Yang Ibinasul Ni Pablo Tung Nira Gatëd Tung Pagparaw̓aya-w̓ayaën Nira Tung Sasang Malalaway Ang Buat Ang Sëlëd Pa Ka Man Tung Nirang Sam Pundaan (5:1-13)
5
Tëëd mi,
nagsarakmu ra yang balita tani ang asan unu tung numyu may sasang pag̓abuat ang durung pisan agkalaway ang maskin tung mga taung anda kang lag̓i ay pag̓intindi nira tung Dios,
indi nganing nag̓abuat nira!
Ay may sam bilug unu asan tung numyu ang ya unu ay pagpakisapën da tung ni inëëy nang kasawa ra rin ni tatay naa.
2 Ang pagkatapus ta numyu,
sigi ra ilëm yang pagdakul yang mga kulu mi,
ag̓ad may sasang nainabu asan tung grupu mi ang maning tiag kalalaway.
Bëlag bang dapat da rin ang yang bag̓ay ang atia ya ikapungaway mi ang pagkatapus yang aruman ming atiang pagbuat yang maning tia,
ya ra rin ay ipapaw̓ig̓ay mi tung pagpurutulan mi?
3-5 Sanu pa indiamu aningënu,
ay kipurki ta yëën tani,
maskin alawiraw ka man tung numyu,
piru ëkël tung kagaëman yang Espiritu Santong pagtinir tung yatën,
kabilangan na,
asanaw ka tung numyu.
Purisu atiing pagkabalitaw,
anday dumang binuatu,
atiang lag̓i,
sinintinsiaanu ra yang taung atiang pagbuat yang maning tia ëkël tung katëngdanan ang ipiniar ni Ginuu tang Jesus tung yëën.
Purisu kung magsaragpunamu si nganing ang sam pundaan ig kabilangan na,
asanaw ra kang papalg̓ud ang parariuita ra kang nag̓apaktël ni Ginuu tang Jesus ang pagmangulu tung yatën,
iintriga ta ra ilëm tung pudir ni Satanas.
Bilang ipapaw̓ig ta ra yang taung atia tung pagpurutulan ming sam pundaan.
Ya ray dapat ang buatën ta ug̓ud duun da nga pakdulay ni Satanas ta mga pinitinsia ang basi pa ra ilëm asan da ka ngaëyangay ta ipanligna na tung pag̓abuat nang atia ug̓ud kung kaw̓utun da nganing yang uras ang ipagsintinsia ni Ginuu ta,
malibri pa ka ëngëd tanya.
6 Kaduma ka tiang pagpabug̓al ming yamu mga matataku ra.
Ayw̓a,
indi mi nag̓askëan ang yang pagpakasalak yang sam bilug makali rang tagbakën ta mansa yang intirung sam pundaan mi?
Katulad da ilëm tung pampalëskag ang maskin gësyë ilëm ang malakët,
sarangan nang palëskag̓ën yang intirung sang masang arina.
7 Kapurisu iplëk mi ra ëngëd yang aruman ming atiang maning pa tung pampalëskag yang pag̓abuat na ang katulad ka tung pamlëk yang mga Judio tung pampalëskag ang nag̓aëpëd tung mga balay nira baklu ra nga silibraay nira yang pista nirang atiang pag̓aningën ang Taklibb.
Ya ray dapat ang buatën mi ay ug̓ud mapakbungamu si tung arinang baklung minasa ang andang pisan ay lakët nang pampalëskag.
Bilang yang sam pundaan ming atia,
maplëkan da ta sasang taung pagbuat ta malaway.
Asan da magbalik tung dating pagkabëtang nang limpiu ang ya ray linuaan yang pagpakugmatay ni Jesu-Cristo.
Ay katulad ka tung mga Israel ang ipinapuklut da tung pagpakirëpën nira duun tung Egipto atiing pagdasag nira tung mga karniru,
yamu,
ya ka.
Atiing pagtalig mi tung ni Jesu-Cristo,
ipinapuklutamu ra ka anya tung pagpakirëpën mi tung pagpakasalak mi natëtëngëd ilëm tung pagpakugmatay na ang asan da nga pakbungay na yang karnirung idinasag nirang tukawc.
8 Purisu katulad ka tung nirang namamlëk tung tanan ang pampalëskag,
yamu ya ka.
Bilang iplëk mi ra ka yang tanan ang malalain ang pagtirimaën pati yang maskin unu pang ubra-ubraay ang malain.
Katulad ka tung nira ang yang tinapay ang pinangan nira pulus ilëm yang indi pinalëskag,
yamu ya ka.
Bilang yang pirming sikarën mi ang pulus ilëm tung limpiung pisan yang pag̓urubraën mi tung pagtërëlëngën yang Dios ang andang pisan ay lakët nang danyu ubin pagpaita-ita ilëm.
Yang tanan ang nag̓ibitala mi kaministiran ang matalig̓an ta duma ang pulus matuud.
9 Atiing pagsulatu tung numyu tan taa rad,
inaningamu ra yëën ang indi mi ra saptën ang pakignunutan yang mga taung pangumbaw̓ay ubin pangunlalii.
10 Yang inaningung atii indi ëngëd nadapat tung bëlag̓an mga tumatalig ang pagbuat ta malalaway ang maning tia ubin kuw̓ali panalënsën tung tanan ang bag̓ay ang asta kalawan da ilëm nira yang mga aruman nira ubin pagtuu tung mga bultung nag̓ipakli nira tung matuud ang Dios.
Ay kipurki kung maning tii rin yang gustuung ianing tung isinulatung atii,
intunsis kaministiran da ka rin ang magliitamu ra ilëm ang pisan taa tung kaliw̓utan ang naa ang para malikayan ming pisan yang mga taung mga maning tia.
11 Kung indi,
yang gustuung ianing tii,
yang indi mi saptën ang pakignunutan ya ra yang sasang taung pagpailala ang tanya unu sasa kang putul ming tumatalig tung ni Ginuung Jesus ang pagkatapus tanya pangumbaw̓ay ubin pangunlalii ubin kuw̓ali panalënsën tung tanan ang bag̓ay,
ubin pagtuu tung mga bultu,
ubin pagpanrangga tung dëngëg yang mga aruman na,
ubin tarainëm,
ubin pagpangalaw ta bëlag̓an anya.
Maskin tung pagpakigsaru,
likayan mi ka ëngëd.
12-13 Ag̓aningënamu ra yëën ta maning tia ay unu pa pay kalalabtën tang magpadapat ta disiplina tung mga taung indi pa nganing nag̓apalg̓ud tung pagpurutulan ta?
Ultimu ilëm ang magpadapat ta parusa tung nira,
ya ra yang Dios.
Yang mga aruman mi tung kaklëran yamu ray may kalalabtën ang magpadapat ta disiplina tung nira.
Kipurki pamaridëngdëngan mi ta maayën yang sasang kalalangan yang Dios tung mga tauan na atiing tukaw pang mag̓aning,
“Kung tinu pay pag̓ëngëd ang pagbuat ta malain,
ipapaw̓ig mi ra ëngëd tung grupu mi,”
ag̓aaninge.