Kung Ya Pa Ag̓aring Magnurunutan Ta Matinlu Yang Mga Tumatalig Ang Mga Judio May Yang Bëlag̓an Mga Judio (14:1-4)
14
May mga putul mi asan ang masyadug katinaklingën.
Kaministiran ang risibiën mi tanirang pakignunutan tung matinlu.
Indi mi ëngëd tag̓aman ta pakigsug̓a natëtëngëd tung pag̓irintindiën nira tung mga riglamintu.
2 Ay tung pag̓intindi mi,
maskin unu pang palanganënay suiltung panganën mi.
Piru tung pag̓intindi nira,
dua-dua yang mga isip nira kung tanira nag̓alugtan da yang Dios ang mamangan ta karnia.
3 Kung tinu pay pamangan ta maskin unu pang palanganënay,
dapat ang indi maglamku tung mga kaarumanan nang indi pamangan yang tanan ang atia.
Pati yang indi pamangan,
dapat kang indi magpakusalak tung mga kaarumanan nang pamangan ay kipurki yang Dios mismu ya ngani ay nagrisibi tung nira.
4 Yang indi pamangan,
andang pisan ay kalalabtën nang magpakusalak tung aruman nang pamangan ay bëlag̓an tanyay ag̓alën yang aruman na,
kung tung pagparaturuw̓ulun pa.
Simpri ultimu ilëm yang sadiling ag̓alën na yay may kalalabtën nang manginsapu tung sasang turuw̓ulun na kung tama yang pag̓urubraën na u kung bëlag.
Ig puiding magkatama yang pag̓urubraën na ay natëtëngëd kayanan ni Ginuung Jesus ang manguluan ang para indi magkamali.
Yang Sasang Nag̓aingaluk Na Tung Nira Ang Masigtimbang-timbang Tung Isip Nira Ang Asta Magbilug Da Kung Ay Pay Magkatamang Usuyun Na (14:5-9)
5 Kung natëtëngëd tung mga maal ang kaldaw,
tung pag̓intindi yang dumang mga kaputulan ta asan may mga kaldaw ang lusu tung kadaklan ang yay dapat ang ipagsilibra nirab.
Piru tung pag̓intindi ming mga putul nira,
maskin unu pang kaldaway parariu ka ilëm ang magkabag̓ay ang ipanirbian mi tung Dios.
Kaministiran sasa may sasa tung numyung tanan asan,
masigtimbang-timbang tung anya-anyang isip ang asta magbilug da kung ay pay magkatamang usuyun na.
Indi na ra ilëm isipan yang mga aruman na.
6 Kung tinu pay pagpalusu tung sasang kaldaw,
yang nag̓ipagpalusu na ay natëtëngëd gustu nang asan da tung pagsilibra na nga padëngëg̓ay na ti Ginuu ta.
Pati yang sasang tumatalig ang pamangan ta maskin unu pang palanganënay,
ya ka.
Gustu na ka ang asan da ka nga padëngëg̓ay na ti Ginuu ta tung pagparanganën na ay nag̓apasalamatan na ra nganing tung Dios yang magpanganën na.
Maskin yang sasang tumatalig ang indi pamangan yang tanan,
ya ka.
Gustu na ka ang tung paglikay na tung dumang palanganën,
asan da ka nga padëngëg̓ay na yang Dios ig nag̓apasalamatan na ra ka nganing tung anya yang magpanganën na.
Ig disir,
maskin unu pay mag̓usuyun yang sasang tumatalig tung tulung klasing atiang sinambit,
parariu ka ilëm ang bëlag̓an malain ang buat.
7 Ay ya pa ag̓ari,
ta yatën ang mga tumatalig,
anday nag̓abui para tung sadili na ilëm ig anda kay mag̓apatay para tung sadili na ilëm.
8 Ay kipurki yang kapulutan na ang ita nag̓abui ay ang para ti Ginuu ta yay mapadëngëg̓an ta ig kung mapatayita ra nganing,
ya ka.
Purisu buiitag patay,
yang may anya ëngëd tung yatën ti Ginuu ta ang yang pag̓asikad ta tung tanan ang pag̓urubraën ta ang tanyay mapadëngëg̓an ta.
9 Kipurki yang katuyuan ëngëd ni Jesu-Cristong nagpakugmatay ang pagkatapus nabui si kang uman ay ug̓ud tanya ray magyaring Ginuu tang ya ëngëd ay may anya tung yatën ang kumpurming nagtalig tung anyang nagpatapnay maskin mapatayita ra man maskin buiita pa man.
Yang Yadwang Nag̓aingaluk Na Tung Nira Ang Tanira Indi Ëngëd Magpakusalak Ubin Maglamku Tung Mga Putul Nira (14:10-12)
10 Ta,
yamung kumpurming pag̓usuy tung mga riglamintung mga maning tiang sinambitu,
ayw̓a nag̓apakusalak mi yang mga putul mi pa ka man ang indi pag̓usuy?
Asta yamung kumpurming indi pag̓usuy tung mga maning tia,
ayw̓a nag̓alamku mi yang mga putul mi pa ka man ang pag̓usuy?
Indi ka ëngëd magkabag̓ay tia ay kipurki itang tanan luw̓usitang manalunga tung Dios ug̓ud tanyay manginsapu tung mga buat-buat ta kung mauyunan na u kung indi.
11 Nag̓askëan ta ang yay mainabu ay tung sasang bitala yang Dios ang napabtang tung kasulatan ang mag̓aning,
“Kumus yuung ti Yawi buiaw ang asta tung sampa,
siguradung magkamaning da ang yang tanan ang mga tau,
mangalëlyag kag indi,
luw̓us dang mamagluud tung katalungaanu ang para manuw̓al tung yëën,
luw̓us da kang mag̓ubligar ang yuu ra ka man yang ultimung Dios,”
mag̓aningc.
12 Purisu asan da ngaintindiay ta ang talagang insapuën yang Dios tung yatën yang mga buat-buat ta sasa may sasa kung mauyunan na u kung indi.
Yang Yaklung Nag̓aingaluk Na Tung Nira Ang Indi Ëngëd Mamagbuat Ta Matëngëran Ta Ipagbuat Ta Kasalanan Yang Mga Aruman Nira (14:13-18)
13 Kapurisu kumus itang tanan insapuanita ra ka man yang Dios,
indiita ra magparakusalakan natëtëngëd tung mga bag̓ay ang atia,
kung indi,
bilug̓un ta yang mga isip ta ang indiita ëngëd magbuat ta maskin unu pa man ang bag̓ayay ang muya asan da nga guyuray yang isip yang sasang putul tang tumatalig ang magbuat ta sasang nag̓aintindian nang bawal tung anya.
14 Natëtëngëd tung pagkinapulitay yamën ang naa ni Ginuung Jesus,
nag̓asiguruu ra ang anda ra ka man ang pisan ay palanganën ang nag̓ibawal yang Dios tung yatën ang mga tumatalig.
Ug̓aring ka man ilëm,
kung may sasang putul ta ang tung pag̓intindi na may mga palanganën ang bawal ang panganën na,
tay puis tung anya,
talagang bawal tia.
15 Yang kinaisipan nang maning tia ya ray dapat ang intindiën ta ta maayën kipurki kung yang pagparanganën ta ta sasang palanganën ya ray matëngëran na ang yang sasang putul tang atia magpalangaas dang magpakipangan ka maskin nag̓aintindian nang bawal tung anya ang pagkatapus asan da ka nga tigbak ta pag̓imasul yang sadiling painu-inu na,
ig disir indi mi ra nag̓apaitaan ta gëgmang ustu.
Purisu sigun ka ilëm tung iw̓ël tang mamangan ta sasang palanganën ang bawal tung pag̓intindi na,
indiita ëngëd magbuat ta ikarangga yang pagtaralig̓ën yang putul ming atia tung ni Jesu-Cristo,
naang tanya ka pa man ay sasa ra ka tung pinakugmatayan nad.
16 Purisu maskin pang matinlu tung pag̓intindi mi yang sasang nag̓atima ming buatën,
kung alimbawa ya ray matëngëran na ang yang sasang putul ming tumatalig magpalangaas dang magbuat ta nag̓aintindian nang kasalanan,
ang pagkatapus yamung mga tumatalig asanamu ra ka nga sawayay ta duma,
tay indi mi ra ilëm dayunun ang buatën.
17 Kipurki kung mag̓usuyita tung mga riglamintung atiang dati sigun tung pagparanganën ta ubin pag̓irinëmën ta u kung indiita mag̓usuy,
anday kalalabtën na tung pagpagaëm ta tung Dios.
Kung indi,
yang dapat ang impurtaën tang pagpagaëm tung anya ang ita pirming magbuat yang magkatama,
ig pirmiita kang mag̓uruyunan ta matinlung magpurutul,
ig pirmiita kang magkasadya ëngëd maskin unu pay mapanawan ta ang yang tanan ang atia ya ag̓ipaëyangay tung yatën yang Espiritu Santo.
18 Ay kung tinu pay pagpatuw̓ul tung ni Jesu-Cristo ang asan da ipapanaway na tung tulung bag̓ay ang atia,
ya ray mauyunan yang Dios ig asanita ra ka nga galangay ta mga masigkatau ta.
Yang Yaëpat Ang Nag̓aingaluk Na Ang Yang Padërëpan Nira Yang Kumpurming Ikatinlu Yang Pag̓uruyunan Nirang Magpurutul (14:19-23)
19 Purisu yang kaministiran tang padërëpan ang sikarën ya ra yang mga pag̓urubraën ang yang luluaan na,
asanita ra mag̓uruyunan ang magpurutul tung matinlu ig asan da ka mas pang këmëët yang pagtaralig̓ën tang sasa may sasa tung ni Jesu-Cristo.
20 Sigun ka ilëm tung gustu tang mamangan ta sasang palanganën ang tung pag̓intindi yang dumang mga putul tang mga tumatalig bawal ang panganën nira,
indiita ra ëngëd magpadayun ang mamangan.
Kipurki puiding asan da nga rangga yang pag̓irimakluën yang Dios tung mga isip nira.
Maskin yang tanan ang mga palanganën luw̓us da ka man ang nag̓ilug̓ut yang Dios tung yatën,
piru kung ëkël tung pagpangan ta,
asan da nga tuksu yang sasang putul tang masyadung matinaklingën,
balikanita ra ta kasalanan.
Kipurki yang aruman tang atia muya magpangaas da ka ëngëd ang magpakipangan ta sasang palanganën ang tung dating pag̓intindi na bawal ang panganën na.
Talagang asanita ra ngaumid tung pagpakasalak.
21 Kung midyu nag̓apatëng-patëng tang maning tia ka man ay puiding mainabu,
maayën pang indi ta ra ilëm kanay padayunan ang panganën yang karning atiang bawal tung pag̓intindi yang aruman tae ubin indi ta ra ilëm kanay padayunan ang igmën yang binung atiang bawal tung pag̓intindi naf ubin indiita ra ilëm kanay magdayun ang magbuat ta maskin unu pa man ang bag̓ayay ang duun da nga pakdulay ta ta pagsangkëlan yang pagtaralig̓ën na tung ni Ginuung Jesus.
22 Buinu sasa may sasa tung yatën,
kumpurming unu pay pag̓irintindiën ta tung mga bag̓ay ang mga maning tiang bawal tung pag̓intindi yang duma,
ita ra ilëm yang Dios ay mag̓inintindiay.
Indi ta ilëm irëg̓ës tung mga aruman tang aparti ta pag̓irintindiën.
Talagang masadya yang nag̓abtangan yang sasang tumatalig ang indig basulun yang painu-inu na natëtëngëd tung sasang pag̓abuat na ay natëtëngëd yang pag̓abuat nang atia tëëd da ilëm tung pinagtimbang-timbang na ra kang lag̓i tung isip na ang yay magkatamang buatën na.
23 Piru yang tumatalig ang dua-dua pa tung isip nang muya indi mauyunan yang Dios ang tanya mamangan da ta sasang palanganën ang pagkatapus,
maskin dua-dua pa tung isip na,
palangaasan na ra ka ëngëd ang panganën,
yang taung atia talagang basulun da ta mupia yang painu-inu na ig pakusalakën da ka nganing yang Dios ay natëtëngëd binuat na ra ka ëngëd yang sasang bag̓ay ang tung pag̓intindi na bëlag̓an tama.
Maskin unu pa man ang bag̓ayay ang nag̓atima tang buatën,
kung dua-dua pa ka ëngëd tung isip tang muya indi mauyunan yang Dios,
ang pagkatapus buatën ta ra ka ëngëd,
asanita ra mapagbuat ta kasalanan tung anya.