Simanyan kung mangayaw ra nganing asan,

ya ray pangyaklung angayu tung numyu.

Yang linyang pausuyanung manginsapu tung mga aruman ming atiang indi pa nag̓apanligna,

kung unu pay mga kasalanan nirang nag̓ikig̓a tung yëën,

dapat ang paingmatuuran da ta durua ubin tulu nga sistigusan ang sasay bitala nira,

baklu ra padapatayu ta disiplina^a.

2 Atiing asanaw pa tung numyu tung pangyadwang angayu,

bakluaw nagliit,

pinagpaamananu ra kang lag̓i yang mga aruman ming kumpurming nagpakasalak^b.

Numaan ang andanaw pa asan,

pagpaamanaw si kang uman tung nira may tung duma pang kumpurming nagpakasalak da ka atiing andanaw ra asan.

Panganingën mi ang kung asanaw si nganing tung numyu,

indi ra pasinsiaënu yang kumpurming indi nanligna tung nagkarabuat nirang atia.

3 Talagang padapatanu ra ka ëngëd ta disiplina.

Tutal,

pag̓ingalukamu ra kang lag̓i ta sasang pruibang ang ti Jesu-Cristo mismu yay pagpadapat ta bitala tung numyu ang tung yëën ka ag̓italig̓ay na.

Tanya talagang bëlag̓an maluw̓ay,

kung indi,

maktël ang magpadapat ta disiplina tung numyu.

4 Kipurki tanya maskin maluw̓ay ka man atiing pagpalansang na tung krus,

piru bui ra simanyan ëkël tung kagaëman yang Dios.

Tung anya ipananglitayu yang sadiliu ang maskin maluw̓ayaw ka man tung pagtërëlëngën yang duma,

piru kung asanaw si nganing tung numyu,

bistu mi ra yang puirsaung magpadapat ta disiplina ay kasiraanami ra ka ni Jesu-Cristong magpadapat ëkël tung kagaëman yang Dios.

5 Yang mga sadili mi mismu,

ya ray dapat ang insapuën mi ta maayën.

Bilang talimaanën mi kung talagang matuud yang pagtaralig̓ën mi tung ni Jesu-Cristo bilang nag̓apanuntan mi ka ta pagturumanën mi yang mga kalëlyag̓an na.

Indi mi w̓asu nag̓apanimanan tung mga sadili mi ang tanya pagpakigsasa ra tung numyu?

Puira pa ilëm kung tung pag̓insapu mi ang anda ray lumintaw,

tay puis asanamu ra magluang palyadu.

6 Ug̓aring,

dakulu yang sarig̓u ang tung pag̓insapu ming atia tung mga sadili mi,

asan da ka nga maladmaray mi ang pati yuu indiaw ra ka nagluang palyadu ang maning anday pinakaw̓ut na yang pagparakaw̓utunu tung numyu atiing primiru.

7 Nag̓ipag̓ampuamu ra nganing yëën tung Dios ang taw̓anganamu ra anya ta mupia ang indiamu ra ëngëd magbuat ta maskin unu pang malalainay.

Yang pag̓asikarung pag̓ampu,

bëlag̓an ang mag̓aning ang para asanaw ra magluang maktël da yang pagkaapustulu tung pagtërëlëngën yang pamagpakigkuntra tung yëën.

Kung indi,

yang sulaminti ilëm ang pag̓asikaru ang yamu magbuat ta pulus matinlu,

maskin asanaw ra nga tëtëlëngay ta duma ang yuu maluw̓ay gatëd indiaw ra nagpaita yang pagkaapustulung mapuirsang nagpadapat ta disiplina tung numyu.

8 Kung magtinlu ra yang mga buat-buat mi,

ayw̓at padapatanamu pa yëën ta disiplina?

Kipurki tia,

kung ya pay buatënu,

indi ka ëngëd magkatunu tung kamatuuran.

Piru kung padayunan mi ka ëngëd yang mga ubra-ubra ming atiang mga malalain,

ubligaduaw ra ka ëngëd ang magpadapat ta disiplina tung numyu gatëd yay nag̓askëanung uyun ang pisan tung kamatuuran.

9 Ay kipurki masadya tung isipu ang kung ariaw pag tëtëlëngay nirang maluw̓ay,

anday bali,

basta yamu maktël da yang pagprusigir mi tung kalëlyag̓an yang Dios.

Purisu ya ra ka man nganing taa yang nag̓ipag̓ampuu tung anya para tung numyu ang tung makali maulikan da yang pag̓urusuyun mi tung nag̓auyunan na ang nagkawaldang da.

10 Ya ra ka man nganing taa yang ipinagsulatu tung numyu yang natëtëngëd tung mga bag̓ay ang atia mintras andanaw pa asan ug̓ud basi pa ra ilëm ang anda ray kaministiranung magpaita yang kaisëg̓u tung numyung gamitanamu ra yëën ta katëngdananung naang ipinagpiar ni Ginuu ta tung yëën.

Ay kipurki yang katuyuan na ëngëd ang nagpiar,

bëlag̓an ang mag̓aning ang para gamitënung manrangga tung mga tau,

kung indi,

ang para gamitënung magtaw̓ang ta ustu tung nira ug̓ud asan da mas pang këmëët yang pagtaralig̓ën nira tung anya^c.