2
Binilug̓u ra yang isipu ang indiaw ra kanay magdayun ang mangay asan tung numyu nusias may kapungawan sia.
2 Ay ya pa ag̓ari,
kung mangayaw ra asan,
ang pagkatapus pungawënaw si,
tinu pa kayay maglipay tung yëën?
Andang pisan!
Ay ya pa ag̓aring mapasadyaaw pa numyu atiang pungawënamu ra ka?
3 Purisu nagpaëkëlaw ra kanay ilëm ta sulatb tung numyu ay ug̓ud kung angayënamu si nganing yëën ang uman,
indiaw si pakapungawën yang mga tau mismu ang dapat da rin ang ikasadya yang isipu.
Ay may sarig̓u tung numyung tanan ang kung yuu sadyaanaw ra,
pati yamu sadyaanamu ra ka.
4 Kipurki iugtulu tung numyu,
atiing pagsulatu tung numyu yang sulat ang atii,
nakurianaw ra ta durung pag̓isip ang asta duru ra atiing pagtarangitënu kung unu ra ilëm ay apiktar na tung numyu.
Sinulatanamu ra nganing yëën ta maning tiing matigbak-tigbak,
bëlag̓an ang mag̓aning ang para pakapungawënamu ra yëën,
kung indi,
ug̓ud asan da nga maladmaray mi yang gëgmaw tung numyu kung ya pa ag̓arig kalutuk.
Yang Nag̓ikunsiu Na Tung Nira Natëtëngëd Tung Sasang Aruman Nirang Nagbuat Ta Makapupungaw Tung Anya (2:5-11)
5 Kung tinu pay nagpakdul ta kapungawan asan,
bëlag̓an ilëm yuu yang pinakdulan nac,
kung indi,
midyu mas pang yamung tanan asan.
Ya ra ag̓aningayung midyu ay indiaw ilëm malëlyag ang mas pang dulanganu yang kalëlëbatën yang binuatan nang atii.
6 Ustu ra tiang disiplinang atiang nag̓ipagpadapat mi tung anya kipurki may pinakaw̓ut na ra yang katuyuan yang pinag̓irig̓uan ming intirung sam pundaan.
7 Kaministiran patawarën mi rang paktëlën yang isip na ay nusias dërëëg̓ën da yang kapupungawën nang subra ang muya asan da ilëm tëmëgka.
8 Purisu yang nag̓aingaluku w̓a tung numyung sam pundaan,
ipaita mi ëngëd tung anya ang talagang nag̓amaal mi pa ka ëngëd.
9 Kipurki ya ra ka man atiing ipinagsulatu tung numyu tan taa ra ang padapatan mi ta disiplina yang aruman tang atia ug̓ud asanamu ra nga sukdaayu kung yamu talagang riparasiun ang pirmi ang magtuman yang kumpurming nag̓ituw̓ulu tung numyu.
10 Dispuis kung tinu pay disisiunan ming patawarën asan,
yuu ya ka.
Ay kipurki para tung yëën,
kung unu pang kasalananay ang ipinatawaru tung sasang tau,
kung alimbawa may dapat ang ipinatawaru tung anya,
pinatawaru tia para tung ikaayën ming sam pundaan kag yadwa pa nag̓askëanu ra kang lag̓i ang yay nag̓auyunan ni Jesu-Cristo.
11 Ay yang pag̓asikad ta asan ang indiita ra maidyaan ni Satanas ay kabisadu ta ra kung unu pay mga taktika nang magrangga tung pagsarasaan ta.
Natëtëngëd Tung Paglingtan Yang Isip Nang Indi Pa Ag̓akaw̓ut Ti Tito (2:12-13)
12 Numanyan atiing pagkaw̓utu duun tung Troas ang para magparakaw̓utunaw ra yang Matinlung Balita natëtëngëd tung ni Jesu-Cristo tung mga tau duun,
pinakdulanaw anya ta lugarung matinlu ang para maubraw tii.
13 Piru maskin pang maning da tii,
bëlag̓an pa ka ëngëd malimëng yang pag̓irisipënu sigun indiami ra nagbag̓as ni Tito ang sasang putulung tinuw̓ulung mangay asan tung numyud.
Purisu anday dumang binuatu,
pinamaananu ra ilëm yang mga tag̓a duun ang nagpatabukaw ra tani tung Macedonia.
Nag̓akayanan Na Yang Pag̓ërëkëlën Na Tung Katëngdanan Na Natëtëngëd Ilëm Tung Pagpaktël Ni Jesu-Cristo Tung Anya (2:14-17)
14 Abaw piru,
maskin maning da tii yang palaksu yang pag̓irisipënu,
durung pisan agkadakul yang pagpasalamatu tung Dios natëtëngëd tung pag̓ërëkëlën na tung yamën.
Ay kumus pinapandëëg na ti Jesu-Cristo tung tanan ang namagkuntra tung anya,
asanami kang pirmi nag̓ipagapil nae.
Nag̓agamitami ka anyang pagpaintindi tung mga tau natëtëngëd tung ni Jesu-Cristo ang yay maning pa tung sasang paamut ang pag̓ulimpëg da yang banglu na tung maskin ay pa ilëm.
15 Ay tung pagparakaw̓utun yamën tung mga tau yang Matinlung Balitang naa natëtëngëd tung ni Jesu-Cristo,
yang kaalimbawaan yamën maning pa tung sasang paamut ang nag̓ipataw̓uk ni Jesu-Cristo tung katalungaan yang Dios.
Ig yang amut na maning pa tung nag̓auw̓u ra ka yang mga taung nag̓atapnay ra ni Jesu-Cristo pati yang mga taung pagpablag da tung Dios ang duun dag panalunga tung kadiaduan ang asta tung sampa.
16 Para tung mga taung duun dag panalunga tung kadiaduan,
yang pag̓intindi nira tung nag̓ipagpakaw̓ut yamën ang naa,
maning pa tung sasang durug buyung pag̓ëkël ta kamatayën.
Piru tung mga taung nag̓atapnay ra ni Jesu-Cristo,
maning pa tung sasang durung pisan agkabanglu ang pag̓ëkël ta pagsarapënan nira yang Dios ang asta tung sampa.
Kung tung sadiling puirsa na ilëm,
tinu pa kaya ay masarang ang mag̓ëkël tung katëngdanan ang naang maning tiang durung pisan agkaimpurtanti yang apiktar na tung mga tau?
17 Bëlag̓anami pariu tung dakëlëng mga manigparakaw̓utun ang yang bitala yang Dios ang nag̓ipagpakaw̓ut nira nag̓alaktan da nira ta bëlag̓an tamang nag̓itulduk ang para panginguartaan da ilëm nira yang mga taung nag̓apampakaw̓utan nira.
Kung indi,
tung pagparakaw̓utun yamën,
andang pisan ay pag̓asikad yamën para tung mga sadili yamën,
maskin unu pang bag̓ayay.
Kung indi,
yang pirming agdëmdëmën yamën ang yami ka ilëm agtuw̓ulay yang Dios ang ya kay panginsapu tung yamën ang pagparakaw̓utun ig taa ka tung yamën ti Jesu-Cristong pagpakigsasa.