Yang Yadwang Isinulat Ni Pablo Tung Mga Tag̓a CORINTO
Yang Intrada Yang Sulat (1:1-2)
1
Yang nagpasulat tia yuung ti Pablong pinilik yang Dios ang mag̓ing sasang apustul ni Jesu-Cristo bilang sasang taralig̓an nang magbaw̓alitaën natëtëngëd tung anya.
Yang sulat ang atia ipinaëkël da yamën ni Timoteoa ang sasang putul ta tung numyung sam pundaan asan tung Corinto ang binuat da yang Dios ang mga kinasakpan nang sadili pati tung kadaklan ang mga kinasakpan na asan tung intirung sinakëpan yang Acayab.
2 Yang nag̓ipag̓ampu yamën para tung numyu ang mas pang maispirinsiaan mi yang kanëëman yang Ama tang Dios ang pagpadag̓ën-dag̓ën tung numyu durua ni Ginuu tang Jesu-Cristo ig mas pang ikasadya mi yang kaampiran mi tung nirang naang baklu.
Yang Pagpasalamat Ni Pablo Tung Dios Natëtëngëd Tung Paglinga-linga Na Tung Isip Na (1:3-7)
3 Bag̓ay ang pisan ang dayawën ta yang Dios ang ya ka man mismu yang Dios ang pinanalig̓an ni Ginuu tang Jesu-Cristo atiing taa pa rin ang ya kay pag̓aningën nang Ama na.
Ya ra kay nagyaring Ama ta ang durung pisan agkainildawën tung yatën ig ya kay Dios tang paglinga-linga ang pirmi tung mga isip ta.
4 Pati tung mga isip yamën ang mga apustul,
ya kay pirming paglinga-linga,
maskin unu pang kaliwag̓anay ang nag̓apasaran yamën ug̓ud asanami ra ka ngaëyangay ta ipaglinga-linga yamën tung mga putul tang nag̓apasaran ka ta sari-sari kang mga kaliwag̓an ëkël tung nag̓aispirinsiaan yamën tung paglilinga-lingaën na tung mga isip yamën.
5 Nag̓akayanan ka yamën tia ay kung ay pa tiing pagdakël dang pagdakël yang mga kaliwag̓an ang nag̓apasaran yamën sigun ka man tung pagkërërëngën yamën ang naa tung ni Jesu-Cristo ang ya ra kay napasaran ta duru-duru kang mga kaliwag̓an,
duun da kag pagdulang agpagdulang yang pagrilinga-lingaën yang Dios tung isip yamën ëkël tung ni Jesu-Cristong pirming pagpakigsasa tung yamën.
6 Kada mapasaranami ra nganing ta mga kaliwag̓an,
yang pakaw̓utun na,
asanamu ra ka nga taw̓angay yamën.
Ay kipurki,
kada linga-lingaën da nganing yang Dios yang mga isip yamën,
asanami ra ngaëyangay ta matinlung ipaglinga-linga yamën tung mga isip mi ang para maagwantaan mi ra ka yang mga kaliwag̓an ang magkapariu ka tung nag̓agwantaën yamën.
7 Purisu dakulu yang sarig yamën tung numyung maagwantaan mi tia ay nag̓askëan da yamën kung sang kasaayanita ra kang nag̓apasaran ta mga kaliwag̓an,
sang kasaayanita ra kang linga-lingaën yang Dios.
Nag̓asambit Na Yang Sasang Kaliwag̓an Ang Napasaran Nang Durung Pisan Agkalëbat (1:8-11)
8 Nag̓asambitu tia,
mga putulu,
ay gustuung ipaintindi tung numyu natëtëngëd tung sasang kaliwag̓an ang napasaranu tan taa ra tung sinakëpan yang Asia.
Yang kalëlëbatën yang kaliwag̓an ang atii,
subra ra tung masaranganung agwantaën ang asta naplëkanaw ra ilëm ta ipagtalig̓u ang malibriaw pa.
9 Tung pagpamalaru talagang tung kamatayënaw ra ka ëngëd manalunga.
Piru nagkamaninganaw ra ta maning tia ay ug̓ud asanaw ra nga pisanay ta ipagtalig̓u tung sadiliu ang para anda ray dumang matalig̓anu,
kung indi,
ultimu ra ilëm yang Dios ang maskin pa yang mga taung patay ra,
kayanan na pa ka ëngëd ang buiën sing uman.
10 Ang pagkatapus tanya ra ka man ay nagpalibri tung yëën tung kamatayënung atiing siguradu ig ya ka man ay magpadayun tung pagparalibriën na tung yëën ang maskin pa tung uras ang panalungaan tanyay pag̓inëtëg̓an yang isipung ipalibriaw ka ëngëd anya.
11 Puidiamu kang magpakigtaw̓ang tung yëën ëkël tung pag̓arampuën mi ug̓ud dakëlëng mga ityurang tumingaraan ang mamagpasalamat tung Dios natëtëngëd tung taw̓ang nang dakulu tung yëën ëkël ka tung numyung dakëlë kang nag̓arampuën.
Pangërëngan Ti Pablo Tung Sadili Na Ang Limpiu Yang Kunsinsia Na (1:12-14)
12 Magkabag̓ay ra ang ipag̓ampuaw numyu ta maning tia ay may sasang bag̓ay ang indi ëngëd ikaëyakung sambitën ang maskin yang sadiling painu-inuu sistigus tung pagkamatuud.
Yang pagpakignunutu tung tanan ang mga tau,
landaw ra tung numyu,
tëdëk tung kinaisipanu ang anda kay danyu na natëtëngëd ya ray nag̓ipaëyang yang Dios tung yëën.
Bëlag̓an yang pagkamatakung pangkaliw̓utan ay nag̓atalig̓anu,
kung indi,
ultimu ra ilëm tanya.
13-14 Talagang matuud tia ay kipurki maskin tung mga sulatu ang nag̓ipaëkëlu tung numyu,
bëlag̓an ang mag̓aning ang pagsangaan yang pamitalaw,
kung indi,
tëëd da ilëm tung nag̓aintindian ming pagbasa.
Dispuis,
maskin midyu indi mi pa nag̓asuut ta maayën yang isipu,
may sarig̓u ka tung numyu ang basi pa ra ilëm,
tung pira pang kaldaw,
masuut mi ra ka ëngëd ta mupia ug̓ud kung maglëkat da nganing ti Ginuung Jesus,
masadya ra tung mga isip ming magpadëngëg tung yëën tung katalungaan na ang katulad ka tung yëën ang masadya ka tung isipung magpadëngëg tung numyu.
Yang Pagdipindir Ni Pablo Tung Pagkaapustul Na Ang Yay Nag̓adiskumpiar Yang Duma Tung Nira (1:15-22)
15 Kapurisu kumus maning da ka man tia yang sarig̓u tung numyu,
naisipanu ra rin ang tukawënamu ra yëën ang palaksuan ug̓ud ikaayën mi ta maduang bisis yang pagbisitaw asan.
16 Ay yang planuu rin,
tung pagdistinuu duun tung Macedonia,
lambirënamu ra kanay yëën.
Utru si kung magliitaw ra nganing tung Macedonia,
asanaw si kanay magbalik tung numyu.
Ay tung maning tia may lugar ming magpadag̓ën-dag̓ën tung yëën tung pagsaraayënung manganing duun tung Judea.
17 Numaan pala,
natëtëngëd ilëm inumanu yang planuung atia,
basu aningënaw ra numyung sulut-bëtëng yang isipu?
Kanisip mi w̓asung pauman-uman yang planuu ang katulad ka tung pag̓abuat yang mga taung pagpaguyud tung sistima yang kaliw̓utan ang numaan magpaëë ang pagkatapus,
buay-w̓uay ta gësyë,
indi ra?
18 Kung ya pa ag̓ari yang Dios matalig̓an tang matuud yang bitala na,
maning ka tiang matalig̓an mi ang yang nag̓ianingu tung numyu,
bëlag̓an sulut-bëtëng ang numaan magpaëëaw ang pagkatapus indiaw ra.
19 Kipurki ti Jesu-Cristo nganing ang yay pag̓aningën ang Ana Yang Dios ang tanya ka man ay nadapatan yang ipinagpakaw̓ut yamën na Silvano ni Timoteo tung numyu,
nag̓askëan mi ra ka ang bëlag̓an kang lag̓ing sulut-bëtëng yang mga pangaku na ang numaan ëë ang pagkatapus indi ra.
Kipurki tanya,
yang mga pangaku na,
ëë ang asta tung sampa.
20 Kipurki yang kumpurming pinangakuan yang Dios magkamatuud da ka ëngëd ang tanan ëkël tung anyang magkërëng.
Purisu ëkël tung anya,
kada magsaragpunita ra nganing ang magpurutul,
nag̓apagdiklaraita ang talagang magkamaningan da ka man tiang mga pinangakuan na ang asan da ka nga padëngëg̓ay ta yang may pangaku.
21-22 Dispuis yang pagpabakëd tung pagrampilan yamën ni Jesu-Cristo pati yang pagrarampilan mi,
ya ra yang Dios mismu.
Ya kay nagpilik tung yëën ang para magamitaw ra anya tung planu na.
Ya kay maning pa tung nagmarka tung yëën ang yuu anya ra ëkël tung pagpatinir na tung yëën yang Espiritu Santo ang yay maning pa tung sasang pundung ipinatkaw na ang talagang këgngan na ka ëngëd yang tanan ang pinangakuan nac.
Yang Natëngëran Na Ang Ayw̓a Inuman Na Yang Planu Na (1:23–2:4)
23 Simanyan nag̓ainambitu ra yang Dios ang kung bëlag matuud yang nag̓ibitalaung naa,
puiding parusaanaw anya.
Yang indi ra kanay ipinagdayunung minangay si tung numyu asan tung Corinto,
ay ang para pasinsiaënamu ra yëën ang indiamu ra kanay padapatanu ta disiplina.
24 Piru bëlag̓an ang mag̓aning ang yang katuyuanu asan ang yuu mag̓adi tung numyu sigun tung pagtaralig̓ën mi ay kipurki nag̓askëanu rang lag̓ing mabakëd.
Kung indi,
gustuu ilëm din ang magpakigsasa ta matinlu tung numyu ug̓ud magtaraw̓ang-taw̓anganita ang para mas pang magkasadya yang mga isip tang pagtuman yang nag̓auyunan yang Dios.