Nag̓ipag̓isplikar Ni Pablo Kung Ayw̓at Indi Na Rag Sikarën Yang Rasun Nang Magpasuitu Tung Mga Kaputulan (9:1-18)
9
Kung natëtëngëd tung pagparatug̓ayënu tung rasunu ta maning tiaa,
kung tung bag̓ay,
maskin indi ra ipatug̓ayu yang rasunu,
puidi ka rin sigun ka man tung pagkaapustulu.
Ay yuu talagang apustulaw ni Ginuu tang Jesu-Cristo gatëd naitaw ra ka man yang pirsunal na mismu.
Pati yamu nganing ang pagtalig da tung anya,
yamu maning pa tung sasang burak yang pagkaapustulu tung anyab.
2 Maskin indiaw ka man ag̓ilalaën ta duma ang yuu sasang apustul,
piru ta yamu,
nag̓ailalaw ra numyu ang yay pagkabëtangu.
Kipurki yamu mismung sam pundaan asan yay sasang pruibang durug kasanag ang yuu talagang apustulaw anyang matuud gatëd atiing asanaw pa tung numyu,
pinaktëlaw ra anyang nagparakaw̓utun tung numyu ang asta nagtalig̓amu ra yang mga sadili mi tung ni Ginuung Jesus ang nagpatapnay.
3 Buinu,
ya ra taa yang nag̓ipanuw̓alu tung kumpurming pagdiskumpiar tung yëën ang yuu unu bëlag̓anaw matuud ang apustul ni Ginuung Jesus.
4 Ayw̓a,
anda kay rasunung magpasuitu tung mga kaputulan?
Kung tung bag̓ay,
maskin yuu,
may rasunu ka rin ang magpasuitu tung mga kaputulan.
5 Kung alimbawa,
may kasawaw ka rin bilang sasang putulu tung ni Ginuu ta,
bëlag bang may rasunung panuntunu duruami rang magpasuitu ang katulad ka tung pag̓abuat yang kadaklan ang mga apustul may yang mga putul ni Ginuu ta pati nganing ti Pëdroc?
6 Ayw̓a,
yami ilëm ni Bernabe ang anday rasun yamën ang imbis mandilëmami yang pagpangabui yamën,
magpasuituami ra ilëm tung mga kaputulan sigun tung pagkaapustul yamënd?
7 Tinu pay nag̓aintindian ming sundalung pagsuitu tung sadili na?
Tinu pang manigluakay ang indi magpakinaw̓ang tung pruduktu yang mga luak na?
Tinu pang manigkamataay ta ayëp ang indi manginëm yang gatas yang mga ayëp ang pag̓akamataan na?
8 Yang nag̓ianingung atia,
bëlag̓an ilëm sadiling upinyunu.
Bëlag bang nag̓asambit ka tung sasang katuw̓ulan yang Dios?
9 Kipurki may sasang nabtang tung mga katuw̓ulan ang isinulat ni Moises ang kung may baka unung pag̓apagëyëk,
indi unu pugsungane.
Ta,
yang gustu nang ianing tia,
yang pagkabëtang yang mga baka ya ëngëd ay nag̓amaal yang Dios?
10 Bëlag,
kung indi,
ipinasulat na nganing tia ang para ikaayën ta kang mga tau.
Kipurki tëlëngan mi ra ilëm.
Kung mag̓aradu ra nganing yang sasang manig̓aradu,
kung mangayëg da nganing yang sasang manig̓ayëg,
simpri may nag̓aëlatan nirang kaparti nira tung patëbas natëtëngëd tung inubraan nira.
11 Katulad ka tung yamën,
yang kaalimbawaan yamën,
maning pa tung mga manigtakbul ta binik ang anday dumang itinakbul yamën asan tung numyu ya ra yang Matinlung Balita.
Numanyan ang may pruduktu na ra yang pinakabëdlayan yamën,
bëlag̓an magkabag̓ay w̓asu ang yami maning pa tung mangayëg̓ami kang magpasuitu tung numyu?
12 Kung yang duma ngani may rasun nirang magpasuitu tung numyu,
bëlag yami mas pang may rasun?
Piru maskin nag̓apangatadlënganaw ra ta maning tia,
indiami ra ka ëngëd pagsikad yang rasun yamën ang atia.
Kung indi,
pag̓agwantaami ra ilëm tung tanan ang mga kaliwag̓an ug̓ud andang pisan ay maita tung yamën ang sarang mapadatëlan ta duma may ruma ang muya ya ray pag̓ëntëran yang mga isip nirang mag̓intindi tung Matinlung Balita natëtëngëd tung ni Jesu-Cristof.
13 Simpri nag̓askëan mi ra ka ang yang mga paring mga Judiong pamanirbian duun tung pagtuuan ang pinakalusu,
duun da ka ilëm tung pag̓urubraën nira agpangkëlay nira yang pangabuian nira.
Bilang duun tung may midyu lamisaan ang darasag̓an nira ta mga ayëp,
duun da ka ilëm agpamagpaparti tung karnig.
14 Maning ka tia yang palaksu yang tuyun ni Ginuu ta natëtëngëd tung mga manigparakaw̓utun yang Matinlung Balita ang magkabag̓ay ang duun tung pagparakaw̓utun nira nga pangkëlay nira yang mga kaministiran nirah.
15 Piru yuu,
maskin may rasunu ka man ang maning ka tia,
indiaw ka ëngëd pagsikad ang para yuu magpasuitu ra rin tung mga kaputulan.
Ig indi ra ka nganing isinulatu tia ang para suituënaw ra ilëm din numyu.
Maayën pang mapatayaw ra ilëm kay tung---talagang yang nag̓apatiëlanung naang nag̓ipagpabantug ang indiaw pagpasuitu,
indi ra ka ëngëd ipadëëg̓u maskin tung ninu pa.
16 Ay kipurki kung tung pagparakaw̓utunu ilëm,
anday mapatiëlanung ipagpabantug asan ay tia bëlag̓an sadiling patakaranu,
kung indi,
sasang ubligasyun ang ipinasakan da yang Dios tung yëën.
Dakulu yang panuw̓alanu tung Dios kung alimbawa pabaya-w̓ayaanu ra ilëm yang ubligasyunung naa ang indiaw ra magpakaw̓ut yang Matinlung Balita.
17 Ay kung alimbawa yang ubrang naang pagparakaw̓utun ya ray pinilikung pinaklëran,
tay puis magkabag̓ay ra rin ang yuug susuulay.
Piru yay sasang ubligasyunung ipiniar tung yëën yang Dios.
18 Purisu unu pa w̓asu ay sirbing suulu numanyan,
kung indi,
ya ra yang pagkadiw̓aldiu tung ubraung naang pagparakaw̓utun yang Matinlung Balita ang indiaw ra pagsikad yang rasunung magpasuitu tung pamanangëd tung nag̓ipagpakaw̓utu.
Yang Nag̓ipasanag Ni Pablo Kung Ayw̓a Mag̓uman-umanën Na Yang Mga Pasais Nang Pagpakignunut Tung Duma-rumang Klasi Ta Mga Tau (9:19-23)
19 Talagang magkatama yang pag̓abuatung atia kipurki maskin liw̓ianuaw ka man tung pagkalalangan yang maskin tinu pang tauay gatëd anday taung pagpasuituanu,
maning pa tung nagpakirëpënaw ra tung tanan ang mga tau ug̓ud basi pa ra ilëm ang mas magdakël tanirang maëklanu yang mga isip nirang manangëd tung Matinlung Balitang naang nag̓ipagpakaw̓utu tung nirai.
20 Bilang kada magparakaw̓utunaw ra tung mga masigkanasyunung mga Judio,
pagpailalaw ra tung nira ang yuu talagang sasang masigka Judio nira ug̓ud basi pa ra ilëm ang duun da ngaëklayu yang mga isip nirang manangëd tung bitalaw.
Kumus tanira pamagpasuitu pa tung mga katuw̓ulan ang ibinutwan ni Moises tung nasyun yamën,
maskin bëlag̓anaw ra ka man suitu yang mga katuw̓ulan ang atiaj,
piru yang mga pasaisu ya ra ilëm ipausuyayu tung pag̓irintindiën nira ang midyu tung suituaw ka ug̓ud basi pa ra ilëm ang duun da ngaëklayu yang mga kinaisipan nirang manangëd tung nag̓ipagpakaw̓utu tung nira.
21 Pariu kang kada magparakaw̓utunaw ra tung mga taung indi kang lag̓i pamagpasuitu tung mga katuw̓ulan ang atiang nag̓ianingu,
yang mga pasaisu ya ra ka ilëm ipausuyayu tung pag̓irintindiën nira ang midyu indiaw ka pagpasuituk ug̓ud basi pa ra ilëm ang duun da ka ngaëklayu yang mga kinaisipan nirang manangëd tung nag̓ipagpakaw̓utu tung nira.
Piru bëlag̓an ang mag̓aning ang anday pag̓intindiu tung kalëlyag̓an yang Dios,
kung indi,
ubligaduaung magtuman yang kumpurming nag̓ipatuman ni Jesu-Cristo tung yëën.
22 Maning ka man tia yang pagpakignunutu tung mga aruman tang mga tumatalig ang masyadung matinaklingën ay duru pang nag̓ibawal tung nira yang mga painu-inu nira.
Ag̓ipausuyu ra ka ilëm yang mga pasaisu tung pag̓irintindiën nira ang midyu yuu pariu ka tung nirang matinaklingënl ug̓ud basi pa ra ilëm ang duun da ka ngaëklayu yang mga kinaisipan nira ang asta amat-amat dang magwayang dang magwayang yang pag̓irintindiën nira tung kalëlyag̓an yang Dios natëtëngëd tung mga bag̓ay ang atia.
Purisu maskin unu pang klasiay ta taung nag̓apakaw̓utanu,
yang mga pasaisu nag̓ipasaayu ra ilëm tung mga pasais nira ang para mauyunanaw ka nira ug̓ud maskin unu pang papanaway ang usuyunu,
ang basi pa ra ilëm asan da ngaëklayu yang mga kinaisipan yang duma tung nira ang magtalig da ka yang mga sadili nira tung ni Ginuung Jesus ang magpatapnay.
23 Maning tia yang mga pasais ang pag̓ausuyu para tung mas magtinlu yang palaksu yang balitang naang nag̓ipagpakaw̓utu tung mga tau ug̓ud magkasira-siraanami ra ka yang kumpurming manangëd ang magpakbat tung kaayënan ang inding pisan mapasiring-siringan ang ya ka man ay nag̓adapatan yang balitang naa.
Nag̓apaitaan Tanira Ni Pablo Ta Mulidu Sigun Tung Pagsuruspindiën Nira Tung Mga Kalëlyag̓an Nira (9:24-27)
24 Tëlëngan mi ra ilëm yang mga maniglaksu tung kariram.
Siguru nag̓askëan mi ra ka ang tanirang tanan pagralaksuan,
piru sam bilug ilëm tung nira ay mapakdulan ta primyu.
Purisu ta yatën,
sasa may sasa masigprusigir tung pag̓urusuyun ta tung kalëlyag̓an yang Dios ang para balësanita ra ka anya ta maning pa tung sasang primyu ang durung pisan agkatinlu.
25 Kung tinu pay pagsali tung karira,
maskin tung pag̓insayu na pa ilëm,
pagsuspindi rang lag̓i tung mga kalëlyag̓an na ang para indi na mabuat yang maskin unu pang bag̓ayay ang muya yay magpaluw̓ay tung pagralaksuën na.
Yang pag̓aintris nang pagsuspindi ang para tanya maprimyuan yang nag̓isuklub tung kulu yang kumpurming mandëëgn ang indi ra ka ilëm buay madiadu ra ka ilëm.
Piru ta yatën,
anday dumang pag̓aintris tang pagsuspindi tung mga kalëlyag̓an ta,
ya ra tiang maning pa tung primyung anda ëngëd ang pisan ay karangga-ranggaan nang asta tung sampa.
26 Kapurisu ta yëën,
yang kaalimbawaanung pagprusigir tung kumpurming nag̓auyunan ni Ginuung Jesus,
maning pa tung sasang maniglaksu ang yang nag̓apabilug̓an nang pisan ta isip na ya ra yang pasapungan na ëngëd.
Yang pagprusigirung pagsuspindi tung kalëlyag̓anu pariu ka tung sasang bugsingiru ang kada sumuntuk,
pirming magsapulun na yang kalaban na.
27 Bilang bilug ang pisan tung isipu yang pag̓urusuyunu tung kalëlyag̓an ni Ginuu ta.
Ya ra nganing ay nag̓ipagbatuku ta mupia tung sadiliung nag̓aigpitan ang para maëklanu tung pulus magkatama tung pagtëlëng na,
ay tung pangamanu ka man ang yuung nagturuldukanën tung duma kung ya pa ag̓aring marisibi nira yang maning pa tung primyung naang nag̓ianingu,
muya yuu pay mapisanan.