Atiing primirung pagliliw̓utun ni Pablo durua ni Bernabe tung takun ang 46 asta 48, namagparakaw̓utun yang Matinlung Balita tung mga lansangan ang Iconio, Listra, may Derbe (mapa) duun tung parti Galacia (Mga Binuat-buatan 14:1-21). Yang kadaklan duun bëlag̓an mga Judio, kung indi, tag̓a duma-rumang nasyun. Tung mga lansangan ang atii, may mga taung namagpanangëd tung ipinagpakaw̓ut nira ig namagtalig ka yang mga sadili nira tung ni Jesu-Cristong namagpatapnay. Purisu nagkamaningan da ang may salëgsa-salëgsa rang pundaan yang mga tumatalig duun. Pagkatapus yang pag̓urubraën na Pablo duun, namagbalik da ka tung Antioquia duun tung parti Siria ang ya ray pinagliitan nira (14:27-28). Pagkatapus atiing duun da tanira, nagpasulat da ti Pablo yang sulat ang naa tung takun ang 49 ang para ipaëkël na tung mga tumatalig ang atia ang kada may sam pundaan duun tung parti Galacia. Yang ipinagpasulat na tung nira ay nabalitaan na ra ang may mga tumatalig ang mga Judiong tag̓a Judea ang nangasubli tung anya duun tung mga lugar ang atia. Pagkatapus, aparti ra yang nag̓itulduk nira tung mga tumatalig kay tung ipinagtulduk na Pablo tung nira atiing primiru (1:6-10). Kipurki yang palaksu yang nag̓itulduk nira, yang mga tau unung malëlyag dang mausgaran da yang Dios ang salu rang pisan tung pagtërëlëngën na, kulang pa kung magtalig da ilëm yang mga sadili nira tung ni Jesu-Cristo. Dapat ka unu ang tanira magtuman da ka yang mga katuw̓ulan ang ipinagpadapat ni Moises tung nasyun nira atiing tukaw. Yang pinakaimpurtanti unung dapat ang tumanën nira ang tanira magpabuat da ta tanda tung mga tinanguni nira ang para mag̓ing ultimung mga Judio gatëd yang nasyun nira unung atia sam bilug ilëm ang pinagpilik yang Dios ang tukaw ang para mag̓ing mga tauan na. Bëlag̓an ilëm maning tia yang nag̓itulduk nira, kung indi, nag̓apakamali ka nira yang nag̓itulduk ni Pablo ang yang sasang tumatalig liw̓ianu rang indi ra magpasuitu tung mga katuw̓ulan ang mga maning tia ang para asan da rin nga risibiay yang Dios (5:1). Ay kipurki kung liw̓ianu ra unung indi ra magpasuitu, mas pa unung magpakasalak ay anda ra unu ay pagsangkëlan na. Kapurisu yang nag̓itulduk nirang atiing durug kadakul yang kamali na, yay gustu ni Pablo tumpalakën ug̓ud basi pa ra ilëm asan da nga mamanmanay yang isip yang mga tumatalig ang tag̓a duun ang mamagsug̓at dang mamagbalik tung tamang pag̓irintindiën tung kalibrian.

Purisu tung 1:6 asta 10, sinambit ni Pablo yang prublimang atiang natëngëran yang pagpasulat na tung sulat ang naang ipinaëkël na tung nira. Tung 1:11–2:10, dinipindiran na yang pagkaapustul nang ipinagpiar yang Dios tung anya ay ya ra ag̓aningay yang mga manigtulduk ang atii ang tanya unu bëlag̓an matuud ang apustul. Pagkatapus dinipindiran na ka yang kamtangan yang nag̓ipagpakaw̓ut na tung bëlag̓an mga Judio ang talagang yay tama. Ig yang pinakaimpurtanting pabilug̓an nira, bëlag̓an yang mga katuw̓ulan, kung indi, ang magtalig da ilëm tanira yang mga sadili nira tung ni Ginuung Jesus ay asan da ilëm ngausgaray yang Dios ang salu rang pisan tung pagtërëlëngën na (2:11-21). Yang palaksu yang kapitulu 3 may 4, nag̓iwaswas ni Pablo ta maayën kung unu pay kamtangan yang nag̓ipagpakaw̓ut nang atia. Durug tinlu yang mga pangatadlëngan nang pagkërëng tung nag̓ipagpakaw̓ut na ang may mga matitinlung pananglit ang ginamit nang nagpasanag. Pagkatapus tung 5:1–6:10, pinabilug̓an na kung unu pay nag̓alagpakan yang nag̓ipagpakaw̓ut na tung mga pag̓urubraën yang mga tumatalig tung kaldaw-kaldaw. Bilang yang kalibrian ang ipinakdul yang Dios tung nira bëlag̓an tëëd ilëm tung panguring timpu, kung indi, dapat ang may apiktar na simanyan tung mga ulag nira tung pangaldaw-kaldaw. Yang katuyuan na kung ya pa ag̓aring malibrian nira yang dating mga kalëlyag̓an nira pati yang dating palaksu yang mga pag̓irisipën nirang balaw̓ag ka tung kalëlyag̓an yang Dios. Ang para magkamaningan da ta maning tia, kaministiran ang yang Espiritu Santo yay pirming papagmanguluën nira tung mga sadili nira (5:16-26). Atia talagang indi ra ëngëd maguyuran ang magpapsaw tung kalëlyag̓an nirang atiang dati (5:16). Pagkatapus, tung 6:1-10, sinambit na yang impurtanting mga pitik ang dapat pausuyan yang kumpurming pinaëyangan yang Espiritu Santo ta baklung ipagpangabui na. Tung 6:11-18, pinapagbilug na yang pinakaimpurtanting bag̓ay tung intirung sulat ang naa.