Nag̓apaaman Na Tanirang Indi Ëngëd Mampauyun Tung Nag̓irëg̓ës Yang Duma Ang Magpabuat Ta Tanda Tung Mga Tinanguni Nira (5:1-12)
5
Ang para indiita ra dapat ang magpasuitu tung mga katuw̓ulan ang ibinutwan ni Moises,
dëmdëmën ta ang ipinalibriita ra ni Jesu-Cristo.
Purisu indiamu ra ëngëd magpauyun tung maling nag̓itulduk yang duma ang dapatamu ra unung pabuatan ta tanda tung mga tinanguni mi.
Indiamu ra ëngëd magpakirëpën sing magpasuitu tung sistimang atia ang magkapariu ka ilëm ta sistima yang dating natauan mi.
2 Kumus yuu sasang taralig̓an ni Jesu-Cristong pagpadag̓ën-dag̓ën tung numyu,
may sasang gustuung ianing tung numyu ang muya yay mabërëngan mi ta maayën.
Kung ilug̓ut mi yang mga tinanguni ming buatan ta tanda,
asanamu ra nga pisanay ta ikaayën mi ra rin tung kalibrian ang pinagtalus ni Jesu-Cristong nagpakugmatay.
3 Ulitënu si yang nag̓ipagpaamanu kang lag̓i tung numyung tan taa pa.
Kumpurming tinu pay malëlyag ang yang tinanguni na pabuatan ta tanda,
ubligadu ra tanyang magtuman yang tanan ang mga katuw̓ulan ang ibinutwan ni Moises.
4 Ta yamung kumpurming nagpaëkël da yang isip na tung palaksung atia ang puidiamu rang usgaran yang Dios ang salu ra tung pagtërëlëngën na natëtëngëd tung pagturumanën mi yang mga katuw̓ulan,
duunamu ra nga pablag tung ni Jesu-Cristo.
Ay ya pa ag̓ari,
duun da nga talyuray mi yang kanëëman ang ipinagpaita na tung numyu ta diw̓aldi ang andang pisan ay natëngëran na tung mga pagturumanën mi.
5 Ag̓aningënamu ra yëën ta maning tia ay ta yamën ang pagkarapulitan ni Jesu-Cristo may nag̓ipagpakisëw̓at yamën ang tung uri ipabistu ra ëngëd yang Dios tung tanan ang yami inusgaranami ra kang lag̓i anyang magkabag̓ay ra tung anya.
Maning tia yang nag̓apakbat yamën natëtëngëd tung Espiritu Santong yay pagpasiguru tung mga isip yamën ang maning ka man tia yang nag̓iëlat yang Dios tung yamën natëtëngëd ilëm tung pagtaralig̓ën yamën ang naa tung ni Jesu-Cristo.
6 Kipurki nag̓askëan da yamën ang yang nag̓intindiën yang Dios tung sasang tau bëlag̓an kung tanya binuatan da ta tanda tung tinanguni na u kung anda,
kung indi,
sulaminting nag̓intindiën na tung anya kung tanya pagtalig da tung ni Jesu-Cristong bug̓us tung isip na ang asan da ka nga pruibaay tung paggërëgmaën na tung mga masigkatau na.
7 Katinlu ra rin atiing pagtaralig̓ën mi tung ni Jesu-Cristo.
Talagang may nanliw̓ërëng da ka man tung mga isip mi atiang indiamu ra pagpadayun tung pagparanangërën mi tung kamatuuran.
8 Kung unu pay nag̓itulduk nirang nag̓ipagkumbinyu tung numyu,
atia bëlag̓an liit tung Dios ang yay nagbëtëng atiing primiru tung mga kinaisipan ming magtalig yang mga sadili mi tung ni Ginuung Jesus.
9 Muya yang nag̓itulduk nirang atia manulad da tung pampalëskag ang maskin gësyë ilëm ang ilakët,
piru kung tumagmak da nganing,
nag̓apalëskag na yang intirung sang masang arina.
10 Piru maskin nag̓apagbitalaw ta maning tia,
yang isipu nag̓apaktël da ka ëngëd ni Ginuu ta.
Purisu may sarig̓u tung numyu ang indi mi ipataklib tung mga isip mi yang nag̓ipag̓aningung atia.
Dispuis pa,
yang taung atiang pagtag̓am ta panliw̓ërëng tung mga isip mi,
talagang parusaan da ka ëngëd yang Dios maskin abwat yang pagkabëtang na.
11 Piru ta yëën,
mga putulu,
kung alimbawa pagparakaw̓utunaw pa tung bëlag̓an mga Judio ang dapat magpabuat ta tanda tung mga tinanguni nira baklu ra nga risibiay yang Dios ang katulad ka tung nag̓ibalita yang duma,
indiaw ra rin nag̓adëëg-dëëg̓an ta mga masigkanasyunung mga Judio.
Tutal kung maning tii rin yang nag̓ipagpakaw̓utu,
makuat da rin yang nag̓ipagpakulain ëngëd nira tung yëën natëtëngëd tung nag̓ipagpakaw̓utu natëtëngëd tung pagpalansang ni Jesu-Cristo tung krus ang yay ultimu ilëm ang nag̓apatiëlan yang Dios ang magrisibi tung yatën ang mga tau.
12 Yang mga taung atiang pamagpagulu tung mga isip ming pamagtulduk ang dapatamu unung magpabuat ta tanda tung mga tinanguni mi,
kisira rin ang pati yang mga tinanguni nira gërëtën ka nirang kapunun,
magkabag̓ay ra ka rin tii tung niraa.
Yang Pagkaliw̓ianu Nira Indi Ëngëd Padatëlan Nirang Magpagustu Tung Mga Kalëlyag̓an Nirang Dati (5:13-15)
13 Ta yamung mga putulu,
yang ipinagbëtëng yang Dios tung mga isip mi ay ug̓ud ilibriamu ra anyang indiamu ra dapat ang magpasuitu tung mga katuw̓ulan ang para asanamu ra rin nga libri.
Ug̓aring maskin maning da tiang libriamu ra,
indi mi ra ilëm padatëlan yang pagkalibri ming atia ang suiltuamu rang magpaguyud si tung dating pagkatau ming mapinagpanadili.
Kung indi,
ëkël tung paggërëgmaan ming magpurutul,
magpararanëkanamu rang pirming mapagsirirbian ta matinlu.
14 Kipurki yang tanan ang nag̓ipanuw̓ul yang Dios tung yatën puiding mapabilug ta tung sam bilug ilëm ang dapatita unung maggëgma tung aruman tang tau ang katulad ka tung paggërëgmaën ta tung mga sadili tab.
15 Piru kung nusias yamu rag pagsuruay ang pagtërëkëw̓an ang katulad ka tung mga dayamdam,
dapatamung mangaman.
Talagang asan da nga ranggaay mi yang pagtaralig̓ën mi tung ni Ginuung Jesus pati yang pagpurutulan mi.
Nag̓ipagpaprusigir Nang Pirming Papagmanguluën Nira Yang Espiritu Santo (5:16-18)
16 Sugpatanu ra kanay yang inaningu natëtëngëd tung dating pagkatau ming mapinagpanadili.
Kaministiran ang yang Espiritu Santo yay pirming papagmanguluën mi tung sadili mi tung kaldaw-kaldaw.
Atia talagang indiamu ra ëngëd maguyuran yang kumpurming unu pang kalëlyag̓anay ming uyun tung dating pagkatau mi.
17 Talagang matuud tia ay kipurki yang dating mga kalëlyag̓an ming uyun tung pagkatau ming atiang dati pagpakigkuntra tung mga kalëlyag̓an yang Espiritu Santo.
Piru yang Espiritu Santo tanya pagpakigkuntra ka tung mga kalëlyag̓an ming atia natëtëngëd yang duruang atia pagkinuntraay kang lag̓i.
Yang katuyuan yang Espiritu Santong pagpakigkuntra ay ug̓ud indiamu ra dapat ang maguyuran yang dating kalëlyag̓an mi.
18 Dispuis pa,
basta pagpaguyuramu tung Espiritu Santo,
anda ray ministir ang magpasuituamu pa tung mga katuw̓ulan ang para asan da rin nga suspindiay mi yang mga kalëlyag̓an ming dati.
Nag̓apapagsunaid Na Yang Nag̓ipalua Yang Kalëlyag̓an Tang Dati May Yang Nag̓ipaëyang Yang Espiritu Santo (5:19-26)
19 Numanyan kung natëtëngëd tung dating pagkatau tang mapinagpanadili indi mataluk yang mga ubra-ubrang nag̓ipalua na.
Asan da ta pangumbaw̓ay may pangunlalii,
asan da ka ta pagpaklëd tung mga malalaway ang pagburuatën ang andang pisan ay ëyak-ëyak na.
20-21 Asan da ka ta pagturuuën tung mga ginuu-ginuu ubin maskin dumang mga bag̓ay ang nag̓ipakli tung Dios ang pandampan.
Asan da ka ta pandëëg-dëëg ang yang aruman na ya ra ag̓italig̓ay nang padalpëtan ta mga malain.
Asan da ka ta pagpakulain ta isip ang pagpakigsuay tung masigkatau na,
asan da ka ta pangimun,
asan da ka ta nag̓asilag ang maglëlpakën,
asan da ka ta pagpalandaw tung aruman nang ya rag lamkuay na,
asan da ka ta pagsuruag-suag̓an ang yay ikarangga yang pagpurutulan,
asan da ka ta pag̓iw̓ëg,
asan da ka ta pagparabuuën ang may kanunut na kang mga malalaway ang pag̓urubraën.
Asan da ka ta maskin unu-unu ra ilëm ang pagburuatenay ubin pag̓irisipën man ang pariu ka ta laksu tung nagkarasambitu.
Iugtulu tung numyu ang katulad ka tung ipinagpaamanung lag̓i tung numyu,
yang mga taung kumpurming pagpadayun tung mga maning tiang pagburuatën,
indi ra ëngëd pampaintraën yang Dios tung paggaraëmën na tung kaliw̓utan ang baklu.
22-23 Piru kung tinu pa man ay pagpamangulu ra tung Espiritu Santo,
maning taa yang nag̓ipaëyang na tung anya.
Asan da ta paggërëgmaën na tung mga masigkatau na,
asan da ka ta nag̓ikasadya yang isip na maskin unu pay nag̓apanawan na,
asan da ka ta kalimëngan yang isip na,
asan da ka ta kaurayan yang isip na,
asan da ka ta pag̓ildaw na tung mga masigkatau na,
asan da ka ta pagpakaayën na tung nira,
asan da ka ta pagkapiadu na ang tanya madagmit ang taralig̓an yang mga kaarumanan na,
asan da ka ta pag̓aramumuën na tung mga aruman na,
asan da ka ta pagsuruspindiën na tung sadiling kalëlyag̓an na.
Ta,
kung yang mga maning tia yay nag̓ipaëyang yang Espiritu Santo tung sasang tumatalig,
anda ray sagyapën tung anya natëtëngëd tung pagturumanën na yang mga katuw̓ulan.
24 Dispuis kumpurming tinu pay pagkinapulitay ni Jesu-Cristo,
pinangindian da nirang tinalyuran yang dating pagkatau nira pati yang dating mga kalëlyag̓an nira ang kung kaisan anda ray tërëgkaan.
Kung duun ipananglitayu tung ni Jesu-Cristong ilinansang tung krus,
maning pa tung ipinaumid da nira tung anyang ilinansang.
25 Kumus pinaëyanganita ra yang Espiritu Santo ta ipagpangabui tang baklu,
kaministiran magpalalangita ra tung anya tung tanan ang mga pag̓urubraën ta.
26 Indiita ra ëngëd magpabëtang tung sadili ta ang ita landaw tung mga aruman ta ay kipurki asanita ra mag̓iriw̓ëg̓an ang magkaralawan ta dëngëg.