Nag̓asambit Na Kung Unu Pag Kapungaw Yang Isip Na Natëtëngëd Tung Nasyun Nang Israel Ang Tinalyuran Da Yang Dios Natëtëngëd Tung Panambing Nira Tung Ni Ginuung Jesus (9:1-5)
9
Numanyan tung magdasun ang naa,
may gustuung ianing tung numyu ang yay matalig̓an ming talagang matuud natëtëngëd tung pagsinasaay yamën ang naa ni Jesu-Cristo.
Indiaw pagbukli,
kung indi,
maski nganing yang sadiling painu-inuu ang yay nag̓apasanag̓an yang Espiritu Santo,
ya ra kay pagpaugtun tung gustuung ianing ang naa ang talagang matuud.
2 Iugtulu tung numyu,
durung pisan agkapupungawën yang isipung pagdëmdëm tung mga kaputulanung mga masigkanasyunung mga Israel ang alus pa ilëm midyu indi mapunas-punas tung isipu natëtëngëd yang kadaklan tung nira namanambing da ka man tung ni Ginuung Jesus ang tanya unu bëlag̓an yang pag̓aningën ang Cristong nag̓aëlatan da rin nirang kumaw̓ut.
3 Kisira rin ang ilug̓ut da ilëm yang Dios tung yëën ang yuu ra ilëm ay magsali tung nirang sintinsiaan na tung kalainan maskin magbëlag̓anami pa ni Jesu-Cristo,
ug̓ud asan da rin ngaipalibriayu tung sintinsia,
buatënu ra rina.
4 Tëëd mi tiag katinlu yang ipinakdul yang Dios ta diw̓aldi tung nasyun yamën ang Israel.
Tanira ka man mga Israel ang pangguuy,
bilang mga kanubli ni Israel.
Tanira mismu kinaw̓ig da nganing yang Dios ang yay mga ana nab.
Muya-muya nganing ang pinaitaan na yang kasusulawën yang pagkabëtang na atiing duun pa rin tanira tung mga banwang kapasc.
Tung nira ka nagpakigpaig̓u ang tanira ray mag̓ing mga tauan nang sadili ig tanya ra kay mag̓ing Dios nira.
Inulit na ka nganing ang pinaugtunan ta pira pang bisisd.
Pinakdulan na ka nganing ta mga katuw̓ulan na atiing duun pa tanira tung tinënaran yang bukid ang paggug̓uuyan ang Sinaie.
Pinagtuldukan na ka nganing kung ya pa ag̓ari yang tamang pagturuuën nira tung anya.
Tanira kay pinangakuan na ta duru-durung kaayënan,
kapin da ëngëd ang lug̓ud asan yang pag̓aningën ang Cristo bilang Mananapnay ang ipaangay na tung nira.
5 Dispuis yang mga kinaampu yamën ang na Abraham na Isaac ni Jacob ya ra ka man mismu yang pinamilik na atiing tukaw ang para yay buatën nang pamuaran yang nasyun nira.
Ig kidispuis pa,
landaw tung tanan,
atiing pag̓ingtau yang pag̓aningën ang Cristong atia bilang Mananapnay tung nira,
yang nasyun yamën mismu yay natauan na.
Ang pagkatapus bëlag ya mamanangëd tung anya yang kadaklan ang mga masigkanasyunung mga Israel,
ya mamanambing tung anya ang ya ra ka man mismu ay Dios ang makagag̓aëm tung tanan ang ya kay bag̓ay ang dayawën tang asta tung sampang anday katapus-tapusan.
Talagang magkabag̓ay ang pisan tia.
Bëlag̓an Ang Mag̓aning Ang Yang Tanan Ang Mga Kanubli Ni Abraham Luw̓us Ang Ipalg̓ud Yang Dios Tung Pinangakuan Na Tung Anya (9:6-13)
6 Piru maskin namanambing da ka man tung ni Jesu-Cristo yang kadaklan ang mga masigkanasyunung mga Israel,
bëlag̓an ang mag̓aning ang duun da isulay yang Dios yang pinangakuan na tung na Abraham ni Isaac ni Jacob pati mga kanubli nira ang tanya ray mag̓ing Dios nira ig tanira kay mag̓ing mga tauan na.
Ay kipurki bëlag̓an ang mag̓aning ang yang tanan ang mga Israel luw̓us ang magkaw̓ig̓ën yang Dios ang yay matuud ang mga tauan naf.
7 Yadwa pa bëlag̓an kang mag̓aning ang yang tanan ang mga ana ni Abraham parariu kang magkaw̓ig̓ën yang Dios ang lug̓ud tung pinangakuan nang atii,
kung indi,
pilik.
Atia uyun ang pisan tung sasang inaning na tung ni Abraham ang nabtang tung kasulatan ang mag̓aning,
“Sulaminti ilëm yang ana mung ti Isaac ay kaw̓ig̓ënung pamuaran yang mga kanubli mung ipalg̓uru tung pinangakuanu tung nuyug,”
mag̓aning.
8 Duun da ngaintindiay ta ang yang kinaw̓ig yang Dios ang matuud ang mga ana na atii kanay,
bëlag̓an yang mga taung namagsurubli-subli tung ni Abraham tung pastikular ka ilëm ang pagparanganaën tung nira,
kung indi,
ya ra ilëm yang mga taung nag̓ing mga kanubli na ëkël tung sasang pinangakuan yang Dios.
Tanira ra ilëm ay kinaw̓ig nang ya ray ipalg̓ud na tung pinangakuan na tung ni Abraham.
9 Ay padëmdëman mi ra kanay yang sam bilug pang pinangakuan yang Dios tung ni Abraham ang maning taa:
“Tung mga maning ka tiing uras taa tung matakun,
yang kasawa mung atiang ti Sara may ana na rang lalii ëkël tung pagpaktëlu tung anya,”
mag̓aningh.
Purisu duun da ngaskëay ni Abraham ang bëlag̓an tung ana nang sam bilug ipapanaway yang Dios yang planu nang atiing pinangakuan na tung anya,
kung indi,
tung ana na ilëm ang ti Isaac ipapanaway na.
10 Bëlag̓an da ilëm maning tii yang pagpailala yang Dios kung ya pa ag̓ari yang pagpirilikën na,
kung indi,
pati atiing pagmatung tung mga kampi ni Rebeca ang kasawa ni Isaac ang yay sasang kinaampu ta,
ya ka.
Ay duun si ka nagpaita yang Dios ang yang nag̓ipagpilik na tung mga taung gustu nang gamitën ang magpapanaw tung planu na,
indi na ag̓intindiën yang pagdarasun-dasun nirang natural tung mga ginikanan nira ubin mga kinaampu nira.
11-12 Kipurki baklu ipanganaay ni Rebeca yang duruang magkampi,
atiing anda pa nganing ay nag̓abuat nirang maayën ubin malain,
inaning dang lag̓i yang Dios tung anya ang maning taa:
“Yang dakulu ya pay magpaturuw̓ulun tung gësyëi,”
mag̓aning.
Asan da ngaintindiay ta ang yang buat-buat yang mga tau andang pisan ay kalalabtën na tung pagpilik yang Dios,
kung indi,
dipindi ilëm tung sadiling kalëlyag̓an na kung tinu pay pilikën na.
13 Yang ipinasanag nang atii tung ni Rebeca pariung pisan tung sam bilug pang inaning nang nabtang tung kasulatan ang mag̓aning,
“Ti Jacob ya ray pinabuyukanu yang gëgmaw piru ti Esau ya ray indi nalëlyag̓anuj,”
mag̓aning.
Yang Nag̓ipagpilik Yang Dios Tung Mga Tau Bëlag̓an Natëtëngëd Tung Kalëlyag̓an Nira Ubin Pag̓imuras Nira, Kung Indi, Natëtëngëd Ilëm Tung Sadiling Kalëlyag̓an Nang Mag̓ildaw Tung Nira (9:14-18)
14 Ta,
unu pay nalagpakan na tia?
Aningën ta w̓asu ang bëlag̓an tama yang pagpilik yang Dios ang maning tia tung kumpurming tinu pay nag̓alëlyag̓an nang pilikën?
Abaa,
indi ra ka ëngëd magkatama tia!
15 Kipurki padëmdëman ta ra ilëm yang sasang inaning yang Dios tung ni Moises ang mag̓aning,
“Kumpurming tinu pay nag̓alëlyag̓anung ildawan,
ya ra ka ëngëd ay ildawanuk,”
mag̓aning.
16 Purisu asan da ngaintindiay ta ang yang nag̓ipagpilik yang Dios tung mga tau ang para gamitën nang magpapanaw tung planu na bëlag̓an natëtëngëd tung kalëlyag̓an nira ubin tung pag̓imuras man nira,
kung indi,
natëtëngëd ilëm tung sadiling kalëlyag̓an nang mag̓ildaw tung sasang taung andang pisan ay natëngëran na tung anya.
17 Dispuis pa,
isipën ta ka yang sasang bitalang itinalig yang Dios tung ni Moises ang para ipakaw̓ut na tung Faraon ang yay pag̓adi tung Egipto ang napabtang ka tung kasulatan ang mag̓aning,
“Yang ipinagpakarungu ëngëd tung nuyung mag̓ing Adi,
ay ug̓ud ipaitaw tung nuyu kung unu pag kapuirsa yang kagaëmanu ug̓ud mabantug da yang aranu tung bilug ang kaliw̓utanl,”
mag̓aning.
18 Purisu asan da tung duruang bulus ang atia ngaintindiay ta ang kumpurming tinu pay nag̓alëlyag̓an yang Dios ang ildawan,
ya ra ka ëngëd ay ildawan na,
ig kumpurming tinu pay nag̓alëlyag̓an nang paktëlën yang pagpakgat na tung anya ang katulad ka tung Faraon ang atii,
ya ra ka ëngëd ay paktëlën nang magpakgat.
Yang Nag̓ipanuw̓al Na Tung Sulingaag Yang Duma (9:19-29)
19 Muya may asan tung numyung gustu nang magsulingaag tung yëën ang maning taa:
“Kumus dinisisiunan da kang lag̓i yang Dios yang maskin unu pang ubraay ang buatën tang mga tau,
ig disir,
maskin unu pay buatën ta,
pulus nag̓alëlyag̓an na ang yay buatën ta.
Purisu indi ka ëngëd magkatama ang parusaan na pa yang sasang taung nagpakasalak natëtëngëd andang pisan ay taung sumarang ang magkuntra tung kalalangan yang Dios.”
20 Abaa yang tau kang naa ka!
Yawang sasang tau ka ilëm,
supakën mu pa yang Dios?
Katulad tung urun ang binuat ta sasang tau,
yawa inimua ka yang Dios.
Kung alimbawa maskë ra rin ang magbitala yang sasang urun,
magkabag̓ay w̓asung magsupak tung nagbuat tung anyang aningën,
“Ayw̓a binuataw ra nuyu ta maning taa?”
21 Simpri yang sasang manigbuat ta urun,
may kalalangan na tung sang masang kaluntani ang duruay urun ang buatën na ang yang madataan yang sam bilug,
yay gamitën tung dakulung bag̓ay ang pagkatapus yang madataan ka yang sam bilug,
gamitën da ilëm tung pastikular ang bag̓ay.
Maning kang pisan tia tung Dios.
May kagaëman na kang mag̓usuy tung kumpurming unu pay nag̓aplanu na tung mga tau.
22 Ay maskin gustu na ra rin ang magpadangat yang kasisilag̓ën nang magpaita yang kagaëman na tung mga taung namagpasikgël tung anya,
inagwantaan na ra ilëm ang durung pagparurus na tung nira ag̓ad bag̓ay ang pisan ang ya ra rin ay parusaan na.
23 Yang pag̓asikad na ëngëd asan ay ug̓ud magpailala yang sasang ikadëngëg nang durug tinlu ëkël tung pagpaita na yang kaildaw na tung mga taung kumpurming nag̓alëlyag̓an nang ildawan ang ya ra kang lag̓i ay pinalanuan nang palg̓urun tung kasusulawën na.
24 Anday dumang mga tau tia,
kung indi,
ita ra mismung kumpurming tinu pay bintëng nang magtalig yang sadili na tung ni Ginuung Jesus ang magpatapnay.
Yang pinanliit-liitan ta,
bëlag̓an da ilëm tung nasyun yamën ang mga Judio,
kung indi,
tung tag̓a duma-ruma kang mga nasyun ang bëlag̓an mga Judio.
25 Kung natëtëngëd tung bëlag̓an mga Judiong atiang sinambitu,
may sasang bitala yang Dios ang isinulat ni Oseas atiing tukaw ang ya ray gustuung ëklan ang ipagpasunaid tung nira.
Ay ya ray pagpailala ang maskin tanira may pudir yang Dios ang yay pamilikan na ta mga tauan na.
Maning taa yang nag̓ianing na:
“Yang mga taung bëlag̓an kang lag̓ing mga tauanu,
ya ray aningënung mga tauanung sadili.
Tanirang indi kang lag̓i pinaitaanu yang gëgmaw,
ya ray aningënung nag̓agëgmaanum,”
ag̓aaning.
26 Dispuis may sam bilug pang bitala ni Oseas ang maning ka tia yang lagpak na ang mag̓aning,
“Magkamaning da tung uri ta kaldaw ang kada lugar ang yang mga magbaw̓anwa duun ya ray inaning yang Dios ang tukaw ang tanira bëlag̓an mga tauan na,
duun si ka aningay na ang tanira mga ana na rang sadili ang tanya ka man yang Dios ang makagag̓aëmn,”
ag̓aaning.
27-28 Piru kung natëtëngëd tung nasyun yamën ang mga Israel,
may sasang ipinagpakaw̓ut ni Isaias tung nira atiing tukaw ang mag̓aning,
“Yang nasyun tang naang mga kanubli ni Israel,
maskin yang kinadaramëlën ta maning pa tung kënay tung mga binakayan ang indi mabilang-bilang,
piru gësyë ka ilëm yang mangalibri tung sintinsia,
ay natëtëngëd makali rang matuurun yang Dios yang bitala nang ipinagpaaman na ra kang lag̓i tung nira ang yang mga tau taa tung banwang naa,
patëdëkan na ra ka ëngëd ang pisan ang pamarusaano,”
mag̓aning.
29 Dispuis yang nag̓ipag̓aningu ang andang pisan ay taung matapnay yang Dios kung indi na paitaan yang kaildaw na,
bistu ra kang pisan tung sasang inulang tukaw ni Isaias ang mag̓aning,
“Ti Yawing ya ka man ay makagag̓aëm tung tanan,
kung sintinsiaan na ra nganing yang nasyun ta,
kung indiita maildawan nang paëpdan ta pira pang bilug ang mamagsurubli-subli tung yatën,
talagang maspukita ra rin ang katulad ka tung nainabu tung mga taung namagtinir da duun tung mga lansangan yang Sodoma may Gomora atiing pagsintinsia na tung nirap,”
ag̓aaning.
Natëtëngëd Tung Pagpakuindi Yang Mga Israel Tung Patakaran Yang Dios Ang Baklu (9:30–10:21)
30 Kapurisu yang linagpakan yang pangatadlënganung naa natëtëngëd tung mga Israel may tung mga tag̓a duma-rumang nasyun,
ya ra taa.
May bëlag̓an mga Israel ang maskin indi tinag̓aman nirang sinagyap kung ya pa ag̓aring sumalu ra tanira tung pagtërëlëngën yang Dios,
ya pa ka ëngëd ay nangatultul.
Bilang inusgaran da tanira yang Dios ta maning tia natëtëngëd ilëm tung pagtalig nira yang mga sadili nira tung ni Jesu-Cristong nagpatapnay.
31 Ang pagkatapus naang kadaklan ang mga masigka Israelu,
maskin tinag̓aman da nirang sinagyap kung ya pa ag̓aring sumalu ra tanira tung pagtërëlëngën yang Dios ëkël tung pagturumanën nira yang mga katuw̓ulan na,
ya pa kay indi nangatultul tung nag̓asagyap nira.
32 Natëtëngëd tung unu pa ang indi nangatultul,
kung indi,
bëlag ya mamagtalig yang mga sadili nira tung ni Jesu-Cristo ang yay nagpakugmatay para tung nira,
ya mamagtalig tung sadiling këtël nirang pamagtuman yang mga katuw̓ulan.
Yang indi nira ipagtalig yang mga sadili nira tung ni Ginuung Jesus ay natëtëngëd may pinanginlasayan da nira tung anya natëtëngëd napatay.
Yay balaw̓ag ang pisan tung nag̓aëlatan da rin nira tung pag̓aningën ang Cristong pinilik yang Dios ang magbawi tung niraq.
Yang kaalimbawaan yang pinanginlasayan nirang atia tung anya maning pa tung sasang batung nasapdukan nirang nalaw̓aan ang asta indi ra nangatultul tung pag̓asagyap nira.
33 Asan da nga matuuray yang sasang ipinaula yang Dios tung ni Isaias ang nabtang tung kasulatan natëtëngëd tung pag̓aningën ang Cristong ipaangay na taa tung kaliw̓utan ang naa.
Maning taa yang palaksu na:
“Papatandaan mi ta maayën yang bitalaung naa.
May sasang taung papaggaëmënu taa tung banwang naang Israel ang yang kaalimbawaan na maning pa tung sasang batung durug bakëd ang paniëlanr ang ayw̓at ya pay masapdukan yang mga taung malaw̓aans?
Ug̓aring maskin pang maning tia,
kumpurming tinu pay magtalig yang sadili na tung anya,
talagang anda ëngëd ang pisan ay mapaëyakan nang pagsungunan tung nag̓atalig̓an nang atia tung anya,”
mag̓aningt.