Nag̓apabilug̓an Na Kung Unu Pa Ëngëd Ay Natëngëran Na Ang Indi Pangatultul Yang Mga Masigkanasyun Na Tung Kalibrian (10:1-4)
10
Mga putulu,
durung kalëlyag̓u ang yang mga masigkanasyunung naang mga Israel basi pa ra ilëm ang mampatapnay ra tung ni Ginuung Jesus.
Ya kay nag̓ipag̓ampuung pirmi tung Dios ang tëdëk ang pisan tung kinaisipanu.
2 Yang puiding aningënu natëtëngëd tung nira ang talagang matuud,
maskin duru ka man agkadërërëp tung pagturuuën nira tung Dios,
piru bëlag̓an usuy tung tamang pag̓irintindiën.
3 Sanu pa nga tultulay nira tia naang anda nganing ay gustu nirang mamag̓intindi tung baklung ipinagpakigpaig̓ung naang pinagtukud yang Dios kung ya pa ag̓ari yang pag̓usgad na tung mga tau ang salu rang pisan tung pagtërëlëngën na.
Kung indi,
yang nag̓asikad nira ang asan da ilëm ngausgaray na tanira tung pagturumanën nira yang mga katuw̓ulan na.
Purisu ya ray indi nira ipinagsuku tung anya ang para mampauyun da rin tung ipinagpakigpaig̓u nang atiang baklu ang para asan da rin ngausgaray na ta maning tia.
4 Piru yang papanaw ang atiang nag̓usuyun nira binuat da ni Jesu-Cristong imbalidu ra ilëm ëkël tung pagpakugmatay na.
Purisu yang pinakaw̓ut na,
kung tinu pay magtalig yang sadili na tung anyang magpatapnay,
asan da ngausgaray yang Dios ang salu rang pisan tung pagtërëlëngën na.
Kung Tinu Pay Tapnayën Yang Dios (10:5-13)
5 Kung natëtëngëd tung mga masigkanasyunu kung ayw̓a indi nangatultul tung kalibrian ang sinagyap da ka rin niraa,
padëmdëman ta ra kanay yang sasang isinulat ni Moises ang tukaw natëtëngëd tung pag̓usgad yang Dios tung mga tau natëtëngëd tung pagturumanën nira yang mga katuw̓ulan na ang maning taa yang palaksu na:
“Yang mga taung kumpurming nagsëpët dang pisan tung tanan ang nagkarasambit tung mga katuw̓ulan na,
ya ray lugtan nang magpasapën tung anyang asta tung sampa ëkël tung pagturumanën nirang atiang kumplitub,”
mag̓aning.
6 Piru kung natëtëngëd tung papanaw ang naang sam bilug ang suluminti ilëm tung pagtalig yang sasang tau tung ni Jesu-Cristo ang asan da ngausgaray yang Dios ang salu ra,
bistu ka tung sasang ipinagpadapat ni Moises tung mga masigkanasyun nang tukaw ang mag̓aningc,
“Indi mi ipagkësën-kësën tung mga isip mi ang bakluamu ra manangëd tung bitala yang Dios ang naang nag̓ipagpadapatu,
kaministiran may magpaabwat da kanay duun tung langitd.”
Kung aklësënu tung palaksu yang pag̓irisipën yang dumang pagdiskumpiar simanyan tung nag̓ipagpakaw̓ut yamën tung nira,
gustu ka nira ang baklu ra manangëd,
kaministiran ang may magpalangit da kanay ang para yang pag̓aningën ang Cristo,
ya ray ëklan nang magparanëk taa tung kaliw̓utan ang naa.
7 Utru si,
may sam bilug pang ipinagpadapat ni Moises tung nirang tukaw ang mag̓aning,
“Indi mi ka ipagkësën-kësën tung mga isip mi ang bakluamu ra manangëd,
kaministiran may magpaadalëm da kanay duun tung pag̓atiniran yang mga minataye.”
Kung aklësënu ka tung dumang pagdiskumpiar simanyan,
gustu ka nira ang baklu ra manangëd tung nag̓ipagpakaw̓ut yamën,
kaministiran ang may magpaadalëm da kanay duun tung pag̓atiniran yang mga minatay ang para yang pag̓aningën ang Cristo,
ya ray bangunun nang pabalikën taa tung kaliw̓utan ang naa.
8 Imbis maning tia yang nag̓ipagkësën-kësën nira tung mga isip nira,
indi ra.
Kung indi,
yang dapat ang isipën nira,
ya ra taang sam bilug pang inaning ni Moises tung mga masigkanasyun nang mag̓aning,
“Yang bitala yang Dios ang naang nag̓ipagpadapatu tung numyu,
malpës da ilëm ang maintindian mi,
ay asan da tung mga isip ming nag̓apanëëm-nëëman mi ig asan da ka tung mga nganga ming nag̓ipagkësën-kësën mi ka tung mga aruman mif.”
Yang bitala yang Dios ang atiing sinambit na,
kung ilaktëru tung panimpu ta simanyan,
ya ra taang nag̓ipagpakaw̓utu tung mga tau,
kapin da ëngëd tung mga masigkanasyunu ang tanira kaministiran dang magtalig yang mga sadili nira tung ni Jesu-Cristong magpatapnay.
9 Maning taa yang nag̓ipagpadapatu tung nira:
“Kung tinu pa asan tung numyu ay magpalamtuk da yang pundu yang kinaisipan nang manangëd da ang ti Jesu-Cristo binwi si ka man ang uman yang Dios ang pagkatapus yang nganga na ya ray gamitën nang mag̓ubligar tung publiku ang ti Jesus talagang Dios ka man ang matuud ang ya ra kay pinag̓intrigaan na yang sadili nang nagpagaëm,
yang taung atia,
asan da nga tapnayay yang Diosg.
10 Ay ya pa ag̓ari,
yang pundu yang kinaisipan yang sasang tau ya ray dapat ang ipalamtuk nang para manangëd dang tëdëk tung kinaisipan na ig yang nganga na ya ra kay gamitën nang mag̓ubligar da tung publiku kung unu pay nag̓apanangëd na.
Anday dumang pakaw̓utun na tia,
asan da ngausgaray yang Dios ang salu rang pisan tung pagtërëlëngën na bilang asan da nga tapnayay na.”
Maning tia yang nag̓ipagpakaw̓utu tung nira.
11 Talagang matuud tia ay kipurki may sasang bitala yang Dios ang napabtang tung kasulatan ang mag̓aning,
“Kumpurming tinu pay pagtalig tung anya,
talagang anda ëngëd ang pisan ay mapaëyakan nang pagsungunan tung nag̓atalig̓an na tung anyah,”
ag̓aaning.
12 May inaning nang bitalang “kumpurmi” ay natëtëngëd yang tanan ang mga tau,
mag̓ing mga Judio,
mag̓ing mga tag̓a duma-rumang nasyun man,
pantay-pantay ka ilëm tung pagtërëlëngën na.
Sam bilug ilëm yang mag̓ing Ginuu nirang may kalalangan tung nirang tanan ang ya kay magpaita ta kaildaw nang aw̓undang pisan tung kumpurming mag̓ambay tung anyang magpatapnay.
13 Maning kang pisan tia yang isinulat yang sasang manigpalatay yang bitala yang Dios ang tukaw ang mag̓aning,
“Kumpurming tinu pay mag̓ambay tung ni Yawing magpatapnay,
yay tapnayën nai,”
ag̓aaning.
Yang Nag̓ipanuw̓al Na Tung Riklamu Yang Duma Ang Yang Mga Judio Unu Indi Ra Ilëm Pinakdulan Ta Lugar Nirang Magtalig Tung Ni Ginuung Jesus (10:14-21)
14 Kung natëtëngëd tung pag̓ambay yang mga masigkanasyunu tung ni Ginuung Jesus,
muya may dumang mga tumatalig ang mga Judio asan ang may gustu nirang mangatadlëngan ta maning taa:
“Ya pa ag̓aring mapag̓ambay yang kadaklan ang mga masigka Judio ta tung ni Ginuung Jesus kung indi pa nganing nag̓aëyangan ta ipagtalig nira tung anya?
Ig ya pa ag̓aring maëyangan ta ipagtalig nira tung anya kung indi pa nganing nag̓agngël nira yang balita natëtëngëd tung anya?
Ig ya pa ag̓aring magngël nira tia kung anda pa ka nganing ay pagparakaw̓utun tung nira?
15 Ig ya pa ag̓aring may magparakaw̓utun tung nira,
kung indi pag tuw̓ulun yang Dios?
Kung tung bag̓ay,
duru ka rin agkatinlu kung paangayan da tanira yang Dios ta mga manigparakaw̓utun ang katulad ka tung sasang bitalang napabtang tung kasulatan ang mag̓aning,
‘Makasasadya ta isip yang pagkaw̓ut yang mga manigpakaw̓ut ta matinlung balitaj.’”
Maning da tia yang palaksu yang pangatadlëngan yang mga putul tang atia.
16 Yang matuw̓alu asan,
may mga tau rang pinanuw̓ul da ka man yang Dios ang magparakaw̓utun tung nira,
piru yang kadaklan indi ra namanangëd.
Magkapariung pisan tia tung sasang ikinig̓a ni Isaias tung Dios ang tukaw ang mag̓aning,
“Aay Yawi,
midyu alus pa ilëm ang anda ray nanangëd tung ipinagngël yamën tung nirak,”
mag̓aningl.
17 Purisu duun da ngaintindiay ta ang kung may mga taung pagtalig da tung ni Jesu-Cristo,
anday dumang natëngëran na,
nagngël da nira yang balita natëtëngëd tung anya,
ig anday dumang natëngëran na ang tanira nangagngël da,
ay may namagparakaw̓utun da tung nira natëtëngëd tung anya.
18 Piru ëlat kanay kung mangasarang,
yang mga masigkanasyunung naang mga Israel,
indi pa w̓asu nag̓agngël nira yang balitang naa natëtëngëd tung ni Jesu-Cristo?
Talagang nagngël da nira.
Ay katulad tung mga tau tung maskin ay pang banwaay ang puiding mag̓intindi natëtëngëd tung pagkadios yang Dios natëtëngëd tung kalangitan ang inimu na ang yay nag̓atingara nira law̓iig kaldaw,
maning ka tia tung mga masigkanasyunung naa.
Ay maskin ay pang banwaay tanira nga wasak,
puidi kang mag̓intindi tung Matinlung Balitang naa ay natëtëngëd sarambung da ang katulad ka tung sasang bitalang napabtang tung kasulatan ang mag̓aning,
“Yang nag̓ipagdiklara nira natëtëngëd tung anya,
sarambung da,
maskin duun tung ay pang kabiw̓init-binitanaym,”
mag̓aning.
19 Piru ëlat kanay.
Naang mga masigkanasyunung mga Israel,
indi nira w̓asu naintindian yang ipinagpakaw̓ut tung nira natëtëngëd tung ni Ginuung Jesus?
Talagang naintindian da nira,
piru indi ra ka ëngëd pinanangëd nira.
Ti Moises yay tukaw tung tanan ang napag̓ula ang yang bëlag̓an mga Israel ya ray mampauyun ang para asan da nga tapnayay yang Dios.
Bistu ra duun tung sasang inaning yang Dios ang ipinalatay ni Moises tung mga masigkanasyun na atiing tukaw pa ang mag̓aning,
“Purisu ta yëën,
anday dumang buatënu,
papag̓iw̓ëg̓ënamu ra yëën natëtëngëd tung pag̓irildawënu tung mga tag̓a duma-rumang mga nasyun ang ya kang lag̓i ay pag̓alamku ming anday kuinta nira.
Pasilag̓ënamu ra ka yëën natëtëngëd ya ray paitaanu ta dakulung pabur yang mga taung atiang nag̓alamku ming anday naërëm nira natëtëngëd tung yëënn,”
ag̓aaning.
20 Dispuis pa maski nganing ti Isaias,
durug kabalur yang isip nang nagpalatay yang sasang bitala yang Dios tung mga masigkanasyun na atiing tukaw ang balaw̓ag ang pisan tung mga isip nira.
Maning taa yang ipinalatay na,
“Yang mga tag̓a duma-rumang nasyun ang indi kang lag̓ing pamagsagyap tung yëën,
talagang ya pa ka ëngëd ay patultulunu.
Tanirang dati-rating indi kang lag̓ing pamagpasadsad kung unu pay mga kalëlyag̓anu,
talagang ya pa ka ëngëd ay pagpailalaanuo,”
mag̓aning.
21 Piru kung natëtëngëd tung mga masigkanasyun ni Isaias ang mga Israel,
yang aning yang Dios ang ipinalatay na,
maning taa:
“Tung tantung kabuay ra yang pagpararawatënu yang kalimaung naang durua tung mga taung naang indi ka ëngëd pamanangëd tung yëën,
kung indi,
yuu ra ilëm agpasuag̓ay nirap,”
ag̓aaning.