Yang Nag̓ibasul Ni Pablo Tung Nira Natëtëngëd Tung Pagdarangëpën Nira Tung Mga Usgadu (6:1-11)
6
Kung may sam bilug asan tung numyu ang may agrabiadu na tung aruman nang tumatalig,
ayw̓a,
magkatama w̓asu ang magpangaas da ka ëngëd ang magdimanda tung sasang usgadung bëlag̓an ka pa man tumatalig?
Bëlag ba ang yang dapat ang papagbistaën na ya ra yang mga aruman nang binuat da ka yang Dios ang mga kinasakpan nang sadili ang katulad ka tung anya?
2 Ayw̓a,
indi mi nag̓askëan ang tung uri,
ta yatën ang binuat da yang Dios ang mga kinasakpan nang sadili,
talig̓anita ra anyang magbista tung mga tau ang kasiraanita ra ka ni Ginuung Jesus?
Ig disir,
kung tung numyu ipabistaay na yang mga tau tung uri ta kaldaw,
ayw̓a,
simanyan indiamu ka w̓asu kumayang magbista tung mga kaputulan ming may mga kasu-kasu nirang mga maning ka ilëm tiang gërëg̓ësyëng bag̓ay ilëm?
3 Ayw̓a,
indi mi ka nag̓akdëkan ang pati yang mga angil,
ya ra kay ipabista na tung yatën tung uri?
Ya pa yang mga kasu-kasung atiang nag̓adapat ilëm tung pagpangabui mi taa tung kaliw̓utan ang naa indi mi pa w̓asu masarangan ang arigluën?
4 Purisu kada magkatiniramu ra nganing ta mga kasung mga maning tia,
ayw̓a,
idangëp mi pa ka ëngëd tung mga usgadung indi nganing agkaw̓ig̓ën ming mga putul ming mga tumatalig?
5 Ag̓aningënamu ra yëën ta maning tia ay ug̓ud asanamu ra ngaëyangay ta ëyak mi.
Abaa,
ayw̓a,
talagang andang pisan ay putul mi asan ang mawayang ta kinaisipan ang maskëng magbista tung duruang magputul tung ni Ginuu tang pag̓aasuntuan?
6 Ang pagkatapus atia pala,
mismu yang duruang magputul tung ni Ginuu ta,
ya pay pag̓asuntuan duun ka pa man mismu tung katalungaan yang sasang usgadung bëlag̓an ka pa man masigkatumatalig nira?
7 Abaa,
tung pag̓arasuntuan ming atia,
talagang durung pisan agkadakul yang kapirdian yang pagpurutulan ming sam pundaan.
Indi w̓a,
mas maayën pang magpalëpësamu ra ilëm,
maskin madayaanamu pang kalawan ta sasang may kantidad kay tung magdangëpamu tung usgadung magdimanda tung putul ming panlëpës tung numyu?
8 Ang pagkatapus yang numyu kang atia,
yamu mismu ay pag̓intra pagpanlëpës ig pagpangalaw ang anday dumang nag̓adarali mi,
kung indi,
mismu yang mga putul mi ka pa man tung ni Ginuu ta!
9-10 Ayw̓a,
indi mi nag̓askëan ang yang mga taung kumpurming pagpadayun ka ëngëd tung pagburuatën nira ta maskin unu pang malainay,
indi ra ka ëngëd paintraën yang Dios tung paggaraëmën na tung uri?
Purisu indi mi ilëm dayaën yang mga sadili mi.
Kipurki kung tinu pay kumbaw̓aynën ubin kunlaliiën,
kung tinu pay pagtuu tung mga bultu,
kung tinu pay paglimbung tung kasawa na,
kung tinu pay pagkakasawa-kasawaan ang lalii may lalii,
kung tinu pay kuw̓ali panalënsën tung tanan ang bag̓ay,
kung tinu pay tarainëm,
kung tinu pay pagpanduminar,
kung tinu pay pagpangalaw ta bëlag̓an anya,
anday inaning tung nira,
indi ra ka ëngëd paintraën yang Dios tung paggaraëmën na tung uri.
11 Atii kanay ang indiamu pa nag̓apagtalig tung ni Ginuung Jesus,
maning kang pisan tia yang mga pag̓urubraën mi.
Piru numanyan pinagpunasanamu ra yang Ampuan tang Dios tung mga kasalanan ming mga maning tiang durug kaligna ang maning pa tung pinagdig̓uamu ra anya.
Pinagpabag̓ayamu ra ka ni Jesu-Cristo tung anya ang para liw̓ianuamu rang magpalëngët tung anya.
Pinag̓usgaranamu ra ka nganing anyang saluamu rang pisan tung pagtërëlëngën na.
Yang tanan ang atiang pinagbuat na para tung numyu,
duun da ipatiëlay na tung pagpakugmatay ni Ginuung Jesu-Cristo,
duun da ka ipapanaway na tung pag̓urubraën yang Espiritu Santo ang yay nangimaklu tung mga kinaisipan mi ang asta may pinakaw̓ut na ra ka man ang matinlu tung mga pag̓urubraën mi.
Yang Pamarik Ni Pablo Tung Katadlëngan Yang Duma Ang Anda Unu Ay Baling Mangumbaw̓ay (6:12-20)
12 Midyu may katadlëngan ta duma may ruma asan ang kumus napagtalig da unu tung ni Ginuung Jesus,
suiltu ra unung magbuat yang kumpurming unu pay nag̓alëlyag̓an nirang buatën.
Tung bag̓ay,
tama ka rin tii.
Piru bëlag̓an ang mag̓aning ang yang tanan ang kalëlyag̓an tang buatën ikaayën ta ubin ikaayën yang mga arumanu.
Maskin yuu puidi kang aningënu ang maskin unu pang pag̓urubraënay suiltuaw,
piru indiaw ra ka ëngëd malëlyag ang may sasang buatënu ang muya asanaw ra ka magamën ang magpakirëpën si.
13 May katadlëngan pa yang duma ang pag̓inatuay unu yang pamangan ta may yang tian ta.
Dispuis tung uri ta kaldaw unu parariu ka ilëm unung pëlkan yang Dios ta pangaministiran nira.
Kung tung bag̓ay,
tama ka rin tii.
Piru kung natëtëngëd tung tinanguni tang naang bilug,
iugtulu tung numyu,
yang katuyuan na bëlag̓an ang mag̓aning ang para gamitën tang mangumbaw̓ay,
kung indi,
ang para gamitën tang ipagpadëngëg tung ni Ginuung Jesus.
Ig tanyang Ginuu ta yay pagsuitu tung mga tinanguni tang naa ang kumpurming unu pay mga kaministiran na ay tanya ra ilëm ay pag̓ingalukan ta.
14 Dispuis pinabungkaras da nganing yang Dios ti Ginuu ta pati ita ya kay buatën na tung yatën ëkël tung kagaëman na.
15 Ayw̓a,
nag̓alimung-limung da tung mga isip mi ang yang mga tinanguni ming bilug yay mga parti-parti yang tinanguni mismu ni Jesu-Cristo?
Ayw̓a,
magkatama w̓asu tung mga isip mi ang yang tinanguni tang naang binuat da ni Ginuung Jesus ang mga parti-parti yang tinanguni na mismu,
ya pay kalawën ta tung anyang ipakiugpu tung sasang baw̓ay ang pagpagamit ang para tanya si ay may pudir?
Indi ra ka ëngëd ang pisan magkatama tia!
16 Ayw̓a,
indi mi ra nag̓adëmdëman ang kung tinu pay magpakiapën tung sasang baw̓ay ang pagpagamit,
duun da tanira magsasaan ta tinanguni may tinanguni?
Kipurki maski tung kasulatan nganing nabtang da kang lag̓i ang yang durua unu mag̓ing sa nga tinangunian da ilëm taniraa.
17 Piru kung tinu pay pagpakigkapulit tung ni Ginuung Jesus,
pagsasaan da ka tanira ta kinaisipan may kinaisipan.
18 Purisu likayan ming likayan yang bisyung atiang pangumbaw̓ay.
Ay kipurki yang kasalanan ang atia aparti tung kadaklan ang mga kasalanan ang nag̓abuat ta sasang tau.
Kipurki ëkël tung kasalanan ang atia,
yang tinanguni ming sasa ra rin ang parti-parti yang tinanguni mismu ni Ginuung Jesus ang para tung ikadëngëg nab,
asan dag kalaway mi tung anyang iunungay tung tinanguni yang baw̓ay ang atia ang tanya si ay may pudir.
19 Kung indiamu ëngëd mag̓impurmi tung nag̓ianingung atia,
ayw̓a,
indi mi nag̓adëmdëman ang yang mga tinanguni ming atia maning pa tung sasang balay ang sagradu ang pag̓atiniran yang Espiritu Santong ipinagpatinir yang Dios tung numyu?
Yang gustu nang ianing,
bëlag̓an dang yamuy may pudir asan,
kung indi,
yang Dios mismu,
ya ray may anya.
20 Ag̓aningënamu ra yëën ang anda ray pudir mi tung tinanguni mi ay natëtëngëd ginawaramu ra nganing yang Dios ta may kantidad nang durung pisan agkamaalc.
Purisu numanyan kumus tanya ray may anya tung mga tinanguni mi,
dapat ang gamitën mi tung kumpurmi ilëm ang ikadëngëg na.