Yang Nag̓ipailala Na Ëngëd Tung Mga Tau Ya Ra Ti Jesu-Cristo Mismu Ang Para Mabilug̓an Nira Tung Anya Yang Ultimung Pagkadios Yang Dios (4:1-6)
4
Kapurisu kumus maning ka man tia yang kantidad yang pagkaapustulung naang ipinagpiar yang Dios tung yëëna natëtëngëd ilëm tung kanëëman nang durug dakul tung yëën,
indiaw ra ka ëngëd pagpaluw̓ay.
2 Kung natëtëngëd tung pasaisung pagparakaw̓utun,
binilug̓u ra kang lag̓i yang isipu ang indiaw mag̓usuy tung ug̓ali ta duma ang yang pag̓asikad nira ya ag̓italukay nira natëtëngëd makakaëyak ang maskëan da ta tau.
Bilang yang pagparakaw̓utunu indi pag̓aëklanu tung pasëën ig indi ka magbaliskarënu yang bitala yang Dios.
Kung indi,
kumpurming unu pay kamtangan yang kamatuuran,
ya kay nag̓ipagpakaw̓utung anday talukan,
ug̓ud basi pa ra ilëm ang asan da nga maladmaray yang mga tau ang yuu sasang matalig̓an nirang pagbitala ang may turuw̓alënu ka man tung Dios kung mali yang nag̓ipagpakaw̓utu tung nira.
3 Dispuis maskin nag̓ataklëw̓an yang kamtangan yang Matinlung Balitang naang nag̓ipagpakaw̓utu,
nag̓ataklëw̓an ilëm tung mga taung pagpablag da tung Dios ang yang panampëtan nira kadiaduan dang asta tung sampa.
4 Ay ya pa ag̓ari,
ti Satanas ang ya ka man ay pagtag̓am ta tiwakaw tung pagkadios yang Dios simanyan taa tung kaliw̓utan ang naa,
yay nagpakiklëp tung mga kinaisipan yang mga taung atiang indi mangalëlyag ang mamanangëd.
Ya ray binuat na ug̓ud indi ra maklëran yang nag̓ibalita tung nira natëtëngëd tung kadëngëg̓an ni Jesu-Cristo ang asan da ka man din tung anya nga bilug̓ay nira yang ultimung pagkadios yang Dios.
5 Ay bëlag̓an yang sadiliu ay nag̓ipailalaw tung mga tau,
kung indi,
ultimu ilëm ti Jesu-Cristo ang ya ra ka man ay dapat ang tingaraën nirang ultimung Ginuu nira ang tanya ilëm ay dapat ang panangërën nira.
Kung natëtëngëd tung sadiliu,
anday dumang nag̓ipagpailalaw,
kung indi,
yuu maning pa tung sasa ka ilëm ang turuw̓ulun na ang pag̓asikasu tung maning tung numyu arangan da ilëm tung ni Jesu-Cristo.
6 Tanya ilëm ay nag̓apabilug̓anung nag̓ipagpakaw̓ut ay natëtëngëd yang Dios ang nagkalalangan atiing primiru ang yang kaliw̓utan ang makiklëp pa rin ay manadlaw rab,
ya ra ka man mismu yang nagpasanag tung kinaisipanung makiklëp pa ka rin ang para asan da nga bilug̓ayu yang kasusulawën na mismu tung ityura ni Jesu-Cristong nagpaita tung yëënc.
Maskin Durung Kaliwag̓an Ang Nag̓apasaran Na, Pagpadayun Ka Ëngëd Tung Pagparakaw̓utun Na (4:7-15)
7 Yang kaalimbawaan yang balitang atiang ipinagpiar tung yëën ang para ipagpakaw̓utu tung mga tau,
maning pa tung sasang manggad ang durug kamaal ang pagkatapus yuung piniaran malpës da ka ilëm ang madiadu yang pagkabëtangu ang katulad ka tung sasang urun.
Nagkamaningan da ta maning tia ay ug̓ud asan da ngaintindiay ang yang puirsa yang nag̓ipagpakaw̓utung naang durug kabuilu,
bëlag̓an yuuy pinangapunglan na,
kung indi,
ultimu ra ilëm yang Dios.
8 Ay tung pagparakaw̓utunu,
maskin ariaw pa ngangay,
nag̓apaliwag̓anaw yang mga tau ta duru,
piru indiaw ka nag̓apiëtan ang pisan.
Ang kaisan nag̓aliwag̓anaw ta mupia ta pag̓isip kung unu pa kaya ay maayën ang buatënu,
piru indiaw ka ëngëd magluw̓ayën ang pisan.
9 Nag̓adëëg-dëëg̓anaw ta mga tau,
piru indiaw ka ëngëd nag̓apaw̓ayaan yang Dios.
Ang kaisan nag̓atigbakaw ta mupia piru indiaw ka mag̓imatayën.
10 Tung mga kaliwag̓an ang atiang magpasaranu,
pirmi ilëm ang yag talungayu ang yuu puiding imatayën da ilëm ang katulad ka tung binuat tung ni Jesus.
Maning tia yang nag̓apanawanu ug̓ud asan da ngaintindiay yang mga tau ang tanya talagang bui ka man ang matuud ëkël tung pagpakigsasa na tung yëën ang pagpalibri tung mga kaliwag̓an ang atia.
11 Talagang matuud tia ay kipurki mintras buiaw pa,
pirmiaung panalaytay tung buang pukis ang muya yuu ra ilëm ag̓imatayay arangan da ilëm tung panirbianung naa tung ni Ginuung Jesus.
Maning tia yang nag̓apasaranu ug̓ud asan da nga bistuay ang tanya talagang bui ka man ang matuud ëkël tung pagtaraw̓angën na tung yëën ang sasang tau ka ilëm ka man ang suitu kang lag̓i ilëm ta kamatayën.
12 Ig disir yang ilyag nang ianing,
yang pagparakaw̓utunung naa natëtëngëd tung ni Jesu-Cristo,
puiding yay magakdanu ang yuu imatayën da.
Piru yang luluaan na tung maning tung numyung nag̓apampakaw̓utanu,
asan da nga paëyangay yang Dios ta ipagpangabui nirang baklu ang anday pagtapusan na.
13 Dispuis kumus may pagtalig̓u tung Dios ang yay magdipindir tung yëën,
nag̓apagpadayunaw tung pagparakaw̓utunu yang Matinlung Balitang naa,
maskin unu pay nag̓apasaranu.
Yang pagtaralig̓ënung naa tung anya,
magkapariu ka tung pagtaralig̓ën yang sasang tau nuntukaw ang yang inaning na tung Dios napabtang tung kasulatan ang mag̓aning,
“Kumus tinalig̓ana ra yëën,
napagbitalaw ra ka ëngëd,”
mag̓aningd.
14 Ay nag̓askëanu ra ka ang yang Dios ang nagpabungkaras tung ni Ginuung Jesus ya kay magpabungkaras tung yëën ëkël tung pagsinasaay yamën ni Ginuung Jesus ang pagkatapus kasiraanita ra kang ëklan na ang para mapagpakigsapënita ra tung anyang asta tung sampa.
15 Ag̓aningaw kasiraanita ra ka ay yang tanan ang atiang mga kaliwag̓an ang nag̓apasaranu nganing ay arangan da ka man ilëm tung maning tung numyung nag̓apampakaw̓utanu.
Yang pag̓asikaru ëngëd asan,
mintras ya rag durulang agdurulang yang kinadakël yang mga taung nag̓apalg̓ud tung kanëëman yang Dios ang asan da ka tanira nga tapnayay na,
ya ra kag durulang agdurulang yang pagparasalamatën nira tung anya natëtëngëd ka man tung kanëëman nang atiang anday natëngëran na tung nira ang asan da ka tanya nga padëngëg̓ay nira.
Maskin Amat-amat Dang Panluw̓ay Yang Tinanguni Na, Piru Yang Kinaisipan Na Ya Ray Nag̓imakluën Yang Dios Tung Kaldaw-kaldaw (4:16-18)
16 Purisu ya ray nag̓atëngëran na ang indiaw ka ëngëd pagpaluw̓ay tung pag̓ërëkëlënu yang katëngdananung naae.
Maskin amat-amat da ka man ang magluluw̓ay ra yang tinanguniung naa,
piru yang kinaisipanu ya ray nag̓imakluën yang Dios tung kaldaw-kaldaw.
17 Yang indi ra ëngëd ipagpaluw̓ayu ay nag̓akdëkanu ra ang yang mga kaliwag̓an ang naang nag̓apasaranu simanyan indi ra ilëm buay magtataklib da ka ilëm ig kung ikumpalar pa tung kantidad ang malg̓uran ta tung uri,
inding pisan tumimbang.
Ay yang kabaliskad na tung uri ya ra yang pagkadamay ta tung kasusulawën mismu yang Dios ang yang kantidad na durung pisan agkatimbang ang anda ëngëd ang pisan ay katapus-tapusan na.
18 Mintras anda pa,
yang nag̓apabilug̓an ta mga isip ta,
bëlag̓an yang mga bag̓ay taa tung kaliw̓utan ang naang nag̓abtangan ta mga mata ta,
kung indi,
ya ra yang nag̓apakbat tang indi ta pa nag̓aita.
Ay kipurki yang mga bag̓ay ang nag̓aita ta magtataklib da ka ilëm.
Piru yang indi ta pa nag̓aita,
ya pa ka ëngëd ay magnatis ang asta tung sampang anda ëngëd ang pisan ay katapus-tapusan na.