Yang Primirung Isinulat Ni Pablo Tung Mga Tag̓a CORINTO
Yang Intrada Yang Sulat (1:1-3)
1
Yang nagpasulat tia,
yuung ti Pablo ang sasang apustul ni Jesu-Cristong magparakaw̓utun tung mga tau natëtëngëd tung anya.
Bintëngaw ra nganing anyang mag̓ing apustul na gatëd ya ra kang lag̓i ay kalëlyag̓an yang Dios para tung yëën.
Yaming nagpaëkël yang sulat ang atia,
duruaami ni Sostenesa,
ang yay sasang putul ta tung ni Ginuung Jesus.
2 Yang sulat ang atia ipinaëkël da yamën tung numyung sam pundaan ang pagsaragpun-sagpun asan tung siudad ang Corinto.
Anday dumang may anya tung numyu,
kung indi,
ya ra yang Dios mismu natëtëngëd pinabag̓ayamu ra ni Jesu-Cristo tung anya.
Bilang pinilikamu ra yang Dios ang yamu mag̓ing anya ra,
kasiraanamu ra ka yang mga tau tung maskin ay pang banwaay ang kumpurming pag̓ambay kang pirmi tung ni Ginuu tang Jesu-Cristo ang ya ra ka man ay nag̓atingara nirang ultimu ilëm ang Ginuu nira ig Ginuu ta ka.
3 Yang nag̓ipag̓ampu yamën para tung numyu ang mas pang maispirinsiaan mi yang kanëëman yang Ama tang Dios durua ni Ginuu tang Jesu-Cristong pamagpadag̓ën-dag̓ën tung numyu ig mas pang ikasadya mi yang kaampiran mi tung nirang naang baklu.
Pagpasalamat Ti Pablo Natëtëngëd Tung Mga Abilidad Ang Ipinakdul Yang Espiritu Santo Tung Nira (1:4-9)
4 Pirmiaung pagpasalamat tung Ampuan tang Dios natëtëngëd tung numyu.
Yang nag̓apasalamatanu ëngëd tung anyang yay pagpaturuw̓ulunanu,
ya ra yang kanëëman nang ipinagpaita na tung numyu ëkël tung ni Jesu-Cristo.
5 Ay kipurki natëtëngëd ilëm tung pagpakigsasa mi tung anya,
duruamug kagarbusu tung tanan ang nag̓ipakdul yang Dios tung mga tauan na.
Sasa ra asan tung pagpadakul na tung pag̓irintindiën mi tung kamatuuran ang liit tung anya pati tung abilidad ming maayënamung mamëtang-bëtang tung matinlung bitala yang kumpurming nag̓aintindian mi.
6 Asan da nga pruibaay ang talagang matuud ka man yang balitang naang ipinagpakaw̓ut yamën tung numyu natëtëngëd tung ni Jesu-Cristo.
7 Purisu yang pinakaw̓ut na,
mintras paglalangkag̓ënamung pagpakbat tung uras ang ipagpabistu yang Dios tung ni Ginuu tang Jesu-Cristong maggaraëmën,
indiamung pisan magkulangën ta mga abilidad ang atiang nag̓ipaëyang yang Espiritu Santo tung numyung sari-sarib.
8 Dispuis pa,
yang Dios mismu ya ray magpadayun tung pagpabakëd na tung pagtaralig̓ën mi mintras buiamu pa ug̓ud kung kaw̓utun da nganing yang uras ang ipaglëkat ni Ginuu tang Jesu-Cristo,
anday mabangdan na tung numyu.
9 Talagang matalig̓an ta yang Dios ang ya ray buatën na ay tanya ka man ngani ay nagbëtëng tung mga isip mi atiing primiru ang para magbiringkitanamu ra yang pag̓aningën nang “Ana na” ang ti Jesu-Cristo ang yay nag̓atingara tang pinakaag̓alën ta.
Yang Prublima: Pagbërëlag-bëlag̓an Tanira Ta Kinaisipan Natëtëngëd Tung Mga Manigmangulu Kung Tinu Pay Mas Mataku Tung Nira (1:10-17)
10 Ug̓aring ilëm,
mga putulu,
may sasang nag̓aingaluku tung numyu sigun tung katëngdananung naang ipinagpiar ni Ginuu tang Jesu-Cristo tung yëën.
Kaministiran ang yamung tanan asan sasa ilëm ay kërësën mi.
Indiamu ra magsuruag-suag̓an,
kung indi,
mag̓uruyunanamu ra ilëm ta mupiang magsarasaan ta kinaisipan may kinaisipan.
11 Ag̓aningënamu ra yëën ta maning tia,
mga putulu,
ay natëtëngëd may nabalitaanu tung mga aruman ni Chloe ang yamu unu asan pagsuruay-suayan.
12 Yang gustuung ianing tia ay katulad tung duma unu asan ang pamansianing ang tanira unu mga tauanu.
Yang duma unu pamansianing ka ang tanira unu mga tauan ni Apolos.
Yang duma unu pamansianing ka ang tanira unu mga tauan ni Pedro.
Asta yang duma unu pamansianing ka ang tanira ilëm unu ay ultimung mga tauan ni Jesu-Cristo.
13 Abaa naa pala kung maning tia yang nag̓ibitala mi,
midyu ti Jesu-Cristo ya ra ilëm ag̓iintraay mi bëlak-bëlak!
Ayw̓a yuung ti Pablo yay nagpakugmatay tung krus para tung numyu?
Atiing pagpabënyag ming nagpapruiba,
ayw̓a,
yang pinapruibaan mi ang yamuy mag̓ing mga tauanu?
14 Durug dakul yang pagpasalamatu tung Dios ang atiing asanaw pa tung numyu,
anday nabënyag̓anu,
puira pa tung ni Crispoc durua ni Gayod.
15 Maayën ilëm ngani ang gësyë ilëm yang pinamënyag̓anu.
Ay kung dakël-dakël pa,
muya duun da ilëm din mamaglaum ang yuu ray pinagpasirungan nira ang para mag̓ing mga tauanu buat.
16 Ëlat kanay,
nalipataw ra rin.
Asta ti Estefanas palang sam pamilya,
pinamënyag̓anu ka.
Kung may duma pa asan,
indi ra ilëm nag̓adëmdëmanu.
17 Ay ya pa ag̓ari,
bëlag̓an kang lag̓ing yay itinuw̓ul ni Jesu-Cristo tung yëën ang magpamënyag̓aw tung mga tau,
kung indi,
ang para magparakaw̓utunaw tung nira yang Matinlung Balita natëtëngëd tung ni Jesu-Cristo.
Anda kay gustu nang maggamitaw yang pagkamatakuung mamëtang-bëtang ta bitala.
Ay kung yay buatënu,
yang nag̓ipagpakaw̓utung naa natëtëngëd tung pagpalansang ni Jesu-Cristo tung krus asan da nga taklëw̓ay yang nag̓adapatan nang asta anda ray pagbatuwan ta isip yang mga taung pamamati.
Natëtëngëd Tung Pag̓aningën Ta Duma Ang Kalukuan Ilëm Unu Yang Pagpalansang Yang Pag̓aningën Ang Cristo Tung Krus (1:18-25)
18 Nag̓apagbitalaw ta maning tia,
ay may nag̓auksibaranu tung mga taung nag̓apampakaw̓utanu yang balitang naa natëtëngëd tung nag̓adapatan yang pagpalansang na tung kruse.
Tung pag̓intindi yang mga taung duun dag panalunga tung kadiaduan ang anday katapusan,
yang pagpabëtang nira tung pagpalansang na tung krus,
midyu kalukuan ilëm.
Piru tung pag̓intindi tang mga tumatalig ang nag̓atapnay ra yang Dios,
duun da tung pagpakugmatay na nga bilug̓ay ta yang puirsa nang pagtapnay tung yatën.
19 Ay ya pa ag̓ari,
pagbinalaw̓ag̓ay kang lag̓i yang pag̓irintindiën yang mga tau may yang pag̓irintindiën yang Dios.
Katulad ang pisan tung sasang bitala yang Dios ang napabtang tung kasulatan ang mag̓aning,
“Yang pagkamataku yang mga matataku,
ya ray tuungunu.
Yang pagkaansianu yang mga taung marautak,
ya ray pasungawënu,”
ag̓aaningf.
20 Ta,
ay pa w̓a yang pagkamataku yang mga matataku?
Ay pa w̓a yang nag̓akdëkan yang mga sag̓ad tung mga riglamintu yamën ang mga Judio?
Ay pa w̓a yang pangatadlëngan yang maraayën ang mangatadlëngan?
Indi w̓a ang yang katataku nirang atiang nag̓adayaw ta kadaklan taa tung kaliw̓utan ang naa,
ya ray binaliskad yang Dios ang binuat ang kalukuan da ilëm?
21 Ay kipurki tëlëngan mi.
Kumus mataku yang Dios,
nagplanu ra kang lag̓i ang indi ra ka ëngëd maimung mangatultul yang mga tau tung anya kung ya ka ilëm yang pagkamataku nira yay talig̓an nira.
Kung indi,
uyun ang pisan tung isip na ang ëkël ilëm tung nag̓ipagpakaw̓ut yamën ang naang pag̓aningën ta duma ang kalukuan da ilëm unu,
asan da ilëm nga tapnayay na yang kumpurming manangëd.
22 Ay kipurki tëlëngan mi ra ilëm yang palaksu yang pag̓irisipën yang kadaklan ang mga tau.
Yang mga masigkanasyunung mga Judio,
pamag̓ingaluk ta mga pruibang makabëw̓ërëng ang ipaita yang Dios tung nira baklu ra mamanangëd tung nag̓ipagpakaw̓ut yamën ang naa.
Pati yang bëlag̓an mga Judio ang tag̓a duma-rumang nasyun,
yang pag̓asikad nira baklu ra panangëray nira yang nag̓ipagpakaw̓ut yamën kung may magngël da nira asan ang madulang tung pagkamataku nira.
23 Ang pagkatapus ta yamën,
yang nag̓ipagpakaw̓ut yamën tung nirang tanan,
ang yang pag̓aningën ang Cristong pinilik yang Dios ang maggaraëmën,
imbis maggaraëmën dang lag̓i,
ya ra ipalansangay tung krus ang katulad ka tung sasang kriminal.
Ang pagkatapus kung magngël da nganing tia yang mga masigkanasyunung mga Judio,
ya rang pisan ay pagbalaw̓ag̓an yang mga isip nira.
Asta yang bëlag̓an mga Judio,
kung magngël da ka nganing nira tia,
ag̓ipabtang da ilëm nirang sasang kalukuan ilëm.
24 Piru tung pag̓intindi yang kumpurming nagpabtëng da tung Dios ang para magtalig da tung ni Jesu-Cristo,
maskin mga Judio kag bëlag,
duun da tung anya nga bilug̓ay nira yang builu yang kagaëman yang Dios ang nagtapnay tung nira,
ig kung unu pag kawayang yang isip nang nagpapanaw tung planu nang naang durug tinlu.
25 Ay ya pa ag̓ari,
yang planu yang Dios ang naang natëtëngëd tung pagpakugmatay ni Ginuung Jesus ang yay nag̓atëlëngan ta mga taung kalukuan ilëm,
ya pay landaw ang pisan tung tanan ang pagkamataku nirang mga tau.
Ig naang planu nang nag̓alaum nirang maluw̓ay,
ya pay landaw ang pisan tung tanan ang këtël nirang mga tau.
Natëtëngëd Tung Pag̓aningën Ta Duma Ang Kalukuan Ilëm Unu Ang Tanirang Aranëk Ta Pagkabëtang Ya Pay Pinagpilik Yang Dios (1:26-31)
26 Puiding madëëp mi yang gustuung ianing,
mga putulu,
kung padëmdëman mi ra ilëm yang mga pagkabëtang mi atiing pagbëtëng yang Dios tung mga isip ming para magtalig̓amu ra tung ni Ginuung Jesus.
Piraamu pa ka ilëm ang bilug ay matataku tung pagtërëlëngën yang mga masigkatau mi?
Piraamu pa ka ilëm ang bilug ay darakulung mga tau?
Piraamu pa ka ilëm ang bilug ay abwat ta dug̓u?
27 Piru yamung pag̓alamku ta duma ang anday mga kaliw̓utan mi,
yamu pay pinagpilik yang Dios ang para asan da tung numyu nga pakaëyakay na yang mga matataku.
Yamung pag̓atëlëngan ta duma ang gëg̓ësyëamu ilëm ang mga tau,
yamu pay pinagpilik yang Dios ang para asan da tung numyu nga pakaëyakay na yang darakulung mga tau.
28 Yamung pag̓atëlëngan ta duma ang aranëkamu ta dug̓u ang pagkatapus nag̓alamkuamu ka nirang anday kuinta,
yamu pay pinagpilik yang Dios ug̓ud asan da tung numyu nga paitaay na ang andang pisan ay kuinta na tung pagtëlëng na yang kumpurming nag̓apakumaal yang mga taung pamagpaguyud tung sistima yang kaliw̓utan ang naa.
29 Anday dumang pag̓asikad yang Dios asan,
kung indi,
ug̓ud yang tanan ang mga tau asan da nga pisanay na ta ipagpabug̓al nira ang tanira maraayën tung pagtërëlëngën na,
ang yang kalaum nira ya ray patiëlan nang magtapnay tung nira buat.
30 Pati yamu,
anda kay mapabug̓al mi asan kipurki ultimu ilëm tanya yang may kabuat-buatan ang ipinakapulitamu ra anya tung ni Jesu-Cristo.
Asan da ka tung ni Jesu-Cristo nga bilug̓ay mi kung unu pag kawayang yang isip nang nagpapanaw tung pinalanu na kung ya pa ag̓ari yang pagtapnay na tung yatën ang mga tau ang ya ra ka man taa yang kamtangan na.
Natëtëngëd ilëm tung pagpakugmatay ni Jesu-Cristo,
duunamu ra ngausgaray yang Dios ang saluamu rang pisan tung pagtërëlëngën na,
duunamu ra ka nga pabag̓ayay nang para mapagpalëngëtamu ra tung anyang magtuu.
31 Nagkamaninganamu ra ta maning tia ay ug̓ud magkamatuud da tung numyu yang sasang bitalang nabtang tung kasulatan ang mag̓aning,
“Kung tinu pay malëlyag ang magpabantug,
kaministiran ang ultimu ra ilëm ti Yawi ya ray ipabantug na,”
mag̓aning.g