Yang Yalimang Nag̓aingaluk Na Tung Nira Ang Dapat Ang Ipalandaw Nirang Sikarën Yang Mauyunan Yang Mga Aruman Nirang Dua-dua Pa Yang Mga Isip Nira (15:1-4)
15
Buinu,
ibaliku ra kanay tung yatën ang nag̓asiguru ang maskin magbuatita ta duma-rumang bag̓ay ang ibinawal tung mga riglamintung mga maning tiang sinambitu nungaynaa,
indiita ra pakusalakën yang Dios.
Kung unu pay mga pasais yang mga aruman tang dua-dua pa tung mga isip nira kung nag̓alugtan da yang Dios ang magbuat yang mga bag̓ay ang atia,
bëlag ya ërëpay ta,
ya agwantaay ta tung matinlung kinaisipan.
Indi ta ra ilëm sikarën ang buatën yang uyun ka ilëm tung sadiling kalëlyag̓an ta.
2 Kung indi,
sasa may sasa tung yatën,
yang sikarën ta yang mauyunan yang mga kaarumanan tang kumpurming ikaayën nira ug̓ud asan da ka nga taw̓angay ta ang para mas pang këmëët yang pagtaralig̓ën nira tung ni Ginuu ta.
3 Yay dapat ang sikarën ta ay kipurki binutwananita ra ni Jesu-Cristo ta matinlung mulidung dapat ang usuyun ta.
Tanya ngani bëlag ya magsikad yang uyun tung sadiling kalëlyag̓an na,
ya mag̓agwanta tung kaliwag̓an basta matumanan na ra ilëm yang nag̓auyunan yang Dios ang yang kaliwag̓an ang atiing napasaran na mas pa kay tung nag̓aingaluku tung numyung agwantaën.
Atia bistung bistu tung sasang naula natëtëngëd tung anya ang nabtang tung kasulatan ang kabilangan na yay aning na tung Dios ang maning taa:
“Yang mga insultung atiang nag̓itirada kang lag̓i yang mga taung makinasalananën tung nuyu,
nag̓aumiraw ra kang magtamaanb,”
mag̓aning.
4 Nag̓asambitu tia ay natëtëngëd kumpurming unu pay isinulat tung kasulatan atiing tukaw,
ipinabtang da nganing asan ug̓ud ta yatën ang nag̓alayun simanyan,
ya ray mapangayapan ta ta ipagpaktël ta tung mga isip tang mag̓agwanta tung mga kaliwag̓an ang asanita ra ka ngaëyangay ta kinaisipan tang matëntën ang pagpakisëw̓at tung tanan ang pinangakuan yang Dios tung kumpurming mga tauan na.
Yang Nag̓ipag̓ampu Na Para Tung Nira Ang Taw̓angan Yang Dios Ang Mag̓uruyunan Ëngëd Ta Matinlu (15:5-6)
5 Yang nag̓ipag̓ampuu tung Dios ang yay sarang ang magpaktël tung mga isip ta ang para indiita magmataka ang yamung tanan asan taw̓anganamu ra anyang mag̓uruyunan ëngëd ta matinlu ang yay mag̓atu tung mga pasais ang ipinagpaita ni Jesu-Cristo.
6 Maning tia yang nag̓ipag̓ampuu para tung numyu ay ug̓ud kung magsarasaanamu ra nganing ta isip ig sasa kay kërësën mi,
asan da nga padëngëg̓ay mi yang Dios ang ya ka man mismu yang Dios ang pinanalig̓an ni Ginuu tang Jesu-Cristo atiing pag̓ingtau na taa tung kaliw̓utan ang naa ig ya kay pag̓aningën nang Ama nang paglinukutay tanira ta pagkadios.
Nag̓aulit Na Yang Nag̓aingaluk Na Ang Tanirang Duruang Grupu, Maskin May Pinagbëlag̓anan Nira Ta Pag̓irintindiën, Kaministiran Ka Ëngëd Ang Magnurunutan Tanirang Tanan Tung Matinlu (15:7-12)
7 Kapurisu ulitënu ra kanay yang gustuung ianing tung numyung tanan asan tung Romac.
Indiamu ra ëngëd magduruma-dumaan,
kung indi,
kung ya pa ag̓ari ang yamu rinisibi ra ni Jesu-Cristo ang anday pinag̓ëntëran yang isip na,
dapat ang maning kang pisan tia yang pagnurunutan ming magpurutul.
Ay kung maitaamu ra nganing ta duma ang pag̓usuyamu ra tung mga pasais ni Jesu-Cristo,
asan dag dayaway nirang agpadëngëg̓ay yang Dios.
8 Gustuung ipadëmdëmu tung numyu ang atiing pag̓ingtau yang pag̓aningën ang Cristo,
tinuw̓ul yang Dios ang manirbian tung nasyun yamën ang mga Judio.
Tung panirbian nang atia minatuud na ra yang pinangakuan yang Dios tung mga kinaampu yamën ang tung uri paangayan na yang mga kanubli nira ta sasang Mananapnay.
Duun da nga papruibaay na ang yang Dios talagang matalig̓an ka man ang magkërëng tung nabitalaan na.
9 Bëlag da ilëm ya tiay katuyuan nang nag̓ingtaung bilug,
kung indi,
pati nganing yang mga tag̓a duma-rumang nasyun ang bëlag̓an mga Judio inintindi na ra ka ug̓ud maëyangan da ka ta ipagdayaw nira tung Dios natëtëngëd tung kaildaw ang ipinagpaita na tung nira ang pati tanira nag̓apalg̓ud na ra ka tung mga tauan nang nag̓amanguluan na.
Tung pagpaita na yang kaildaw nang atia tung nira duun da nagkamatuud yang sasang naula ni Adi David atiing inaning na tung Dios ang mag̓aning,
“Purisu Ampuanung Dios,
kung mag̓urugpuami ra nganing yang mga tag̓a duma-rumang nasyun ang para magtuuami tung nuyu,
magdayawaw tung nuyung nunut da ka ta pagkantaw,”
ag̓aaningd.
10 Dispuis tung sam bilug ang kasulatan,
may san tag̓ang bitala ang inaning ni Moises ang mag̓aning,
“Pati yamung tag̓a duma-rumang nasyun,
magpakasadyaamu ra ka,
kaugpuanamu ra ka yamën ang mga Israel ang yay dating binuat yang Dios ang mga tauan na,”
ag̓aaninge.
11 Dispuis tung sam bilug pang kasulatan,
may sasang bitalang nabtang ang mag̓aning,
“Yamung tanan ang mga tag̓a duma-rumang nasyun,
maskin unu pang nasyunay,
magdayawamu ra ka tung ni Yawif,”
mag̓aning.
12 Kidispuis pa duun tung isinulat ni Isaias may sasa kang inula na natëtëngëd tung Mananapnay ang ipaangay yang Dios ang mag̓aning,
“Ti Adi David ang ana ni Jesseg may sasang kanubli nang lumua tung uri ta kaldaw ang ya ra kay magmangulu tung mga tag̓a duma-rumang nasyun ang bëlag̓an mga masigka Israel na.
Ya ray pakbatën nirang magpalua yang tanan ang pinangakuan yang Dios,”
ag̓aaningh.
Yang Nag̓ipag̓ampu Na Tung Dios Ang Para Kayanan Nirang Tumanën Yang Tanan Ang Nag̓aingaluk Na Tung Nirang Duruang Grupu (15:13)
13 Buinu,
yang nag̓ipag̓ampuu tung Dios ang yay pagpaëyang ta ipagpakbat ta tung pinangakuan na tung yatën ang pakasadyaën na ra ka ëngëd ang pisan yang mga isip mi ig taw̓anganamu ra ka anyang mag̓uruyunanamu ra tung matinlu mintras pagtalig̓amung ustu tung anya ug̓ud ya rag durulang agdurulang yang pagkatëntën yang mga isip ming pagpakbat tung tanan ang pinangakuan na ëkël tung pagparakëtëlën yang Espiritu Santo tung mga isip mi.
Natëtëngëd Tung Ipinagsulat Na Tung Nira (15:14-21)
14 Mga putulu,
ang para tung yëën,
dakulu yang kumpiansaw ang ta yamu asan duruamu rag kaayën ig duru ra kang nag̓askëan mi natëtëngëd tung kamatuuran.
Nag̓askëamu ra nganing ang magparainunukuan ang magparamanan.
15 Ug̓aring ilëm ka man tung sulat ang atiang ipinaëkëlu tung numyu,
midyu tung diniritsyuanamu ra ka man yëën natëtëngëd tung mga bag̓ay ang durug kaimpurtanting ipadëmdëmu tung numyu.
May kalalabtënu nganing ang magsulat tung numyu ta maning tia ay natëtëngëd ilëm tung katëngdananung naang ipinagpiar yang Dios tung yëën ang yuu ra kay nag̓apaktël nang pag̓ërëkëlën.
16 Yang katuyuan nang nagpiar tung yëën ay ang para yuu mag̓ing sasang manirbian tung ni Jesu-Cristo ëkël tung pagparakaw̓utunu tung bëlag̓an mga Judio.
Yang kaalimbawaanung pagparakaw̓utun tung nira yang Matinlung Balitang naang liit tung Dios,
yuu maning pa tung sasang paring Judio ang pagprisintar ta sasang igparakdul tung Dios.
Yang maning pa tung nag̓iprisintaru tung anya ya ra yang kumpurming magtalig tung ni Jesu-Cristo ang para taniray mag̓ing maning pa tung sasang igparakdulu tung Dios ang yay mauyunan na ta maayën ëkël tung pag̓urubraën yang Espiritu Santo tung nira ang para mag̓atu tung Dios.
17 Kapurisu natëtëngëd nag̓apaktëlaw ra ka man ni Jesu-Cristo ta maayën tung ubrang naang itinalig yang Dios tung yëën,
kung isip-isipënu yang pinakaw̓ut na agsadyaanaw ra ta duru.
18 Indiaw ra ka ëngëd magpalangaas ang magsambit natëtëngëd tung sadili ilëm ang pag̓urubraënu.
Suluminti ilëm sambitënu ya ra yang kumpurming ipinaëyang ni Jesu-Cristo tung yëën ang nunut da ka ta pagpaktël na para manangëd da yang bëlag̓an mga Judio tung Matinlung Balita natëtëngëd tung anya.
Ay pinaktël na ta mupia yang bitalang ipinagpakaw̓utu tung nira pati yang mga binuat-buatanu.
19 Ay may mga pruibang maktël ang napalapusu ang durug kabëw̓ërëng ëkël tung pagpaktël tung yëën yang Espiritu Santo.
Purisu atiing pagliliw̓utunu,
mag̓impisa duun tung Jerusalem ang asta ra duun tung Ilirico,
tinalusu ra yang sam parti tung ubrang ipiniar yang Dios tung yëën.
20-21 Tung pagparakaw̓utunung naa,
yang pirming nag̓apaawatanu ëngëd ang yuu magparakaw̓utun duun tung mga banwa ang yang mga tau na indi pa nag̓apampakaw̓utan yang Matinlung Balitang naa.
Yang pag̓asikaru,
bëlag yuu mag̓intra tung ubrang pinagtukud da ta dumai,
kung indi,
yuu mag̓usuy tung sasang linyang naitaw tung kasulatan ang may sasang inula natëtëngëd tung Mananapnay ang kumaw̓ut ang maning taa yang palaksu na:
“Yang mga taung indi napakaw̓utan natëtëngëd tung anya,
mangamalamad da tung indi namalamaran nira.
Tanirang indi nangagngël natëtëngëd tung anya,
mangaintindi ra tung indi naintindian nira,j
” mag̓aning.
Natëtëngëd Tung Planu Nang Magpanaw Duun Tung Nira (15:22-29)
22 Kapurisu yang pagliliw̓utunung atia tung duma-rumang banwa,
ya ra kay naaw̓alaanu ta muya-muya ang indiaw nadayun agkali ang nag̓angay asan tung numyu.
23-24 Piru simanyan kumus anda ray lugar tani ang yang mga tau indi pa nag̓agngël yang balita natëtëngëd tung ni Jesu-Cristo ig kumus tung pira-pira rang takun yang paglalangkag̓ënung mangay asan tung numyu,
ya ra ka man taang nag̓atimaung buatën simanyan.
Kung kaw̓utun da nganing yang uras ang ipagdistinuu duun tung parti Espanya,
gustuung asanaw ra kanay tukaw ang magpanaw tung numyung manlumunan ang para bakluaw ra padag̓ën-dag̓ënay ming papanaway ang magdistinu duun,
ang ikasadyaw ra kanay yang pagrarampilan tang magpurutul maskin tung gësyëng uras da ilëm.
25 Ug̓aring ilëm numanyan,
bakluaw ra mangay asan tung numyu,
magdistinuaw ra kanay duun tung Jerusalem ang para mag̓atëraw ra kanay yang nag̓itaw̓ang tung mga kaputulan tang mga tumatalig ang ya ra kay binuat yang Dios ang mga tauan na duun.
26 Kaministiran ang mangayaw ra kanay duun ay yang mga kaputulan tang mga tumatalig ang tag̓a Macedonia may tani kang tag̓a Acaya ang kada sam pundaan,
tëdëk buluntad tung mga isip nirang mamagpaëkël da yang mga taw̓ang nira tung mga tauan yang Dios ang mga maliliwag̓ën duun tung Jerusalemk.
27 Maskin tëdëk buluntad ka man tung mga isip nira yang pagtaraw̓angën nirang atia,
piru kung isip-isipënu ëngëd ang talaga,
tanira may utang ka nirang kanëëman tung mga kaputulan nirang atia.
Ay kipurki kung bëlag̓an natëtëngëd tung mga tumatalig ang mga Judio ang yay namagparakaw̓utun yang Matinlung Balita tung maning tung nirang bëlag̓an mga Judio atiing primiru,
indi ra rin nangalg̓ud tung kalibrian ang naang pinagtukud ni Ginuu tang Jesu-Cristo.
Purisu magkabag̓ay ra kang pisan ang yang kaayënan nirang pangkaliw̓utan ka ilëm ya ra kay itaw̓ang nira tung mga kaputulan nirang atia.
28 Purisu kung matapusu ra nganing tia ang yang nag̓itaw̓ang ang naa luw̓us dang maintrigaw tung nira,
bakluaw ra magliit duun tung Jerusalem ang para magdistinuaw ra duun tung parti Espanya ang asanaw ra kanay magpanaw tung numyung manlumunan.
29 Dispuis ag̓askëanu ka ang kung kumaw̓utaw ra nganing asan tung numyu,
padag̓ën-dag̓ënanita ra ni Jesu-Cristo ta mupia ang asan da mas magbakëd yang pagtaralig̓ën tang tanan tung anya.
Natëtëngëd Tung Nag̓ipagpaampu Na Tung Nira (15:30-32)
30-31 Mga putulu,
arangan da ilëm tung pagtaralig̓ën tang naa tung ni Ginuu tang Jesu-Cristo may tung paggërëgmaan tang magpurutul ang yay nag̓ipaëyang tung yatën yang Espiritu Santo,
naa w̓a may sasang nag̓aingaluku ëngëd tung numyu.
Pakigsasaayaw ka numyu tung pag̓arampuënung tëdëk tung Dios ang manadaanaw ka anyang indiaw mapudiran yang mga masigkanasyunung duma duun tung sinakëpan yang Judëal ang pamagpakuindi pa ka ëngëd tung Matinlung Balitang naang nag̓ipagpakaw̓utu natëtëngëd tung ni Ginuung Jesus.
Ipag̓ampu mi ka dayun ang yang taw̓ang ang naang pag̓aëklanu ang para ipakdulu tung mga tumatalig ang tag̓a Jerusalem ang ya ra kay binuat yang Dios ang mga tauan na,
ya ra ka ëngëd ay mauyunan nirang risibiënm.
32 Maning tia yang ipag̓ampu mi para tung yëën ay ug̓ud kung yay kalëlyag̓an yang Dios tung yëën,
paangayënaw ra ka ëngëd anya asan ang tung masadyang kinaisipan ig asan da ka këmtël ta mupia yang isipu natëtëngëd tung pagrarampilan tang magpurutul.
Yang Pag̓arampuën Na Para Tung Nira (15:33)
33 Buinu,
yang nag̓ipag̓ampuung pirmi tung Dios ang yay pagpaëyang ta paglimëngan yang mga isip ta ang yamung tanan asan mas pang maispirinsiaan mi ang nag̓apakigsasaanamu ka man anya.