Natëtëngëd Tung Pamlëk Yang Dios Tung Nasyun Ang Israel Kung Unu Pay Nalagpakan Na (11:1-6)
11
Ta,
yang panambing ang naa yang kadaklan ang mga masigka Israelu tung ni Ginuung Jesus,
unu pa w̓asu ay nalagpakan na?
Aningën ta w̓asu ang yang intirung nasyun ang naang Israel ang yay pinilik yang Dios atiing tukaw ang para mag̓ing mga tauan nang sadili,
ya rang pisan ay ipinlëk nang luw̓us?
Abaa,
indi ka ëngëd magkatama tia.
Ay maskin yuu puiding pangkëlan ta basi ang bëlag̓an tama tia.
Ay kipurki yuu ngani sasang Israel ka ang kanubli ni Abraham ig lug̓uraw ka ngani tung sam palanang pinamuaran ni apung Benjamina ang pagkatapus bëlag yuu iplëkay na,
yuu ildaway na.
2 Talagang indi ka man ipinlëk ang pisan yang Dios yang mga tauan nang pinilik nang tukaw ang para tanira ëngëd ay pakaayënën na.
Simpri nag̓akdëkan mi ra ka yang sasang napabtang tung kasulatan sigun tung ni Elias atiing tanya nagkig̓a ra tung Dios natëtëngëd tung mga masigkanasyun nang mga Israel ang mag̓aning tung anya,
3 “Yawi,
yawa rag tëtëlëng.
Yang kadaklan ang mga arumanung pinanuw̓ul mu kang magpalatay yang bitala mu tung mga taung naa,
pinangimatay ra ilëm nira.
Pati mga batung tinarutug ang binuat dang darasag̓an ta mga ayëp ang ya ag̓iintrigaay yamën tung nuyu,
pinaggëw̓a ra ka nganing nira.
Dispuis pa,
yuu ra ilëm ang sam bilug ay nag̓aëpëd ang pagtuu ta ustu tung nuyu,
ang pagkatapus nag̓atimaanaw ra ka nirang imatayën!”
ag̓aaningb.
4 Piru unu pay itinuw̓al yang Dios tung anya,
kung indi,
ya taa:
“Puira pa tung nuyu,
may nag̓aëpëd pa kang pitung liw̓u nga laliian ang itinig̓anaw rang yëën ang indi ra ka namagluud tung katalungaan yang bultung atiang pag̓aningën ang ti Baal,”
mag̓aningc.
5 Maning kang pisan tia yang laksu na tung mga panimpu ta simanyan.
Ay kung ikumpalar pa tung kinadaramëlën yang mga kaarumanan tang mga Israel,
itang mga Israel ang nagtalig da yang mga sadili ta tung ni Ginuung Jesus ang nagpatapnay maning pa tung ëpërita ra ilëm nira.
Pininig̓ita ra nganing yang Dios ang mag̓ing mga tauan na natëtëngëd ilëm tung kaildaw nang ipinagpaita na tung yatën ang durung pisan agkabëw̓ërëng.
6 Yang ipinagpinig na tung yatën,
andang pisan ay kalalabtën na tung mga buat-buat tang mga matitinlu,
kung indi,
natëtëngëd ilëm tung kaildaw nang atia.
Kipurki kung yang ipagpilik na tung mga tau,
asan da rin ipatiëlay na tung mga buat-buat nirang matitinlu,
intunsis anda ra asan tung kaildaw na maniël yang ipagpilik na tung nira.
Yang Kadaklan Ang Mga Israel Indi Nangatultul Tung Kalibrian Ag̓ad Pa Sinagyap Ka Rin Nira Ta Madërëp (11:7-10)
7 Ta,
unu pay linagpakan yang nag̓ianingung naa,
kung indi,
ya ra taa.
Yang sinagyap ta durug dërëp yang mga masigkanasyun tang naang mga Israel ang tanira mausgaran da yang Dios ang sumalu ra tung pagtërëlëngën na,
ya pay indi natultulan yang kadaklan.
Kung indi,
itang mga Israel ang pinilik yang Dios ang inildawan,
itay natultul.
Ang pagkatapus yang kadaklan,
pinaw̓ayaan da ilëm yang Dios ang asta mas pang nagpabëngël ang indi ra ilëm maklëran yang kamatuuran natëtëngëd tung kalibrian ang pinagtukud da ni Jesu-Cristo.
8 Yang bag̓ay ang naa,
magkapariu ka tung binuat yang Dios ang tukaw tung nasyun ang Israel ang yay nabtang tung kasulatan ang mag̓aning,
“Maning pa tung pinaëlëk na yang mga isip nira.
Indi ra ëngëd dumakat kung unu pay nag̓auyunan na ay indi ra ka ilëm maklëran ang asta ra ilëm simanyan,”
ag̓aaningd.
9 Midyu magkanggid-anggid ka tung sasang iningaluk ni Adi David tung Dios ang yang mga taung pamagpakigkuntra tung anya ya ray maning pa tung pakëkbëlën na yang mga isip nira ang maning taa yang palaksu na:
“Ay Ampuanung Dios,
yang nag̓aingaluku tung nuyu,
yang mga pagkalipayan nirang atia ta duru kag makatatalig ta mga isip nira ang tanira maraayën ka tung pagtërëlëngën mu,
buatën mu ra ilëm ang maning pa tung sasang pakul ang mainalian da ilëm tanirang makëdkëran.
Bëlsën mu ta magkabag̓ay ang taniray pagbalikan ëngëd ta kasalanan.
10 Pakiklëpën mu ra yang mga kinaisipan nira ang asta indi ra mangaintindi ta ustu tung nuyu.
Palbatan mung pirmi tung mga kaliwag̓an ang katulad ka tung mga kirëpën ang pirming nag̓apasakanan ta mga malëlbat,”
mag̓aninge.
Durung Mga Taung Tag̓a Duma-rumang Nasyun Ang Nag̓apanapnay Yang Dios Ang Basi Pa Ra Ilëm Duun Da NGa Paiw̓ëg̓ay Na Yang Mga Israel (11:11-12)
11 Ta,
unu pa w̓asu ay linagpakan yang pangatadlënganung atia?
Aningën ta w̓asu ang yang mga kinasakpan yang nasyun ang naang Israel,
atiing pagpakuindi nira tung ni Jesu-Cristo,
duun da nga lambëg ang pisan tung kalainan ang asta tung sampa?
Abaa,
indi ka ëngëd magkatama tia!
Kung indi,
maning taa yang nainabu.
Natëtëngëd tung pagpakuindi nirang atia tung ni Jesu-Cristo,
yang Matinlung Balitang naa natëtëngëd tung anya ilinaktëd da tung bëlag̓an mga Israel ug̓ud maintindian da nira natëtëngëd tung kalibrian ang pinagtukud na.
Ay yang pag̓asikad yang Dios asan ang basi pa ra ilëm asan da nga paiw̓ëg̓ay na yang mga Israel tung bëlag̓an mga Israel ang nag̓apanapnay na ang asta pati tanira mangalëlyag da kang mampatapnay tung ni Jesu-Cristo.
12 Kung tung panambing nira tung ni Jesu-Cristo asan da nga paitaay yang Dios yang dumang mga tau ta kaildaw nang aw̓unda,
ig kung tung panalyud nira tung kalibrian asan da nga pakaayënay na ta mupia yang bëlag̓an mga Judio,
ig disir,
kung kaw̓utun da nganing yang uras ang makumplitu rang pisan yang kinadakël yang mga Judiong pinilik yang Dios ang ya ray mamagtalig tung ni Jesu-Cristo,
kapin dang magkatinlu yang pakaw̓utun na.
Gustu Na Ang Tung Pagparakaw̓utun Na Asan Da NGaëyangay Yang Mga Israel Ta Ipag̓iw̓ëg Nira (11:13-16)
13 Ug̓aring nani pa yang sasang gustuung ianing tung numyu asan ang bëlag̓an mga Israel.
Kumus yuu sasang taralig̓an ni Jesu-Cristong tinuw̓ul nang magparakaw̓utun yang Matinlung Balita tung maning tung numyung bëlag̓an mga Israel,
yay pag̓apakdulanu ta dakulung kantidad na.
14 Yang sasang pag̓asikaru ay ug̓ud basi pa ra ilëm ang tung pagparakaw̓utunung naa,
asan da ngaëyangay yang mga masigkanasyunung mga Israel ta ipag̓iw̓ëg nira tung maning tung numyung nag̓atapnay ra yang Dios,
ang asta mangalëlyag da kang mamagtalig tung ni Jesu-Cristong magpatapnay.
15 Sinambitu nungayna ang yang kadaklan ang mga masigkanasyunung atia ipinlëk da yang Dios natëtëngëd tung panambing nira tung ni Ginuung Jesu-Cristo.
Kung tung pamlëk na tung nira duun da ka nangatultul yang dumang mga tau tung dalan ang pagbalikan nira tung Dios,
ig disir,
kung yang mga masigkanasyunu ya ray mamagtalig tung ni Jesu-Cristo ang para asan da ka tanira nga risibiay yang Dios,
yang kaalimbawaan nira,
maning pa tung mga taung nagkarapatay ra ang pagkatapus pinamui si kang uman yang Dios.
16 May sasang riglamintung ibinutwan ni Moises tung nasyun yamën ang Israel ang ya ray gustuung buatën ang sasang pananglit.
Atii kanay,
kung may sang masang arinang lutukun da,
yang sam parting tingkaw ang linutuk ya ra iprisintaray nira tung Dios.
Kumus may kalalabtën da yang Dios tung sam parting atiang ipinatkaw,
pati yang nag̓aëpëd ang yay magdasun ang lutukun,
ya kaf.
Yang pisan ay kaalimbawaan yang intirung sang nasyun ang Israel.
Kumus yang mga kinaampu nirang namamuad tung nira atiing primiru yay kinaw̓ig yang Dios ang mga tauan nang sadili,
pati yang mga kanubli nira,
may kalalabtën pa ka ëngëd yang Dios tung nira sigun tung mga kinaampu nirang atii.
Yang sam bilug pang puiding ipananglitu tung bag̓ay ang naa,
ya ra yang sang kapungul yang ayu.
Yang maning pa tung laskaw na,
ya ra yang mga kinaampu nirang atii.
Yang maning pa tung mga sanga-sanga na,
ya ra yang mga kanubli nira.
Purisu kumus rinisibi ra nganing yang Dios yang maning pa tung laskaw na,
pati yang maning pa tung mga sanga-sanga na,
may kalalabtën na pa ka ëngëd tung nira.
May Sasang Nag̓ipaaman Na Tung Mga Tumatalig Ang Bëlag̓an Mga Israel (11:17-24)
17 Durung mga masigkanasyunung mga Israel ang ipinamlëk da yang Dios natëtëngëd tung panambing nira tung ni Ginuung Jesus.
Yang kaalimbawaan nira maning pa tung mga sanga-sanga yang sasang ayung pag̓aningën ang olibo ang balaynën ang ya ray pinaglampang na.
Ang pagkatapus yamung bëlag̓an mga Israel ang tinapnay ra yang Dios natëtëngëd ilëm tung pagtalig mi tung ni Jesu-Cristo,
yang kaalimbawaan mi,
maning pa tung mga sanga-sanga yang sasa kang olibong talunun.
Ang pagkatapus maning pa tung ingkëlanamu ra yang Dios ang ipinakapulit tung mga sanga-sangang nag̓aëpëd tung olibong atiang balaynën.
Yang katuyuan na asan ay ang para maning pa tung kasiraanamu rang magsëpsëp yang payëk yang ayu ang durug kasustansia ang duun ka manliit tung laskaw yang ayu.
Bilang ipinalg̓uramu ra yang Dios tung kalibrian ang pinangakuan nang tukaw tung ni Abraham ang yay namuad tung nasyun nira.
18 Piru maski pang maning tia yang nabtangan mi,
indiamu ëngëd magpasaktar tung mga Israel ang atiang ipinlëk da yang Dios ang maning pa tung pinaglampang na.
Unu pa w̓asu ay ipagpabug̓al mi asan?
Yamu maning pa tung mga sanga-sanga ilëm.
Piru kung disgrasia ëyanganamu pa ta ipagpasaktar mi tung nira,
dëmdëmën mi ra ilëm kanay ang bëlag̓an yang mga sanga-sanga ay pagpakdul ta sustansia tung laskaw yang sasang ayu,
kung indi,
yang laskaw na yay pagpakdul ta sustansia tung mga sanga-sanga na.
Yang ilyag nang ianing bëlag̓an ang mag̓aning ang yamuy pinanliitan ta ikaayën yang mga Israel,
kung indi,
yang nasyun nira yay pinanliitan yang nag̓ikaayën mi simanyan tung ni Ginuung Jesu-Cristo.
19 Muya may asan tung numyung magsublang ang mangatadlëngan ang yang mga Israel unu maning pa tung linampang da yang Dios ay ug̓ud ta yamu unung bëlag̓an mga Israel may lugar dang ipakapulitamu ra anya tung kapungul yang ayung atia.
20 Yang matuw̓alu asan,
ëë,
matuud ka man tia.
Ug̓aring ilëm yang dapat ang dëmdëmën ta,
yang ipinaglampang yang Dios tung nira ay natëtëngëd ang indi ra nangalëlyag ang mamagtalig tung ni Jesu-Cristo.
Ang pagkatapus ta yamu,
natëtëngëd ilëm tung pagtaralig̓ën mi tung anya may kadayunan mi tung nag̓abtangan ming atiang maning pa tung yamug kakapulit.
Purisu bëlag̓an ang yay pagdakulan yang mga kulu ming magpasaktar tung nira,
kung indi,
mangamanamu ra ta mupia.
21 Kipurki kung indi nganing ipinalibri yang Dios yang mga Israel ang yay maning pa tung dating mga sanga-sanga yang ayu,
kung indi,
maning pa tung pinaglampang na,
pati yamung maning pa tung ya ra ilëm ag̓ipakapulitay na,
talagang indiamu ka ipalibri na kung alimbawa indi mi idayun yang pagtaralig̓ën mi tung ni Jesu-Cristo.
22 Purisu papatandaan mi ta maayën kung ya pa ag̓arig kaisëg yang Dios ang magpadangat ta parusa tung duma ig kung ya pa ag̓arig kainildawën ang magtapnay tung duma.
Maisëg tung mga Israel ang atiang namanambing da tung ni Jesu-Cristo,
piru durug kainildawën tung numyung bëlag̓an mga Israel sasa may sasa basta idayun mi yang pagpakumaal mi tung kanëëman nang atiing ipinagpaita na tung numyu.
Ay kung disgrasia indi mi idayun tia sasa may sasa,
pati yamu sakpën ka yang kaisëg na ang maning pa tung lampangënamu ra ka anya.
23 Dispuis pa,
maski nganing tanirang mga Israel,
kung indi ra ilëm idayun nira yang panambing nirang atia tung ni Jesu-Cristo,
kung indi,
magsuku ra ka tung anyang mampatapnay,
talagang risibiën da ka ëngëd yang Dios ang maning pa tung asan si ipakapulitay na tung dating kapungul ang pinaglampangan tung nira.
Ay tia ya kang lag̓i ay masarangan nang buatën.
24 Kipurki isipën mi.
Yamung bëlag̓an mga Israel,
yang kaalimbawaan mi,
maning pa tung mga sanga-sanga yang sasang ayung olibong talunanën ang nagkarasigpat da ang pagkatapus ipinakapulit da duun tung sang kapungul ang olibong balaynën,
ag̓ad bëlag̓an kang lag̓ing yay natural na.
Kung maning tia ya pay binuat yang Dios tung numyu,
mas malpës ang tanirang maning pa tung dating sanga-sanga yang ayung atia ya ibalikay nang ipakapulitay tung dating kapungul nang pinaglampangan tung nira.
Kung Ya Pa Ag̓aring Maanluyan Yang Dios Yang Prublima Natëtëngëd Tung Kadaklan Ang Mga Israel Ang Ipinagpëlëk Na (11:25-32)
25 Yamung mga putulu tung ni Ginuung Jesus ang bëlag̓an mga Israel,
nag̓apasanag̓anamu ra yëën ta maning tia ay may sasang inëgtëman pa rin yang Dios ang tukaw ang simanyan ya ray ipinabunayag na tung yëën.
Gustuung ya ray maintindian mi ug̓ud indiamu magpasaktar tung mga Israel ang may nag̓alandawan mi pa tung nira.
Ya ra taa yang ipinabunayag na tung yëën.
Yang pagpabëngël ang naa yang kadaklan ang mga Israel tung Matinlung Balita natëtëngëd tung ni Jesu-Cristo bëlag̓an ang mag̓aning ang yay magdayun ang asta tung sampa.
Kung indi,
asan da ilëm nëgka tung uras dang makumplitu ra nganing yang kinadakël yang bëlag̓an mga Israel ang kada sang nasyun ang kumpurming magtalig tung ni Ginuung Jesus,
ang asan da ka ngalg̓ud tung palaksu yang paggaraëmën yang Dios ang naang baklu.
26 Kung mainabu ra nganing tia,
yang kadaklan ang mga Israel ang atiang pamagpabëngël duun da ngaëyangay ta ipagtalig nirang mamagtalig da ka tung ni Ginuung Jesusg.
Kipurki yang bag̓ay ang atia naula kang lag̓ing napabtang tung kasulatan ang mag̓aning,
“Yang Mananapnay ang nag̓aëlatan ta,
sasa kang masigkanasyun tang Israel.
Kung kumaw̓ut da nganing,
yang papanaw nang magpanapnay tung yatën ang mga kanubli ka ni Jacob,
punasanita ra anya tung mga paglalampasën ta tung kalëlyag̓an yang Dios,”
ag̓aaningh.
27 May sasa pang inaning yang Dios ang nabtang ka tung kasulatan ang yay gustuung isugpat tung naulitu ang maning taa yang palaksu na:
“Ya ra taa yang pangakuu tung mga Israel ang pampatawarënu tanira tung mga kasalanan ang nagkarabuat nira tung yëën,”
ag̓aaningi.
28 Kung natëtëngëd tung pagpasuag yang mga Israel tung Matinlung Balitang naa,
yang pagpabëtang yang Dios tung nira,
kuari ra mga kasuay na ang asta duun da nga laktëd yang balitang naa tung maning tung numyung bëlag̓an mga Israel ang ya ra kay ikinaayën mi.
Piru kung natëtëngëd tung pagpilik yang Dios tung nasyun nira tiing tukaw,
tanirang sang nasyun nag̓agëgmaan na pa ka ëngëd,
ay natëtëngëd tung pinangakuan na tung mga kinaampu yamën atiing tukaw.
29 Ay kipurki yang Dios tanya,
indi na ag̓umanën yang isip na kung tinu pay pilikën nang para pakaayënën naj.
Pati yang pagpilik na tung nasyun nira,
indi na ra ka pinag̓inësëlan.
30 Kapurisu kung papagbilug̓unu ra yang gustuung ianing,
ya ra taa.
Ta yamung tag̓a duma-rumang nasyun,
atiing indiamu pa nag̓apagtalig tung ni Ginuung Jesus,
nagpasuag̓amu ka tung kalëlyag̓an yang Dios ang nagpanadili.
Piru atiing pagpasuag tung Dios yang mga Israel ang ti Jesu-Cristo ya ray pinanambingan nira,
asanamu ra nga pakdulay na ta rugal ming manangëd tung Matinlung Balita natëtëngëd tung anya ang asta duunamu ra ka ngaildaway nang tinapnay.
31 Purisu kumus maning da ka man tia yang naispirinsiaan mi,
puidi kang ya ra kay maispirinsiaan nirang mga Israel.
Kipurki pati tanira namagpasuag da ka tung kalëlyag̓an yang Dios.
Pagkatapus tung pagpaita yang Dios tung numyu yang kaildaw nang nagtapnay,
yang pag̓asikad na asan ang basi pa ra ilëm ang asan da tanira ngaëyangay ta ipag̓intris nira ang asta mamagsuku ra ka tung ni Ginuung Jesus ang asan da ka ngaildaway yang Dios.
32 Ay ya pa ag̓ari,
yang tanan ang mga tau,
maskin mga Israel,
maskin tag̓a duma-rumang nasyun,
parariung pinamparurusan yang Dios tung pagparasuag̓ën nira tung anya ang asta asan da ilëm nga kulung ang katulad ka tung mga prisung ipinakalabus.
Yang pag̓asikad na duun ay ug̓ud parariu kang maildawan na ang yay ultimu ilëm ang mapagpalusutan nira tung pinagkulungan ang atia tung nirak.
Yang Pagdayaw Na Tung Dios Natëtëngëd Tung Kawawayangën Yang Isip Na Pati Tung Kantidad Yang Mga Kalalangan Na Asta Ra Ka Tung Pag̓ërëkëlën Na (11:33-36)
33 Ang panëëm-nëëmanu kung ya pa ag̓ari yang pagpapanaw yang Dios tung planu nang atiang durug tinlu tung mga Israel may tung bëlag̓an mga Israel,
yuu rag sadyaay ta mupia natëtëngëd tung kawawayangën yang isip nang andang pisan ay katëgka-tëgkaan na ig tung nag̓askëan nang andang pisan ay pagkakulang na.
Indi ta ëngëd masangkad ang pisan yang mga kalalangan na asta yang pag̓ërëkëlën na tung tanan ang bag̓ay,
indi ta ka ëngëd maintindian yang tanan ang palaksu na.
34 Uyun ang pisan tia tung mga bitalang napabtang tung kasulatan ang mag̓aning,
“Andang pisan ay taung nag̓asangkad yang tanan ang palaksu yang pag̓irisipën ni Yawi.
Anda kay taung mapagsugpat tung anya kung unu pay maayën ang buatën nal.
35 Yang Dios anday napautang tang kanëëman tung anya ang para ya ray balësan na tung yatën natëtëngëd anday mapakdul ta tung anya ang bëlag̓an liit kang lag̓i tung anya,”
ag̓aaningm.
36 Nag̓askëan tang matuud tia ay kipurki yang tanan ang pagkarainabu pulus lug̓ud tung kagaëman na ig tanya kay pag̓ërëkëlën tung tanan ug̓ud tung uri luw̓us da kang ikadëngëg na.
Bag̓ay ang pisan ang tanyay dayawën tang tanan ang mga tau ang asta tung sampang anda ëngëd ay katapus-tapusan na.
Magkamaningan da ka man tia.