Tung Primirung Corinto, tinag̓aman ni Pablong sulw̓aran yang pagsuruay-suayan nira pati mga prublima nirang duma. Pagkatapus tung pira pang bulan, nagbalik dang nagbisita tung nira. Piru durug pungaw yang pinakaw̓ut na ay pinabëngëlan da ilëm nira (2:1), ig midyu tung nagduma ra ka yang pag̓irilalaan nira. Purisu nagplanu ra rin ang magbalik si tung nira (1:15), piru nag̓uman da yang isip na ay nadëmdëman na yang nainabu atiing pagbisita na duun ang parariu ra tanirang pinungaw ta duru (2:1). Purisu imbis balikan na sing uman tanira, naisip da ang mas matinlu, sulatan na ra ilëm kanay tanira ta malëbat-lëbat, basi pa ra ilëm mamanmanan da tanirang mamagsug̓at natëtëngëd tung mga ubra-ubra nirang kamali (2:1-4) Yang isinulat nang atii indi nalg̓ud tung kasulatan ay naplëk da. Atiing pag̓ëlat da ta balita kung unu pay pinakaw̓ut na, napag̓inësël da rin ang nagsulat da tung nira ta maning tiang mga bitalang malëbat-lëbat (7:8). Piru tung pagbag̓as nira ni Titong pinapag̓ëkël na yang sulat ang atia, baklu ra ngaskëay na ang naa pala, durug tinlu yang pinakaw̓ut na. Purisu, kumus matinlu yang dinangat na (7:6-16), nagpasulat si ang para ipaëkël na si tung ni Titong magbalik duun tung Corinto. Ya ra taang sulat ang naa.

Ug̓aring ilëm, atiing indi pa nag̓apaëkël na, kinaw̓utan si ta balitang makapupungaw si ang may mga taung namagsubli tung anya duun ang ya ray pamagkuntra ta maayën tung anya. Nag̓abangdanan da nganing nirang bëlag̓an matuud ang apustul. Ay yang gustu nira tiwakawën da nira ti Pablo ang para taniray ilalaën yang mga tumatalig. Dispuis yang nag̓itulduk nira natëtëngëd tung ni Ginuung Jesus ig tung Espiritu Santo, durung pisan agkalawid tung ipinagpakaw̓ut ni Pablo tung nira atiing primiru (11:4). Purisu, kumus maning da ka man tii, ti Pablo tanya naisip dang sugpatan na ra kanay yang sulat na, baklu ra ipaëklay na tung ni Tito. Yang isinugpat nang atia, ya ra yang kapitulu 10 asta 13. Kapurisu aparti ra ta tunadas yang isinugpat na kay tung natkaw ang ipinasulat na bilang kapitulu 1 asta 9. Ay kipurki tung 10 asta 13, nagdipindir da ta maayën tung pagkaapustul nang nag̓atag̓aman ta pagrangga. Kapurisu tung pagkërëng ni Pablo tung pagkaapustul na, midyu tung nag̓arëgsanan ilëm ang mag̓intra ra paambug. Bëlag̓an ang mag̓aning ang tanya pagpabantug tung nira, kung indi, gustu na ilëm ang pakdulan na tanira ta matinlung mapatiëlan nirang para këgngan da nirang mamanuw̓al tung mga manigtulduk ang atia (5:12). Dispuis yang pinabilug̓an na ëngëd ang pagpaambug, bëlag̓an yang sadiling puirsa na, kung indi, ya ra ilëm yang kumpurming pagpailala tung pagkamaluw̓ay na (11:30) ug̓ud duun da nga pruibaay ang tanya, maskin maluw̓ay ka man, nag̓apaktël da ka ëngëd yang Dios tung pag̓ërëkëlën na tung pagkaapustul na (12:9).

Dispuis pa, tung sulat ang naa durung maita tang matinlung mapangayapan ta para tung mga sadili ta sasa may sasa pati tung ikaayën yang grupu ta. Tung 1:3-4 maintindian ta kung ayw̓a nag̓apasaranita ta pinitinsia ang kaisan. Tung 3:5 maintindian ta ka ang maskin unu pay ipiniar yang Dios tung yatën ang ubraën para tung ikadëngëg na, masarangan ta ka ilëm ëkël tung pagpaktël na tung yatën. Tung 3:18 ngaskëay ta ka ang kung pirming pabilug̓an ta mga isip ta kung unu pag katinlu yang kadëngëg̓an ni Ginuung Jesus, asan da ag̓imakluay yang Espiritu Santo yang mga isip tang asta mas pang mag̓atuita rang mag̓atu tung anya. Tung 4:7 ang magdarasun, maintindian ta ka ang yang Matinlung Balitang ipinagpiar yang Dios tung yatën ang para ipagpakaw̓ut ta, maning pa tung sasang manggad ang durug kamaal ang pagkatapus itang piniaran na maning pa tung sasa ka ilëm ang urun ang parabtangan ang malpës da ka ilëm ang madiadu. Maning tia yang palaksu na ug̓ud asan da ngaintindiay ang anday dumang may puirsa asan, kung indi, ultimu ra ilëm yang Dios ang pagpaktël tung yatën. Tung 4:16-18 nga bilug̓ay ta kung ayw̓a indiita ra ka ëngëd magpaluw̓ay tung ubrang nag̓ipatuman ni Ginuu ta tung yatën ay natëtëngëd yang nag̓aprusigiran ta may kantidad nang durung pisan agkatimbang ang maskin indi ta pa nag̓aita simanyan, piru ya ray magnatis ang asta tung sampa. Pagkatapus asan tung 5:1-10 nga marësmësay ta kung unu pay mainabu tung yatën tung uras ang ita mapatay ang durug katinlu yang nag̓iëlat yang Dios tung yatën. Durug tinlung dëmdëmën ta yang inaning ni Pablo tung 5:15 ang kung itang pinakugmatayan ni Ginuung Jesus, pinaëyanganita ra anya ta ipagpangabui tang baklu ang liit tung anya, simanyan anda ray gana tang magsikad pa tung sadiling kalëlyag̓an ta, kung indi, yang nag̓ipalusu tang sikarën ya ra ilëm yang kalëlyag̓an yang nangërëngan tung yatën ang nagpakugmatay. Kung paranëkan ta ta pagbasa yang 5:17, mabilug̓an ta ra yang binuat yang Dios tung yatën atiing pagtalig ta tung ni Ginuung Jesus ang maning pa tung inimuita si anyang baklu. Purisu taklib da yang dati, ig yang baklu taa ra tung mga sadili tag pag̓andar. Pagkatapus tung 5:18-21, maintindian ta ka kung ya pa ag̓aring nakuat da yang pinagsangkëlan da rin yang isip yang Dios ang magpaulik tung yatën ang makinasalananën. Dispuis, kung padayunan tang basaën yang 6:1-2, maskëan ta ra ka yang sasang pangamanan ta ang maskin tinapnayita ra ka man yang Dios natëtëngëd ilëm tung kanëëman na, muya, kung paw̓aya-w̓ayaan ta, anda ray pakaw̓utun nang matinlu tung mga ug̓ali tang magbaklu. Sayang yang planu yang Dios ang matinlu ra rin para tung yatën. Kung padayunan tang basaën yang isinulat na tung 7:9-11, asan da ka ngaintindiay ta ang kung itang mga tumatalig pakapungawënita ra yang Dios natëtëngëd tung mga ubra-ubra tang bëlag̓an tama tung pagtëlëng na, puiding asanita ra ngaëyangay ta ipanligna ta tung mga ubra-ubra tang mga maning tia. Atia, yang kapupungawën tang maning tiang klasi na yang pisan ay nag̓auyunan yang Dios kipurki tung panligna ta, asan da ngaulikay yang pag̓urusuyun ta tung kalëlyag̓an na ang nagkawaldang da ang pagkatapus andang pisan pag̓inësëlan ta tung kapupungawën tang maning tia. Dispuis tung kapitulu 8-9, may durug tinlung panëëm-nëëman ta kung ya pa ag̓aring maëyanganita ta kinaisipan tang masalamaitang magpakdul ta itaw̓ang ta tung duma. Yang matinlung sauluën ta ya ra yang sasang bitala tung 9:8 kung ya pa ag̓aring mag̓ing bastanti ra yang magamit tang magbuat ta maskin unu pang ikaayënay yang mga masigkatau ta. Kung padayunan ta ta pagbasa yang inulit ni Pablo tung 10:17-18, asan da ngaskëay ta ang ultimu ra ilëm yang Dios ay dapat ang ipabantug ta, bëlag̓an da yang mga sadili ta. Bëlag̓an aprubadu yang taung pagpabantug tung sadili na, kung indi, mag̓ing aprubadu ilëm kung tanya bantug̓un da ni Ginuu ta. Pagkatapus tung 12:9 may durug ka tinlung ayapën ang ya ra yang tinuw̓al ni Ginuu ta tung ni Pablo ang ayw̓a indi na ra kuatën yang maning pa tung tënëk ang tuminënëng da tung tinanguni na: “Ay kipurki kung aria pag luw̓ayay, asan da ka nga simanay mu yang kagaëmanung mas pang këmtël ang magtaw̓ang tung nuyu.” Pagkatapus tung kapitulu 13:5, may sam bilug pang inaning na ang dapat ang panëëm-nëëman ta ka: “Yang mga sadili mi mismu, ya ray dapat ang insapuën mi ta maayën. Bilang talimaanën mi kung talagang matuud yang pagtaralig̓ën mi tung ni Jesu-Cristo bilang nag̓apanuntan mi ka ta pagturumanën mi yang mga kalëlyag̓an na.” Ay ya pa ag̓ari, kung kaisan, durung kalëlyag tang manginsapu tung mga ubra-ubra yang mga kaputulan ta. Piru naa pala, landaw tung tanan ang yang mga sadili ta mismu ya ray dapat ang tukawën tang insapuën ta mupia kung ita talagang pulidung pagtalig ang matuud tung ni Ginuung Jesus u kung indi. Kidispuis pa, matinlu kang basaën ta yang inaning na tung 13:13 ang para duun da nga panaway ta kung unu pay kabag̓ay-w̓ag̓ayan yang pagkadios yang Dios ang tulu tanirang paglulukutan tung sa nga Diosan ilëm.