Nag̓asambit Na Yang Matinlung Mulidung Ipinaita Yang Mga Tag̓a Macedonia Sigun Tung Pagparakdulun (8:1-7)
8
Buinu,
mga putulu,
gustuung ipakdëk tung numyu kung unu pay pinakaw̓ut yang pag̓urubraën yang Dios tung mga isip yang mga tumatalig ang kada sam pundaan tani tung sinakëpan yang Macedonia.
2 Ay kipurki maskin pinasaran ta kaliwag̓an ang durug lëbat ang asan da ka man tanira nga sukdaay ta mupia,
piru kumus may kasadyaan nirang duru,
inyangan da ka ëngëd ta kinaisipan nirang durung pisan agkasalamang namagpakdul ta itaw̓ang nira tung mga kaputulan ta,
maskin duru kag kaliliniwag̓ën.
3 Sistigusaw tung pagkamatuud ang yang ipinakdul nirang atia bëlag̓an da ilëm yang kumpurmi ra ilëm ang nasarangan nira,
kung indi,
subra pa nganing ig tëdëk buluntad tung mga isip nira yang pagparakdulun nirang atia.
4 Duru ra nganing ang pag̓amu-amu nira tung yëën ang kung maimu ilëm tugtanu ka tanirang mamagpakilakët tung pagtaraw̓angën tung mga tauan yang Dios duun tung Judëaa.
5 Andang pisan ay laum-laumu ang yang buatën nira sumubra pa tung pamatëng-patëngu tung nira.
Kung indi,
landaw tung tanan,
yang mga sadili nira ya ray ipinag̓intriga nira tung ni Ginuu tang ipinagaëm pati tung yëën ya ka ang katulad ka tung kalëlyag̓an yang Dios ang yay buatën nira.
6 Purisu ya ra kay nag̓ipagpaktëlu tung isip ni Tito ang kaministiran magpadayun yang pagparadag̓ën-dag̓ënën na asan tung numyung naimpisaan na ra tan taa pa ang asta makumplitu mi rang pisan yang kabilug̓an yang itaw̓ang ming durug tinlu tung mga kaputulan tang atia.
7 Numaan,
kung ilaktëru ra tung numyu asan,
yang nag̓askëanu tung numyu,
duruamug kabastanti maskin tung unu pang pag̓urubraënay.
Sasa ra asan tung pagtaralig̓ën ming dakulu tung Dios,
maraayënamu kang mamëtang-bëtang ta bitala,
duru kang nag̓askëan mi natëtëngëd tung kamatuuran,
duruamu kag kadërërëp ang manirbian tung Dios tung sari-saring papanaw,
ig durug kaaw̓unda yang paggërëgmaan ming magpurutul ëkël tung naita mi tung yëën.
Purisu kumus maning da ka man tia yang pagkaaw̓unda mi,
gustuu ang duun da ipatupuay mi yang pagtaraw̓angën mi tung mga kaputulan ta.
Nag̓ipag̓isplikar Na Kung Unu Pay Katuyuan Nang Pagpaktël Na Tung Nirang Mamagtaw̓ang (8:8-15)
8 Yang nag̓ianingung atia bëlag̓an ang mag̓aning ang pagkalalanganaw tung numyu,
kung indi,
nag̓asambitu ilëm yang kadërërëpën yang dumang pamagtaw̓ang ug̓ud asanamu ra nga sukdaayu kung unu pag kalutuk yang gëgma mi tung mga kaputulan tang atiang pangaliwag̓an.
9 Ministir pang lalanganamu pa yëën ang magpaitaamu ta gëgmang lutuk,
sindu nag̓amarësmësan mi ra ka nganing kung unu pay kantidad yang kanëëman ang atiang ipinagpaita ni Ginuung Jesu-Cristo tung yatën.
Kung ipananglitu pa tung pagkabëtang yang sasang tau,
ag̓ad tanya manggaranën,
piru arangan da ilëm tung yatën,
nagpakamaliliwag̓ën da ug̓ud ëkël tung kaliliwag̓ën nang atii,
asanamu ra mapamanggad na tung inding pisan mapasiring-siringan.
10 Purisu nani ra yang paëtaru tung numyu natëtëngëd tung bag̓ay ang atia.
Maayën pang tapusun mi ra ka ëngëd yang naimpisaan mi tan takun.
Atii kanay,
bëlag̓an ilëm ang tukawamu ra tung tanan ang nag̓impisang nagtuw̓ud ta itaw̓ang mi,
kung indi,
tukawamu ra ka nganing tung tanan ang inyangan ta isip ming magtaw̓ang.
11 Ug̓aring numaan,
idayun mi yang pagturuw̓urun ming atia ang asta makumplitu mi ra ëngëd ug̓ud kung ya pa ag̓ari yang kadërërëpën ming nag̓impisa,
ya kay kadërërëpën ming magtapus ang kumpurming masarangan mi numaan.
12 Kipurki kung durung kalëlyag ming magpakdul,
kumpurming unu pay masarangan ming ipakdul,
ya ra kay risibiën yang Dios.
Indiamu ka ëlatan nang magpakdul ta indi mi masarangan.
13-14 Bëlag̓an ang mag̓aning ang yang duma palakanënu ang pagkatapus yamu ray palbatanu.
Kung indi,
kumus yamu asan aw̓unda simanyan,
magkatama ka ang taw̓angan mi yang mga kaputulan tang nag̓aliwag̓an da.
Atia,
tung dumang uras ang yamu si ay pagkaliwag ig taniray aw̓unda,
taw̓anganamu ra ka nira.
Tung maning tiang papanaw,
pariu-pariuamung magtaraw̓ang-taw̓angan ang kumpurming tinu pay nag̓aliwag̓an.
15 Atia kung yay usuyun mi tia,
yang luluaan na magkaanggid-anggid da tung sasang napabtang tung kasulatan natëtëngëd tung pag̓uup yang mga Israel ta mana tiing tukaw ang mag̓aning,
“Kung tinu pay napag̓uup ta dakëlë,
bëlag̓an kang subra tung kaministiran na yang nauup na.
Kung tinu pay napag̓uup ta gësyë,
indi ra ka nagkakulang,”
mag̓aningb.
Nag̓ipagpailala Na Kung Tinu Pay Pinanuw̓ul Nang Mamagpadag̓ën-dag̓ën Tung Nira Natëtëngëd Tung Bag̓ay Ang Atia (8:16–9:5)
16 Duru rag kadakul yang pagpasalamatu tung Dios ang ti Tito nag̓apaëyangan na ka ta nag̓ipagpadërëp nang magpadag̓ën-dag̓ën tung numyu asan ang katulad ka tung kadërërëpënu.
17 Ay bëlag̓an da ilëm ang pagpauyun da tung nag̓ipagpaktëlu tung anyac,
kung indi,
tëdëk ang pisan tung kinaisipan na ang tanya magbalik da asan tung numyu natëtëngëd duru ra kang lag̓ing kalëlyag nang magpadag̓ën-dag̓ën tung numyu.
18 Dispuis may sasa kang putul tang ipanunutu tung anya ang ya ray ilaladu tung mga tumatalig ang kada sam pundaan natëtëngëd tung pagprusigir nang pagparakaw̓utun yang Matinlung Balita.
19 Bëlag̓an ilëm maning tia yang pasais na,
kung indi,
tanya ra ka nganing ay pinagkërësënan yang kada sam pundaan ang pinabilug̓an ang para ya ray ipanunut nira tung yëën tung pag̓ërëkëlënu tung nag̓itaw̓ang ang naa ang asan da nga padëngëg̓ay ta ti Ginuu ta ig asan da ka nga bistu ang ta yatën,
duru ka man agkadakul yang kalëlyag tang magtaw̓ang tung mga kaputulan ta.
20 Yang nag̓ipagpanunutu tung putul tang atia ay pangamanaw ka ang para anday mabangdan tung yëën natëtëngëd tung pag̓ërëkëlënu tung nag̓itaw̓ang ang naang dakulu ka man yang kantidad na.
21 Ay kipurki anday dumang pag̓asikaru asan,
kung indi,
ang yuu magbuat yang magkatama bëlag̓an ilëm tung pagtërëlëngën yang Dios,
kung indi,
pati tung pagtërëlëngën yang mga aruman tang tau.
22 Dispuis may sam bilug pa ka ëngëd ang putul tang ipanunutu tung na Tito.
Yang putul tang atia,
tung pagpaniiru tung anya,
talagang duru ka man agkadërërëp tung tanan ang itinalig̓u tung anyang ubraën.
Pagkatapus numanyan kumus dakulu ra ka man yang kumpiansa na tung numyu,
mas pang madërëp ang magpaiwan-iwan tung bag̓ay ang atia.
23 Kung natëtëngëd ka man tung ni Tito,
tanya sasang arumanung yay katabyangung pagpadag̓ën-dag̓ën tung numyu.
Kung natëtëngëd tung mga putul tang atiang durua ang nansinunut tung anya,
yay pamangërëngan tung mga kaarumanan nirang mga tumatalig ang kada sam pundaan tani ang tung pangërëngan nirang atia asan da ka nga padëngëg̓ay nira ti Jesu-Cristo.
24 Kapurisu kung mansikaw̓ut da nganing tanira asan,
papruibaan ming talagang may gëgma mi tung nira ëkël tung pagsapët mi tung nira.
Ay kung mabalitaan da nganing yang mga putul tang atiang namagpilik tung nirang kada sam pundaan,
asan da nga bilug̓ay nira ang yang ipinagpabantug̓u tung nira natëtëngëd tung numyu talagang may kamatuuran na ka man.