Tanira Ag̓aningën Ni Pablo Ang Dapat Pakëpësën Da Nira Yang Mga Kulu Nirang Pagdakul Dang Masyadu (4:1-7)
4
Kapurisu simanyan yang tamang pagpabëtang yang sasang tau tung yamën ang mga manigparakaw̓utun,
yami mga turuw̓ulun ni Jesu-Cristo.
Pinagpiaranami anyang magparakaw̓utun natëtëngëd tung planu yang Dios ang magpanapnay tung yatën ang mga tau ang yay inëgtëman na pa rin ang tukaw ang pagkatapus numanyan da ilëm ipagpabunayag̓ay na.
2 Dispuis yang sasang taung piniaran,
yang dapat ang ipaita na ang tanya talagang matalig̓an yang nagpiar tung anya.
3 Para tung yëën,
gësyëng bag̓ay ka ilëm kung nag̓asintinsiaanaw ra numyu ang indiaw matalig̓an sigun tung pagkaapustulu,
kipurki yang pitik ang nag̓agamit mi pitik ka ilëm ta taua.
Indiaw ngani pagsintinsia tung sadiliu.
4 Kung tung bag̓ay,
indiaug basulun yang sadiling painu-inuu,
piru bëlag̓an ang mag̓aning ang asanaw ra magluang limpiu.
Ultimu ra ilëm ti Ginuu ang yay nagpiar tung yëën yay sarang ang manginsapu tung yëën kung yuu sasang matalig̓an na u kung indi.
5 Kapurisu ustu ra tiang pagsirintinsiaën mi tung yëën mintras indi pa magkakaw̓ut yang uras ang ipinagtipu yang Dios bilang yang uras ang ipaglëkat ni Ginuu ta.
Ay kung maglëkat da nganing tanya,
ya ray magpabistu tung tanan ang mga pag̓urubraën ta ang indi naskëan ta kadaklan.
Ya ra kay magpabunayag kung unu pa ëngëd ay sinikad ta tung mga pag̓urubraën ta.
Kung mapabunayag na ra nganing tia,
bakluita ra dayaway yang Dios kung ay pay magkabag̓ay ang dayawën na tung yatën sasa may sasab.
6 Yang mga bag̓ay ang atia ipinadapatu tung yamën ni Apolos ang para tung numyu ug̓ud tung yamën ni Apolos ngaitaay mi yang mulidu kung unu pay tamang pag̓urusuyun tung sasang matinlung kunsiu ang indi ta unu pasubraan yang gustung ianing yang napabtang tung kasulatan.
Yadwa pa ang para sasa may sasa tung numyu asan da ka magkëpës yang mga kulu ming pagdakul ang mapinagdapig̓amu tung sasang manigparakaw̓utun ang yay maayën tung numyu ang pagkatapus yang aruman na ya rag lamkuay ming magsawayën.
7 Ayw̓a,
tinu pay nagpabëtang tung numyu ang yamu landaw tung mga kaarumanan ming nag̓alalamku mi?
Ayw̓a,
may numyung sadili ang bëlag̓an ya ipakdulay yang Dios tung numyu?
Ay kumus yamu ka ilëm agpakdulay na,
ayw̓at ya ra ag̓ipagpabug̓alay ming kuinta numyung sadili?
Yang Pagpasunaid Ni Pablo Tung Pagpabëtang Nirang Tag̓a Corinto Tung Mga Sadili Nira May Yang Nag̓abtangan Nirang Mga Apustul (4:8-13)
8 Naa pala,
durung pisan agkatinlu yang nag̓abtangan ming atia.
Midyu pusawamu rang lag̓i tung tanan ang kaayënan ang atiang anday katapus-tapusan na.
Midyu nag̓apakinaw̓angan mi rang lag̓i yang manggad mi duun tung langit.
Midyu paggaraëmënamu rang lag̓i tung kaliw̓utan ang baklu.
Piru ta yamën ang mga apustul ang ayw̓a kaya indiami pa pala pag̓impisang paggaraëmën?
Kisira ra rin ang matuud da ka man ang paggaraëmënamu ra,
ug̓ud kasiraanita ra ka rin ang maggaraëmën.
Atii ra rin!
9 Nag̓apagbitalaw ta maning tia ay kung isip-isipënu ilëm yang nag̓abtangan yamën ang mga apustul,
midyu tung ipinabtangami ra ilëm yang Dios ang pinakaaranëk dang pisan tung tanan ang mga tau.
Yang kaalimbawaan yamën yami maning pa tung mga prisung nag̓aguyuran dang imatayën,
ang yang tanan ang mga mata yang mga tau pati mga angil duun tung langit,
kuinta ag̓isamwag dang tanan tung yamën.
10 Ay yang pagpabëtang yang mga tau tung yamën,
yami unu mga buin-buin ay natëtëngëd tung pangërëngan yamën tung ni Jesu-Cristo.
Piru naa pala,
yamung pinagtuldukan yamën,
yang pagpabëtang mi tung mga sadili mi,
duruamug katataku sigun tung pagsarasaan mi ni Jesu-Cristo.
Yami pag̓atëlënganami yang mga tau ang gëg̓ësyëami ka ilëm ang mga tau.
Piru naa pala yamung pinagpakaw̓utan yamën,
yang pagpabëtang mi tung mga sadili mi ang yamu darakuluamung mga tau.
Naa pala,
yamu,
yang pagpabëtang mi tung mga sadili mi ang yamu ray bag̓ay ang pisan ang garalangën ta mga tau.
Piru ta yamën,
anda ëngëd ang pisan ay panggalang nira tung yamën.
11 Dispuis ang asta ra ilëm nganing simanyan,
nag̓apasaranami ta pasuw̓uk may pakanal.
Maskin yang pag̓araw̓ëlën yamën alang-alang.
Ang kaisan nag̓asalapuami ta pasuntuk.
Yang pagkarabëtangën yamën tung kaliw̓utan paalyu-alyu ra ilëm.
12 Pati yang ulas yamën magbëw̓ëëk tung pagpakabëdlay yamën ang para maitaami ilëm ta pangabui yamën.
Kung palagpakanami ta mga bitalang malalain,
yang nag̓iblës yamën tung pagpalagpak,
ya ra ilëm ag̓ipag̓ampuay yamën ang pakaayënën da yang Dios.
Kung dëëg-dëëg̓anami ta duma,
mag̓agwantaën da ilëm yamën tung mauray ang kinaisipan.
13 Kung mag̓insultuënami ra nganing ta duma,
yang nag̓ituw̓al yamën pulus matitinlung bitala ang tung luay-luay ilëm yang pamalpas yamën.
Ang asta ra ilëm nganing simanyan yang pagtërëlëngën yang mga tau tung yamën,
yami maning pa tung basurang igpërëlëk ubin buling ta sasang taung nagdig̓u,
arangan da ilëm tung pangërëngan yamën tung ni Jesu-Cristo.
Gustu Ni Pablo Ang Tanya Kaw̓ig̓ën Si Nirang Yay Maning Pa Tung Sasang Ama Nirang Pagpaiwan-iwan Tung Nira (4:14-21)
14 Mga putulu,
sinulatanamu ra yeen ta maning tia,
bëlag̓an ang mag̓aning ang para eyakenamu ra yeen,
kung indi,
yamu ilem agpainunukuayung magtadlëngën gatëd agkaw̓ig̓anamu kang lag̓i yëën ang mga anaung sadili ang nag̓agëgmaanu ta duru.
15 Yang ipagkëba-këba yang dëdlaanu ta duru tung numyu ay maskin liniw̓u-liw̓u pa yang pagturuldukanën tung numyu,
piru bëlag̓an dakëlë yang maning pa tung ama mi,
kung indi,
sam bilug ilëm.
Ay ta yëën,
yuu ray nagyaring maning pa tung ama mi gatëd atiing pagpalikëru yang Matinlung Balita asan tung numyu,
pinaktëlaw ni Jesu-Cristong nagpainunuku tung numyu ang asta napagtalig̓amu ra yang mga sadili mi tung anyang nagpatapnay.
16 Purisu yang nag̓aingaluku w̓a tung numyung agkaw̓ig̓ënung mga anaw,
mag̓usuyamu ra w̓a tung mga pasais ang naita mi tung yëën ang ama mi.
17 Ya ra ka man taang ipinagpangayu tung ni Timoteo asan tung numyu ang para magpadëmdëm tung numyu kung unu pay mga pasaisung pagpagaëm tung ni Jesu-Cristo ang ya ra ka man mismu ay nag̓itulduku tung mga tumatalig ang kada sam pundaan tung maskin ay pang banwaay.
Dakulu yang pagtalig̓u tung ni Timoteo ay nagkaw̓ig̓ënu kang sasang anaung sadili ang nag̓agëgmaanu ta duru.
Yadwa pa pagpailala ra ang tanya matalig̓an tung kumpurming unu pay nag̓ipatuman ni Ginuu ta tung anya.
18 Naa pala,
pagkabalita unu yang duma asan ang tanya ray ipaangayu asan tung numyu,
dayun da unung namagpalabwak ang yuu unu indiaw ra magpangaas ang mag̓angay asan ay mag̓ëlëraw ra unu buat ang manalunga tung nira.
19 Piru mangayaw ra ka ëngëd asan tung makali,
basta malëlyag ilëm ti Ginuu ta.
Kumaw̓utaw ra nganing asan,
ya ray pagtuungu tung mga taung atiang masyadug kadakul yang mga kulu nira kung tanira nag̓apaktël dang matuud yang Espiritu Santo u kung maktël ilëm tung pagpalabwak.
20 Kipurki yang pruibang dilëmën tung sasang taung pag̓aning ang tanya unu pagpagaëm tung Dios,
anda tung dilak na ag̓insapuay,
kung indi,
tung mga ubra-ubra na kung tanya matuud dang nag̓apaktël yang Dios ang magtuman yang mga kalëlyag̓an na u kung bëlag.
21 Ta,
unu pay gustu mi tung yëën kung kumaw̓utaw ra nganing asan?
Yamu ray papilikënu kung yamu pasalapuayung bitalaay natëtëngëd tung mga kamali mi u ang yamu paitaayu yang paggëgmaw may yang pagkaamumuu.