7
Purisu mga putulung nag̓agëgmaanu,
kumus maning da ka man tia yang mga pangaku yang Dios tung yatën,
kaministiran iplëk ta ra yang maskin unu pang ubra-ubraay ang makamamansa tung mga sadili ta,
pati yang sayud ang mga pagparainu-inuën,
ya ka.
Pabug̓usun ta yang mga isip ta tung kumpurming nag̓auyunan na ug̓ud mas pang mag̓atuita rang mag̓atu tung anyang durung pisan agkalimpiu.
Ya ray buatën ta natëtëngëd tung panggalang ta tung anyang nunut da ka ta pag̓ëlëd ta ang muya mapaglampasita pa tung anya.
Nag̓asambit Na Kung Natëtëngëd Tung Unu Pa Magkabag̓ay Ra Ang Balësan Ka Nira Yang Gëgma Na (7:2-4)
2 Ibug̓us mi ra w̓a yang gëgma mi tung yëën ang katulad ka tung nag̓ianingu ta nungaynaa.
Maskin nag̓abangdananaw ka man yang duma asan tung numyu,
piru tung pagkamatuud,
andang pisan ay binuatanung malain maskin tung ninu pa.
Anda ka nganing ay rinanggaanu ta dëngëg.
Anda ka nganing ay linëpësu.
3 Bëlag̓an kang mag̓aning ang yamu rag pakusalakayung pagsambit yang nag̓ipagbangdan ang atia yang duma tung yëën.
Kipurki katulad ka tung nag̓ianingu ta nungayna,
duruamug kamaal tung yëën.
Patay bui indi mag̓uman yang gëgmaung naa tung numyu.
4 Anday nag̓aëgtëmanung pagbitala tung numyu ay dakulu kang lag̓i yang kumpiansaw tung numyu.
Nag̓ipabantug̓amu ka nganing yëën ta duru tung duma.
Ta,
unu pay pinakaw̓ut na simanyan,
kung indi,
kumintël da ka ëngëd yang isipu ig nag̓aampayanaw ra ka ta kasadyaanung duru maskin unu pang kaliwag̓anay ang nag̓apasaranu.
Nag̓ibalita Na Kung Ya Pa Ag̓ari Yang Pagpaktël Yang Dios Tung Isip Na Ëkël Tung Ibinalita Ni Tito Tung Anya (7:5-16)
5 Ibaliku ra kanay yang isturia tung mga kaliwag̓an ang napasaranu tung pagkaw̓utu tani tung Macëdoniab.
Anda pa ka ëngëd ay kalimëngan yang pag̓irisipënu ay natëtëngëd maskin ariaw pa nanalunga,
durung kaliwag̓an ang nagkarabag̓asu.
Ay may mga taung namagpakigkuntra tung yëën natëtëngëd tung nag̓ipagpakaw̓utu.
Yadwa pa,
durung pagkëba-këba yang dëdlaanu natëtëngëd tung mga kaputulan ang midyu tung pamanluw̓ay ra yang duma.
6 Piru yang Dios ang yay pagpaktël tung isip yang mga taung magluw̓ayën da,
ya ray nagpaktël tung isipu ëkël tung pagkaw̓ut ni Tito.
7 Bëlag̓an da ilëm tung pagkaw̓ut na kumintël yang isipu,
kung indi,
pati tung ibinalita na tung yëën kung ya pa ag̓aring kumintël da ka yang isip na natëtëngëd tung numyu.
Ay binalitaanaw anya ang duru rang paglalangkag̓ën mi tung yëën ang tung makali mag̓irita-ita si ka,
ig kung ya pa ag̓arig katëdëk tung mga isip mi yang pagsug̓at mi natëtëngëd tung pagpakigkuntra mi tung yëën,
pati yang kadërërëpën ming pagkërëng tung yëën.
Purisu pagkagngëlu yang ibinalita nang atia tung yëën,
mas pa ka ëngëd ang nagkasadya yang isipu.
8 Ay maskin pinamungawamu ra ka man tung isinulatung atia tung numyu tan taa pac,
indiaw ka pag̓inësël ang napagsulataw ra ta maning tiang matigbak-tigbak tung numyu.
Tung bag̓ay napag̓inësëlaw ra rin atiing pagkabalitaw ang yang isinulatung atia ya ray pinagpungawan yang mga isip mi ang tung gësyë ka ilëm ang uras.
9 Piru simanyan duruaug kasadya.
Yang nag̓ikasadya yang isipu bëlag̓an natëtëngëd ang pinapungawanamu ra yëën,
kung indi,
natëtëngëd tung kapupungawën ming atia asanamu ra ngaëyangay ta ipanligna mi tung mga ubra-ubra ming malain.
Ay ya pa ag̓ari,
yang kapupungawën ming atia ya ra yang kapupungawën ang nag̓auyunan yang Dios.
Purisu anday pinakaw̓ut nang malain tung numyu yang ipinasulatung atii.
10 Kipurki yang sasang tau,
kung may kapupungawën nang maning tiang uyun tung nag̓alëlyag̓an yang Dios,
asan da ngaëyangay ta ipagsug̓at na tung mga ubra-ubra na ang asta maulikan da yang pag̓urusuyun na tung nag̓auyunan yang Dios ang nagkawaldang da ang pagkatapus andang pisan ay pagsug̓atan na asan.
Piru kung yang kapupungawën na ya ra ka ilëm yang kapupungawën ang kadagmitan ang nag̓asinti yang mga taung pamagpaguyud pa tung sistima yang kaliw̓utan ang naa,
andang pisan ay taw̓ang na tung taung atia ang para magsug̓at pa rin,
kung indi,
asan da manëg̓as yang isip nang magpadayun tung pagpablag na tung Dios.
11 Maskin napag̓inësëlaw ra rin ang nagpaëkël yang sulat ang atia tung numyu,
piru naa pala durung pisan agkatinlu yang pinakaw̓ut yang kapupungawën ming atiing nag̓auyunan yang Dios.
Ay asanamu ra ngaëyangay ang duruamung pisan agkadërërëp ang mag̓intindi ta maayën tung nadikanan yang karanggaan yang pagpurutulan ta.
Durung pisan ang kalëlyag ming magpailala ang talagang indiamu ra pandapig tung aruman ming atiang nagbuat yang malain.
Duru kang pisan ang pag̓imasul yang mga painu-inu mi tung mga sadili mi kung ayw̓at kinusintir mi pa.
Binalayanamu ra ka ta ëlëd ming duru kung unu ra ilëm ay panampëtan na tung numyu.
Duru kang pisan ang paglalangkag̓ën mi ang tung makali maulikan da yang pagpurutulan tang naglain da rin.
Duruamu kang pisan agkadërërëp ang magkërëng tung yëën.
Duruamu kang pisan agkadisididung nagparaig̓ung sam pundaan ang para magdisiplinaamu ra tung aruman ming atiang nagbuat yang malain.
Purisu tung tanan ang atiang ipinaita mi,
asan da nga papruibaay mi ang talagang anda ray turuw̓alën mi natëtëngëd tung bag̓ay ang atia.
12 Kapurisu maskin sinulatanamu ra yëën ta maning tia,
yang ipinagsulatu bëlag̓an da ilëm natëtëngëd tung taung atiang nagbuat yang malain ubin natëtëngëd tung taung binuatan na,
kung indi,
yang katuyuanu ëngëd ang nagsulat ay ug̓ud kung batikalanamu ra nganing,
asanamu ra nga maladmaray ang talagang may pagmaal mi ka man ang matuud tung yëën ang ya ka man ay nag̓auyunan yang Dios.
13 Purisu duun da nalinga-linga yang isipu ang maning da ka man tia yang pinakaw̓ut yang isinulatu.
Dispuis bëlag̓an ilëm ang kumintël da yang isipu,
kung indi,
pagkaitaw tung ni Tito ang duru rag sadya yang isip na,
mas pa ka ëngëd ang nagkasadya yang isipu.
Yang ikinasadya yang isip na ay natëtëngëd tung numyung tanan asan ang naglinga-linga tung isip nang bëgbëg da ka rin natëtëngëd tung numyu.
14 Talagang masadya tung isipu tia ay kipurki yamu ra kang lag̓i ay ipinagpabantug̓u tung anya ang pagkatapus indiaw ra ka pinakaëyakan mi.
Kumus pulus matuud yang tanan ang nag̓ianingu tung numyu,
purisu durug sadya yang isipu ang pati yang ipinagpabantug̓ung atia tung anya natëtëngëd tung numyu luminua ra kang may kamatuuran na ka.
15 Purisu simanyan mas pang nag̓agamën yang isip na tung numyu ay nag̓adëmdëman na kung ya pa ag̓ari yang pagparanangërën ming tanan tung kumpurming ipinalatay na tung numyung liit tung yëën atiing pagrisibi mi tung anyang durug dakul yang panggalang mi tung anya ang nunut da ka ta pagdëla mi.
16 Purisu ta yëën tanya,
durung pisan agkasadya yang isipu ay natëtëngëd dakulu ra ëngëd yang kumpiansaw tung numyu maskin tung unu pang bag̓ayay.