Pagkëba-këbaan Da Ta Duru Yang Dëdlaan Na Ang Muya Tanira Liw̓ërëngën Da Ta Duma (11:1-6)
11
Kisira ra rin ang pasinsiaënaw ra kanay numyu.
May pira pa ilëm ang tag̓ang gustuu rin ang ianing tung numyu.
Piru muya laumanaw ra ka ilëm numyu ang yang sadiliu ya ra ilëm ag̓ipadayawayu ang maning pa tung sasang taung kabus-kabus.
Piru maskin pang maning tia,
ya ra ka ëngëd ay ingalukunu tung numyu ug̓ud.
2 Ya ray nag̓aingaluku tung numyu ay kipurki durug këtël yang pangimunu ang katulad ka tung pangimun yang Diosa.
Anday dumang nag̓apangimunanu ya ra yang mga taung atiang pamagturuldukun tung numyu ang para patalangënamu ra nira tung pagtaralig̓ën mi.
Ay yang kaalimbawaan mi maning pa tung sasang daralang limpiu ta ug̓ali ang ipinabinalayu tung sasang tau ang ya ra ti Jesu-Cristo.
Indiaw ëngëd malëlyag ang yang gëgma mi tung anya magtënakan pa.
3 Yang pagkëtab-këtaw̓an ëngëd yang dëdlaanu para tung numyu ang muya makbungamu pa tung ni Eba atiing tukaw.
Katulad tung anyang nadayaan yang nagpairaw-iraw ang atiing durug kaansianung magpandaya,
yamu ya kab.
Ay muya liw̓ërëngënamu ra ka yang mga manigtulduk ang atia ang yang mga isip mi nag̓apatalang da nira tung pagtaralig̓ën ming tëdëk ig gëgma ming bug̓us tung ni Jesu-Cristo.
4 Ayw̓a indiamu aningënu,
kipurki alkuntaduamung pagrisibi tung maskin tinu pay magkaw̓ut asan ang magparakaw̓utun natëtëngëd tung ni Jesus buat ang pagkatapus indi ëngëd nganing magkatunu tung ipinagpakaw̓utu tung numyu atiing primiru.
Nag̓arisibi mi ra ka nganing yang sasang ispiritu ang aparti tung Espiritu Santong rinisibi mi atiing primiru.
Nag̓apauyunan mi ra ka ilëm nganing yang ag̓aningën nirang Matinlung Balita buat ang dakulu yang pinag̓apartian na tung balitang ipinagpakaw̓utu tung numyu atiing primiru.
5 Kaministiran pasinsiaënaw ra kanay numyung magkërëng tung sadiliu,
ay tung pag̓intindiu,
indiaung pisan nag̓ataktak tung dating mga apustul ang atiang pag̓aningën yang mga bisita ming atia ang indi unung pisan mapasiring-siringanc.
6 Maskin anda ka man ay pinag̓aralanung abwat natëtëngëd tung matinlung pamëtang-bëtang ta bitala,
piru sag̓araw rang sag̓ad tung Matinlung Balitang naang nag̓ipagpakaw̓utu tung mga tau.
Ya ra kay pirming nag̓apapruibaanu ta mupia tung numyu.
Yang Nag̓ipanuw̓al Na Tung Nag̓ibangdan Yang Duma Tung Anya Ang Tanya Unu Bëlag̓an Matuud Ang Apustul (11:7-11)
7 Atiing pagparakaw̓utunu tung numyu yang Matinlung Balitang liit tung Dios,
indiaw ra ka man nagpaukupar tung numyu,
kung indi,
midyu tung nagparanëkaw yang pagkabëtangung nagpëg̓ës tung ubrang pastikular.
Ayw̓a,
ya ray nag̓ipakusalak mi tung yëën ang ya ra nganing ay dakulung pabur tung numyu ang yamu mapabtang tung abwat?
Tëëd mi,
tung pasaisung atia,
asanamu ra nag̓ing mga kinasakpan da yang Diosd!
8 Kuw̓ali pinanakawanu ra ilëm yang duma-rumang grupung nagpaëkël ta supurta tung yëën basta mapagpadag̓ën-dag̓ënaw ra ilëm tung numyu ta diw̓aldi.
9 Atiing asanaw pa tung numyu,
maskin kinampusaw ra,
indiaw ra ka ëngëd nagpaukupar tung numyu,
maskin tung ninu pa asan.
Ay yang kakulanganu,
inasikasu ra yang mga putul tang namansiliit tani tung Macedonia.
Ig tung uras ang atii nag̓amlig̓aw ra ta mupia ang indiamu ilëm lëbatan tung yëën.
Ig maskin tung magpaluyut ya pa ka ëngëd ay amlig̓anu ta maayën.
10 Talagang matuud yang bitalaung atia ay katulad ka tung ni Jesu-Cristong pulus matuud yang pinag̓aning na,
ya ra kay nag̓apausuyanu.
Talagang andang pisan ay tau asan tung intirung sinakëpan yang Acaya ang yay mapagpaimukli tung yëën tung nag̓ipagpaambug̓ung naa ang indiaung pisan pagpaukupar tung mga taung pamagpamati tung yëën ang pagparakaw̓utun yang Matinlung Balita.
11 Natëtëngëd tung unu pa w̓asu ang ya ray nag̓aamlig̓anu ang indiamu ëngëd lëbatan tung yëën?
Natëtëngëd basu ang yuu naplëkanaw ra ta gëgmaw tung numyu?
Bëlag ka.
Ay yang Dios yay nag̓askë ang nag̓agëgmaanamu yëën ta duru.
Nag̓asambit Na Yang Pag̓asikad Na Tung Pasais Nang Atiang Indi Pagpaukupar (11:12-15)
12 Talagang idayunu ka ëngëd yang pasaisung atia ug̓ud asan da nga kalawayu ta katadlëngan yang duma asan ang pamagpaukupar tung numyu ang ya ray nag̓apatiëlan nirang pamagpaambug ang tanira unu mga apustul ka ig yang pasais nira unu pariu ka ilëm tung pasaisu buat.
13 Kipurki yang mga taung atia pamagpaapustul-apustul da ilëm.
Tanira mga manigparakaw̓utun ang mga mandaraya ay pamagpasuad-suad da ilëm ang tanira matuud ang mga apustul ni Jesu-Cristo.
14 Indiita ilëm mabërëng tia kipurki maskin ti Satanas nganing pagpasuad-suad ka ang tanya sasang angil ang masulaw yang pagkabëtang na ang para aningën kang liit ka man tung Dios.
15 Purisu bëlag̓an makabëw̓ërëng kung yang nag̓apanuw̓ul na pamagpasuad-suad ka ang tanira nag̓apanuw̓ul ka ni Jesu-Cristong mamag̓ërëkëlën tung pagburuatën yang matitinlu.
Piru yang panampëtan nira tung uri,
pakdulan yang Dios ta parusang magkabag̓ay ang pisan tung mga inubra-ubra nirang atiang pagpandaya.
Nag̓aulit Na Yang Pagpailala Tung Pagkaapustul Na Ang Maninga Tung Pagpaambug (11:16-29)
16 Buinu,
ibaliku ra kanay tung inaningu ta nungayna ang yuu mag̓intraw ra kanay pakabus-kabus.
Purisu anday maglaum tung yëën ang yuu kabus-kabusaw ra ka man ang matuud.
Ug̓aring ilëm kung magkamaning da ka man tia yang pagpabëtang mi tung yëën,
tay pag̓ingalukaw rang lag̓i ta pasinsia tung numyu,
ug̓ud pati yuu lugtanaw ra ka numyung magpaambug da ka kanay ta gësyë ang katulad ka tung mga pamagpaapustul-apustul ang atia.
17 Kung tung bag̓ay yang pasaisung naang pagbitala bëlag̓an ka man pariu tung pasais ni Ginuu ta atiing taa pa rin tanya,
kung indi,
tung pagparambug̓unung naa natëtëngëd tung pagkaapustulu,
yuu ka ilëm agpagpakabus-kabus.
18 Ay kumus duru ra asan ang pamagpaambug ang para ilëm tung ikaayën yang mga pagkabëtang nirang sadili,
pati yuu midyu tung magpaambug̓aw ra ka ug̓ud.
19 Simpri kumus duruamug katataku,
bëlag̓an maliwag siguru tung mga isip ming magpasinsiaamu ra tung yëën,
ay midyu magsadyaanamu ra ka nganing tung duma ang nangakabus-kabusan da.
20 Ay ya pa ag̓ari,
tëlëngan mi ra ilëm yang nag̓ainabu asan.
Maskin may asan ang maning pa tung pamangirëpën da tung numyu ubin pamagpanlëpës da ang yamu ra ilëm agdayaay nira,
ubin pamaglamku tung numyung pamagduminar,
nag̓apasinsiaan mi ra ka ilëm nganing.
21 Abaw lastima ilëm!
Kung bëlag̓anaw ilëm ka man talawan ang yay makakaëyak ang aminënu,
dapat da rin ang inubraw ra ka yang maning ka tia tung numyu.
Tutal nag̓aagwantaan mi ra ka palang magpasinsiaën!
Simanyan kung unu pay gustu yang sasang tau asan ang palangaasan nang ipagpaambug,
ya ra kay palangaasanung ipagpaambug ka.
Ug̓aring yang papatandaan mi ilëm,
yang pasaisung naang pagpaambug,
yuu ka ilëm agpagpakabus-kabus.
22 Kung tanira pamagpaambug ang tanira mga Hebreong pulutiku,
yuu Hebreo kang pulutiku.
Kung tanira pamagpaambug ang tanira mga kinasakpan yang nasyun ang Israele,
yuu ya ka.
Kung tanira pamagpaambug ang tanira mga kanubli ni Abrahamf,
yuu sasa kang kanubli na.
23 Kung tanira pamansianing ang tanira unu pamagpaturuw̓ulun buat tung ni Jesu-Cristo,
ta yëën,
maskin midyuaw ra ilëm tung sasang taung kabus-kabus ang pagbitala,
mas pang may mapailalaw kay tung nira ang yuu talagang turuw̓ulunaw ka man anyang matuud.
Katulad da asan tung pagparakaw̓utunu yang Matinlung Balita,
durung bëdlayung iginastaw.
Dispuis pira-pira rang bisis ang ipinakalabusaw arangan da ilëm tung pangërënganu tung ni Jesu-Cristo.
Indi ra ilëm mabilangu kung pira-piraaw rang bisis ang suminalapuaw ta paaplit ta palu.
Pira-pira ra kang bisis ang napbësaw ra rin tung kamatayën.
24 Malimaaw rang pinaburdunan yang mga masigkanasyunung mga Judio ang may mga katëngdanan,
ang taluklung puluk may siam ang lapdës na.
25 Makluaw ra kang pinalu yang mga tag̓a Romang may mga katëngdanan.
Ig minsaaw ra kang pinagtaraw̓angan ang pinagbatu ang para imatayënaw ra rin.
Makluaw ra kang napasar ta parusdak yang nag̓asaayanu tung tëëb ig may minsa pa ang nag̓apun da ilëm may nagdamal pa ang palutaw-lutawu tung alauran.
26 Kumus durung pagparanaw-panawënung pagliliw̓utun tung maskin ay pang banwaay,
yang kabuiu pirmi ilëm ang nag̓apabtang tung pangalang-alangan.
Kung kaisan naalang-alangaw ra rin tung paglalaktërënu tung mga subang maktël yang tulw̓a na.
Indiaw ka ëngëd nalibri tung karisguan,
maskin ariaw pa nagtëyëb,
mag̓ing tung mga siudad,
mag̓ing tung mga banwang palag-palag yang tau na,
mag̓ing tung tëëb man.
Kung kaisan naalang-alangaw ra ka rin tung mga tulisan ang nagkarapanaw-panawanu.
Kung kaisan pinaliwag̓anaw ta duru yang mga masigkanasyunung mga Judio ig kung kaisan pati yang tag̓a duma-rumang nasyun ang bëlag̓an mga Judio,
ya ra kay namagpakdul ta karisguan tung yëën.
Ig kung kaisan naalang-alangaw ra ka rin nganing tung mga taung pamagpatunu-tunu ilëm ang tanira unu mga masigkatumatalig̓u ka buat.
27 Dispuis bëlag ilëm gësyë yang bëdlayung nagtrabaw ang ya ra kay ibinalakyangu tung pagparakaw̓utunu.
Durung mga law̓ii ang pëlëk yang ëlëku.
Napanawaw ra ka ta pasuw̓uk may pakanal.
Muya-muyaaw rang namlëk tung pagparanganënu ang para anday paglingatanu tung pagpaturuw̓ulunu tung ni Ginuu ta.
Napasaranu ka yang lamig ang subra ang naalang-alangaw ka man ta pag̓araw̓ëlënu.
28 Ig puira pa tung nagkarapasaranung duma ang indi ra panambitënu,
kaldaw-kaldaw pagsintiaw ta lëbat sigun tung pagkëba-këba yang dëdlaanu kung ya ra ilëm ag̓ari yang pagtaralig̓ën yang mga kaputulan tang pamagsaragpun ang kada sam pundaan tung duma-rumang banwa.
29 Kung tinu pay nag̓abalitaanu tung nira ang panluw̓ay ra,
asan da ka nga sintiayu yang kaluluw̓ayënu kang pagpasunaid tung anya.
Kung tinu pay nag̓abalitaanu tung nirang nagpaguyud da ta tuksung nagpakasalak,
ag̓aampayanaw ra ta kapupungawënung duru tung anya ang nunut da ka ta kaërëpung duru tung binuat tung anya yang nagsunlug.
Nag̓asambit Ni Pablo Yang Sasang Napasaran Na Ang Ya Ëngëd Ay Pagpailala Tung Pagkamaluw̓ay Na (11:30-33)
30 Kumus nag̓arëgsananaw ra ka man ang magpaambugg,
yang ipagpaambug̓u ya ra ilëm yang sasang napasaranung pagpailala ëngëd tung pagkamaluw̓ayu.
31 Yuu magsumpaanu pa tung aran yang Ampuan tang Dios ang ya ka man mismu yang Dios ang pinanalig̓an ni Ginuu tang Jesu-Cristo atiing taa pa rin ang ya kay pag̓aningën nang Ama na.
Magkabag̓ay ang pisan ang tanyay dayawën tang asta tung sampa.
Yay nag̓askë ang indiaw pagbukli tung nag̓ianingung naa.
32 Atiing duunaw pa tung Damasco,
yang Gubirnadur ang atiing linugtan ni Adi Aretas ang mangatëngdanan duun,
ya ray nagpabantay tung mga guardia duun tung mga purta yang siudad ang para kung magluaw,
dëëpënaw rang lag̓i nira.
33 Tëëd mi tiang pagkamaluw̓ayu ang yuu ra ituntunay yang mga kaarumananu tung sasang tiklis ang ipapuklutay tung bintana yang padir,
bakluaw pa ka nga libri tung pudir yang Gubirnadur ang atiah!