Maskin Anday Gustu Nang Magpalbat Tung Nira, Piru Simpan Da Ka Ëngëd Ang Magpadapat Ta Disiplina (10:1-6)
10
Buinu,
yuu mismung ti Pablo may sasang nag̓aingaluku tung numyu ang ipapanawu tung pasais ni Jesu-Cristo ang tanya durug kaamumu ig durug kaayën.
Piru tëëd mi,
sigun tung pagkaamumuu,
yuu rag laumay ta duma asan ang basta asanaw unu tung numyu,
duruaw unug katalaw.
Piru kung andanaw ra unu asan,
duruaw unug kaisëg ang pagpaëkël tung numyu ta mga sulat unung malëlbat yang karga na.
2 Ya ra taa yang nag̓aingaluku tung numyu:
kung maimu ilëm,
kung kumaw̓utaw ra nganing asan,
indiaw ra ilëm parëgsanan ming mangisëg ang katulad tung nag̓aisipanung buatën.
Ay kung marëgsananaw pa,
talagang palangaasanu ra ka ëngëd ang pagngëlën ta malbat yang dumang atiang pagpabëtang tung yëën ang yang panalig̓anu unung pagparakaw̓utun,
ya ra ilëm yang sadiling kinatakwanu.
3 Bëlag matuud tia ay kipurki maskin yuu sasang tau ka ilëm ang may kaluluw̓ayën,
piru tung panirbianu tung Dios ang yuu maning pa tung pagpakigbatukaw tung maskin unu pay nag̓apgësan ta mga tau ang balaw̓ag tung kamatuuran ang liit tung anya,
talagang indiaw panalig tung sadiling kinatakwananu.
4 Ay yang maning pa tung armas ang nag̓ipagbatuku,
bëlag̓an yang kadagmitan ang nag̓agamit yang dumang mga manigbitala ang panalig tung puirsa nirang sadili,
kung indi,
ya ra yang nag̓ipakdul yang Dios tung yëën ang ya ra kag paktëlay na ang para kayananung barik-barikën yang mga kamaling katadlëngan ang nag̓apatiëlan ta mga tau ang midyu tung kutag kabaw̓akëd.
5 Pati yang maskin unu pang nag̓ipagsagangay yang mga tau tung tamang pag̓irintindiën tung Dios ang ya ra ka man ay nag̓ipagpabug̓al nira,
ya ra kay nag̓apalagpaku.
Asta yang maskin unu pang palaksuay ta pag̓irisipën nirang pagpasuag tung ni Jesu-Cristo,
ya ra kay nag̓asaklawanu ang basi pa ra ilëm asan da nga manmanay tanirang magpagaëm tung anya.
6 Dispuis kung mapaita mi ra nganing tung yëën ang yamung kadaklan asan panangëramu ra ta ustu tung ni Jesu-Cristo ig pagpauyunamu ra ka tung pagkaapustulu,
atia simpanaw ra kang magpadapat ta disiplina tung kumpurming tinu pa asan ay pagpadayun pa ka ëngëd tung pagpasuag na.
Nag̓asambit Na Yang Katuyuan Ëngëd Yang Katëngdanan Na Ang Talagang Para Tung Ikaayën Nira (10:7-11)
7 Kung isip-isipënu,
yang nag̓intindiën mi,
midyu ya ra ilëm yang nag̓aita mi tung sagpaw.
Kung tinu pa asan ay pagtalig tung sadili na ang tanya pinilik ni Jesu-Cristong mangërëngan tung anya,
dapat ang isipën na ka ang kung matuud ang tanya pinilik na,
pati yuu ya ka.
8 Kipurki maskin ipagpaambug̓u pa yang katëngdananu ang midyu tung subra pa tung magkabag̓ay,
indiaw ra ka ëngëd mapaëyak.
Kipurki ya ra ka man ay ipinagpiar ni Ginuu ta tung yëën ang yang katuyuan na,
bëlag̓an ang mag̓aning ang yay paniëlanung manrangga tung numyu,
kung indi,
ang para mapadag̓ën-dag̓ënanamu ra yëën ang para mas pang magtinlu yang pag̓urusuyun mi tung nag̓ayunan na.
9 Nag̓asambitu tiang katuyuan yang katëngdananu ay ug̓ud anday maglaum tung yëën ang yang nag̓ipagpaëkëlu tung numyu ta mga sulat,
ay ug̓ud asanamu ra papaëldayung patarantaën.
10 Ay kipurki may duma asan ang pagriklamu ang kung magsulataw ra nganing unu tung numyu,
duru unug puirsa kag masyadug lëbat yang karga na.
Piru kung asanaw ra unu tung numyu,
bëlag̓aw unu sarapëtën ay yuu unu talawan,
ig indiaw ka unu maskëng mamëtang-bëtang ta bitala.
11 Ya taa yang dapat ang intindiën yang sasang taung pagbitala ta maning tia:
kumpurming unu pang pasaisayung mapanimanan mi tung isinulatu tung numyung andanaw pa asan,
ya ra kang pisan ay maita mi tung ulag̓u kung asanaw ra nganing.
Yang Pamarik Na Tung Katadlëngan Ang Nag̓apatiëlan Yang Duma Ang Tanya Unu Anda Kang Lag̓i Ay Katëngdanan Nang Nagparakaw̓utun Duun Tung Corinto (10:12-18)
12 Ya ilëm may sasa ka man ang panalawanu asan.
Indiaw ra ilëm ëngëd magpangaas ang magpakitupu tung duma asan ang andang pisan ay pandalëndënan nirang magpadayaw tung numyu ang tanira unu buat na pa may katëngdanan ang abwat.
Yang sadiliu indi ra ikumpalaru tung nira.
Tëëd mi,
tanira ka mismu ay pagpakdul yang pitik ang pagpasunairan nira tung mga sadili nira ang pagkatapus pirmi ilëm ang pagkurumpalar-kumpalaran tanirang pagparaabwat-abwatan.
Talagang andang pisan ay naërëm nira!
13 Piru ta yëën,
indiaw mag̓ambu ang may katëngdananung subra pa tung sukat ang magkatama,
kung indi,
asan da ilëm ag̓ipausuyayu tung sukat ang ipiniar yang Dios tung yëën ang asta asanaw ra ka man nganing nagparakaw̓utun tung numyu.
14 Kipurki bëlag̓an ang mag̓aning ang tung pagparadag̓ën-dag̓ënënung naa tung numyu ang nag̓apasubraanu ra yang sukat ang atiing ipiniar na tung yëën.
Kung indiamu galang pinagpakaw̓utanu atiing primiru,
tay puis nag̓apasubraanu ra ka man din.
Piru yuu ra nganing ay katukawan ang nag̓imuras ang asta nakaw̓utaw ra asan ang nagparakaw̓utun tung numyu yang Matinlung Balita natëtëngëd tung ni Jesu-Cristo.
15 Indiaw nganing pag̓ambu ang yëën da yang inubra ta duma ang katulad ka tung duma asan ang pamagpakigkuntra tung yëën ay kipurki tia subra ra tung sukat ang ipiniar tung yëën.
Kung indi,
dakulu yang sarig̓u tung numyu ang mintras dumakul dang dumakul yang pagtaralig̓ën mi tung ni Jesu-Cristo dumakul da kang dumakul yang kumpiansa mi tung yëën ang talagang pinakdulanaw ra ka man yang Dios ta katëngdananung mangërëngan tung ni Jesu-Cristo asan tung numyu ang pirmi ka man ang uyun tung sukat ang atiing ipiniar yang Dios tung yëën.
16 Asanaw ra nga taw̓angay mi ang asta mapagparakaw̓utunaw ra ka tung mga tau duun tung duma-rumang banwa tung tukawan ming indi pa nag̓apalikëran ta duma yang Matinlung Balita.
Atia,
indiaw magpabug̓al natëtëngëd tung inubra ta duma duun ang yëën da,
kung indi,
yang sulaminting ibalitaw tëëd ilëm tung sadiling inubraw.
17 Yang linyang nag̓ausuyu ya ra yang sasang sinambit tung kasulatan ang mag̓aning,
“Kung tinu pay malëlyag ang magpabantug,
bëlag̓an yang sadili na ya ipabantug̓ay na,
kung indi,
ultimu ra ilëm ti Yawi,
ya ray dapat ang ipabantug na,”
mag̓aninga.
18 Ay ya pa ag̓ari,
yang taung aprubadu,
bëlag da yang pagpabantug tung sadili na,
kung indi,
ultimu ra ilëm yang taung bantug̓un ni Ginuu ta yay talagang aprubadub.