Yang Mga Sadili Ta Kaministiran Ang Iintriga Tang Bug̓us Tung Dios (12:1-2)
12
Kapurisu mga putulu,
natëtëngëd tung kaildaw ang ipinagpaita yang Dios tung yatën atiing pagtalig ta tung ni Jesu-Cristoa,
yang nag̓ipagpaprusigiru tung yatën ang tanan ang sasa may sasa masig̓intriga yang anya-anyang sadili tung Dios ang ipagaëm.
Yang pag̓irintrigaën tang atia tung anya ipananglitu tung dating pagturuuën yang mga Israel tung Dios ang duun ipapanaway nira tung pagparadasag̓ën nira ta mga ayëp ang ya iintrigaay nira tung anya.
Ug̓aring yang yatën ang iintriga tung anya bëlag̓an patay,
kung indi,
ya ra yang mga sadili ta mismung bui pa ang ultimu ilëm tanya ay may anya ang ya ra kay mauyunan na ta mupia.
Yay pagturuuën tang magkabag̓ay ang pisan tung anya.
2 Indiita ra ëngëd magpaguyud tung sistimang pangkaliw̓utan ang yang palaksu na balaw̓ag ang pisan tung kalëlyag̓an yang Dios.
Kung indi,
ipaimaklu tang pirmi tung anya yang mga kinaisipan ta ug̓ud asan da ka magbaklu yang mga ubra-ubra ta ang para asan da ka nga tultulay ta kung unu pay nag̓alëlyag̓an na ang yay buatën ta.
Bilang asan da ngaskëay ta kung unu pay talagang matinlu ig kung unu pay nag̓auyunan na ig kung unu pay may taw̓ang na ang para masalapayita ra tung pinalanu na tung yatën.
Natëtëngëd Tung Pag̓urusuyun Nira Tung Nira-nirang Turnu (12:3-8)
3 Natëtëngëd tung pagkaapustulung naang ipinagpiar yang Dios tung yëën ang yuu ra kag paktëlay nang pag̓ërëkëlën,
may gustuung ianing tung yatën dang tanan.
Sasa may sasa tung yatën kaministiran ang indiita ëngëd magpabëtang tung mga sadili ta ang subra pa tung magkatama,
kung indi,
tung katamtaman ilëm ipabtangay ta.
Asan da ipausuyay ta yang pagpabëtang ta tung kumpurming unu pay nag̓akayanan tang ubraën ang ya ra kay ipinaëyang yang Dios tung yatën sasa may sasa atiing primirung pagtalig ta tung ni Jesu-Cristo.
4 Kipurki tëlëngan mi.
Yang tinanguni ta sam bilug ilëm,
piru dakëlë yang mga parti-parti na ang nag̓aaparti-apartian ta turnu nirang nag̓itaw̓ang nira tung tinanguni tang bilug.
5 Maning kang pisan tia yang kaalimbawaan tang mga tumatalig.
Maskin dakëlëita,
yang kaalimbawaan ta,
maning pa tung sa nga tinangunianita ra ilëm natëtëngëd tung pagtaralig̓ën tang tanan tung ni Jesu-Cristo ig sasa may sasa tung yatën talagang kaministiran ta yang taw̓ang yang kadaklan ang mga putul ang katulad ka tung mga tinanguni ta ang kaministiran ka nira yang taw̓ang yang mga parti-parti na.
Purisu indiita ëngëd magpabtang tung mga sadili ta ang itay landaw pa tung mga putul ta.
6 Kung indi,
kumus sasa may sasa tung yatën,
anya-anyang nag̓akayanan ang kumpurming unu pay ipinaëyang yang Dios tung yatën,
kaministiran ang masigpadërëp yang anya-anyang nag̓akayanan ang para tung ikadëngëg na.
Alimbawa kung tinu pa tung yatën ay pinaëyangan na ta ikaya nang magpadapat ta bitalang ya ag̓ipaëyangay na tung isip na,
kaministiran ang ya ray padërëpan nang ipasanag na tung mga kaarumanan na ang asan da ka ipapanaway na tung magkatunu tung kamatuuran ang ipinagpabunayag da kang lag̓i yang Dios tung yatën.
7 Kung tinu pay pinaëyangan na ta kinaisipan nang manirbian ta matinlu tung mga kaarumanan na,
kaministiran ang ya ray prusigiran na ta mupiang ubraën.
Kung tinu pay pinëyangan na ta ikaya nang magpasanag ta makaliliway ta isip yang mga kaarumanan na natëtëngëd tung kamatuuran ang ipinagpasulat yang Dios,
kaministiran ang ya ra kay pabilug̓an ta isip nang ubraën.
8 Kung tinu pay pinaëyangan na ta ikaya nang magpaktël tung isip yang mga kaarumanan na ang para mas pang këmëët yang pagtaralig̓ën nira tung ni Ginuung Jesus,
kaministiran ang ya ra kay padërëpan na.
Kung tinu pay pinaëyangan na ta kinaisipan nang masalamang magbuluntad ta igparakdul na tung may mga kaministiran,
ya ray padërëpan na.
Ug̓aring yang pagburuluntarën na,
kaministiran ang tëdëk tung isip nang anday pag̓asikad nang para tanya dayawën.
Kung tinu pay pinaëyangan na ta ikaya nang magpadag̓ën-dag̓ën tung sam pundaan yang mga kaarumanan nang mga tumatalig,
kaministiran ang ya ra kay padërëpan na ta mupia.
Kung tinu pay pinëyangan na ta kinaisipan nang mainildawën tung mga masigkatau nang nag̓aliwag̓an da,
kaministiran ang ya ray prusigiran na tung masadyang kinaisipan.
Natëtëngëd Tung Paggërëgmaan Nirang Tëdëk Ang Yay Dapat Ang Ipaita Nira Tung Tanan Ang Pag̓urulag̓ën Nira Tung Pangaldaw-kaldaw (12:9-18)
9 Kung natëtëngëd tung paggërëgmaën ta tung mga masigkatau ta,
kaministiran ang bëlag̓an tung patunu-tunu ilëm,
kung indi,
tëdëk tung kinaisipan ta.
Kumpurming unu pay nag̓aintindian tang malain tung pagtërëlëngën yang Dios,
yag pakulainay ta.
Ig yang kumpurming unu pay nag̓aintindian tang maayën tung pagtërëlëngën na,
yag pakumaalay ta.
10 Kaministiran ka ang yang paggërëgmaan tang mga tumatalig sasa may sasa asan da ipatupuay ta tung paggërëgmaan ang lutuk yang magpurutul ang sërëkëd tung tian.
Magturukawanita rang magdarayawan.
11 Indiita ëngëd magpatamad,
kung indi,
pirmiitang magpakabëdlay ang magpaturuw̓ulun ta madërëp tung ni Ginuu ta ang yang mga isip ta ya ra ipadëgtëay ta tung Espiritu Santo ang para pirming makinit yang gëgma ta tung anya ang maning pa tung waing pagbukal.
12 Yang ikasadya ëngëd yang mga isip ta,
ya ra yang kaayënan ang nag̓apakbat ta ang ya ray ipalapus yang Dios tung uri.
Kung mapasaranita ra nganing ta pinitinsia,
magpakatëntënitang mag̓agwanta ig magprusigirita ra ka ëngëd ang pirmi tung pag̓arampuën ta.
13 Kung may mga putul tang tumatalig ang kampus da tung pagpangalayun nira,
ya ray intindiën tang tabnuyun.
Kung may mga putul tang nag̓apanaw tung yatën,
ya ray padërëpan tang asikasuën ta matinlu tung mga pamalay-w̓alay ta.
14 Kung may mga taung pamagpandëëg-dëëg tung yatën arangan da ilëm tung pagtaralig̓ën ta tung ni Jesu-Cristo,
indi ta ra ipag̓ampu tung Dios ang para padalpëtan na ta malain,
kung indi,
ya ag̓ipag̓ampuay ta ang ya ra pakaayënay na.
15 Dispuis,
kung may putul tang may pagpakasadyaan na,
magpakigsasaita ra ka tung anyang magpakasadya.
Kung may putul tang mag̓sampiën da ta pagpungawan na ang kung kaisan ya ra kay nag̓ipanangit na,
ya ka,
pakigdamayan ta ra ka tung kapupungawën nang magpakigtangitita ra ka.
16 Kaministiran ang itang magpurutul pantay-pantay yang pagpabëtang ta tung sasa may sasa ang anday maglandawan.
Indiita ra ka pagsikarën yang sadiling dëngëg ta,
kung indi,
maskin aranëk ang ubra ang midyu indi ra rin bumag̓ay tung pagkabëtang ta,
pëgsan ta ra ka ëngëd ang ubraënb.
Indiita ra ëngëd magpabëtang tung mga sadili ta ang ita mas mataku kay tung mga aruman ta.
17 Kung may magbuat ta malain tung yatën,
indiita ra ëngëd mangimalësan,
kung indi,
intindiën ta ta mupia yang mga ulag ta ang maskin tung pagtërëlëngën yang kadaklan puiding aningën nirang matinlu.
18 Mintras may rimidyung sarang mabuat ta,
ta yatën,
ya ray buatën ta ug̓ud basi pa ra ilëm ang asanita ra mag̓uruyunan yang mga aruman tang atia.
Kaministiran Ang Dëëg̓ën Ta Yang Malain Ëkël Tung Pagburuatën Ta Yang Matitinlu (12:19-21)
19 Mga putulung nag̓amaalu,
indiita ra ëngëd ang pisan mangimalësan tung sasang taung nagbuat ta malain tung yatën,
kung indi,
ipatug̓ay ta ra ilëm tung Dios ang magpadangat ta parusa tung anya.
Ya ray buatën ta ay may sasang inaning nang nabtang tung kasulatan ang mag̓aning tanya,
“Kung natëtëngëd tung pagbaralësën,
yuu ray bala asan.
Yuu ray mangimalësan tung kumpurming tinu pay nagbuat ta malain tung numyu,
bëlag̓an yamu,”
ag̓aaningc.
20 Kung indi,
yang buatën ta,
mag̓usuyita ra ilëm tung sam bilug ang bitalang nabtang ka tung kasulatan ang mag̓aning,
“Kung alimbawa nag̓asuw̓uk da yang pagpakigsuay tung nuyu,
papaanën mu.
Kung alimbawa agkanalën da,
paigmën mu ka ta wai.
Ay asan da nga paëyak natëtëngëd tung pagpakigsuay na tung nuyu,”
mag̓aningd.
21 Yang gustuung ianing,
indiita ra ka ëngëd magpadëëg tung mga ubra-ubrang malain ang binuat tung yatën yang sasang tau ang muya maisipitang mangimalësan tung anya,
kung indi,
dëëg̓ën ta yang mga ubra-ubra nang atiang malain ëkël tung pagburuatën ta ta ikaayën na.