Taniray Maning Pa Tung Sulat Ang Pagpailala Tung Pagkaapustul Na Natëtëngëd Tung Linuaan Yang Pagparakaw̓utun Na Tung Nira (3:1-3)
3
Muya may mag̓aning si ang yang sinambitung atia sasang pagpaambug̓u ra ilëm tung sadiliu.
Piru bëlag.
Yuu bëlag pariu tung dumang mga manigtulduk ang kaministiran may mga sulat bilang kabakëran ang mapaita nira tung numyu ug̓ud risibiën mi ubin magpasulat tung numyu ta mapaita nira tung duma.
2 Ta yëën,
yang sirbing kabakëranung pagpailala tung pagkaapustulu yamu ra ka mismu ang ya ray iginurit tung pupusukun mi ang puiding basaën ang intindiën ta tanan ang mga tau.
3 Bistu ra ang yamu maning pa tung sasang sulat ang isinulat ni Jesu-Cristo mismu ëkël tung pagparakaw̓utunu tung numyu.
Yang ginamit nang nagsulat bëlag̓an tinta,
kung indi,
ya ra yang Espiritu Santong durug builu yang pag̓urubraën na tung mga isip mi.
Ig bëlag̓an kang mga batung pinasag̓i ang pinagsulatan na ang katulad ka tung binuat na atiing tukaw tung timpu pa ni Moises,
kung indi,
ya ra yang mga pupusukun mi mismu.
Tanya Nag̓apaëyangan Yang Dios Ta Ikaya Nang Magparakaw̓utun Sigun Tung Baklung Ipinagpakigpaig̓u Na Tung Mga Tau (3:4-6)
4 Nag̓apagbitalaw ta maning tia,
ay dakulu yang kumpiansaw tung Dios ang maning da ka man tia yang inubra na tung numyu ëkël tung pagpakigsasa ni Jesu-Cristo tung yëën ang nagparakaw̓utun tung numyu.
5 Ug̓aring bëlag̓an ang mag̓aning ang yang pagpabëtangu tung sadiliu ang yang katëngdananung naa kayananu tung sadiling këtëlu,
kung indi,
nag̓asaranganu ka ilëm natëtëngëd tung pagpaktël yang Dios tung yëën.
Kipurki anday panalig̓anu tung sadiliu ang para magpabëtangaw ka rin ang kayananu ka yang ubrang naa,
kung indi,
nag̓asaranganu ka man nganing tia natëtëngëd ilëm tung taw̓ang yang Dios tung yëën.
6 Ay kipurki tanyay nagpaëyang tung yëën ta ikayaw ang manirbian tung anya ang magparakaw̓utun tung mga tau natëtëngëd tung baklung ipinagpakigpaig̓u na tung nira.
Yang palaksu yang baklung ipinagpakigpaig̓u nang naa,
bëlag̓an pariu tung dating ipinagpakigpaig̓u na tung nasyun yamën ang Israel ang may mga katuw̓ulan ang dapat tumanën yamën,
kung indi,
asan ag̓ipapanaway na tung pag̓irimakluën yang Espiritu Santo tung kinaisipan tang mga tau.
Kipurki kung yang panalig̓an yang sasang tau ya ra yang pagturumanën na yang mga katuw̓ulan ang atia,
magdayun da ka ëngëd yang pagpablag na tung Dios ëkël tung paglalampasën na.
Piru tung pag̓imaklu yang Espiritu Santo tung kinaisipan na,
asan da ngaëyangay ta ipagpangabui nang baklu.
Mas Pang May Pagkamatinlu Na Yang Baklung Ipinagpakigpaig̓u Yang Dios Kay Tung Dating Ipinagpakigpaig̓u Na (3:7-11)
7-8 Atiing pagtukud yang Dios tung dating pakigpaig̓u na tung nasyun ang Israel ang may mga katuw̓ulan nang iginurit na tung mga batung pinasag̓i,
bistu ra yang kasusulawën nang nagpailala tung kagaëman na.
Maskin amat-amat da ka man ang nag̓aludas tung ityura ni Moises yang kasusulawën ang atii,
yang mga masigkanasyun ni Moises indi ra nangagwantang nangatëlëng ta madëkdëk,
yang kasusulawën nang puirtia.
Ig disir kung may kanunut na nganing ang kasusulawën atiing pagpundar yang Dios tung dating pakigpaig̓u na ang asan da ka man nga pablag yang mga tau tung anya,
simanyan mas pang may apiktar nang maktël yang kagaëman nang nag̓ipanunut na tung pag̓irimakluën yang Espiritu Santo tung kinaisipan yang mga tau.
9 Kipurki kung nagpaita yang kasusulawën na atiing pagtukud na yang dating pakigpaig̓u nang atii ang yang pakaw̓utun na tung yatën ang mga tau asanita ra nga sintinsiaay na tung kalainan,
ig disir simanyan kapin pang pagpailala yang kagaëman na tung ipinagpakigpaig̓u nang naang baklu ang asanita ra ngausgaray nang saluita rang pisan tung pagtërëlëngën na.
10 Kidispuis pa,
maskin may pagkamatinlu na ka man ang matimbang atiing dati,
piru puiding aningën ta ang naplëkan da ta pagkamatinlu na natëtëngëd tung baklu ang yay mas landaw ta pagkamatinlu na.
11 Kipurki kung may pagkamatinlu na nganing yang dating atii ang indi nagnatis,
kapin pang may mas pang pagkamatinlu na yang baklu ang yay magnatis ang asta tung sampa.
Nag̓asambit Na Yang Maning Pa Tung Pagtaklëb Tung Isip Yang Mga Tau Kung Ya Pa Ag̓aring Makuat Ang Para Mabilug̓an Da Nira Yang Kantidad Yang Kadëngëg̓an Ni Ginuu Ta (3:12-18)
12 Kapurisu kumus dakulu yang sarig̓u ang mas maktël yang builu yang pakigpaig̓u nang naang baklu kay tung dati,
anda ëngëd ang pisan ay pandalëndënanung ipagpakaw̓utu tung mga tau kung unu pay palaksu na.
13 Yang pasaisung pagparakaw̓utun bëlag̓an pariu tung ni Moises atiing tukaw ang yang ityura nang dinëëtan yang kasusulawën yang Dios,
ya rag dapënay na ta ringging aw̓ël ug̓ud indi ra matëlëngan ta madëkdëk yang mga masigka Israel na yang kasusulawën nang atiang amat-amat dang pagpurawas.
14 Piru maskin tama yang pag̓asikad ni Moises ang nagdapën tung ityura na,
anda ray pinakaw̓ut nang maayënb.
Ay ya pa ag̓ari,
namagpatëg̓as da ka ëngëd ang asta indi ra namag̓usuy tung ipinagpakigpaig̓u yang Dios ang atii tung nira.
Midyu magkaanggid-anggid da tung mga kanubli nira simanyan,
ay kipurki kada basaën tung nira yang isinulat ni Moises natëtëngëd tung dating ipinagpakigpaig̓ung atii,
maning pa tung may dapën kang nag̓ataklëb tung mga isip nira ang katulad ka tung ipinagdapën ni Moises tung ityura na.
Indi pa ka ëngëd nag̓akuat.
Kipurki baklu ra makuat tia,
kung italig da nira yang mga sadili nira tung ni Jesu-Cristo.
15 Talagang indi pa ka ëngëd nag̓akuat tia ay natëtëngëd ang asta ra ilëm simanyan,
kada basaën tung nira yang mga katuw̓ulan ang isinulat ni Moises,
yang pag̓intindiën nira asan,
kung matumanan nira yang mga katuw̓ulan ang atia,
asan da tanira nga risibiay yang Dios buat.
Yay maning pa tung sasang pagtaklëb tung mga isip nira ang indi ka ëngëd maintindian nira ang yang dating ipinagpakigpaig̓u ang atii,
durung pagkakulang na.
16 Piru kung tinu pay manalunga tung ni Ginuung Jesus ang para italig na ra tung anya yang sadili na,
asan da ka nga kuat yang maning pa tung dapën ang nagtaklëb pa rin tung isip nac.
17 Dispuis kung tinu pay manalunga tung ni Ginuung Jesus,
asan da ngaipalg̓uray na tung baklung ipinagpakigpaig̓u yang Dios ang yay nag̓amanguluan yang Espiritu Santo.
Ig kung tinu pay nag̓amanguluan yang Espiritu Santo,
luas da tung pinagpakëmkëman nang dati.
18 Purisu ta yatën ang kumpurming kinuatan yang Dios yang maning pa tung nagtaklëb da rin tung mga kinaisipan ta,
nag̓apabilug̓an ta ra kung unu pag katinlu yang kadëngëg̓an ni Ginuung Jesus.
Mintras yay nag̓apabilug̓an ta,
asan da ag̓imakluay yang Espiritu Santo yang mga isip tang ag̓imakluay ang asta mag̓atuita rang mag̓atu tung ni Ginuu ta ug̓ud kung paniiranita yang mga aruman ta,
maita ra nira kung ya pa ag̓arig katinlu yang ug̓ali na ang ita panulad tung sasang ispiu ang tëtëlëngan nira.
Anday dumang may ubra tung yatën ang maning tia,
ya ra ti Ginuu ta mismu ang asan da ag̓ipapanaway na tung Espiritu Santong nag̓ipatinir na tung yatën.