Kung Tinu Pay May Kalbatan Na, Pakigdamayan Tang Taw̓angan (6:1-6)
6
Mga putulu,
kung alimbawa,
may aruman mi asan ang nainalian da ta tuksung nagpakasalak,
yamu asan ang kumpurming pagpamangulu tung Espiritu Santo,
painunukuan mi ang para maulikan da yang pag̓urusuyun na tung nag̓auyunan yang Dios ang nagkawaldang da.
Yang pagparainunukuën mi tung anya,
ëklan mi tung pagkaamumu mi.
Dispuis sasa may sasa tung numyung magpainunuku tung anya masigbantay ta mupia yang anya-anyang sadili nusias maëklan da ka ta tuksu.
2 Kung tinu pay may kalbatan na,
pakigdamayan ming taw̓angan.
Asan da nga tumanay mi yang sasang katuw̓ulan ang nag̓ipatuman ni Jesu-Cristo tung yatën ang mga tauan naa.
3 Kung tinu pay paglaum ang tanya mas abwat kay tung mga aruman na,
ang pagkatapus tung pagtërëlëngën yang Dios,
bëlag̓an abwat,
asan da ka ilëm nga lukuay na yang sadili na.
4 Maayën pa sasa may sasa tung yatën,
masigtimbang-timbang yang anya-anyang ubra-ubra kung usuy tung pitik u kung bëlag.
Atia,
kung usuy ka man,
ya ra ka ilëm ay ikasadya na tung isip na.
Indi na ra ilëm ikumpalar tung pag̓urubraën yang duma.
5 Dapat ang yay buatën ta ay natëtëngëd sasa may sasa tung yatën,
anya-anyang panuw̓alan sinag̓intindiay.
6 Ug̓aring kumpurming tinu pay pagpatulduk tung sasang maayën ang magtulduk natëtëngëd tung kamatuuran,
kung unu pay sarang ang mabuluntad na tung aruman nang atiang pagpapirdi tung uras na,
magkabag̓ay ang pisan ang ya ray buatën na.
Kumpurming Unu Pay Nag̓iluak, Yay Mapatëbasan (6:7-10)
7 Indi mi ilëm lukuën yang mga sadili ming maglaum ang maskin magpaguyuramu tung dating pagkatau ming atiang mapinagpanadili ang muya indiamu ra balikan ta kasalanan.
Yang Dios tanya bëlag̓an ang yay sasang lëlëpës-lëpësën.
Ay kipurki kung tung pagluluakën ipananglitayu,
kumpurming unu pay nag̓iluak yang sasang tau,
atia ra ka mismu ay mapatëbasan na.
8 Ag̓aningënamu ra yëën ta maning tia natëtëngëd,
kung yang maning pa tung nag̓iluak yang sasang tau ya ra yang pagpaguyud na tung dating pagkatau nang mapinagpanadili,
indi maimu ang indi na mapatëbasan yang ikadiadu na ang yang pagkablag na tung Dios dumayun ang asta tung sampa.
Piru kung yang maning pa tung nag̓iluak na ya ra yang pagpamangulu na tung Espiritu Santo,
asan da nga patëbasay nang magmas pa yang katinlu yang kaampiran na tung Dios ang tung uri magsapënan da tanirang asta tung sampa.
9 Dispuis ta yatën ang pagbuat ta matinlu,
indiita ra ilëm magpaluw̓ay.
Ay kipurki kung kumaw̓ut da nganing yang uras ang magkatama tung pag̓intindi yang Dios,
mapatëbasan ta ra ka ëngëd yang pinakabëdlayan ta basta indiita ra ilëm magmataka.
10 Purisu mintras may lugar ta,
magbuatita ta ikaayën yang mga masigkatau ta maskin tinu pa,
kapin da ëngëd yang mga kaarumanan tang mga tumatalig tung ni Jesu-Cristo ang yang kaalimbawaan tang tanan maning pa tung sam pamilyaita ra ilëm.
Yang Ultimung Tuyun Ni Pablo Tung Mga Tumatalig (6:11-16)
11 Atia ra yang yëën ang sadiling panulat.
Tëlëngan mi w̓a yang kadarakulun yang mga litrang isinulatu.
Binuatanu nganing ta maning tia ug̓ud yang magdarasun pang ianingu mas pang bumatikal tung mga isip mi.
12 May mga tau asan ang pangalëlyag ang tanira dayawën ta mga masigka Judio nira natëtëngëd tung patakaran nira.
Yang ipagrëg̓ës nira tung numyung magpabuat ta tanda tung mga tinanguni mi ay ug̓ud indi ra ilëm madëëg-dëëg̓an ang uman yang mga masigkanasyun nira.
Ay kung alimbawa,
mamagparakaw̓utun pa natëtëngëd tung pagpalansang ni Jesu-Cristo tung krus ang yay ultimu ilëm ang nag̓apatiëlan yang Dios ang mag̓usgad tung mga taung salu rang pisan tung pagtërëlëngën na ig andang pisan ay ministir nirang magpabuat ta tanda,
talagang asan da tanira nga dëëg-dëëg̓ay ta mupia.
13 Ag̓aningënung ya ilëm tia ay gustu nirang likayan ay kipurki tanira mismung pamagtag̓am ta rëg̓ës tung numyung pabuatan mi ta tanda yang mga tinanguni mi,
indi nganing pamagsulipët tung tanan ang mga katuw̓ulan.
Piru gustu pa ka ëngëd nirang magpabuatamu ta tanda ay ug̓ud ipabantug̓amu ra ilëm nirang ipagpabug̓al tung mga masigka Judio nirang atia ang yamu nakumbinsiramu ra nira.
14 Piru ta yëën gustuung gustu ang anda ëngëd ang pisan ay dumang ipagpabantug̓u,
kung indi,
sulaminti ilëm yang pagpalansang ni Jesu-Cristo tung krus.
Atiing pagbatikal tung isipu kung unu pay linagpakan yang pagpalansang nang atii,
asanaw ra nga plëkay ta ipagmaalu tung sistimang pangkaliw̓utan.
Pati tanirang pamagpaguyud pa tung sistimang atia,
pagkamalamad nira ang nagkamaninganaw ra ta maning tia,
asan da ka tanira nga plëkay ta ipagmaal nira tung yëën.
15 Ultimu ra ilëm tiay ipagpabantug̓u kipurki nag̓askëanu ra ang yang sagyapën yang Dios tung sasang tau,
bëlag̓an ang mag̓aning kung tanya binuatan ta tanda yang tinanguni na u kung anda.
Kung indi,
yang suluminting sagyapën na tung anya kung tanya maning pa tung inimu sing baklu ang asan da ka nga pruibaay tung pagpangabui nang baklu kab.
16 Yadwa pa,
kumpurming tinu pay mag̓usuy tung pitik ang atia yay ildawan yang Dios ang palg̓urun tung kalibrian ang ipalua na tung uri ta kaldaw.
Bilang yang tanan ang pag̓usuy tung pitik ang atia tanira ilëm ay ultimung Israel bilang ultimung mga tauan yang Dios.
Nag̓apaamanan Na Yang Mga Manigtulduk Ang Pamagsag̓usut Tung Mga Tag̓a Galacia (6:17)
17 Mag̓impisa numaan,
kumpurming tinu pay pagpagamu tung yëën,
ya ray paamanënu ang dapat indiaw ra ka gamuën nirang uman.
Ay kipurki siguradung panuw̓alan nira tia tung ni Ginuung Jesus mismu ang yay ag̓alënu.
Bistu ra ang yuu kirëpënaw ka man anya ay katulad ka tung sasang kirëpën ang minarkaan da yang ag̓alën na,
yuu maning pa tung minarkaanaw ra ka anya ay may mga ulat-ulatung pag̓aëkël-ëkëlanu nganing tung tinanguniu ang ya ray nagakdanu tung pagkërërëngënu tung anyac.
Yang Pagtapusan Yang Sulat (6:18)
18 Mga putulung kumpurming matuud ang mga tumatalig asan,
nag̓ipag̓ampuamu ra yëën ang mas pang maispirinsiaan mi yang kanëëman ni Ginuu tang Jesu-Cristong pagpadag̓ën-dag̓ën tung numyu.
Magkamaningan da ka man tia.
Ya ra ilëm tia ay maaningu tung numyu,
Pablo