Nag̓apasanag̓an Na Tanira Ang Midyu Dërëëg̓ën Pa Yang Dating Pagkatau Nirang Mapinagpanadili (3:1-4)
3
Ta yëën,
mga putulu,
atiing asanaw pa tung numyu atiing primiru,
indiaw ra ka ilëm napagpasanag tung numyu ang pariu ka tung pagparasanag̓ënu tung mga tumatalig ang pagpamangulu ra tung Espiritu Santo.
Kung indi,
nagpaintindiaw ra ilëm tung numyu ang yamu pariu ka ilëm tung mga taung këmkëm pa yang dating pagkatau nirang mapinagpanadili.
Ay ya pa ag̓ari,
atii kanay,
bakluamu ra ka ilëm napagtalig tung ni Jesu-Cristo.
Purisu indiamu pa nag̓askë kung unu pay magkatamang buatën ming mag̓usuy tung kalëlyag̓an yang Dios ubin kung unu pay dapat ang indi mi buatën.
Ay yamu maning pa tung mga mamulang gëg̓ësyë pa ka ilëm ang anda pay kaliw̓utan nira natëtëngëd tung mga bag̓ay ang atia.
2 Yang kaalimbawaan na,
maning pa tung pinainëmamu ra ilëm yëën kanay ta gatas.
Indiamu pinapaanu ta anën ang pinaplan gatëd indi mi pa makayanan ta pag̓intindi.
Piru atia pala,
maski nganing asta ra ilëm simanyan,
indi mi pa ka ëngëd makayanan.
3 Ayw̓a indiamu aningënu,
kipurki maning pa tung indiamu pa nag̓apuklut tung pagpakëmkëm mi tung dating pagkatau ming mapinagpanadili.
Yang mga ubra-ubra mi nganing pariu ka ilëm tung mga ubra-ubra yang mga taung indi pa nag̓apagtalig tung ni Ginuu ta.
4 Pariu ra atiang pagpirilik-pilikan mi tung yamën ang mga manigparakaw̓utun ang pag̓aning yang duma asan ang tanya unu sasang tauanu ang yang duma asan pag̓aning kang tanya unu sasang tauan ni Apolosa.
Bëlag ba tia asan da nga bistu ang yang pag̓abuat mi pariu ka ilëm tung pag̓abuat yang mga taung indi pa nag̓apagpagaëm tung ni Ginuu ta?
Yang Panadlëng Ni Pablo Tung Mga Isip Nirang Baliskad Sigun Tung Nira Ni Apolos (3:5-9a)
5 Ayw̓a unu pa pay pagpabëtang mi tung yamën ni Apolos ang yami pay papagkupitinsiaën mi?
Bëlag̓anami impurtanti,
kung indi,
yami parariu ka ilëm ang mga turuw̓ulun yang Dios.
Yami ra ilëm aggamitay nang nagparakaw̓utun tung numyu ang asta nagtalig̓amu ra tung ni Jesu-Cristong nagpatapnay.
Dispuis ta yamën ang durua,
sinagpiaray yang Dios ta yamën yamën ang turnu.
6 Ta yëën,
yang turnuu,
maning pa tung yuuy nagluak.
Ti Apolos tanya,
yang anyang turnu,
maning pa tung yay nagbënyag tung ilinuaku.
Piru yang nagpalawlaw,
ya ra yang Dios.
7 Kapurisu yuung nagluak asta tanyang nagbënyag,
bëlag̓an ang yami yay impurtanti,
kung indi,
yang dapat ang pabilug̓an ta mga isip ming dayawën,
ultimu ra ilëm yang Dios ang yay nagpatubu.
8 Yuung nagluak may tanyang nagbënyag,
bëlag̓an ang mag̓aning ang yamig pagpinaabwatay,
kung indi,
yamig pagsinasaay ta maayën ang sasa ilëm yang pag̓asikad yamën.
Ug̓aring kumpurmi ra ilëm yang bëdlay yamën sasa may sasa,
ya ray pasukatan yang Dios ang magbalës tung yamën ta maning pa tung primyung durug tinlu.
9 Ay yang Dios yay may anya tung yamën ni Apolos ig pagtinaw̓angayami ka tung nag̓ipatuman na tung yamën.
Pati yamu,
yang Dios ya kay may anya tung numyung sam pundaan ang yamu maning pa tung sasang kaluakan na.
Ig yadwa pa,
yamu maning pa tung sasang balay ang nag̓ipakdëng na.
Yang Pagpadëmdëm Ni Pablo Tung Mga Manigpadag̓ën-dag̓ën Duun Ang Yang Pag̓urubraën Nira Sasa May Sasa Insapuën Ka Ëngëd Yang Dios Tung Uri (3:9b-17)
Yang sam bilug pang kaalimbawaan mi,
yamung sam pundaan,
maning pa tung sasang balay ang nag̓ipakdëng yang Dios.
10 Natëtëngëd tung katëngdananung ipiniar yang Dios tung yëën,
pinaktëlaw ra anyang nagpalikëd yang Matinlung Balita natëtëngëd tung ni Jesu-Cristo asan tung numyu.
Yang kaalimbawaanu,
maning pa tung sasang maistru karpintirung nagpasintar yang mga adili ta sasang balay ang yay paniëlan yang intirung lëbat na.
Ang pagkatapus simanyan may duma asan ang pamagtakëd da ta mga kasangkapan tung mga adili yang balay ang atiang ipinagpasintaru.
Ug̓aring kumpurming tinu pay pag̓urubraën asan,
masig̓amlig kung ya pa ag̓ari yang pagtarakërën na ang muya indi mag̓atu tung kabakëd yang paniëlan yang balay.
11 Ay kipurki anday dumang paniëlan ang mapasintaran kung bëlag̓an yang ipinagpasintaru atiing primiru ang ya ra ti Jesu-Cristo mismu kapin da ëngëd natëtëngëd tung pagpalansang na tung krusb.
12 Yang kaalimbawaan yang mga kasangkapan ang nag̓itakëd yang dumang mga manig̓ubra tung mga adili yang balay,
maning pa tung bulawan ubin landuk ang salapi,
ubin mga batung mamaalën ang pinasag̓ic.
Piru yang nag̓itakëd yang duma maning pa tung ayu ubin kirib ubin buluk.
13 Sasa may sasa tung nira mabistu ra kung yang ipiniar yang Dios tung anya ingkëlan na tung matinlung pag̓urubraën u kung ingkëlan na tung bëlag matinlu.
Ay malw̓awan da ka ëngëd tung uras ang ipanginsapu ni Ginuu tang Jesu-Cristo tung mga inubra tang mga tauan nad.
Kipurki yang panginsapu na tung mga inubra ta,
nag̓ipananglit tung sasang apuy ang pumasar ang asan da nga pruibaay kung unu pag kabakëd yang inubra yang sasa may sasa.
14 Kung tinu pang manig̓ubraay ang yang inubra na tung balay indi ra masiruk tung apuy ang atia,
atiay ya ray balësan yang Dios ta sasang maning pa tung primyu nang durung pisan agkatinlu.
15 Piru kung tinu pang manig̓ubraay ang yang inubra na ya ra nga siruk,
atia ya ray mawaraan yang iblës da rin yang Dios tung anya.
Piru bëlag̓an ang mag̓aning ang tanya indi ra tapnayën yang Dios ang ipalibri tung sintinsia na.
Malibri ka,
piru yang kaalimbawaan na maning pa tung sasang taung nalibri tung balay ang nag̓asiruk ang andang pisan ay nabitbit na tung pagkalibri na.
16 Ayw̓a,
nalipatan mi ra ang yamung sam pundaan asan maning pa tung sasang balay ang pag̓atiniran yang Dios ëkël tung Espiritu Santong pinapagtinir na tung numyu?
17 Purisu kung tinu pay magbuat ta ikadiadu yang pag̓atiniran yang Dios ang atia,
tanya si kay bëlsën yang Dios ta ikadiadu na ka gatëd yang pag̓atiniran yang Dios sagradu ig durug kamaal tung anya ang yamu ra ka man mismung sam pundaan.
Nag̓ainambit Si Ni Pablo Yang Pagdarayawën Nirang Subra Tung Mga Manigparakaw̓utun (3:18-23)
18 Kuidaw,
muya anday dumang nag̓adayaan mi,
ya ra ka ilëm yang mga sadili mi.
Ay kung tinu pa asan tung numyu ay paglaum ang tanya mataku ang yang pagkamataku na ya ra ka ilëm ngayapay na tung sistimang pangkaliw̓utan,
maayën pang ipabtang na ra ilëm yang sadili na ang sasang buin-buin ka ilëm ug̓ud asan da nga paëyangay yang Dios ta pagkamataku nang uyun tung anya.
19 Ay yang pagkamatakung nag̓adayaw yang kadaklan ang pamagpaguyud tung sistima yang kaliw̓utan ang naa,
kalukuan ilëm tung pagtërëlëngën yang Dios.
Kipurki isipën mi ra ilëm yang sasang bitala ang nabtang tung kasulatan ang mag̓aning,
“Yang pagkaansianu yang mga matataku ya ka man mismu ay maning pa tung palagsikën ta pakul ang yay nag̓ipaglaang yang Dios tung nira ang asta malambëg tung malain,”
mag̓aning.e
20 Dispuis may sam bilug pang bitalang mas mabuilu ang nabtang ka tung kasulatan ang mag̓aning,
“Nag̓askëan da kang lag̓i yang Dios ang yang palaksu yang pag̓irisipën yang mga matatakung pamagtalig tung pagkamataku nira,
andang pisan ay pakaw̓utun nang para asan da rin mamagkatinir ta kalibrian,”
mag̓aning.f
21-22 Kapurisu,
kumus maning da ka man tia yang pagtërëlëngën yang Dios tung pagkamataku yang mga tau,
ayw̓at magpabantug̓amu pa tung sasang manigparakaw̓utun ang maning mas mataku kay tung kadaklan?
Kipurki maskin tinu pa tung nira,
parariu ra ka ilëm ang nag̓ipakdul yang Dios tung numyung magtaw̓ang,
mag̓ing yuung ti Pablo,
mag̓ing ti Apolos man,
mag̓ing ti Pedro man.
Pati yang bilug ang kaliw̓utan pa,
maskin yang kalayunan mi may yang kamatayën mi,
asta yang pagkarainabu numanyan may yang magkarainabu tung panalungaan,
luw̓us dang ag̓ipakdul yang Dios para tung ikaayën mi.
23 Bëlag̓anamu mga tauan yang ninu pang manigparakaw̓utunayg,
kung indi,
yang may anya tung numyu,
ultimu ilëm ti Jesu-Cristo ig yang may anya tung anya,
yang Dios.