Sasang Bulung Tung Kulung Pagdakul (12:1-10)
12
Katulad tung nag̓ianingu nungayna,
talagang nag̓arëgsananaw ra ka man ang magpaambug.
Purisu,
maskin nag̓askëanung muya puiding anday pakaw̓utun nang ikaayën mi,
ilaktëru ra ka ëngëd kanay yang isturia tung mga bag̓ay ang ipinagpabunayag ni Ginuu ta tung yëën ang duun da ipapanaway na tung ipinadakat na tung panëlëngu.
2 May nag̓ailalaung sasang tumatalig tung ni Jesu-Cristoa ang may nainabu tung anya atiing tukaw ang simanyan may sam puluk da may ëpat ang takun ang nagtaraklib.
Yang taung naa gulping ingkëlan duun tung yaklung ëslëb yang kalangitanb.
Indi ilëm nag̓askëanu kung yang tinanguni na mismu ingkëlan duun u kung nabutwan.
Anday dumang nag̓akdëk tia,
ultimu ra ilëm yang Dios.
3-4 Basta yang nag̓askëanu ilëm tung taung naa,
gulping ingkëlan duun tung kaismayaan.
Ulitënu pa ta minsa.
Indi ilëm nag̓akdëkanu kung yang tinanguni na mismu ingkëlan duun u kung nabutwan.
Anday dumang nag̓akdëk tia ultimu ra ilëm yang Dios.
Atiing duun da tanya,
may nagngël nang inding pisan mapabag̓ayan na tung bitala tang mga tau ig indi nganing sarang ang bëngatën ang maskin tinu pa.
5 Purisu yang taung atia ya ray bag̓ay ang ipagpabantug̓u,
piru kung natëtëngëd tung sadiliu indiaw ra magpabantug,
puira pa tung mga bag̓ay ang pagpailala tung pagkamaluw̓ayu.
6 Ay kipurki kung gustuu rin ang magpaambug natëtëngëd tung mga bag̓ay ang atii,
indiaw ka magluang maning pa tung sasang kabus-kabus ang pagbitala,
ay natëtëngëd pulus matuud yang magbitalaënu.
Piru indiaw ra ilëm ka ëngëd magpaambug ay nusias yuu ray tingaraën ta mga tau ang mas abwat kay tung nagkaraita nirang nagkarabuatu ig tung nagkaragngël nirang ibinitalaw.
7 Dispuis,
ang para indi ilëm dumakul yang kuluu natëtëngëd tung ipinagpabunayag ang atii tung yëën ang duru ka man ang pisan agkabëw̓ërëng,
may sasang ipinakdul tung yëën ang maning pa tung tënëkc ang ya rag tëtënëng tung tinanguniu.
Bilang pinaangayanaw ra ni Satanas tung sasang angil na ang para papinitinsiaanaw ra anyang tigbakën ug̓ud indi dumakul yang kuluu.
8 Maklung bisis ipangaraw̓aw tung ni Ginuu tang kuatën na ra tung yëën.
9 Ang pagkatapus yang tuw̓al na tung yëën,
“Maskin indi ra kuatënu tia,
ultimu ra ilëm yang taw̓angu ay kaministiran mu ang para kayanan mung agwantaën.
Ay kipurki kung aria pag luw̓ayay,
asan da ka nga sintiay mu yang kagaëmanung mas pang këmtël ang magtaw̓ang tung nuyu,”
mag̓aning.
Purisu ya ray natëngëran na ang durug sadya tung isipung magpaambug natëtëngëd tung kumpurming panluw̓ayanu ug̓ud asanaw ra nga landungay ang pirmi yang kagaëman ni Jesu-Cristo.
10 Purisu agrisibiënu tung matinlung kinaisipan kung yuug pasaray ta panluw̓ayanu u kung yuug insultuay,
u kung yuug papinitinsiaay u kung yuug dëëg-dëëg̓ay u kung yuug paliwag̓ay ang yang tanan ka man ang mga maning tia nag̓ainabu tung yëën arangan da ilëm tung pangërënganu tung ni Jesu-Cristo.
Ay kipurki,
kung ariaw pag luw̓ayay,
asanaw ra ka nga paëyangay na ta ikayaw tung maskin unu pay nag̓apasaranu.
Nag̓aulit Ni Pablo Yang Dumang Mga Bag̓ay Ang Pagpailala Tung Pagkaapustul Na Ang Ya Ra Rin Ay Dapat Ang Dinëmdëm Nirang Namagkërëng Tung Anya (12:11-18)
11 Anday dumang ipinagpakabus-kabusung nag̓intra paambug ang maning tia,
kung indi,
midyu tung nag̓arëgsananaw ra ilëm numyu.
Ay dapat da rin ang kindënganaw numyung dinayaw tung mga taung atiang pamagpasuad-suad ang tanira pag̓apanuw̓ul ka ni Jesu-Cristo.
Kipurki maskin anda ka man ay kakuinta-kuintaw ang katulad ka tung nag̓aaning nira,
piru ëkël tung ni Ginuu tang pagpaktël tung yëën,
indiaung pisan nag̓ataktak tung dating mga apustul ang atiang pag̓aningën nirang indi makdingand.
12 Atiing asanaw pa tung numyu,
tung pag̓ërëkëlënu tung katëngdananu may nagkaraita ming mga talandaan ang yay pagpailala tung sasang matuud ang apustul.
Katulad ka tung pasaisung nagparakaw̓utun ang maskin durung napasaranung kaliwag̓an asan,
inagwantaanung nagprusigir ka ëngëd.
Lug̓ud da ka asan may mga pruiba kang makëktël ang ipinabuat yang Dios tung yëën ang ya ray nabërëngan mi ta mupia.
13 Talagang tama yang pag̓ërëkëlënu tung pagkaapustulu asan tung numyu.
Ay kipurki kung ikumpalaramu pa yëën tung duma-rumang mga tumatalig ang kada sam pundaan,
pariu-pariuamu ka ilëm ang indiamu ka linipi-lipiu,
puira pa siguru atiing indiaw ra ka man nagpaukupar tung numyu ang katulad ka tung pag̓abuat yang duma.
Tay puis kung yay sasang kasalananu tung numyu,
patawarayaw ka numyu!
14 Paamananamu ra kanay yëën ay numaan simpanaw rang mangay asan tung numyu ang ya ray pangyaklung angayu asane.
Kung kumaw̓utaw ra nganing asan,
indiaw pa ka ëngëd magpalbat tung numyung magpaukupar ay natëtëngëd bëlag̓an yang kuarta mi yay nag̓asikaru,
kung indi,
yang kinaisipan mi mismu kung ya pa ag̓aring mataw̓anganamu ra yëën tung pagtaralig̓ën mi ay natëtëngëd yamu ra kang lag̓i ay nabtang ang maning pa tung mga anaw.
Kapurisu katulad tung mamag̓arana ang yang kadagmitan ang mainabu,
bëlag̓an yang mga mamula ang yay dapat ang magsimpan ta ikaayën yang mga ginikanan nira,
kung indi,
yang mga ginikanan.
15 Ta yëën ang nabtang ang maning pa tung ama mi,
durug sadya tung isipung maggamit yang tanan ang puirsaw,
maskin kampusunaw pa,
basta mataw̓angaw ilëm tung numyu ang para mas pang këmëët yang pagtaralig̓ën mi tung ni Ginuu ta.
Piru midyu kung ay pa tiing ya ra ag̓alutuk ag̓alutuk yang gëgmaw tung numyu ang ayw̓at asan dag panlabnay ang panlabnay yang gëgma mi tung yëën?
16 Buinu,
siguru pauyunamu ka ang indiaw ka man nagpalbat tung numyung nagpaukupar,
piru muya may mag̓aning ang kumus yuu unu duruaug kaansianu,
naëklanamu ra ilëm unu yëën ta kulu.
17 Ëlat kanay,
kung natëtëngëd tung mga arumanung atiing pinanuw̓ulung mansiangay asan tung numyu,
basu may sam bilug tung nira ang pinapanlëpësu tung numyu?
18 Ay ti Tito ka man pinaktëlu yang isip nang mangay asan,
pati yang sasang putul ta ipinanunutu pa ka man tung anya.
Ayw̓a,
ti Tito w̓asu,
yay nanlëpës tung numyu?
Bëlag bang yami ni Tito pagsinasaayami ta pag̓asikad yamën?
Bëlag bang pariuami ka ta mga pasais?
May Duruang Klasing Pangamanan Ni Pablo Kung Kumaw̓ut Da NGaning Duun Tung Nira (12:19-21)
19 Muya tung pagbasa mi tung nag̓ianingung atia,
malaumanaw ra ilëm numyu ang anday dumang pag̓abuatu,
kung indi,
pagdipinsaw ra ka ilëm tung sadiliu.
Piru bëlag̓an matuud tia ay kipurki maskin unu pay nag̓ianingu tung numyu,
nag̓ianingu mismu tung katalungaan yang Dios ig nag̓apaëyanganaw ra ka ni Jesu-Cristo yang dapat ang ianingu tung numyu.
Dispuis mga putulung nag̓amaalu,
yang pag̓asikaru ëngëd tung tanan ang atiang nag̓ianingu tung numyu ang basi pa ra ilëm ang mataw̓anganamu ra yëën tung pagtaralig̓ën mi tung ni Ginuung Jesus ug̓ud asan da mas pang këmëët.
20 Ag̓aningënamu ra yëën ta maning tia ay yang nag̓aëldanu,
muya kaw̓utanamu ra yëën ang pagbuatamu ra ta indi malëlyag̓anu ig maitaw ka numyung magbuat ta sasang indi mi ra ka malëlyag̓an.
Ay muya kaw̓utanamu yëën ang yang duma pagsuruayan da ta ërëkëtan ubin pag̓iriw̓ëg̓-iw̓ëg̓an da ubin panungkukan da ta kasilag ubin may pagpanadili ra ubin pagraranggaan da ta dëngëg may dëngëg ubin pagdaraldalan da ubin pansidarakul da yang mga kulu nirang pagparalandawan ubin kung unu pa man ang mga kaguluanay ang kaw̓utanu.
21 Yang nag̓aëldanu ëngëd tung pagkaw̓utu asan ang muya yang Dios ang pagpaturuw̓ulunanu,
ilug̓utaw si anya tung kaëyakan asan tung katalungaan mi ang asta mag̓intraw ra ilëm tangit natëtëngëd tung dakëlë pa asan tung numyung nagpakasalak tan taa pa ang pagkatapus maskin pinakdulanu pa ta lugar nirang manligna,
indi pa ka ëngëd nag̓apanligna tung nagkarabuat nirang malalaway ang katulad ka tung pangumbaw̓ay ubin pangunlalii ang ya ra kay pinaklëran nirang anday ëyak-ëyak nira.