Nag̓ipailala Ni Pablo Ti Febe (16:1-2)
16
Gustuung ipailala tung numyu yang sasang putul tang baw̓ay ang ti Febe ang ya ray pinapag̓ëkëlu yang sulatung atia.
Tanya sasa kang tumataw̓ang ang panirbian tung mga kaarumanan nang mga tumatalig ang sam pundaan tung Cencreaa.
2 Yang nag̓aingaluku tung numyu,
kung kumaw̓ut da nganing asan tung numyu,
saptën mi ta mupia ang yang pagkaw̓ig mi tung anya sasa ra kang putul mi tung ni Ginuu ta.
Ay kipurki ta yatën ang binuat da yang Dios ang sadiling mga tauan na maning tia ay magkabag̓ay ang buatën ta tung mga kaarumanan tang mga tumatalig tung ni Ginuu ta.
Padag̓ën-dag̓ënan mi ka ta mupia kung unu pay mga kakulangan na,
ay tanya duru ra kang mga tau ang nagkarataw̓angan na,
pati ngani yuu,
ya ka.
Pagpakikumusta Ti Pablo Tung Mga Tumatalig Ang Nag̓ailala Na Duun Tung Roma (16:3-15)
3 Taa numanyan gustuung ipakikumustaaw ra kanay numyu asan tung ni Priscab duruang magkasawa ni Aquila ang tanira mga masigkapariuu kang manigparakaw̓utun yang Matinlung Balita natëtëngëd tung ni Jesu-Cristo.
4 May mininsa ang mismu yang mga linawa nira ipinapirinda nira ang para yuu malibri tung malain.
Purisu bëlag da ilëm yuuy pagpasalamat tung nira ta dakulung pagpasalamat,
kung indi,
pati yang tanan ang mga tumatalig ang bëlag̓an mga Judio ang kada sam pundaan pamagpasalamat da ka tung nira natëtëngëd tung pagpalibri nirang atii tung yëën.
5 Pati yang mga tumatalig ang sam pundaan ang pamagsaragpun-sagpun asan tung balay yang duruang magkasawang atia,
ya ka,
gustuu kang ipakikumustaw ra ka numyu tung nira.
Pati tung ni Epeneto ang nag̓amaalu ka,
ipakikumustaw ra ka numyu tung anya.
Duun tung intirung sinakëpan yang Asia yay tukaw tung tanan ang nagtalig yang sadili na tung ni Jesu-Cristong nagpatapnay.
6 Asta ti Maria,
ipakikumustaw ra ka numyu tung anya.
Nabalitaanu ra kung ya pa ag̓ari yang pagpakabëdlay nang duru ang pagpaturuw̓ulun tung ni Ginuu ta ang yamu ray tinaw̓angan nang tanan.
7 Pati ti Andronico durua ni Juniac,
ipakikumustaw ra ka numyu tung nira.
Yay mga masigkanasyunung mga Judio ig tan taa pa,
kasiraanami ra kang ipinakalabus arangan da ilëm tung pagkërërëngën yamën tung ni Ginuu tang Jesu-Cristo.
Tanirang durua ilaladu ra yamën ang mga apustul ni Jesu-Cristo.
Dispuis tukaw pa ngani tanira tung yëën ang nagtalig tung ni Jesu-Cristong nagpatapnay.
8 Asta ti Ampliato ang ya kay nag̓amaalu natëtëngëd tung pagputulan yamën tung ni Ginuu ta,
ipakikumustaw ra ka numyu tung anya.
9 Pati ti Urbano ang yay sasang masigkapariuung manigparakaw̓utun ang tukaw ang asta simanyan dayun-dayun ka yang pagparakaw̓utun na asan tung numyu asta ti Estaquis ang nag̓amaalu ka,
ipakikumustaw ra ka numyu tung nirang durua.
10 Asta ti Apeles ang yay sasang ilaladung maskin pinanawan da ta mga sukdang maliliwag,
indi ra ka ëngëd nag̓uman yang pagtalig na tung ni Jesu-Cristo ang duun da tanya ngauyunay ta mupia yang Dios,
ipakikumustaw ra ka numyu tung anya.
Pati yang mga tumatalig ang pamagtinir tung pamalay-w̓alay ni Aristobulo,
ipakikumustaw ra ka numyu tung nira.
11 Asta ti Herodion ang sasa kang masigkanasyunu,
ipakikumustaw ra ka numyu tung anya.
Asta yang mga tumatalig ang pamagtinir tung pamalay-w̓alay ni Narciso,
ya ka,
ipakikumustaw ra ka numyu tung nira.
12 Dispuis ipakikumustaw ra ka numyu tung ni Trifena durua ni Trifosad Talagang pamagpakabëdlay yang mga baw̓ay ang atia tung pagparaturuw̓ulun nira tung ni Ginuu ta.
Asta ti Persida ang yay sasa kang putul tang baw̓ay ang nag̓amaal ta ka,
ya ka,
ipakikumustaw ra ka numyu tung anya.
Duru ra kang pinakabëdlayan nang pagpaturuw̓ulun tung ni Ginuu ta.
13 Pati ti Rufo ang ilaladung durung pisan agkadërëp tung pagparaturuw̓ulun na tung ni Ginuu ta,
ipakikumustaw ra ka numyu tung anya durua ni nanay na ang yang pag̓atratar na tung yëën,
agkaw̓ig̓ënaw anyang sasang ana na.
14 Asta na Asincrito,
ni Flegonte,
ni Hermes,
ni Patrobas,
may ti Hermas,
ipakikumustaw ra ka numyu tung nirang tanan kasiraan da ka tanira yang mga kaarumanan nirang mga tumatalig ang pamagsaragpun-sagpun ang sam pundaan.
15 Pati ti Filologo durua ni Juliae may ti Nereo durua tanira yang putul nang baw̓ay,
asta ti Olimpas,
ipakikumustaw ra ka numyu tung nirang tanan kasiraan da ka tanira yang mga kaarumanan nirang binuat da ka yang Dios ang mga tauan na ang pamagsaragpun-sagpun ang sam pundaan.
Natëtëngëd Tung Pagsarapëtan Nirang Magpurutul (16:16)
16 Pati yamung tanan asan,
kada magsaragpunamu ra nganing tung numyu-numyung grupu,
magsarapëtanamu ka tung matinlung pasais ang mauyunan yang Dios ug̓ud asan da nga bistu kung unu pag katëdëk yang paggërëgmaan ming magpurutulf.
Asta yang tanan ang mga tumatalig tung ampir tani ang kada sam pundaan ang ti Jesu-Cristo ay may anya tung nirang tanan,
pamagpakikumusta ka tung numyu asan.
Yang Nag̓ipagpaprusigir Ni Pablo Tung Nirang Pangultimu (16:17-20a)
17 Mga putulu,
naa w̓a yang sasang nag̓aingaluku ëngëd tung numyu.
Amlig̓an mi ta mupia yang mga taung kumpurming pagturuldukun natëtëngëd tung ni Jesu-Cristo ang kuntrang pisan tung ipinagtulduk tung numyu atiing primiru.
Ay yang luaan na,
asan da pagpaguad ta ikarangga yang pagsarasaan ming magpurutul ang asta magbërëlag̓anamu ra ilëm ang magkuruntra-kuntraan,
ang kung kaisan ya ray makanayan ta ipamalpas da dayun yang duma tung ni Ginuung Jesus.
Indiamu ra ëngëd magpakignunut tung mga taung mga maning tia.
18 Kipurki yang mga taung mga maning tia,
bëlag̓an ti Ginuu tang Jesu-Cristo yay nag̓apagpaturuw̓ulunan nira,
kung indi,
ya ra ilëm yang sadiling kalëlyag̓an nirag.
Dispuis kung pabitalaën mu,
durug katatalig kag durung pagbuladas nira tung mga taung pamamati tung nira ang asan da nga dayaay nira yang duma ang ërëkël-ëkëlan pa ta kulu.
19 Ya ray dapat ang amlig̓an mi yang mga taung mga maning tia ay yamu bantug da tung mga putul tang mga tumatalig tung maskin ay pang banwaay ang yamu unu asan durug tinlu yang pagturumanën mi yang kamatuuranh ang ya ra ka man ay natëngëran na ang nag̓ikasadyaamu yëën ta duru.
Ug̓aring ilëm ang para indi ilëm marangga yang nag̓abantug ang atia tung numyu,
yang gustuu para tung numyu ang yamu mag̓ing mawayang ta kinaisipan tung pagburuatën ang matitinlu piru tung pagburuatën ang malalain yamu mag̓ing kiput ta kinaisipan.
20 Ay kung amlig̓an mi yang mga taung mga maning tiang nag̓ipagpaamanu tung numyu,
yang Dios ang yay pagpaëyang yang pag̓uruyunan ming magpurutul,
asan da nga dëëg̓ay nang pisan tung makali ti Satanas ang yay pagpaktël tung nira ang yang kaalimbawaan na maning pa tung asan da ipabtangay na tung dapa-rapa yang mga kakay ming papiklakani.
Ya ra taa yang nag̓ipag̓ampuu ëngëd para tung numyu ang mas pang maispirinsiaan mi yang kanëëman ni Ginuu tang Jesus ang pagpadag̓ën-dag̓ën tung numyuj.
Pati Yang Mga Aruman Ni Pablo Pamagpakumusta Ka Tung Mga Tag̓a Roma (16:21-23)
21 Buinu,
ti Timoteo ang yay sasang masigkapariuung manigparakaw̓utun tani gustu na kang magpakikumusta asan tung numyu.
Pati ti Lucio,
ti Jason may ti Sosipater ang yay mga masigkanasyunung mga Judio,
gustu ka nirang mamagpakikumusta asan tung numyuk.
22 Pati yuung ti Tercio ang tinalig̓an ni Pablong pinapagsulat yang sulat ang atia,
gustuu kang magsalëët ang magpakikumusta asan tung numyu ay yuu sasang putul ming tumatalig tung ni Ginuu ta.
23-24 Pati ti Gayol ang yay panlumunanu ang yang balay na yay pagsaragpunan yang intirung sam pundaan tani,
gustu na kang magpakikumusta asan tung numyu.
Pati ti Erastom ang yay tisuriru tani tung siudad ang nani,
gustu na kang magpakikumusta asan tung numyu,
asta ti Cuarto ang sasa kang putul ta,
ya kan.
Yang Pagtapusan Da Ëngëd Ni Pablo Yang Sulat Na Ang Yay Nag̓aulit Na Yang Pinakaimpurtanting Nabtang Tung Matinlung Balitang Nag̓ipagpakaw̓ut Na Ang Yay Dapat Ang Dayawën Nira Tung Dios (16:25-27)
25 Buinu,
anday dumang sarang ang magpabakëd tung pagtaralig̓ën mi tung ni Jesu-Cristo,
ya ra yang Dios.
Yang gamitën nang magpabakëd ya ra taang Matinlung Balitang naang nag̓ipagpakaw̓utu ang yang nag̓adapatan na,
ya ra ka man yang natëtëngëd tung ni Jesu-Cristo.
Yang nag̓ipagpakaw̓utung naa uyun ang pisan tung ipinagpabunayag yang Dios tung yëën natëtëngëd tung planu na para tung yatën ang mga tau ang disti pa tung primiru nag̓aëgtëman na pa rin.
26 Piru simanyan bunayag dang pisan ëkël tung pagparakaw̓utun yamën ang mga apustul ang duun da ag̓ipatiëlay yamën tung nagkaraula yang mga manigpalatay yang bitala yang Dios atiing tukaw natëtëngëd tung Mananapnay ang kumaw̓ut ang pagkatapus isinulat da ka nirang ipinabtang tung kasulatan.
Purisu sigun tung itinuw̓ul tung yamën yang Dios ang anday pinanliitan na kag anda kay pagtapusan na,
nag̓ipaskë ra yamën yang planu nang atia tung mga taung maskin unu pang nasyunay ang bëlag̓an mga Judio ang basi pa ra ilëm durung magtalig tung ni Jesu-Cristong magpatapnay ang yang dangatën na matumanan da nira yang mga kalëlyag̓an na.
27 Kapurisu ang mapanëëm-nëëmanu tia,
anday dumang sakpën yang isipu,
kung indi,
magkabag̓ay rang pisan ang yang ultimu ilëm ang Dios ang ya ka man ilëm ay nag̓askëng pisan yang tanan,
ya ray padëngëg̓an tang pirmi ang asta tung sampa ëkël tung taw̓ang ni Jesu-Cristong pangërëngan tung yatën duun tung katalungaan na.
Talagang ya ray magkatamang pisan ang yay buatën ta.
Ya ra ilëm tia ay maningu tung numyu,
Pablo