ay,
nag̓askëanu ka ang yang duma tung nira pagparakaw̓utun natëtëngëd tung ni Jesu-Cristo gatëd ilëm tung pangimun nira tung yëën ang may gustu nirang magpalandaw.
Piru yang duma,
yang pag̓asikad nira tung pagparakaw̓utun nira ang para magpaita yang pagpakigsasa nira tung yëën.
16 Ay nag̓agëgmaanaw nira ig gustu ka nirang magpaugtun tung yëën ay nag̓askëan da nira ang ipinabtangaw ra nganing yang Dios tani ug̓ud magkërëngaw ta ustu tung Matinlung Balita.
17 Piru yang dumang atiing nag̓aaningu,
bëlag̓an tama yang pag̓asikad nira,
kung indi,
gustu ilëm nirang magtiwakaw tung yëën.
Kanisip nira ang kung duru rang taung magdag̓umukan tung nira,
asanaw ra ka mangimun tung nira ang asta mas pang maliw̓ëg̓an yang isipu mintras naniaw pa tung pagditinian.
18 Piru anda ray bali tia.
Maskin yang duma pagpasëën ilëm ang pagparakaw̓utun,
maskin yang duma tama yang pag̓asikad nira tung pagparakaw̓utun nira,
yang impurtanti asan ang yang balita natëtëngëd tung ni Jesu-Cristo nag̓ipagpakaw̓ut da ka ëngëd tung mga tau tani.
Atia ya ray nag̓ikasadya yang isipu.
Yang Yadwang Nag̓ikasadya Na Ang Asan Da Tung Mga Kaliwag̓an Mag̓atung Mas Pa Tung Nag̓alëlyag̓an Yang Dios Tung Anya (1:18b-26)
Bëlag̓an da ilëm ya tiay nag̓ikasadyaw,
kung indi,
magpakasadyaaw pa ka ëngëd
19 natëtëngëd nag̓askëanu ang yang mga kaliwag̓an ang naang duminangat da tung yëën,
asanaw ra mag̓atung mas pa tung nag̓alëlyag̓an yang Dios tung yëën ëkël tung pag̓arampuën mi may tung pagtaraw̓angën yang Espiritu Santong naang nag̓ipatinir ni Jesu-Cristo tung yëën.
20 Yang nag̓alëlyag̓anu ëngëd ang indiaw ra ka ëngëd magkatinir ta ëyak ang magkërëng ta ustu tung ni Jesu-Cristo,
kung indi,
ang katulad ka tung binuatung nagpaluyut,
kapin da ëngëd numanyan ang maktël ëngëd yang isipung magpadëngëg tung anya tung tanan ang ulag̓u ang anday ëntëranu,
maskin pabuiënaw pa maskin ipaimatayaw pa.
21 Ay unu pay pulut nang nag̓abuiaw,
kung indi,
ang para ikadëngëg̓aw ni Jesu-Cristo.
Kung imatayënaw man,
mas maayën tung yëën ay duunaw rang pisan tung anya magpasapën.
22 Piru kung yang planu yang Ampuan ta para tung yëën ang yuu pabuiënaw pa anya taa tung kaliw̓utan ang naa,
intunsis mapagpadayunaw ra tung panirbianung naa tung ni Jesu-Cristo ang dakulu yang kantidad na.
Purisu indi ilëm maskëanu kung ay pay ipalandawu tung pabuiënaw may tung papatayaw.
23 Bilang yay paglingtan yang isipu kung ay pay ipalandawu tung duruang atia.
Kipurki durung kalëlyag̓ung pablag̓aw rang magpasapën tung ni Jesu-Cristo ay andang pisan ay magdëëg tii.
24 Ug̓aring kung isip-isipënu,
midyu mas impurtanti ang pabutwanaw ra kanay taa tung kaliw̓utan ang naa arangan da ilëm tung numyu.
25 Intunsis kumus yay magkatama tung isipu ang mas impurtanti ka man tia,
purisu nag̓akarkuluu ilëm ang puiding kalëlyag̓an yang Dios ang yuu pabutwanaw ra ka man taa tung kaliw̓utan ang naa ang para mapagpakiugpuaw si ka tung numyu.
Ay tung maning tia,
mapadag̓ën-dag̓ënanamu yëën natëtëngëd tung pagtaralig̓ën mi tung ni Ginuung Jesus ang para mas pang këmëët ang asan da ka magkasadya yang mga isip mi.
26 Purisu kung mag̓urugpuita si,
duun da magdulang ang mas pa yang kasadyaan ming magdayaw tung ni Jesu-Cristo natëtëngëd tung yëën ang pinabalikaw ra anya asan tung numyu.
Yang Mga Ug̓ali Nira Dapat Ang Pirming Mag̓atu Tung Nag̓adapatan Yang Matinlung Balita (1:27-30)
27 Landaw tung tanan ang yang mga ug̓ali mi pirming magkabag̓ay tung nag̓adapatan yang Matinlung Balita natëtëngëd tung ni Jesu-Cristo.
Ya ray dapat ang sikarën mi ug̓ud maskin mabalikaw si tung numyung mag̓irita-ita si ka,
maskin andanaw asan ang yuu ra ilëm nga balitaay,
maskëanu ka ëngëd ang ta yamu pagbërëgkës-bëgkësanamu ta mupia ang maskin may pamagkuntra tung numyu,
indiamu ëngëd pagpaluw̓ay tung pagparakaw̓utun mi yang Balitang naang Matinlu ang yay nag̓apanangëd ta.
28 Yadwa pa ang indiamu kang pisan pagpatalaw tung pamagpakigkuntrang atia tung numyu.
Ay kung indiamu manalaw tung nira,
asan da tanira nga pakdulay mi ta sasang pruiba ang yang panalungaan nira kalainan da ig ta yamu kalibrian da yang panampëtan mi.
Anday dumang may patakaran tia,
kung indi,
yang Ampuan ta mismu.
29 Ay kipurki bëlag̓an da ilëm ang pinakdulanamu ra anya ta pabur ang pinaëyanganamu ra anya ta ipagtalig mi tung ni Jesu-Cristo,
kung indi,
may sasa kang pabur bali ang ilinug̓ut na ka tung numyu ang yamu mapasaran ta pinitinsia arangan da ilëm tung anyang pag̓akëgngan mia.
30 Purisu ya ray natëngëran na ang pati yamu asan nag̓apasaramu ka ta pinitinsia ang katulad ka tung naita mi tung yëën atiing asanaw pa tung numyu pati numaan ang pariu ka tung nag̓abalitaan mi.