Yang Mga Tag̓a Galacia Bëlag̓an Da Suitu Yang Napuawan Nira, Kung Indi, Binuat Da Yang Dios Ang Mga Ana Na Rang Pakinaw̓angën Na Tung Pinangakuan Na (4:1-7)
4
Numaan yang bag̓ay ang atia,
ipananglitu ra kanay tung panunubliën yang mga mamula tung ginikanan nira.
Yang sasang mulang manubli tung kamanggaran yang tatay na,
maskin subliën nang luw̓us tung uri,
piru mintras may pagkaminuridad na pa,
pariu ka ilëm yang pagkabëtang na tung sasang kirëpën ang anda kang lag̓i ay pudir na.
2 Mintras mula pa,
suitu pa tanya yang mga taung piniaran ni tatay nang mag̓asikasu tung anya kag mag̓ërëkëlën tung ganadus ang subliën na tung uri.
Maning ka ilëm tia yang pagkabëtang nang asta kaw̓utun da yang uras ang ipinagtipu ni tatay na ang tanya kumaw̓ut da tung mayuridad naa.
3 Maning ka tia tung yamën ang mga Judio,
yami maning pa tung sasang mula ang may minuridad pa.
Ubligaduaming magtuman yang mga katuw̓ulan ang ibinutwan ni Moises tung nasyun yamën ang yang arangkada na,
taa ilëm tëgka tung kaliw̓utan.
Bilang yami maning pa tung mga kirëpën ilëm.
4 Maayën ilëm,
pagkaw̓ut yang uras ang ipinagtipu ra kang lag̓i yang Dios,
tinuw̓ul na yang pag̓aningën nang Ana Nang mangay taa tung kaliw̓utan ang naa.
Nag̓ingtaung bilug ang katulad ka tung yatën gatëd ya kay ipanganaay ta sasang baw̓ay.
Yadwa pa,
sigun tung planu yang Dios tung anya,
tanya ultimung kinasakpan yang nasyun yamën ang Israel ig suitu ka yang mga katuw̓ulan ang ibinutwan ni Moises tung yamën.
5 Yang katuyuan yang Dios ang nagtuw̓ul tung anya ay ug̓ud yaming mga Judiong suitu pa yang mga katuw̓ulan ang atia,
mapalibriami ra anya ëkël tung pagpakugmatay na ug̓ud asanami ra nga pakdulay na ta pagkabëtang tang mga anaita ra yang Dios.
6 Kumus yamu,
binuatamu ra ka man yang Dios ang mga ana na,
gustu nang masimanan mi.
Purisu pinatiniranamu ra anya tung Espiritu Santong pagsinasaay kang lag̓i tanira yang pag̓aningën ang Ana Yang Dios.
Ya ray pagpaëyang tung mga isip mi ang magkabag̓ay ra ang yang Dios ya ra ag̓aningay mi sasa may sasa ang “Amaw”.
7 Anday dumang lagpakan na,
kung indi,
sasa may sasa tung numyu,
yang pagkabëtang mi nag̓uman da.
Bëlag̓anamu ra pariu tung mga kirëpën,
kung indi,
mga anaamu ra yang Dios.
Dispuis kumus mga anaamu ra ka man anya,
tung pusisiunamu rang magrisibi yang tanan ang kaayënan ang pinangakuan na tung mga ana na.
Nag̓apaprusigir Na Tanirang Indi Ra Mamag̓intindi Tung Mga Katuw̓ulan Ang Pagpasuituan Yang Mga Judio (4:8-12a)
8 Atiing anda pay kaampiran mi tung Dios,
yang kaalimbawaan mi mga kirëpënamu pa yang mga ginuu-ginuung atiang bëlag̓an matuud ang Dios.
9 Piru simanyan may kaampiran mi ra tung matuud ang Dios ubin mas matinlung aningënu ang yang Dios ya ray tukaw ang nagpakirampil tung numyu bakluamu pa napagpakirampil tung anya.
Pagkatapus numanyan nag̓abërëngaw ta duru tung numyu kung ayw̓at pag̓intindiamu ra tung sasang sistimang magkapariu ka ilëm tung dating napuawan mi.
Ayw̓a kaya nag̓alëlyag̓amung magpakëmkëm si tung andang pisan ay mataw̓ang na?
10 Maning da tiang nag̓apapaktëlan mi ra yang mga maal ang kaldaw ang nag̓ipagsilibra ta mga Judio ang katulad ka tung kaldaw ang nag̓ipamaënay nira may tung pistang nag̓ipagsilibra nira ang kada lumati yang bulan ubin yang mga nag̓ipagsilibra nira tung takun-takun.
11 Abaw pagkëba-këba ra ta mupia yang dëdlaanu natëtëngëd tung numyu.
Muya madiadu ra ka ilëm yang pinakabëdlayanung nagpaintindi tung numyu.
12 Mga putulu,
yang nag̓ipagpaprusigiru tung numyu,
magpakbungamu ra tung yëën ang namlëk da tung sistimang atia.
Tutal ta yëën,
atiing asanaw pa tung numyu,
nagpakbungaw ra ka tung numyung tag̓a duma-rumang nasyun ang indiamu kang lag̓i pag̓usuy tung mga katuw̓ulan ang ibinutwan ni Moises tung nasyun yamën.
Nag̓ikumpalar Na Yang Pagsarapëtën Nira Tung Anya Atiing Primiru May Yang Pagpabëtang Nira Tung Anya Numaan (4:12b-20)
Tan taang atiing asanaw pa,
durung pisan agkatinlu yang pag̓istimar mi tung yëën.
13 Siguru nag̓adëmdëman mi ka ang atiing primirung pagkaw̓utu asan tung numyu paglaruaw.
Kung bëlag tung laruung atii,
indiaw ra ka rin natadëng asan tung numyung asta nagdasig-dasig da yang tinanguniu.
Anda ra ka rin ay lugarung magparakaw̓utun tung numyu yang Matinlung Balita.
14 Maskin sinayuranamu ra ka man ang nagtëlëng tung pagkabëtangung atii,
indiaw ra ka ëngëd pinamidbiran ming linikayan,
kung indi,
sinapëtaw ra numyu ta maayën ang midyuaw pa tung sasang angil ang tinuw̓ul yang Dios ubin maning pa tung ni Jesu-Cristo mismu.
15 Ayw̓a,
nalipatan mi ra yang kasadyaan mi atiing primiru ang nanangëramu ra tung Matinlung Balita ang asanamu ra ka nga pakaayënay ta mupia yang Dios?
Maskin nganing yuu mapagpaingmatuud ang kung puidi ilëm din,
pati mga mata mi,
linuat mi ra rin ang itindul tung yëën,
yang pagmamaalën ming atii tung yëën.
16 Ayw̓a,
numaan basu ag̓ipabtangaw ra ilëm numyung sasang kasuay mi natëtëngëd pagpadayunaw pang pagpadapat tung numyu yang kamatuuran?
17 Yang mga taung atiang pamagtulduk ta makatatalang asan tung numyu,
durung pagparaiwan-iwanën nira tung numyu ang para ya ray mauyunan mi tung nira.
Piru yang pag̓asikad nira bëlag̓an matinlu.
Ay yang gustu nira,
marangga ra yang pagnurunutan tang magpurutul ang para tanira ray ipalusu mi ta gëgma mi.
18 Kung tung bag̓ay,
maayën kang may magpaiwan-iwan tung numyu maskin asanaw ka kag anda,
basta anday dumang pag̓asikad na,
kung indi,
ultimu ilëm yang ikaayën mi.
19 Yamung agkaw̓ig̓ënung mga anaw,
yang kaalimbawaanu yuu maning pa tung nanay ming mangana sing uman tung numyu ang duru rag siit yang pagparanganaënu.
Ay kipurki nag̓apagkurianaw ra ta durung pagdëmdëm tung numyu kung sanu ra kaya këmëët yang pagtaralig̓ën mi tung ni Jesu-Cristo ang asta maita ra ka ëngëd tung mga pagpangabui mi.
20 Talagang durug kagulu yang isipu natëtëngëd tung numyu.
Kisira ra rin asanaw ra tung numyu,
mapaiwan-iwananu ra rin ta maayën yang mga pamitalaw.
Yang Kaalimbawaan Nira Maning Pa Tung Mga Mamulang May Gustu Nirang Mamagpakli Tung Ni Nanay Nira (4:21-31)
21 Midyu may duma asan tung numyung nag̓alëlyag dang magpasuitu tung mga urdinansang pinanubli yang nasyun yamën ang Israel tung ni Moises ug̓ud asan da tanira nga risibiay yang Dios buat.
Yang gustuung ianing tung nira,
maayën pang pasadsaran da kanay nira ta mupia yang ipinasulat yang Dios tung ni Moises.
22 Napabtang ka duun ang ti Abraham duruay ana nang lalii.
Yang sam bilug ipinangana yang kirëpën yang kasawa na.
Yang sam bilug ipinangana yang kasawa na mismu ang tanya bëlag̓an kirëpën yang pagkabëtang na.
23 Dispuis yang sam bilug ang ipinangana yang kirëpën yay naana ni Abraham tung pastikular ka ilëm ang papanaw.
Piru yang sam bilug ang ipinangana yang bëlag̓an kirëpën yay naana na natëtëngëd ilëm tung pagkërëng yang Dios tung pinangakuan na tung nirang magkasawa.
24 Taa simanyan yang kapanawan yang nainabung atii gustuung buatënung sasang pananglit.
Yang mga baw̓ay ang atiang durua maning pa tung yay kamtangan yang durua kang patakaran ang ipinagpakigpaig̓u yang Dios.
Yang sam bilug ipinagpakigpaig̓u na tung nasyun ang Israel duun tung bukid ang pag̓aningën ang Sinai.
Yang kaalimbawaan yang ipinagpakigpaig̓u nang atii maning pa tung sasang kirëpën ang baw̓ay ig yang kaalimbawaan yang mga taung pamagpasuitu tung ipinagpakigpaig̓u nang atii yay maning pa tung mga ana yang kirëpën ang baw̓ay ang pati tanira pulus ka ilëm mga kirëpën ëkël tung inaën.
Purisu magkabag̓ay kang ipananglitu tung ni Hagar ang yay sasang kirëpën atiing tukaw.
25 Maski yang aran na,
nanggid tung bukid ang atiang Sinai duun tung banwang Arabia.
Dispuis pa yang kirëpën ang atiang ti Hagar magkabag̓ay kang ipananglitu ka tung siudad ang Jerusalem ang yay pinakasintru yang rilyun ang nag̓ausuy yang kadaklan ang mga Israel numanyan.
Ay kipurki yang kaalimbawaan yang siudad ang atia maning pa tung sasang kirëpën ang inaën ig yang kaalimbawaan yang pamag̓usuy tung rilyun ang atia yay maning pa tung mga ana nang pulus ka kirëpën gatëd ubligadu tanirang mamag̓usuy tung mga riglamintu na.
26 Piru may sam bilug ang Jerusalem duun tung kaabwat-abwatan ang yang kaalimbawaan na maning pa tung sasang inaën ka ang bëlag̓an kirëpën yang pagkabëtang na.
Yang Jerusalem ang atii yay maning pa tung nanay tang mga tumatalig.
Dispuis yang kaatu na ya ra ti Sara ang bëlag̓an kirëpën.
27 Talagang magkatamang mag̓inatuay tanira ay kipurki may sasang napabtang tung kasulatan natëtëngëd tung siudad ang Jerusalem atiing tukaw ang maning taa yang palaksu na:
“Yawang maning pa tung nakapasan da ta mga ana mu ig india ra ka pangana,
magpakasadyaa ra.
Yawang indi pa pagbalunbun ta masiit ang mangana,
india mag̓ëgtëm,
kung indi,
maggaluaka ra.
Ay kipurki maskin binutwanana ra kanay ka man yang kasawa mu,
piru dakëlë ra ka ëngëd yang ipangana mu.
Mas dakëlë nganing kay tung primiru ang atiing indi pa naliit yang kasawa mu,”
mag̓aningb.
28 Dispuis,
mga kaputulan,
yamu ray ipinabtang yang Dios ang mga kanubling pinangakuan na tung ni Abraham ëkël tung pagsarasaan mi ni Jesu-Cristo natëtëngëd tanya sasang kanubli ni Isaac ig ti Isaac tanya yay ana ang pinangakuan yang Dios tung ni Abrahamc.
29 Dispuis pa kung balikan ta yang kapanawan yang nagkainabu tung mga ana ni Abraham ang atiing durua,
yang sam bilug ang inana na tung pastikular ka ilëm ang papanaw dinëëg-dëëg̓an na yang sam bilug ang inana na ëkël tung kagaëman yang Espiritu Santo.
Maning ka tia yang nag̓ainabu numanyan.
Ay itang pagtalig tung sasang kanubli ni Abraham ang ti Jesu-Cristo nag̓adëëg-dëëg̓anita ka yang duma ang yang nag̓apapaktëlan nira ya ra yang ipinagpakigpaig̓ung atiing sam bilug sigun tung mga katuw̓ulan.
30 Piru unu pay napabtang tung kasulatan,
kung indi,
pinauyunan da yang Dios yang pinag̓aning ni Sara tung ni Abraham ang kaskasën na ra ilëm unu yang kirëpën ang mag̓ana ay yang inana na unu tung kirëpën talagang indi ra ka ëngëd unu manubli tung kaayënan ang subliën yang inana na tung kasawa nang bëlag̓an kirëpën.
Anday dumang lagpakan na tia,
kung indi,
kumpurming tinu pay malëlyag ang magpalg̓ud da tung dating ipinagpakigpaig̓u yang Dios tung nasyun ang Israel atiing tukaw,
talagang indi ra ëngëd pakinaw̓angën yang Dios tung kaayënan ang pinangakuan na tung ni Abraham may tung mga kanubli na.
31 Ig disir,
mga putulu,
kumus ita ka man ay pakinaw̓angën yang Dios tung kaayënan ang atia,
yang kaalimbawaan yang pusisiun ang nabtangan ta bëlag̓anita mga kanubli yang baw̓ay ang atiang kirëpën,
kung indi,
ita ray mga kanubli yang kasawa ni Abraham ang luas kang lag̓i tung pagkakirëpën.