Yang Itinuw̓al Ni Pablo Tung Tinalimaan Nira Natëtëngëd Tung Pagparanganën Nira Yang Karning Isinag̓ud Tung Mga Bultu (8:1-13)
8
Numanyan,
kung natëtëngëd tung karning nag̓isag̓ud yang duma tung sasang bultu,
nag̓askëanu yang nag̓ianing yang duma asan ang ta yatën unung tanan ang mga tumatalig,
nag̓aintindiita ra unu sigun tung bag̓ay ang atia.
Ug̓aring yang kadagmitan ang nag̓ainabu,
yang nag̓aintindian ta yay makaling pagdakulan yang kulu ta.
Piru kung nag̓apaggëgmaita ta ustu tung mga kaarumanan ta,
durung kalëlyag tang magtaw̓ang tung nira ang para mas pang këmëët yang pagtaralig̓ën nira tung ni Ginuu ta.
2 Kung tinu pay pagtalig tung sadili na ang tanya talagang nag̓aintindi ra,
asan da ta taung anda pay naërëm na tung dapat da rin ang maintindian na.
3 Piru kung tinu pay nag̓askë rang maggëgma ta ustu tung mga kaarumanan na,
nasapung da tung pagkaintinding magkatamang pisan tung pagtërëlëngën yang Diosa.
4 Purisu kung natëtëngëd tung pagparanganën yang karni ta ayëp ang atiang nag̓isag̓ud tung mga bultu,
kung tung bag̓ay,
katulad tung nag̓ianing mi,
nag̓askëan ta ka man ang yang sasang bultu andang pisan ay kapulutan nab.
Ig nag̓askëan ta ka ang anday dumang Dios,
kung indi,
ultimu ilëm tanyang sam bilug.
5-6 Kipurki maskin may pag̓aningën ta mga taung mga “dios” ka man nirang nag̓atutuuan nira,
mag̓ing tung kalangitan man mag̓ing tung katanëkan man,
maskin duru ka man yang pangambayan nirang kuinta mga “dios” nira ubin mga “ginuu-ginuu” nira,
piru tung yatën ang mga tumatalig tung ni Ginuung Jesus,
ultimung sam bilug ilëm yang Dios ang ya ray nagyaring Ama ta ang ya kay nag̓imu yang tanan ang bag̓ay,
ig para tung ikadëngëg na tinauita ra anya.
Kidispuis pa sam bilug ka ilëm yang Ginuung nag̓atingara tang pagkalalangan tung yatën ang ya ra ti Jesu-Cristo ang tung anya ka man ipinaimu yang Dios yang tanan ang bag̓ay ig natëtëngëd ilëm tung pagpakugmatay na binuatita ra yang Dios ang mga ana na.
7 Ug̓aring ilëm,
bëlag̓an ang mag̓aning ang yang tanan ang mga tumatalig nag̓aintindi ra ang katulad ka tung numyu.
Kipurki may mga putul mi asan tung grupu mi ang masyadung nagkaanad da tung dating pagturuuën nirang tukaw tung mga ginuu-ginuung mga maning tia.
Purisu ya ray nag̓atëngëran na ang asta ra ilëm simanyan,
kung alimbawa,
magpakisaru si tung karning isinag̓ud tung sasang ginuu-ginuu duun mismu tung pagtuuan tung bultu na,
anday dumang mapanimanan nira,
kung indi,
asan si nga mansaay nira yang mga sadili nira tung pagturuuën nirang atia tung sasang may pagkadios na tung pag̓intindi nira.
8 Kung tung bag̓ay,
tama ka rin atiang katadlëngan mi ang maskin unu pay panganën mi,
andang pisan ay kalalabtën na tung pagrarampilan mi yang Dios.
Katulad ka tung nag̓ianing mi ang maskin mamanganamu,
bëlag̓an kang mag̓aning ang yay indi mauyunan yang Dios tung numyu ubin maskin indiamu mamangan,
bëlag̓an kang mag̓aning ang yay mas pang mauyunan na tung numyu.
9 Piru maskin tamaënu yang rasun ming atia,
may sasang dapat da ka ëngëd ang amlig̓an mi asan.
Anday duma,
ya ra yang mga aruman ming atiang maluw̓ay pa yang pagparainu-inuën nira,
nusias yang pagkaliw̓ianu ming atiang mamangan ta mga karning nag̓isag̓ud tung sasang ginuu-ginuu,
ya ray makanayan ta ipagpakasalak nira.
10 Kipurki ta yamung pagpadayaw ang nag̓aintindiamu ra natëtëngëd tung mga bag̓ay ang atia,
kung alimbawa pagpakigsaruamu ra duun mismu tung pagtuuan tung sasang ginuu-ginuu ang pagkatapus maitaamu ra ta sasang aruman ming tumatalig ang atiang maluw̓ay pa yang pagparainu-inuën na,
muya asan da këmtël yang isip nang magpakigsaru ra ka ang tung anyang pag̓intindi asan sig tutuuay na yang ginuu-ginuung atiang nag̓asag̓ud.
Kanisip mi tung maning tia,
ya nga taw̓angay ming para asan da mas këmtël yang pagparainu-inuën na?
Aparti kang pagtaw̓angay mi tia!
11 Kipurki yang apiktar na tung aruman ming atiang maluw̓ay pa yang pagparainu-inuën na,
asan da tung pagkaintindi ming atia nga diadu yang pagtaralig̓ën na tung matuud ang Dios ang tanya sasa ka pa man ang putul ming pinakugmatayan ka ni Jesu-Cristo!
12 Purisu tung pag̓abuat ming atia,
asan da nga buatay mi ta dakulung kasalanan yang mga putul ming atia,
ay asan da nga guyuray yang mga isip nirang magbuat ta sasang ipagbasul ta mupia tung nira yang mga painu-inu nira.
Bëlag̓an ilëm taniray nag̓abuatan mi ta kasalanan ang dakulu,
kung indi,
pati ti Jesu-Cristo mismung nag̓atalig̓an ka rin nira,
ya ka!
13 Kapurisu kung alimbawa may sasang putulung tumatalig ang midyu makaling maguyuran yang isip nang magbuat ta sasang nag̓ibawal tung anya yang sadiling painu-inu na natëtëngëd tung yëën ang yuug dawalay nang pamangan ta sasang palanganën ang bawal tung anya,
indiaw ra ilëm mamangan ang uman ta karnic ang asta tung sampa ug̓ud indiaw ilëm matëngëran ta ipagbuat yang sasang putulu ta kasalanan tung pag̓intindi na.