6
Ta,
kumus pagsasaanami yang Dios tung pag̓urubraën ang naa,
midyu magkabag̓ay ra ka ang pati yamung pinagpaitaan na ra yang kanëëman nang tinapnay,
paktëlënamu ra ka yëën.
Indi mi ëngëd kapa-kapaan yang kanëëman nang atia ang muya anda ray pakaw̓utun nang matinlu tung mga ug̓ali mi.
2 Ag̓aningënamu ra yëën ta maning tia,
ay may sasang ipadëmdëmu tung numyung ipinaula yang Dios ang tukaw ang napabtang tung kasulatan ang mag̓aning,
“Kung kaw̓utun da nganing yang uras ang ipinagtipuung magpaitaw yang kanëëmanu tung numyu,
talagang tuw̓alënu ra ka ëngëd yang nag̓ipag̓ampu mi tung yëën.
Ëë,
manangëramu ra tung yëën,
kung kaw̓utun da nganing yang uras ang ipagtukuru yang kalibrian mi,
talagang taw̓anganamu ra ka ëngëd yëën,”
mag̓aninga.
Tandaan mi ta maayën yang ianingung naa tung numyu:
numaan da yang uras ang ipinagtipu nang ikaayën tang mga tau yang kanëëman na.
Numaan da yang uras ang tinukud na ra yang kalibrian tang mga tau.
Purisu indi mi ëngëd kapa-kapaan yang kanëëman nang atiang ipinagpaita na tung numyub.
Nag̓ilista Ni Pablo Yang Mga Nagkarapanawan Nang Yay Pagpailala Tung Pagkaapustul Na (6:3-10)
3 Pati yuu,
kumus pagsasaanami ka man yang Dios tung pag̓urubraën ang naa tung mga taung nag̓apampakaw̓utanu,
durug kadakul yang pag̓amlig̓u tung sadiliu ang andang pisan ay mabuatu ang muya ya ray pagmalaganaan ta isip yang maskin tinu pang tauay.
Ya ray nag̓amlig̓anu ta mupia ug̓ud indi maduminar yang nag̓ipagpakaw̓utung naa.
4 Kung indi,
tung tanan ang mga ulag̓u nag̓ipagpailalaw ang yuu talagang sasang turuw̓ulun ka man yang Dios.
Ay maskin durug liwag yang magpasaranu,
maskin unu pag lëbat yang pinitinsiang mag̓agmaanu,
nag̓agwantaanu ka ëngëd tung maayën ang kinaisipan.
5 Pariu ra asan ang muya-muyaw rang pinagpaburdunan ang nunut da ka ta pagpakalabus.
Kung kaisan pinagtaraw̓anganaw pa ta mga taung pinag̓intraan tigbak.
Pati yang bëdlayung pagprusigir tung pag̓urubraënu,
pinagsintiu ra ka.
Ang kaisan pinasaranu yang papuyatung duru pati pasuw̓uk sigun tung pagprusigiru tung pagparakaw̓utunu.
6 Dispuis pag̓aëklanu yang katëngdananu tung mga pasais ang limpiu ig sag̓araw pa tung bitala yang Dios ig mauray yang isipu ang pirmiaung pagpaita yang kanëëmanung matinlu tung mga tau.
Pirmiaw kang pagpamangulu tung Espiritu Santo ig wai yang gëgmang nag̓ipaitaw tung mga taung anday ëkël nang danyu.
7 Anday dumang nag̓ipagpakaw̓utu,
kung indi,
sulaminti ilëm yang kamatuuran ang liit tung Dios ig bistu ra ka ang tanyay pagpaktël tung yëën ang pagparakaw̓utun.
Kung tung pagkasundalu pa,
yang maning pa tung mga kasangkapanu,
ya ra yang pagburuatënu yang magkatama tung pagtërëlëngën yang Dios.
Purisu simpanaw rang manalunga tung maskin unu pay mapanawanu,
maskin matinlu,
maskin malain man.
8 Ay kung kaisan maggalangënaw ka ta mupia yang mga tau,
piru kung kaisan,
magsawayanaw ka nira.
Kung kaisan magdayawënaw ka nira ta maayën,
piru kung kaisan mag̓insultuënaw ka nira.
Mag̓aningënaw pa ta duma ang yuu unu sasang mandarayang pagpatalang tung mga tau.
Piru yang nag̓akëgnganu sulaminti ilëm yang kamatuuran ang ipinagpabunayag yang Dios tung yatën.
9 Ag̓aningënaw ka ta duma ang yuu unu bëlag̓an bag̓ay ang sarapëtën,
piru may duma ang durug tinlu yang pag̓istimar nira tung yëën.
Pirming gësyëaw ilëm nag̓akbës tung kamatayën,
piru naa pala magbuw̓uiyënaw pa ka ëngëd yang Dios.
Maskin nag̓apatigbakanaw ta may mga katëngdanan,
piru indiaw pa ka ëngëd nag̓apaimatay nira.
10 Maskin mapungaw ka man yang magpasaranung kaisan,
piru indiaw ka ëngëd nag̓aplëkan ta kasadyaan ang nag̓ipaëyang ni Ginuu ta tung isipu.
Maskin maliliwag̓ënaw ka man piru ëkël tung pagparakaw̓utunu durung mga taung agpakinaw̓angën da yang Dios tung maning pa tung sasang manggad ang inding pisan mapasiring-siringan.
Matuud man ang anday mga kaayënanung masyadu taa tung kaliw̓utan ang naa,
piru yang tanan ang kaayënan ang kumpurming magnatis ang asta tung sampa,
yëën da kang tanan.
Nag̓aingaluk Na Tung Nira Ang Balësan Ka Nira Yang Gëgma Nang Bug̓us Tung Nira (6:11-13)
11 Ay yamung mga tag̓a Corintong nag̓amaalu ta mupia,
yang tanan ang nabtang tung isipu luw̓us dang ag̓ipaintindiu tung numyu natëtëngëd tung gëgmaw tung numyu talagang bug̓us tung isipu.
12 Bëlag̓an ang mag̓aning ang yuuy nagparusaw tung gëgmaw tung numyu,
kung indi,
yamuy nagparusaw yang gëgma mi tung yëën.
13 Kumus agkaw̓ig̓ënamu ra ka man yëën ang maning pa tung mga anaw,
ag̓aningënamu ra ilëm yëën ang katulad ka tung sasang amaën ang pagpadëmdëm tung mga ana na.
Ibug̓us mi ra w̓a yang gëgma mi tung yëën ang ya ray bag̓ay ang pisan ang iblës mi tung yëën ang bug̓us ka yang gëgmaw tung numyu.
Indi Ëngëd Mamagpakigsasa Tung Pag̓urubraën Yang Bëlag̓an Mga Tumatalig Ang Kuntra Tung Dios (6:14–7:1)
14 Mga kaputulan,
katulad tung baka ang indi puiding iugpu tung dumang ayëp tung sa nga singkawan ilëm,
ta numyu,
indiamu ra ka magpakigsasa tung pag̓urubraën yang bëlag̓an mga tumatalig ang kumpurming kuntra tung pagtërëlëngën yang Diosc.
Ayw̓a,
magkabag̓ay yang magkatama tung indi magkatama?
Ayw̓a,
yang masadlaw may yang makiklëp pagnunutan w̓asu?
15 Unu pa,
ti Jesu-Cristo may ti Satanas ang nag̓aguuyan ang kaisan tung ni Belial,
pagsasaan ta kësën w̓asu?
Ya pa ag̓aring magkatunuan yang sasang tumatalig may yang sasang bëlag̓an tumatalig?
16 Ayw̓a,
magkabag̓ay w̓asu ang yang pagtuuan yang mga masigkanasyunu tung Dios ang pinakalusu,
ya pay mapatiniran nira ta mga bultu ang para ya ray papagdënganën nirang tutuuan?
Nag̓asambitu tia ay natëtëngëd simanyan ta yatën ang mga tumatalig,
ita ray maning pa tung balay ang pag̓atiniran yang Dios ang ya ka man ilëm ay ultimung Dios ang makagag̓aëmd.
Talagang matuud tia ay kipurki padëmdëman mi ra ilëm yang sasang ibinitala yang Dios ang napabtang tung kasulatan ang mag̓aning,
“Magpakiugpuaw tung nirang magtinir.
Yuuy mag̓ing Dios ang tutuuan nira ig tanira kay mag̓ing mga tauanung pampadag̓ën-dag̓ënanu,”
ag̓aaninge.
17 Purisu magkabag̓ay kang ipagpadapatu ra tung numyu yang sasang itinuw̓ul ni Yawi tung mga tauan nang atiing tukaw pang maning taa:
“Magpablag̓amu ra tung pagturuuën yang mga kaarumanan mi tung mga ginuu-ginuu nirang bëlag̓an matuud ang Dios.
Pati yang kumpurming unu pay pag̓agamit nira tung pagturuuën nira,
likayan mi ra ka ang para asanamu ra nga risibiayung mga tauanu,”
mag̓aningf.
18 May sam bilug pa kang inaning na tung nira bilang sasang pagpaktël na tung mga isip nira ang mag̓aning,
“Yuuy mag̓ing Ama mi ig yamuy mag̓ing mga anaw tig lalii tig baw̓ay,”
ag̓aaning ti Yawing makagag̓aëm tung tanang.