Yang Paniëlan Yang Ipagtalig Nira Tung Ni Jesu-Cristo Bëlag̓an Yang Pagkamataku Yang Sasang Tau, Kung Indi, Ultimu Ra Ilëm Yang Builu Yang Bitalang Pinagbatuwan Yang Isip Nira (2:1-5)
2
Pati yuu nganing,
mga putulu,
atiing pagkaw̓utu asan tung numyu,
yang pasaisu indi ka ipinablag̓u tung linyang atiang nag̓ianingu.
Kipurki atiing pagparakaw̓utunu tung numyu sigun tung planung naang ipinagpaingmatuud yang Diosa,
indiamu ra ka ginamitanu ta abwat ang kinatakwanan ang yuu puirting mamëtang-bëtang ta bitala.
2 Ay binilug̓u rang lag̓i yang isipu ang mintras asanaw pa tung numyu,
anday dumang pabilug̓anu tung pagparakaw̓utunu,
kung indi,
ultimu ilëm ti Jesu-Cristo kapin da ëngëd yang pagpalansang na tung krus kung unu pa ëngëd ay nag̓adapatan na.
3 Purisu ta yëën,
atiing asanaw pa tung numyu,
kumus ipinlëku ra yang pagtalig̓u tung sadiling kinatakwananu,
anda ray dumang napanimananu tung sadiliu,
kung indi,
ya ra yang kaluluw̓ayënu.
Nagkëba-këba ra nganing ta mupia yang dëdlaanu ay tung ëlërung nusias ilëm indi masaranganu yang ipinaubra yang Dios tung yëën asan tung numyu.
4 Pati yang pagparakaw̓utunu tung numyu,
indiamu ka ginamitanu ta mga katadlëngan ang makakaingganya ang para asan da rin ngaëklayu yang mga kinaisipan mi.
Kung indi,
yang bitalaw ipinadlut da yang Espiritu Santong pinaktël ang asta tinëmëngan da ta mupia yang mga isip mi ang asan da ka nga pruibaay mi ang talagang liit ka man tung Dios yang nag̓ipagpakaw̓utung atia tung numyu.
5 Yang pag̓asikad yang Dios asan ay ug̓ud bëlag̓an yang pagkamataku ta aruman mi ka ilëm ang tau ay paniëlan ming magtalig tung ni Ginuung Jesus,
kung indi,
ultimu ra ilëm yang builu yang bitala yang Dios mismu ang ya ra ka man ay pinagbatuwan yang mga isip ming nanangëd.
Natëtëngëd Tung Ultimung Makawawayang Ta Isip Ang Ya Ra Yang Nag̓ipagpakaw̓ut Na Natëtëngëd Tung Pagpakugmatay Ni Jesu-Cristo (2:6-16)
6 Ug̓aring,
may makawawayang ta isip tung nag̓ipagpasanag̓u tung numyung mga tumatalig ang para magtëg̓asanamu ra tung pagtalig mi.
Piru yang kawawayanganën ta isip ang naang nag̓ianingu,
bëlag̓an pariu tung pagkamatakung nag̓adayaw yang kadaklan ang mga tau numanyan taa tung kaliw̓utan ang naa ang ya ëngëd ay nag̓ausuy yang may mga katëngdanan ang yang panalungaan nira talagang kalainan.
7 Kung indi,
yang kawawayanganën ta isip ang naa,
ultimu ilëm ang liit tung Dios.
Yang nag̓adapatan na,
ya ra yang planu nang inëgtëman na pa rin atiing tukaw ang pagkatapus numanyan ipinapanaw na ra tung ni Jesu-Cristo.
Ya ka man mismu yang tinima na atiing indi na pa nag̓aimu yang kaliw̓utan ang yang katuyuan na ang para asanita ra nga palg̓uray na tung kasusulawën na tung uri ta kaldaw.
8 Yang planu nang atiang durung pisan agkatinlu,
andang pisan ay naërëm yang may mga katëngdanan taa tung kaliw̓utan ang naa,
may sam bilug tung nira,
andang pisan.
Ay kipurki kung naintindian da nira tia,
indi ra rin ipinalansang nira tung krus ti Ginuu ta ang ya ka pa man yang pinilik yang Dios ang kung maggaraëmën da ngani tung uri,
durung pisan agkasulaw yang pagkabëtang na.
9 Piru andang pisan ay naërëm nira natëtëngëd tung planu nang naa ang katulad ang pisan tung nabtang tung kasulatan ang mag̓aning,
“Yang indi ra dinakat ta mata,
yang indi ra nagngël ta talinga,
yang indi ra kinaw̓ut ta isip ta mga tau,
yang pisan ay pinagsimpan yang Dios ang para ikaayën yang kumpurming pagmaal tung anya,”
ag̓aaningb.
10 Ay ta yatën ang pagmaal tung anya,
tung yatën da ipinabunayag na natëtëngëd tung kalibrian ang naang pinagsimpan na ëkël tung pagparasanag̓ën yang Espiritu Santo tung mga painu-inu ta.
Kipurki yang Espiritu Santo tanya,
andang pisan ay indi na masangkad,
maskin nganing yang planu yang Dios ang nag̓aëgtëman na pa rin atiing tukaw.
11 Kipurki tinu pa w̓asu ay nag̓akdëk kung unu pay palaksu yang pag̓irisipën yang sasang tau kung bëlag̓an tanya mismung may sadili?
Maning ka tia tung Dios.
Andang pisan ay nakdëk kung unu pay palaksu yang pag̓irisipën na sigun tung kalibrian tang naa,
kung bëlag tung pasanag yang Espiritu Santo ang paglulukutan da kang lag̓i tanira tung pagkadios.
12 Ang pagkatapus numanyan ta yatën,
atiing pagtalig ta tung ni Ginuung Jesus,
yang narisibi ta ya ra mismu yang Espiritu Santo ang bëlag̓an kang lag̓i lug̓ud tung sistimang pag̓andar taa tung kaliw̓utan ang naa.
Ya ray ipinatinir yang Dios tung yatën ug̓ud maintindian ta kung unu pay palaksu yang kalibrian ang naang ipinakdul na ta diw̓aldi tung yatën ëkël tung pagpakugmatay ni Jesu-Cristo.
13 Dispuis kung unu pay kamtangan yang kalibrian tang naa,
ya ka man mismu ay nag̓ipagpakaw̓utu tung mga tau.
Bëlag̓an ang mag̓aning ang ya ngayapayu tung mga taung nag̓adayaw ang matataku,
kung indi,
ya ituldukay tung yëën yang Espiritu Santo.
Kumpurming unu pay itinulduk na tung yëën ya ray yang nag̓ibitalaw ang ya ka ag̓ipaëyangay na tung isipu.
14 Piru yang taung indi nag̓atiniran yang Espiritu Santo,
indi ëngëd magpauyun tung nag̓itulduk yang Espiritu Santo,
ay tung pag̓intindi na,
kalukuan ilëm.
Indi ka ilëm nganing kayanan nang intindiën natëtëngëd ultimu ra ilëm yang Espiritu Santo ay sarang magpasanag tung anya ang para masadsaran na ra rin yang mga bag̓ay ang atia.
15 Piru yang taung nag̓atiniran da yang Espiritu Santo,
ya ray sarang ang magpasadsad kung unu pay nag̓adapatan yang kumpurming nag̓ipasanag yang Espiritu Santo tung anya natëtëngëd tung kalibrian na.
Piru yang tau mismung atia,
kung tag̓aman ang santiarën yang mga aruman nang indi nag̓atiniran yang Espiritu Santo,
indi ra ëngëd mamarësmësan nira kung unu pay palaksu yang pag̓irisipën na pati mga ubra-ubra nang nangimaklu ra.
16 Yang indi nira ipagmarësmës tung anya ay katulad ang pisan tung sasang nabtang tung kasulatan ang anda unung pisan ay taung nag̓aintindi kung unu pay palaksu yang pag̓irisipën ni Yawi.
Anda unung pisan ay mapagsugpat tung anyac.
Piru ta yatën ang kumpurming nag̓atiniran da yang Espiritu Santo,
nag̓aintindian ta ra kung unu pay palaksu yang pag̓irisipën ni Jesu-Cristong nag̓ipasanag tung yatën yang Espiritu Santo.