Yang Nag̓ipagpakaw̓ut Na Pinauyunan Da Ka Yang Dating Mga Apustul (2:1-10)
2
Taa numanyan,
pagkataklib da yang sam puluk may ëpat dang takun,
bakluaw si nanungul-tungul duun tung Jerusalem,
kasiraanami ra ka ni Bernabe.
Pati ti Tito,
ingkëlanu ra kang pinanunut.
2 Yang ipinag̓angayu duun bëlag yuug paguuyay yang dating mga apustul,
kung indi,
yuug pabunayag̓ay yang Dios ang ya ray gustu nang buatënu.
Kumaw̓utami ra duun,
nagpaintindiaw ra kung unu pa ëngëd ay kamtangan yang Matinlung Balitang naang pirming nag̓ipagpakaw̓utu tung maning tung numyung bëlag̓an mga Judio.
Ay yang pinangamananu duun,
kung alimbawa indi paugtunan nira yang nag̓ipagpakaw̓utu,
muya ya ray puiding padatëlan ta dumang mamagdiskumpiar tung yëën.
Apiki,
anda ray pakaw̓utun yang pinakabëdlayanung tukaw pati numaan.
Yang pinalëngtanung pinakigkësënan ang yami yami ra ilëm,
ya ra yang mga putul tang pag̓atëlëngan ta abwat yang mga taung atiang pamagturuldukun da asan tung numyung atiang baklua.
3 Ti Titong naang nagduman tung yëën,
anda kang lag̓i ay tandang binuat tung tinanguni na gatëd bëlag̓an Judio yang nasyun na.
Piru maskin pang maning tia,
rinisibi ra yang mga pamagmangulu duun ang sasa kang putul nirang tumatalig tung ni Jesu-Cristo.
Indi ra nganing rinëg̓ës nirang magpabuat ta tanda ag̓ad ya ra rin ay gustu yang duma.
4 Yang dumang atia,
ya ray pinangamananung nagpakigkësën tung mga pamagmangulu ang yami yami ra ilëm.
Kipurki yang dumang atiang pamagrëg̓ës,
pamagpatumatalig-tumatalig ilëm ang para mamagpakiglakët da ilëm tung sam pundaan duun.
Ya ra ilëm pamagsag̓usut ug̓ud tung matinlung pagpataliktik nira tung yamën kung may mapuntusan da nira natëtëngëd tung pagkaliw̓ianu tang nang ipinakdul tung yatën ni Jesu-Cristo.
Ay simanyan indiita ra dapat ang magpasuitu tung mga katuw̓ulan ang para tung pagturumanën ta asanita ra rin nga risibiay yang Dios.
Yang planu rin nira,
mamangirëpën da rin tung yamën ang pabalikën tung dating pinanalig̓an da rin yamën ang para ipasuituami si nira tung mga katuw̓ulan.
5 Piru inding pisan pinauyunan yamën maskin tung gësyë ilëm ang uras ug̓ud inding pisan mauman yang tamang pag̓irintindiën tung ultimung Matinlung Balitang naang nag̓ipagpakaw̓ut yamën ang para tung ikaayën mi asan.
6 Numanyan anday dumang dinangat na,
pagkamarësmës da yang mga putul ta duun kung unu pa ëngëd ay kamtangan yang nag̓ipagpakaw̓utu,
andang pisan ay painunuku nira tung yëën ang maning umanënu pa yang nag̓ipagpakaw̓utu tung maning tung numyung bëlag̓an mga masigkanasyun yamën ang mga Judio.
Kung tung bag̓ay,
yang mga putul tang atia,
maskin nag̓atëlëngan ka man ta abwat yang pamagturuldukun da tung numyung atiang baklu,
piru tung yëën ang pag̓intindi,
ayw̓at yang pagkabëtang yang sasang tau ya pay intindiën tang ipalandaw tung duma ang tung pagtërëlëngën yang Dios pantay-pantay ra ka ilëm?
7 Ya ra ka man tiang nag̓ipag̓aningu,
bëlag yuug sugpatay yang mga putul tang atii,
antis yuug pauyunay nira,
ay namalamaran da nira ang pati yuu piniaran da ka yang Dios ang magparakaw̓utun yang Matinlung Balita tung mga tag̓a duma-rumang nasyun ang katulad ka tung ni Pedro ang ya ra kay piniaran nang magparakaw̓utun tung mga masigkanasyun yamën ang mga Judio.
8 Bilang yang nagpaktël tung ni Pedro ang para magparakaw̓utun tung mga masigkanasyun yamën ang mga Judio ya ka man mismu yang nagpaktël tung yëën ug̓ud magparakaw̓utunaw ka tung maning tung numyung mga tag̓a duma-rumang nasyun.
9 Kapurisu pagkasiman yang mga putul tang atia ang yuu nag̓apaktëlaw ka man yang Dios natëtëngëd tung pagkaapustulu,
kinumustaami ra ilëm nira ni Bernabe ang kinaw̓ig ang san tuug̓ami ra ilëm.
Anday dumang namangumusta tung yamën ya ra ti Santiago,
ti Pedro,
may ti Juan ang ya ra ka man taang pag̓atëlëngan ta abwat yang pamagturuldukun da asan tung numyung atiang baklu ang ya ra nganing ag̓aningay nirang ultimu ilëm tanira yang pamagmangulu tung tanan ang mga kaputulan.
Yang pinag̓irig̓uan yamën tung uras ang atii ang yang pabilug̓an ëngëd yamën ni Bernabe,
ya ra yang pagparakaw̓utun yamën tung maning tung numyung mga tag̓a duma-rumang nasyun ig yang pabilug̓an ëngëd nira ya ra yang pagparakaw̓utun nira tung mga masigkanasyun yamën ang mga Judio.
10 Ug̓aring ilëm yang itinuyun nira tung yamën ang indi ëngëd unu yamën paglipatan yang mga putul tang mga maliliwag̓ën ang tag̓a Jerusalem ang ya ra ka man ang lag̓i ay nag̓apadërëpanu.
Nag̓aulit Na Yang Pagbasul Na Tung Ni Pedro Natëtëngëd Indi Na Ra Inusuy Yang Linyang Magkatunu Tung Matinlung Balita (2:11-21)
11 Taa numanyan atiing pagbalik yamën duun tung Antioquia,
ti Pedro minangay ra ka duun.
May mininsang pinarangkaung sinambëng natëtëngëd may kamaling pag̓abuat na.
12 Ay atiing primiru ang indi pa nag̓akaw̓ut yang mga aruman ni Santiagong duun liit tung Jerusalem,
ti Pedro pagpakisadu ra kang lag̓i tung mga tumatalig ang bëlag̓an mga masigkanasyun yamën ang mga Judio ang anday pilik yang mga palanganën nira.
Piru pagkaw̓ut da yang mga taung atia,
amat-amat dang nandëlëg ti Pedro tung dating mga kasadu nang atia ang asta nagpablag da ka ëngëd tung nira natëtëngëd may pinangamanan na tung mga masigkanasyun nang atiang baklung namansikaw̓utb.
13 Dispuis pati yang mga tumatalig ang atiang mga Judio ang dating tag̓a Antioquia,
namag̓isul da ka tung nag̓askëan da nirang magkatama natëtëngëd tung naita nira tung ni Pedro.
Pati nganing ti Bernabe naguyud da ka natëtëngëd tung pag̓isul nirang atia.
14 Kapurisu atiing naintindianu ra ang yang pag̓abuat nirang atia indi ëngëd pagkatunu tung tamang pag̓irintindiën tung Matinlung Balita,
dayunu rang binasul ti Pedro tung katalungaan yang tanan ang mga kaputulan.
Ag̓aaningaw tung anya,
“Pedro,
maski yawa sasa ka man ang Judiong pulutiku,
piru tan taa,
ipinasaay mu ra yang ug̓ali mu tung ug̓ali yang mga putul tang naang bëlag̓an mga masigkanasyun tang mga Judio.
Ay nagpakisarua ra nganing tung nira.
Piru numaan,
tung pagdëlëg mung atia tung nira,
asan da nga guyuray mu yang isip nira ang yang ug̓ali nira dapat ang ipasaay ra nira tung ug̓ali tang mga Judio ug̓ud asan da tanira nga risibiay yang Dios buat.
Talagang kamali mu tia!
15 Pedro,
ita,
dati kang lag̓ing mga Judio.
Bëlag̓anita tag̓a dumang nasyun ang indi kang lag̓i pamag̓usuy tung mga katuw̓ulan ang ibinutwan ni Moises.
16 Piru nag̓akdëkan ta ra ka ang yang papanaw yang Dios ang mag̓usgad tung sasang tau ang salu ra tung pagtërëlëngën na,
bëlag̓an natëtëngëd tung pagturumanën na yang mga katuw̓ulan ang atia,
kung indi,
natëtëngëd ilëm tung pagtalig na yang sadili na tung ni Jesu-Cristong magpatapnay.
Purisu maski nganing itang dati kang lag̓ing mga Judio,
nagtalig̓ita ra tung ni Jesu-Cristong nagpatapnay.
Ya ray binuat ta ay ug̓ud asanita ra ngausgaray yang Dios ang salu rang pisan tung pagtërëlëngën na ëkël ilëm tung pagtalig ta tung ni Jesu-Cristo,
bëlag̓an natëtëngëd tung pagturumanën ta yang mga katuw̓ulan ang atiing ibinutwan ni Moises tung nasyun ta.
Ay kipurki may bitala yang Dios ang anda unung pisan ay tau may sam bilug ang mausgaran nang salu rang pisan tung pagtërëlëngën na ëkël tung pagturumanën na yang mga katuw̓ulan nac.
17 Dispuis pa,
atii kanay,
kumus durung kalëlyag tang risibiënita ra yang Dios suluminti ilëm ëkël tung pagtalig tang bug̓us tung ni Jesu-Cristo,
maskin mga Judioita ka man,
nagpakbungita ra tung bëlag̓an mga Judio ang indi kang lag̓i pagtuman yang mga katuw̓ulan ang atia.
Ayw̓a,
yang gustu mung ianing,
Pedro,
ang yang pagpaw̓aya tang atii kasalanan ta tung Dios?
Ti Jesu-Cristo w̓asu aningën tang yay nagsulsul tung yatën ang magpakasalak?
Abaa,
bëlag kang kasalanan ta tii!
Ti Jesu-Cristong tinalig̓an ta,
talagang indi pagsulsul tung sasang tau ang para magbuat ta kasalanan!
18 Alimbawa kung pinaw̓ayaanu ra yang dating pinanalig̓anung para risibiënaw ra yang Dios ang pagkatapus,
ya si kay balikanung panalig̓an,
talagang asanaw ra magluang malinampasën tung kamatuuran.
19 Ay kipurki natëtëngëd tung pagturumanënu yang mga katuw̓ulan ang atia,
asanaw ra mismu nga plëkay ta ipagtalig̓u ang asanaw ra nga risibiay yang Dios.
Nagkamaninganaw ra ta maning tia ay ug̓ud asan da makuat yang sasang pagsagang da rin tung yëën ang indiaw magkatinir ta kaampiranu tung Dios.
Ay atiing pagpakigkapulitu tung ni Jesu-Cristong ilinansang tung krus,
asanaw ra nga luasay tung pagpasuituu tung mga katuw̓ulan ang kalaumu ra rin ang asanaw nga risibiay yang Dios natëtëngëd tung sadiling këtëlung pagtuman.
20 Purisu numaan,
indiaw ra pagmangulu tung sadiliu,
kung indi,
pagpamanguluaw ra tung ni Jesu-Cristong pagpakigkapulit da tung yëën.
Maskin unu pay pag̓abuatu simanyan,
ya ag̓ipapanawayu tung pagtaralig̓ënung bug̓us tung anya ang yay pag̓aningën ang Ana Yang Dios.
Tanya ka man yang naggëgma tung yëën ang asta pinakugmatayanaw ra nganing anya.
21 Indig baliwalaënu yang kanëëman nang atiang ipinagpaita na tung yëën atiing pagpakugmatay na.
Kapurisu kung papagbilug̓unu ra yang gustuung ianing,
ya ra taa.
Kung asanita nga risibiay yang Dios tung pagturumanën ta yang mga katuw̓ulan na,
intunsis anda ra ka rin ay kapulutan na yang pagpakugmatay ni Jesu-Cristo,”
ag̓aaningaw duun tung ni Pedro.