Yang Primirung Isinulat Ni Pablo Tung Mga Tag̓a CORINTO
Patkaw Ang Pasanag Tung Kumpurming Magbasa
Atiing pangyadwang pagliliw̓utun ni Pablong nagparakaw̓utun (tung mapa tëlëngay yang pinanawan na) yang Matinlung Balita natëtëngëd tung ni Jesu-Cristo, nagdistinu ra duun tung siudad ang Corinto (Mga Binuat-buatan 18:1-11). Atii kanay, yay pinakasiudad tung sinakëpan yang intirung Acaya. Tulung klasi yang mga taung namag̓istar duun tung uras dang atii. May mga Giriego ang yay dating magbaw̓anwa duun, may mga tag̓a Roma, ig may mga Judiong mga dumarangëp duun. Bantug yang siudad ang atii natëtëngëd durung mga manggaranën duun ang maktël yang mga nigusyu nira. Sari-saring mga rilyun ang nag̓apgësan yang mga tau ig bantug ka yang mga pag̓urubraën nirang malalaway laliig baw̓ay. Ti Pablo nagtinir duun tung sëlëd san takun may tënga ig durung namagpanangëd tung ipinagpakaw̓ut nang nagtalig tung ni Jesu-Cristo (Mga Binuat-buatan 18:8).
Simanyan atiing pagtaklib da yang tulung takun ang ililiitën ni Pablo duun ang naglaktëd da tung Efesong pagparakaw̓utun, kinaw̓utan da ta sulat ang ipinaëkël tung anya yang sam pundaan duun tung Corinto (7:1). Puiding na Estefanas yang pinapag̓ëkël nira (16:17-18). Dispuis pa may balitang nagngël ni Pablo ang tanira unu duun pagsuruay-suayan da (1:11) ig may duma pa unung mga prublima nira. Purisu napag̓isip dang magbalës ta sulat ang ya ra ka man taa. Yang mga prublima nira tinag̓aman nang sinulw̓aran ig kumpurming unu pay tinalimaan nira tung anya, tinag̓aman na ra kang tinuw̓al.
Kung natëtëngëd tung kamtangan yang sulat ang naa, yang primirung pinabilug̓an na ya ra yang pagsuruay-suayan nira (kapitulu 1, 2, 3, 4). Magdasun, kung unu pay dapat ang buatën nira tung aruman nirang sam bilug ang pagbuat ta sasang durung pisan agkalaway (kapitulu 5). Tung kapitulu 6, 7, 8, 9, 10 tinuw̓al na yang mga tinalimaan nira tung anya tung sulat ang atiing ipinaëkël da nira tung anya. Tung kapitulu 11, inintindi na yang mali nira ang yang mga baw̓ay ipinlëk da nira yang pagtalirung nira tung mga kulu nira pati yang mga pasais nirang pagdërëmdëmën tung nag̓adapatan yang pagpakugmatay ni Jesu-Cristo. Tung kapitulu 12, 13, 14 nagpainunuku tung nira natëtëngëd tung tamang paggaramitën nira yang mga abilidad ang ipinampaëyang yang Espiritu Santo tung nira sasa may sasa. Yang nabtang tung kapitulu 15 natëtëngëd tung pagkabui si kang uman ni Jesu-Cristo ig kung unu pay apiktar na tung mga tumatalig ang napatay ra ubin tung mga bui pa. Tung kapitulu 16, baklu tapusay na yang pagsurulatën na, may mga impurtanti kang sinambit na tung nira ang katulad ka tung pagsirimpanën nira tung itaw̓ang nira tung mga kaputulan nira duun tung Jerusalem.
Yang Kamtangan Yang Sulat Ang Binulus-bulus
1:1-9 Yang Intrada Yang Sulat
1:10–4:21 Yang Ipinagtapal Ni Pablo Tung Pagsuruay-suayan Nirang Pagkarampi-kampian
Kapitulu 5 Dapat Ang Ipaaw̓ig Da Kanay Nira Yang Sasang Aruman Nirang Pagpadayun Pa Tung Pagpakasalak Nang Malaway Ang Asta Mamanmanan Da
6:1-11 Dapat Ang Indi Magdirimandaan Yang Magpurutul Tung Katalungaan Yang Mga Usgadung Bëlag̓an Mga Tumatalig
6:12-20 Dapat Ang Gamitën Nira Yang Mga Tinanguni Nira Tung Ikadëngëg Yang Dios Ang Ya Ray May Anya
Kapitulu 7 Yang Itinuw̓al Ni Pablo Tung Tinalimaan Nira Natëtëngëd Tung Pagkarasawaën
Kapitulu 8 Yang Itinuw̓al Na Tung Tinalimaan Nira Natëtëngëd Tung Mga Karning Nag̓isag̓ud Tung Mga Bultu
Kapitulu 9 Yang Nag̓ipasanag Na Kung Ayw̓at Indi Nag Sikarën Yang Diritsyu Nang Magpasuitu Tung Mga Kaputulan, Kung Indi, Maning Pa Tung Pagpakirëpën Da Ilëm Tung Tanan Ang Mga Tau
10:1–11:1 Yang Ipinagpaaman Na Tung Nira Ang Indi Ëngëd Mamagpakigsadu Tung Mga Kaarumanan Nirang Pamagsag̓ud Tung Mga Bultu
11:2-16 Nag̓ipasanag Na Kung Ayw̓at Magkabag̓ay Ang Yang Mga Baw̓ay Mamagtalirung Ang Kada Mamagsaragpun Da Nganing Tanirang Sam Pundaan
11:17-34 Nag̓ipasanag Na Kung Unu Pay Dapat Ang Taradlëngën Nira Tung Sistima Nirang Pagdërëmdëmën Tung Nag̓adapatan Yang Pagpakugmatay Ni Ginuung Jesus
Kapitulu 12-14 Natëtëngëd Tung Mga Abilidad Ang Nag̓ipaëyang Yang Espiritu Santo Tung Nira Kung Unu Pay Tamang Paggaramitën Nira
Kapitulu 15 Natëtëngëd Tung Pagkabui Si Kang Uman Ni Ginuung Jesus Pati Yang Pagkabui Si Kang Uman Yang Pagtalig Tung Anya
16:1-4 Natëtëngëd Tung Pagturuw̓urun Nira Ta Kuartang Itaw̓ang Tung Mga Tumatalig Ang Pamangaliwag Duun Tung Jerusalem
16:5-12 Natëtëngëd Tung Planu Na Pati Mga Planu Ni Timoteo May Ni Apolos
16:13-14 Yang Mga Ultimung Nag̓ipaprusigir Na Tung Nira
16:15-18 Natëtëngëd Tung Nirang Sam Pundaan Kung Tinu Pay Dapat Ang Ilalaën Nirang Panuntan
16:19-24 Yang Pagtapusan Yang Sulat