Yang Isinulat Ni Pablo Tung Mga Tag̓a EFESO
Patkaw Ang Pasanag Tung Kumpurming Magbasa
Yang sulat ang naa ipinasulat ni Pablong ipinaëkël tung sam pundaan yang mga tumatalig duun tung siudad ang Efeso. Atiing pagpasulat na, agditiniyën pa duun tung siudad yang Roma natëtëngëd tung pagparakaw̓utun na yang Matinlung Balita natëtëngëd tung kalibrian ang pinagtukud ni Ginuung Jesu-Cristo.
Tung pinag̓impisaan yang sulat na, ipinagpasanag na tung nira natëtëngëd tung pinagplanu kang lag̓i yang Dios ang para ipatayu-tayu na rang pisan ang papagturunuën si yang tanan ang bag̓ay ang inimu na tung kaliw̓utan ang naa pati tung kalangitan ang ti Jesu-Cristo yay papagmanguluën na tung nirang tanan (1:10). Purisu pinaktël ni Pablo yang mga isip yang mga tumatalig ang magsarasaan da ta kinaisipan alang-alang da ilëm tung pagkarapulitan nira ni Jesu-Cristo ug̓ud yang mga ubra-ubra nira magkatunu tung pinagplanu yang Dios para tung nira.
May mga pananglit ang ginamit nang pagbadbad tung mga isip nira kung unu pay nag̓adapatan yang pagsarasaan nirang mga tumatalig. Yang tanan ang mga tumatalig tung bilug ang kaliw̓utan ipinananglit na tung mga parti-parti yang sa nga tinangunian ang ti Jesu-Cristo yay maning pa tung kulu yang tinanguning atia (4:1-16). Ipinananglit na ka tanira tung sasang balay ang dakulu ang ti Jesu-Cristo yay maning pa tung pinakaimpurtanting batung pagpabilug tung intirung balay (2:19-22). Pati yang duruang magkasawa ipinananglit na ka tung ni Jesu-Cristo may yang tanan ang pamagtalig tung anya (5:21-33).
May mapangayapan ta tung sulat ang naa natëtëngëd tung matinlung pagkarasawaën yang magkarasawa may tung matinlung rilasyun yang maggirinikanan pati yang mamag̓ag̓alën (5:21–6:9).
Tung pinagtapusan ni Pablo ta bitala, may durung tinlung mapangayapan ta natëtëngëd tung nag̓ipasangkap yang Dios tung yatën ang mga tumatalig ang ipagmanada tang manguntiël tung mga idya ni Satanas ang pirming pagtag̓am ta daya tung yatën (6:10-20).
Yang Kamtangan Yang Sulat Ang Pinagbulus-bulus:
1:1-2 Yang Intrada Yang Sulat
1:3-14 Yang Pagdarayawën Ni Pablo Natëtëngëd Tung Pagpakaayën Yang Dios Tung Nirang Mga Tumatalig Ëkël Tung Pinagtalus Ni Jesu-Cristo
1:15-23 Yang Nag̓ipag̓ampu Ni Pablo Para Tung Nira
2:1-10 Yang Nag̓apatiëlan Yang Dios Ang Magtapnay Tung Mga Tau Suluminti Ilëm Yang Kanëëman Nang Ibinuluntad Na
2:11-22 Pinapagsarasa Ra Yang Dios Yang Mga Judio May Yang Bëlag̓an Mga Judio Ëkël Tung Ni Jesu-Cristong Parariung Tinapnay Na
3:1-13 Natëtëngëd Tung Katuyuan Yang Dios Ang Nagpiar Tung Ni Pablong Magparakaw̓utun Tung Bëlag̓an Mga Judio
3:14-21 Yang Nag̓ipag̓ampu Si Ni Pablo Para Tung Nira
4:1-16 Natëtëngëd Tung Pagsarasaan Nira Ang Ya Ag̓asikasuay Nira Ta Maayën
4:17–5:2 Yang Dating Pag̓urubraën Nira Dapat Ang Mapaklian Ta Baklu Ang Uyun Tung Kalëlyag̓an Yang Dios
5:3-21 Yang Mga Pag̓urubraën Ang Magkabag̓ay Tung Mga Tumatalig
5:22-33 Natëtëngëd Tung Palaksu Yang Matinlung Pagkarasawaën Ang Nag̓auyunan Yang Dios
6:1-4 Natëtëngëd Tung Matitinlung Ug̓aling Dapat Ang Usuyun Yang Maggirinikanan
6:5-9 Natëtëngëd Tung Matitinlung Ug̓aling Dapat Ang Usuyun Yang Mamag̓arag̓alën
6:10-20 Nag̓ipasanag Na Kung Ya Pa Ag̓aring Mapanguntiëlan Nirang Batukan Na Satanas
6:21-22 Natëtëngëd Tung Ni Tikiko Ang Nag̓ipaangay Na Duun Tung Nira
6:23-24 Yang Pagtapusan Yang Sulat Ang Tanira Si Ay Nag̓ipag̓ampu Na