9
Kung tung bag̓ay,
anda ra ka rin ay kaministiran ang sulatanamu pa yëën natëtëngëd tung nag̓itaw̓ang ang atia tung mga kaputulan tang binuat da ka yang Dios ang mga tauan nang sadili.
2 Ay nag̓askëanu ra kang lag̓i ang yamu durung kalëlyag ming magtaw̓ang ang ya ra ka man nganing ay ipinagpabantug̓u tung mga putul ta tani tung sinakëpan yang Macedonia.
Ag̓aaningaw tung nira ang yamu asan tung sinakëpan yang Acaya,
disti pa tan takun simpanamu rang lag̓ing magtaw̓ang.
Purisu yang linuaan na,
pag̓agngël nira ang yamu durung kalëlyag ming magtaw̓ang,
asan da ka kumintël yang isip yang kadaklan tung nira ang mamagtaw̓ang da ka.
3 Ug̓aring ilëm yang nabtang tung isipu,
mas matinlu ang ipaangayu ra asan yang mga putul tang atiang nagkarasambitu nungayna ug̓ud indi ilëm magluang sungaw ra ka ilëm yang ipinagpabantug̓ung atia natëtëngëd tung numyu,
kung indi,
talagang simpanamu ra ka man ang matuud ang para magtaw̓ang ang katulad ka tung inaningung atia tung nira.
4 Nusias ilëm may mga putul tang tag̓a tani tung Macedonia ang gustu nirang mamansinunut tung yëën ang mamansiangay asan ang pagkatapus kaw̓utanamu ra nira ang bëlag̓anamu pa pala simpan,
yuu talagang mapaëyakaw ta duru,
maskin indiaw ra magsambit ang pati yamu,
ya ka,
natëtëngëd tung inaningu tung nira ang yamu simpan da.
5 Purisu yang nabtang tung isipu,
kaministiran ang paktëlënu yang isip yang mga putul tang atiang mamagtukaw ra tung yëën ang mansiangay asan tung numyu ug̓ud ya ray magpaiwan-iwan tung numyu ang para simpan da ka man yang may kantidad nang atiang durug tinlu ang ya ra kang lag̓i ay pinangakuan ming tukaw ang itaw̓ang mi.
Yang pag̓asikaru ay ug̓ud tung pagkaw̓utu asan,
simpan da ka man ig bistu ra ka ang yang pagparakdulun ming atia bëlag̓an ang midyu tung narëgsananamu ra ilëm yëën,
kung indi,
talagang tëdëk buluntad tung kinaisipan mi.
Nag̓apaktël Na Tanira Ang Mag̓ing Masalama Tung Pagparakdulun Nira (9:6-15)
6 Isipën mi ra kanay yang pananglit ang naa ang para madëëp mi yang gustuung ianing.
Kung tinu pay magluak ta gësyë ilëm,
gësyë ka ilëm yang mapatëbas na.
Piru kung tinu pay magluak ta duru,
duru ka yang mapatëbas na.
7 Purisu sasa may sasa tung yatën,
masigpakdul yang kumpurming pinagtimbang-timbang na ra kang lag̓i tung isip na ang ya ray ipakdul na.
Indi ra ilëm magpakdul ang ya rag panganugunay na yang nag̓ipakdul na ubin midyu tung nag̓arëgsanan da ilëm.
Kipurki yang nag̓auyunan ëngëd yang Dios ya ra yang taung durug kasadya yang isip nang pagpakdul.
8 Dispuis yang Dios yay sarang ang magpakdul tung numyu ta sari-saring kaayënan ang aw̓unda ka yang pagparakdulun na ug̓ud ëkël tung pag̓arasikasuën nang pirmi tung tanan ang mga kaministiran mi,
bastanti ka yang magamit ming magbuat ta maskin unu pang ikaayënay yang mga masigkatau mi.
9 Yang gustuung ianing tia,
pariu tung sasang napabtang tung kasulatan natëtëngëd tung sasang taung nag̓auyunan yang Dios ang mag̓aning yang bitala na,
“Tanya durug kasalamang pagpamakdul tung mga maliliwag̓ën.
Yang apiktar yang pagparakdulun na yay magnatis ang asta tung sampa,”
mag̓aninga.
10 Dispuis yang Dios ang yay pagpakdul ta similya tung sasang manigluak pati yang kaministiran nang mapangan,
ya ra kay magpakdul tung numyu ta maning pa tung similya kag padaklën na pa nganing ang pagkatapus ya ra kay paumintuën na yang patëbas yang pagkamasalama mi.
11 Talagang pakaayënënamu ra anya ta mupia ug̓ud puidiamung mag̓ing durug kasalama tung pagparakdulun ming atia ang yang luaan na,
duru rang mamagpasalamat tung Dios natëtëngëd tung itaw̓ang mi tung nira ëkël tung yamën ang papag̓ëkëlën ming mag̓atëd.
12 Ay kipurki yang pagtaraw̓angën ming atia tung nira ang ya kay sasang panirbian mi tung Dios,
bëlag̓an ilëm ang asan da ngasikasuay mi ta mupia yang mga tauan yang Dios tung mga kaministiran nira,
kung indi,
asan da ka ngaëyangay tanira ta ipagpasalamat nirang duru tung Dios ang anday katëgka-tëgkaan na.
13 Tung pagtaraw̓angën ming naa tung nira,
asan da nga papruibaay mi ang talagang pagtumanamu rang matuud yang uyun ang pisan tung Matinlung Balita natëtëngëd tung ni Jesu-Cristo ang ya kang lag̓i ay nag̓ipag̓ubligar mi tung mga tau ang yay nag̓apanangëd mi.
Purisu ya ray dayawën nira tung Dios pati yang pagkamasalama ming pagpakdul tung nira may tung kadaklan ang mga putul tang nag̓aliwag̓an,
ya ka.
14 Dispuis tung pagpakigputul ming atia tung nira,
asan da malansang ta mupia yang mga isip nira tung numyu ang nunut da ka ta pag̓arampuën nira tung Dios para tung numyu natëtëngëd tung pag̓urubraën na tung mga isip ming durug tinlu ang asanamu ra ka ngaëyangay ta kanëëman ming dakulu.
15 Magkabag̓ay rang pisan ang ita magpasalamat da tung Dios ta dakulung pagpasalamat natëtëngëd tung ipinakdul na tung yatën ta diw̓aldi ang kung tag̓aman tang sambitën yang tanan ang luluaan na,
kampusunita ta mga bitalang mapabag̓ay ta.