Nag̓ipaintindi Ni Pablo Kung Ayw̓a Maayën Pang Magkatinir Ta Kasawa Yang Sasang Tumatalig (7:1-9)
7
Numanyan kung natëtëngëd tung mga bag̓ay ang nagkarasambit mi tung sulat ang ipinaëkël mi tung yëën,
maning taa yang maaningu.
Ag̓aaning yang duma asan ang maskin pagkakasawaan da unu yang sasang lalii may yang sasang baw̓ay,
midyu maayën pa unu ang yang lalii indi ra magpakiapën tung kasawa naa.
2 Piru may kaliwag̓an na tia,
ay kipurki kung yay panuntan,
muya puiding duun da nga guyuray yang laliing atiang magbuat ta malalaway tung dumang baw̓ay.
Purisu kaministiran laliig baw̓ay masigpadayun yang pag̓apënan nirang magkasawa.
3 Yang sasang lalii ubligadung magpakdul tung kasawa na yang magkatamang ëlatan na tung anya,
pati yang baw̓ay,
ya ka,
ubligadu kang magpakdul tung kasawa na yang magkatamang ëlatan na ka tung anya.
4 Sigun tung pag̓apënan nirang magkasawa,
yang baw̓ay bëlag̓an ang yay may gaëm tung sadiling tinanguni na,
kung indi,
yang kasawa na,
yay may gaëm asan.
Maning ka tia tung lalii,
bëlag̓an ka ang yay may gaëm tung sadiling tinanguni na,
kung indi,
yang kasawa na,
yay may gaëm asan.
5 Ustu ra tiang pag̓inëgtëmay ming magkasawa natëtëngëd tung bag̓ay ang atia,
puira ilëm ang may kakësënan ming magkasawa ang indiamu ra kanay magdalanan natëtëngëd may durug kaimpurtanting ipag̓ampu mi ang dapat ang pabilug̓an mi ra kanay ta mga isip mi.
Piru kung tapus da nganing yang pag̓arampuën mi,
kaministiran ang idayun mi ëngëd yang pagdalanan ming magkasawa.
Ay kung pumanaw pa ta mabuay-w̓uay,
muya,
kung indiamu ra kumayang magsuspindi tung mga sadili mi,
malpës da ka ilëm ang tuksuënamu ra ni Satanas ang para magbuatamu ra ta malalaway tung duma ang bëlag̓an kasawa mi.
6 Piru maskin ag̓aningënamu ra yëën ta maning tia ang indiamu ra kanay magdalanan,
bëlag̓an ang mag̓aning ang yay sasang urdinu tung numyu,
kung indi,
sasang nag̓ilug̓utu ilëm.
7 Kung tung bag̓ay,
tung yëën ilëm,
gustuu rin ang yamung tanan magkapariu ka tung yëën ang sinsilyung tinanguni.
Piru,
maskin nag̓apagbitalaw ta maning tia,
sasa may sasa tung yatën,
sinagpakdulay yang Dios ta anya-anyang linya.
Purisu masig̓usuy.
Yang duma pinakdulan na ta linya nirang maskin indi ra mangasawa ubin magpakasawa,
bëlag maliwag tung nira.
Ig yang duma pinakdulan na ra ka ta linya nirang magkatinir ta kasawa.
8 Tung sulat mi,
tinalimaanaw numyu natëtëngëd tung mga aruman ming nagkarabalu ra kung unu pay maayën ang buatën nira.
Yang sarang ang matuw̓alu,
kung kayanan ilëm nira,
maayën pang magpadayun tung pagkasinsilyu nirang atia ang katulad ka tung yëën.
9 Piru kung midyu indi ra nganing mangaëgtëm tung mga sadili nira,
tay puis,
kaministiran ang mangasawa si ilëm ubin magpakasawa si ilëm.
Nag̓asambitu tia ay kipurki mas maayën ang magkatinir si ta kasawa nira kay tung magpadayun tung pagkasinsilyu nira ang pirmi ra ilëm ang nag̓abtëng yang kalëlyag̓an yang tinanguni nirang durug puirsa ang midyu tung apuy.
Nag̓ipadëmdëm Ni Pablo Ang Yang Sasang Tumatalig Indi Ëngëd Magpakiblag Tung Kasawa Na (7:10-11)
10 Numanyan kung natëtëngëd tung may mga kasawa asan ang parariung mga tumatalig,
may nag̓ipatumanu tung nira.
Piru bëlag̓an yëën ang nag̓ipatuman,
kung indi,
ya ra ilëm ag̓ipalatayu yang kalalangan ni Ginuung Jesus mismu atiing taa pa rin tung kaliw̓utan ang naab ang yang sasa unung baw̓ay indi magpakiblag tung kasawa na.
11 Piru kung disgrasia mainabu ra ka ëngëd ang may sasang baw̓ay asan ang magpakiblag da ka ëngëd tung kasawa nac,
dapat ang magpadayun tung pagkasinsilyu nang atia,
u kung indi,
magpakigkësën da tung kasawa na ang para mag̓inulikay ra tanirang durua.
Pati nganing yang sasa unung lalii,
dapat kang indi magpakiblag tung kasawa nad.
Nag̓akunsiuan Ni Pablo Yang Mga Tumatalig Ang May Kasawa Nirang Indi Pa Nag̓apagtalig (7:12-16)
12 Numanyan kung natëtëngëd tung kadaklan,
maning taa yang maaningu,
maskin anda ka man ay kalalangan ang ipinakdul ni Ginuung Jesus natëtëngëd tung bag̓ay ang naa.
Kung may sasang tumatalig ang lalii ang yang kasawa na indi pa nag̓apagtalig tung ni Ginuung Jesus,
kung uyun tung isip yang baw̓ay ang magkadayunan yang pagkakasawaan nira,
dapat ang indi na ra pakiblag̓an.
13 Ya ka kung may sasang tumatalig ang baw̓ay ang yang kasawa na indi pa ka nag̓apagtalig,
kung uyun tung isip yang lalii ang magkadayunan yang pagkakasawaan nira,
dapat kang indi na ra ka pakiblag̓ane.
14 Ag̓aningënamu ra yëën ta maning tia,
ay atiing pagtalig yang sasang baw̓ay tung ni Ginuung Jesus,
maskin indi pa nag̓apagtalig yang kasawa na,
asan da nga pabag̓ayay yang Dios yang pagkakasawaan nirang durua ang para mag̓ing limpiu tung pagtërëlëngën na.
Pariu ka yang laksu na tung sasang tumatalig ang lalii.
Atiing pagtalig na tung ni Ginuu ta,
maskin bëlag̓an pang tumatalig yang kasawa na,
asan da ka nga pabag̓ayay yang Dios yang pagkakasawaan nirang durua ug̓ud mag̓ing limpiu ra tung pagtërëlëngën na.
Ay kung bëlag̓an matuud tia,
intunsis yang mga ana nira anda ra rin ay kalalabtën yang Dios tung nira.
Piru tung kamatuuran,
may kalalabtën na ra ka man tung nira,
ëkël tung ginikanan nirang sam bilug ang tumatalig tung ni Ginuu ta.
15 Piru kung alimbawa yang bëlag̓an tumatalig may gustu nang magpakiblag tung kasawa nang tumatalig,
paw̓ayaan da ilëm asan tung pagpakiblag na.
Ay tung maning tiang bag̓ay,
yang sasang tumatalig,
laliig baw̓ay,
luas da tung kalalangan yang Dios ang yang duruang magkasawa dapat ang indi magbëlag̓an.
Ug̓aring maskin pang maning da tia,
kung may sarang pang mabuat yang sasang tumatalig ang basi pa ra ilëm magdayun pa ka ëngëd yang pagkakasawaan nirang durua,
ya ray buatën naf.
Unu pay pulut nang ita bintëng da yang Dios ang mag̓ing mga kinasakpan nang sadili,
kung indi,
ang para mag̓uruyunanita rang pirmi yang mga aruman tag?
16 Ay kipurki ta yawang sasang tumatalig ang baw̓ay,
kung magdayun yang pagkakasawaan ming durua,
indi mu ilëm maskëan kung muya,
natëtëngëd tung nuyu maëklan da ka ëngëd yang isip yang kasawa mu ang asta magtalig da ka yang sadili na tung ni Ginuung Jesus ang magpatapnay.
Pati ta yawang sasang tumatalig ang lalii,
maning ka.
Indi mu ka ilëm makdëkan kung muya natëtëngëd tung nuyu maëklan da ka ëngëd yang isip yang kasawa mu ang asta magtalig da ka tung anyang magpatapnay basta magdayun ilëm yang pagkakasawaan ming durua.
Kung Magpasirung Yang Sasang Tau Tung Ni Ginuung Jesus, Anda Ëngëd Ang Pisan Ay Ministir Ang Umanën Na Pa Yang Dating Nag̓abtangan Na (7:17-24)
17 Ug̓aring maskin pinakdulanu ra ka man ta libri yang sasang putul ta kung alimbawa gustu yang kasawa nang bëlag̓an tumatalig ang magpakiblag tung anyah,
piru yang linyang talagang gustuu ëngëd ang usuyun ming tanan asan ya ra taa.
Sasa may sasa tung yatën ang mga tumatalig,
kumpurming unu pay nabtangan tai,
atiing pagbëtëng yang Dios tung mga isip tang magpatapnay tung ni Ginuung Jesus,
bëlag̓an ang yay tag̓aman tang umanën,
kung indi,
ya ray pasalamatan ta tung anyang padayunan.
Aningën ta ang ya ra kay pagkabëtang ang ilinug̓ut ni Ginuu ta bilang tirnu ta atiing pagtapnay na tung yatën ug̓ud asanita ra ilëm mag̓usuy tung nag̓auyunan na.
Maning ka tia ngani yang nag̓iurdinu tung kada sam pundaan yang mga tumatalig tung maskin ay pang banwaayj.
18 Alimbawa kung may sasang tumatalig ang atiing pagbëtëng yang Dios tung isip na,
may tanda rang lag̓i ang binuat tung tinanguni na,
indi na ra tag̓aman ang ipaludas yang tandang atiak.
Ya ka kung may sasang tumatalig ang atiing pagbëtëng yang Dios tung isip na,
anda kang lag̓i ay tanda tung tinanguni na,
indi ra ka magpabuat.
19 Kipurki andang pisan ay kalalabtën na tung kaampiran yang sasang tumatalig tung Dios kung tanya binuatan ta tanda u kung anda.
Kung indi,
gustu ilëm yang Dios ang tanya magtuman yang kumpurming nag̓ipatuman na tung anya.
20 Purisu sasa may sasa tung yatën,
kumpurming unu pang pagkabëtangay ta atiing pagbëtëng yang Dios tung mga isip tang magpatapnay tung ni Ginuung Jesus,
ya ra ilëm tiay padayunan ta.
21 Alimbawa yawa sasang kirëpën ta sasang tau atiing pagbëtëng yang Dios tung isip mu.
Indi mu ra ka tia pabëgbëg̓an ta kulu mu.
Ug̓aring ilëm,
kung alimbawa pakdulana ra yang ag̓alën mu ta lugar mung malibria ra tung pagkakirëpën mu,
ay tia,
indi mu ra patakliw̓ën.
22 Yang sasang kirëpën,
yang indi na ipagpabëgbëg ta kulu na tung pagkakirëpën na,
ay atiing pagbëtëng yang Dios tung isip na,
duun da nga papuklutay tung pagpakirëpën na tung kursunada nang magpakasalak.
Pati yang sasang tumatalig ang bëlag̓an kang lag̓ing kirëpën atiing pagbëtëng yang Dios tung isip na,
yang kaalimbawaan na numanyan tanya maning pa tung pagpakirëpën da tung anya.
23 Yamung tanan asan,
mag̓ing kirëpën kag bëlag,
parariuamu rang pinaggawad na ta may kantidad nang durung pisan agkamaall.
Purisu ustu ra tiang pagpaëkël mi yang mga isip mi tung dumang pagkunsiu tung numyu ang bakluamu ra unu ngauyunay yang Dios ang mas,
kung inuman mi ra yang dating pagkabëtang mi buat.
Ay muya asanamu ra nga patalangay nira tung pagpakirëpën mi ta ustu tung nanggawad tung numyu.
24 Purisu mga putulu,
sasa may sasa tung numyu,
kumpurming unu pay nabtangan mi atiing pagbëtëng yang Dios tung mga isip ming magtalig tung ni Ginuung Jesus,
ya ra ilëm tiay padayunan mi,
ay tia ya ëngëd ay uyun ang pisan tung pagtërëlëngën yang Diosm.
Nag̓ipaintindi Ni Pablo Kung Ayw̓a Maayën Ang Magpadayun Yang Duma Tung Pagkasinsilyu Nira (7:25-28)
25 Numanyan kung natëtëngëd tung tinalimaan mi tung yëën natëtëngëd tung mga aruman mi asan ang anda pay kasawan,
kung tung bag̓ay,
anday katuw̓ulan ang ipinakdul ni Ginuu ta tung yëën ang para ipatumanu ra rin tung numyu.
Piru yang sarang ang mataw̓angu tung numyu,
ya ra ilëm yang yëën ang sadiling upinyun bilang sasang taung puiding matalig̓an gatëd inildawanaw ra ni Ginuung Jesus ang tinapnay ang nunut da ka ta pagpiar na tung yëën yang katëngdananu.
26 Purisu ya ra taa yang sarang ang ikunsiuu tung numyu.
Natëtëngëd tung panimpu tang naang durug liwag,
maayën pa ang yang sasang lalii padayunan na ra ilëm yang nag̓abtangan na.
27 Kung may kasawa na ra,
indi magsikad ang magpakiblag tung anya.
Kung anda pay kasawa na,
indi mandilëm ta pangasawaën na.
28 Piru kung talagang mangasawa ra ka ëngëd,
indi ka pagpakasalak tung Dios.
Pati yang sasang darala,
kung magpakasawa,
indi ka pagpakasalak.
Ingkasu ilëm,
yang duruang magkasawa durung mga kaliwag̓an ang talungaën nira natëtëngëd ka man tung panimpu tang naang durug liwag ig gustuu ang basi pa ra ilëm yay malikayan nira.
Yang Isplikar Na Natëtëngëd Tung Isinulat Na Tung (7:29-40)
29 Yang gustuung ianing tia,
mga putulu,
kumus diput da ilëm yang timpung ipanirbian ta tung ni Ginuu ta,
mintras indi pa nag̓alkat ti Ginuung Jesus,
kaministiran ang yang mga bag̓ay-w̓ag̓ay taa tung kaliw̓utan ang naa bëlag̓an ang ya ipalusuay ta.
Ya ra ka man taang nag̓ipag̓aningu tung numyung mga lalii ang may mga kasawa ang yang pagkakasawaan ming atia,
indi mi ilëm pagamënan ta mga isip ming subra ay muya asan da nga pabaya-w̓ayaay mi yang pagprusigir mi tung nag̓ipaubra ra rin ni Ginuu ta tung numyu.
30 Maskin ag̓ampayanita ra ta kapupungawën tang duru ang nunut da ka ta pagtarangitën ta,
indi ta ra ilëm pabilug̓an ta isip tang alus pa ilëm ya ra ilëm tiay nag̓aisip ta,
kung indi,
ipabtang ta ra ilëm ang midyu tung anda kay pagpungawan ta.
Maskin ag̓angëpënita ra ta kasadyaan tang duru,
indi ta ra ilëm pagamënan ta isip tang masyadu,
kung indi,
ipabëtang ta ra ilëm ang midyu tung anda kay pagpakasadyaan ta.
Kung mangalangita ra nganing ta maskin unu pang bag̓ayay,
ipabëtang ta ra ilëm ang midyu tung anda ra kay inalang ta ang para indi ta ra mapabaya-w̓ayaan yang nag̓ipaubra ni Ginuu ta tung yatën.
31 Bilang kada magbuatita ta maskin unu pang bag̓ayay ang yay kadagmitan ang nag̓abuat yang mga tau sigun tung pagpangabui nira taa tung kaliw̓utan ang naa,
indi ta ra ilëm pagamënan ta mga isip ta ang alus pa ilëm ya ra ilëm tiay nag̓atalunga ta,
nusias mapabayaw̓ayaan ta yang nag̓ipaubra ni Ginuu ta tung yatën.
Tutal yang sistima yang kaliw̓utan ang naa pati yang tanan ang pag̓urubraën taa,
magkaraparëng da ka ilëm.
32 Dispuis mintras taawamu pa tung kaliw̓utan ang naa,
yang gustuu para tung numyu ang anday bëgbëg yang mga kulu mi kung yamu magkakasawaan da u kung indi pa.
Yang sasang laliing anday kasawa na,
bilug yang pag̓intindi tung nag̓ipatuman ni Ginuu ta tung anya kung ya pa ag̓aring mapag̓usuy tung nag̓auyunan na.
33-34 Yang sasang laliing may kasawa,
yang kadagmitan ang nag̓intindiën na,
ya ra yang mga bag̓ay-w̓ag̓ay tung kaliw̓utan kung ya pa ag̓aring mapagbuat ta mauyunan yang kasawa na.
Purisu durua rang bag̓ay ang nag̓intindiën na.
Gustu nang manirbian tung ni Ginuu ta ig gustu na kang mag̓asikasu tung kaministiran yang kasawa na.
Yang sasang tumatalig ang baw̓ay ang anday kasawa na ubin yang sasang darala pa,
bilug yang pag̓intindi tung nag̓ipatuman ni Ginuu ta tung anya.
Yang gustu na iintriga na ra yang isip nang bug̓us tung anya ang nuntan da ka yang tinanguni na.
Yang baw̓ay ang may kasawa,
yang kadagmitan ang nag̓intindiën na,
ya ra yang mga bag̓ay-w̓ag̓ay tung kaliw̓utan kung ya pa ag̓aring mapagbuat ta mauyunan yang kasawa na.
35 Ag̓aningënamu ra ilëm yëën ta maning tia,
bëlag̓an ang mag̓aning ang para yamug suspindiayu tung mga kalëlyag̓an mi,
kung indi,
gustuu ilëm ang magtaw̓ang tung numyu ang para maëklan mi yang pagpangabui mi tung magkabag̓ay ig bilug ang pisan yang mga isip mi tung nag̓ipatuman ni Ginuu ta tung numyu ang anda ray bëgbëg yang mga kulu mi.
36 Alimbawa may sasang amaën asan ang may ana nang darala ang nag̓alëlyag dang magpakasawa.
Pag̓atëlëngan na ang midyu amat-amat dang pagrusaw ra yang pagkapustura na.
Purisu kung indi na ilyag ang pakasawaan,
muya may mainabung makakaëyak.
Tay puis,
kung ministirën da ta sasang lalii,
maayën pang ilyag na ra ilëm yang ana na tung anya.
Bëlag̓an kang mag̓aning ang yay kasalanan na tung Dios.
37 Ug̓aring kung yang may ana,
binilug na rang pisan yang isip nang indi na ra ilyag yang ana na natëtëngëd anda kay gustu yang ana na,
ig bëlag ya nga rëgsanay ta duma tung disisiun nang atia,
ig liw̓ianu kang magtuman yang kumpurming nag̓alëlyag̓an na para tung ana na ig pinagtimbang-timbang na ra kang lag̓i ta mupia tung isip na,
matinlu kang indi na ra ka ipakasawa.
38 Ig disir,
yang sasang amaën ang nag̓alëlyag dang pakasawaan yang ana nang darala pati yang sam bilug ang indi,
parariung matinlu yang disisiun nirang durua.
Ug̓aring,
kung isip-isipënu ilëm yang pagkarainabung durug kalain tung panimpu ta numanyan,
midyu maayën-ayën pa ta gësyë yang disisiun yang sam bilug ang indi na ra ilëm ilyag yang ana nao.
39 Kidispuis pa kung natëtëngëd tung sasang baw̓ay ang may kasawa,
mintras bui pa yang kasawa na,
dapat ang indi ra maglaum ang mas magtinlu yang panirbian na tung Dios kung alimbawa magpakiblag da tung kasawa na.
Piru kung disgrasia mapatay yang kasawa na ig malëlyag sing magpakasawa,
atia,
liw̓ianu rang magpakasawa si kang uman tung kumpurming nag̓alëlyag̓an na,
basta aruman na kang tumatalig.
40 Piru tung yëën ilëm ang pag̓intindi,
kung padanayan yang balung atia yang pagkasinsilyu na,
midyu mas pang pakaayënën yang Dios ang pasadyaën tung pagpabilug na yang isip na tung panirbian na tung anya.
Ig karkuluu ilëm ang pati yuu pagsinasaayami ka yang Espiritu Santo ta kinaisipan may kinaisipan natëtëngëd tung bag̓ay ang naang tinalimaan mi tung yëën.