Nag̓ipagpasanag Na Kung Unu Pay Magkatamang Pag̓irintindiën Nira Tung May Mga Katëngdanan (13:1-7)
13
Itang tanan ang mga tumatalig,
dapatitang manangëd tung may mga katëngdanan ang pag̓ërëkëlën yang banwa.
Ay kipurki anday katëngdanan ang bëlag̓an tung planu yang Dios manliit ig kung tinu pa man ay pangatëngdanan,
atia yang Dios yay may kalalangan ang kaministiran may mga taung mag̓ërëkëlën tung banwa.
2 Ig disir,
kung tinu pay pagbatuk tung sasang pangatëngdanan,
ya ra kay nag̓abatukan na yang sasang kalalangan yang Dios.
Kag yadwa pa,
kung tinu pay bilug da yang pagbatuk na tung may mga katëngdanan ya ray magakdan na ta parusa ang yay uyun tung kalalangan yang Dios.
3 Ay kipurki tëlëngan mi ra ilëm.
May mga taung nag̓apipiaran ta katëngdanan piru bëlag̓an ang mag̓aning ang para yang mga taung pagbuat ta matinlu yay magkatinir ta ëlëd nira,
kung indi,
ang para yang mga taung pagbuat ta malain yay magkatinir ta ëlëd nira asan.
Purisu kung gustu tang anday ëldan ta tung sasang may katëngdanan,
tay puis yang matinlu ya ray buatën ta ang ya ra kay dayawën na tung yatën.
4 Ay ya pa ag̓ari,
yang pagpabëtang yang Dios tung sasang pangatëngdanan midyu tung sasang turuw̓ulun nang magbuat ta ikaayën yang mga magbaw̓anwa sasa may sasa.
Piru alimbawa ilëm kung tinu pa tung yatën ay mabuat ta malain,
talagang ya ray ipag̓ëlëd na tung may katëngdanan,
ay bëlag̓an ilëm intrimis yang kagaëman nang magparusa tung mga tau.
Bilang kung magpadangat da nganing ta parusa tung mga taung pagbuat ta malain,
katimbang nang ya ray panirbian na tung Dios.
5 Kapurisu ya ra kay ipagkaministiran na ang ita manangëd tung may mga katëngdanan,
bëlag̓an ilëm natëtëngëd ang muya maparusaanita nira kung alimbawa mabuatita ta malain,
kung indi,
kapin pa ëngëd natëtëngëd tung sadiling painu-inu ta ang muya ya ray magbasul tung yatën kung indiita ra manangëd tung nira ay nag̓askëan ta ra kang lag̓i ang yay dapat ang panangdën ta.
6 Purisu ya ra kay nag̓ipaggawad ta yang kumpurming nag̓ipagpagawad nira tung yatën ay kipurki tung pagtërëlëngën yang Dios,
yang pagprusigir nira tung pag̓ërëkëlën nira yang banwa,
katimbang nang ya kay panirbian nira tung anya.
7 Purisu kung unu pay magkabag̓ay ang ipakdul ta tung sasa may sasa tung nira,
ipapakdul ta.
Pariu ra asan tung unu pa man ang balayaranay ang magsukutun nira tung yatën,
ubligadung yag bayaray ta.
Kung tinu pay magkabag̓ay ang galangën,
galangën ta.
Kung tinu pay magkabag̓ay ang padëngëg̓an,
padëngëg̓an ta natëtëngëd ka man tung katëngdanan nang liit tung planu yang Dios.
Kung Tinu Pay Paggëgma Tung Masigkatau Na Asan Da NGa Tumanay Na Yang Tanan Ang Sinambit Tung Mga Katuw̓ulan Yang Dios (13:8-10)
8 Dispuis pa kaministiran ang indi ta paw̓aya-w̓ayaan yang mga kinautangan ta ang yay ubligasyun tang bayaran.
Yang sulaminting ubligasyun tang indi ra ka ëngëd mabayad-bayaran ta ya ra yang ubligasyun tang maggërëgmaan.
Ay kung tinu pay paggëgma ta ustu tung masigkatau na,
ya ray nag̓apagtuman yang tanan ang sinambit tung mga katuw̓ulan.
9 Kipurki kung isip-isipën ta yang mga katuw̓ulan yang Dios,
maning taa yang palaksu yang duma ang nag̓adapat tung pagpakignunut ta tung aruman tang tau.
Indiita unu maglimbung tung kasawa ta,
indiita ka unu mangimatay ta masigkatau ta,
indiita ka unu manakaw ta bëlag̓an yatën,
indiita ka unu mag̓amluk tung bëlag̓an yatëna.
Maskin may duma pang duun ka yang rumbu nira,
tanira kang tanan lug̓ud da tung sa nga katuw̓ulanan da ilëm ang gëgmaan ta unu yang masigkatau ta ang katulad ka tung paggërëgmaën ta tung mga sadili tab.
10 Ay kung paggëgmaita tung masigkatau ta,
indiita ra ka mapagbuat tung anya ta mga malalain ang mga maning tia.
Intunsis kumpurming tinu pay paggëgma tung masigkatau na ya ray nag̓apagtuman yang tanan ang sinambit tung mga katuw̓ulan.
Natëtëngëd Tung Duruang Klasing Panimpu Ang Nag̓ipananglit Na Tung Law̓ii May Kaldaw (13:11-14)
11 Buinu,
kaministiran ang prusigiran tang usuyun yang nagkarasambitung atia,
kapin pa simanyan ang nag̓akdëkan ta ra kung unu pa ëngëd ay kapulutan na yang panimpu tang naa.
Ay kinaw̓ut da yang uras ang ipag̓ulag tang magprusigir tung kalëlyag̓an yang Dios ang katulad ka tung sasang taung napuaw ra.
Kipurki yang uras ang ipagpalibri ëngëd ang pisan ni Ginuu ta tung yatën tung tanan ang kalainan mas dang nag̓aalëngët dang nag̓aalëngët kay tung atiing primirung pagtalig ta tung anyang nagpatapnay.
12 Idayunu ra kanay yang pananglit.
Katulad tung law̓ii ang magtataklib da,
yang pisan yang kaalimbawaan yang panimpu ta simanyan taa tung kaliw̓utan ang naa.
Yang dating sistimang pag̓andar balaw̓ag ang pisan tung kalëlyag̓an yang Dios.
Piru alëngët da ka yang uras ang ipagpakli na ta sasang durung pisan agkatinlung panimpung pinangakuan na ang yay nag̓ipananglitu tung kaldaw.
Purisu kung may mga ubra-ubra ta pang malain ang katulad ka tung nag̓abuat yang mga tau tung makiklëp,
ipamlëk ta rang luw̓us.
Yang dapat ang padërëpan ta ya ra yang pagburuatën ang matitinlu ang may taw̓ang na tung yatën ang manguntiël tung mga panuksu yang kuntrariu ta ang katulad ka tung mga sundalu ang basta kaldaw ra nganing,
ya ray nag̓ipagsuut nira ta mga isangkap nira tung mga tinanguni nira ang para simpan dang manalunga tung mga kabatuk nirac.
13 Bilang ëklan ta tung purus matandës yang mga ubra-ubra ta ang maning pa tung kinaw̓utanita rang lag̓i yang panimpung atiang maning pa tung kaldaw.
Purisu indiita ra magpabuung may kanunut na kang kasadyaan ang durug kagulu.
Indiita ra ka magpaklëd tung maskin unu pang malawayay ang katulad ka tung pangumbaw̓ay may pangunlalii.
Indiita ra ka magsuruayan ig indiita ra ka mag̓iriw̓ëg̓-iw̓ëg̓an ubin magraraibal-raibalan tung kadëngëg̓an.
14 Kung indi,
yang buatën ta,
ti Ginuung Jesu-Cristo mismu,
yay maning pa tung susuutun tang pirmi ang katulad ka tung sasang aw̓ël ang durug tinlu ang para pirmiitang masaliran na yang ug̓ali nang limpiu ang para ya ray maita yang mga tau tung yatën.
Indi ta ëngëd pakdulan ta lugar yang dating pagkatau tang mapinagpanadili ang muya asanita si nga guyuray nang magpapsaw tung dating kalëlyag̓an ta.