Yang Isinulat Ni Pablo Tung Mga Tag̓a GALACIA
Yang Intrada Yang Sulat (1:1-5)
1
Yang nagpasulat yang sulat ang atia ya ra yuung ti Pablo ang sasang apustul.
Bëlag tau yang nagtulduk tung yëën ubin nagtuw̓ul tung yëën ang para yuu mag̓ing apustul,
kung indi,
ultimu ilëm ti Jesu-Cristo durua yang Ama tang Dios ang ya ka man ay nagpabungkaras tung anya.
2 Yang sulat ang atia pinaugtunan da yang tanan ang mga putul tang pamagpakiugpu tung yëën tani ig kasiraanami ra kang nagpaëkël tung numyung mga tumatalig ang salëgsa-salëgsang pundaan asan tung sinakëpan yang Galacia.
3 Yang nag̓ipag̓ampuu tung Ama tang Dios durua ni Ginuung Jesu-Cristo ang mas pang maispirinsiaan mi yang kanëëman nirang pamagpadag̓ën-dag̓ën tung numyu ig mas pang ikasadya mi yang kaampiran mi tung nirang naang baklu.
4 Gustuu kang ipadëmdëm tung numyu ang ti Ginuu ta nagpatumbas yang linawa na natëtëngëd tung mga kasalanan ta ug̓ud asanita ra nga paluasay na tung sistima yang kaliw̓utan ang naa ang durung pisan agkabalaw̓ag tung kalëlyag̓an yang Dios.
Ay ya ra kang lag̓i ay kalëlyag̓an yang Ama tang Dios.
5 Purisu yay dayawën ta tung anyang asta tung sampang anday katapus-tapusan.
Talagang magkabag̓ay ang pisan tia.
Natëtëngëd Tung Prublimang Natëngëran Yang Pagsulat Ni Pablo Tung Nira (1:6-10)
6 Durung pisan agkadakul yang pagkabërëngu tung numyu ang ayw̓at indi pa ilëm nag̓abuay,
panalyuramu ra tung Dios ang ya ka man ay nagbëtëng tung numyung magtalig̓amu rang bug̓us tung kanëëman ang ipinagpaita ni Jesu-Cristong nagpakugmatay.
Ay nag̓ipaëkël mi ra yang isip mi tung dumang nag̓ibalita ang ya ra unu yang Matinlung Balita buat.
7 Piru tung pagkamatuud anday dumang Matinlung Balita,
kung indi,
ultimu ilëm yang nag̓ipagpakaw̓ut yamën natëtëngëd tung kanëëman ni Jesu-Cristong nagpakugmatay.
May asan da unu tung numyung mga manigtulduk ang pamanliw̓ërëng tung mga isip mi ang yang ultimung Matinlung Balita ya ray nag̓atag̓aman nirang umanën.
8 Piru iugtulu tung numyu,
kung tinu pay pagparakaw̓utun tung numyu ta sasang balita ang indi magkatunu tung Matinlung Balitang atiing ipinagpakaw̓ut da yamën tung numyu tan taa pa,
maski ngani yami pa nganing ang mga apustul ni Jesu-Cristo,
maski ngani yang sasang angil ang duun mismu manliit tung langit,
talagang maagmaan na yang silut yang Dios ang anday katapusan.
9 Katulad tung ipinagpaaman da kang lag̓i yamën tung numyu tan taa pa,
ya si kay nag̓ulitënu numanyan.
Kung tinu pa asan ay pagparakaw̓utun tung numyu ta sasang balita ang balaw̓ag tung balitang atiang dating pinanangëd mi atiing asanami pa,
talagang maagmaan na yang silut yang Dios ang anday katapusan.
10 Ta,
tung nag̓ipag̓aningung atia,
ya ra w̓asu ay nag̓ipangati-katiu tung mga tau ang para ya ray mauyunan nira tung yëën?
Bëlag!
Kung indi,
yang pag̓asikarung pagbitala ta maning tia ay ang para yay mauyunan yang Dios tung yëën.
Ay kipurki kung ya pay pag̓asikaru ang yuu mauyunanaw ra ta mga tau ka ilëm,
bëlag̓anaw ra matuud ang turuw̓ulun ni Jesu-Cristo.
Natëtëngëd Tung Pinanliitan Yang Matinlung Balitang Nag̓ipagpakaw̓ut Na (1:11-12)
11 Mga putulu,
iugtulu tung numyu yang kamatuuran,
yang Matinlung Balitang atiang dating ipinagpakaw̓utu tung numyu bëlag̓an inimu-imu ka ilëm ta tau.
12 Ay kipurki bëlag̓an ang mag̓aning ang ya ituldukay tung yëën ta sasang tau ang pagkatapus ya ra ilëm ay pinauyunanu,
kung indi,
ya ipabunayag̓ay ni Jesu-Cristo mismu tung yëën.
Yang Kamtangan Yang Matinlung Balita Ya Ipabunayag̓ay Ni Jesu-Cristo Ta Diritsyu Tung Anya (1:13-24)
13 Ag̓aningënamu ra yëën ta maning tia ay kipurki nabalitaan mi ra ka siguru kung ya pa ag̓ari yang pag̓urubraënu atiing pag̓usuyaw pa rin tung dating pag̓atuuan yamën ang mga Judio.
Katulad da asan tung binuatu tung duma-rumang grupu yang mga tumatalig tung ni Jesu-Cristo ang ya ray pinamarasanu ta mupiang andang pisan ay kaildawu tung nira ay gustuung magkaradiadu ra ilëm.
Ang pagkatapus atii pala ya ray pinagpilik yang Dios ang mag̓ing mga tauan nang sadili.
14 Yang ipinagpamarasu tung nira ya ra yang pag̓urusuyunung durug kasulipët tung dating pag̓atuuan yamën ang atii ang kung ikumpalar pa tung kadaklan ang mga masigkaidaru yuu ëngëd ay pinakamadërëp ang nagkërëng tung pinanubli yamën tung mga kinaampu yamën.
15 Piru atiing duunaw pa rin tung tian ni nanay,
pinatëmënganaw rang lag̓i yang Dios ang yuu mag̓ing sasang taralig̓an ni Jesu-Cristo ang pagkatapus atiing natauaw ra,
bintëng na ra ka yang isipung magsuku tung anya natëtëngëd ilëm tung kaildaw na tung yëën ang andang pisan ay natëngëran na tung mga buat-buatu.
16 Purisu atiing gustu nang magpabunayag tung yëën yang pag̓aningën nang Ana Na,
dayunaw ra ka man ang pinagpaitaan na ug̓ud simpanaw rang magparakaw̓utun natëtëngëd tung anya tung mga tag̓a duma-rumang nasyun.
Numanyan atiing pagkaitaw tung anya,
andang pisan ay pinalëngtanung para ingalukanu ra rin ta painunuku.
17 Indiaw ngani nagbalik duun tung Jerusalem ang para magpasugpataw pa rin tung mga apustul ni Ginuung Jesus ang dati.
Kung indi,
anday dumang binuatu,
atiing lag̓i,
diritsyuaw ra kanay ang nagliit tung Damasco ang nagpaag̓ës duun tung Arabia.
Pagkatapus,
nagbalikaw ra ka duun tung Damasco.
18 Pagkataklib yang tulung takun,
bakluaw ra nagsablay-sablay ang nanungul-tungul duun tung Jerusalem ug̓ud magpailalaw ra tung ni Pedro.
Durua ka ilëm ang linggu yang panlumunanu duun tung anya.
19 Dispuis,
yang kadaklan ang mga apustul na duun,
indi ngani naitaw.
Naitaw ilëm ti Santiagong sasang putul ni Ginuu tang Jesus.
20 Yang inaningung atia nag̓askëan yang Dios ang talagang bëlag̓an bukli.
21 Numanyan pagkatapus yang panlumunanu tung ni Pedro,
dayunaw rang minangay tung mga duma-rumang lugar duun tung sinakëpan yang Siria may Cilicia.
22 Tung uras ang atii indiami pa ka ëngëd nag̓irilalaan tung pirsunal yang mga tumatalig ang kada sam pundaan duun tung sinakëpan yang Judea.
23 Ug̓aring ilëm nabalitaanaw ra nira tung mga aruman nirang duma may ruma ang yuu unung nagpamaras tung nira tan taa,
yuu ra unu mismu ay pagparakaw̓utun tung duma yang Matinlung Balitang nag̓apanangëd nira ang ya ra ka rin unu ay pinagtag̓amanu ta paëntëd yang palaksu na.
24 Purisu ya ray dinayaw nira ta mupia tung Dios yang pangimaklu nang atia tung yëën.