3 Kung mag̓ampuami ra nganing tung Dios ang yay pag̓aningën ang Ama ni Ginuu tang Jesu-Cristo,

yamuy pirming nag̓apasalamatan yamën tung anya.

4 Nag̓ipag̓ampuamu ra nganing yamën natëtëngëd nabalitaanami ra ang yamu unu napagtalig da tung ni Jesu-Cristo,

ig paggëgmaamu ra ka unu tung mga aruman ming parariuamu ra kang binuat yang Dios ang mga tauan nang sadili.

5 Yang pinagamënan ëngëd yang mga isip ming nagtalig ang nunut da ka ta paggëgma,

ya ra yang kaayënan ang nag̓ibaratu yang Dios duun tung langit ang para tung tanan ang mga tauan na ang simanyan ya ray nag̓apakbat mi.

Ya ray naintindian mi atiing pagkagngël mi yang Matinlung Balita natëtëngëd tung ni Jesu-Cristo ang liit tung Dios ang talagang matuud.

6 Yang balitang atiang ipinagpakaw̓ut da tung numyu,

nag̓ipagpakaw̓ut da ka tung mga tau tung maskin ay pang banwaay.

Ya ra ka man nganing ay nag̓ipagbaklu yang sistima yang kumpurming panangëd ig ya rag durulang agdurulang yang kinadakël nira.

Maning kang pisan tia yang nag̓ainabu tung numyu asan,

disti pa atiing primirung pagkagngël mi natëtëngëd tung kanëëman ang ipinagpaita yang Dios tung tanan ang mga tau ang andang pisan ay natëngëran na tung yatën.

Ang pagkatapus ya ra kang pisan ay naispirinsiaan mi mismu tung mga sadili mi atiing pagtalig mi tung ni Ginuung Jesus.

7 Yang balitang atia ya ra ka man ay naintindian mi tung ni Epapras ang yay nag̓amaal yamën ig kasiraanami ra kang pagpaturuw̓ulun tung ni Jesu-Cristo.

Ya kay nag̓atalig̓an nang magpadag̓ën-dag̓ën tung numyu ang para tung ikaayën mi.

8 Tanya ra kay nagbalita tung yamën ang yamu unu,

duruamu unug kaayën tung mga kaarumanan ming mga tumatalig natëtëngëd tung gëgmang nag̓ipaëyang yang Espiritu Santo tung mga isip mi.

9 Purisu ya ray natëngëran na ang ta yami tani,

mag̓impisa pa atiing primirung pagkabalita yamën,

muya-muyaamu ra ilëm ang nag̓ipag̓ampu yamën tung Ampuan ta.

Yang nag̓aingaluk yamën tung anya ang pasanag̓anamu ra anya ta maayën ug̓ud maintindian mi kung unu pay gustu nang yay buatën mi.

Bilang pawayangën na ta mupia yang mga kinaisipan mi ang nunut da ka ta pagpatarëm na ang para magmaskëamu rang magdëëp kung yang nag̓itulduk tung numyu talagang uyun tung kamatuuran u kung bëlag^a.

10 Maning tia yang nag̓ipag̓ampu yamën ug̓ud yang tanan ang mga pag̓urubraën mi magkabag̓ay ra tung pagtërëlëngën ni Ginuu ta ang para luw̓us da kang mauyunan na.

Bilang mapagpaluaamu ra ta sari-saring pag̓urubraën ang matitinlu ig mas pang maispirinsiaan mi kung unu pag katinlu yang kaampiran ming atiang baklu tung Dios.

11 Gustu ka yamën ang paktëlënamu ra yang Dios ta mupia ëkël tung kagaëman nang anday katëgkaan na ang ya ra kang lag̓i ay nag̓ipaita na tung mga tauan na ug̓ud magtëntën dang magtëntën yang mga isip mi ug̓ud kung mapasaranamu ra nganing ta mga kaliwag̓an,

makayanan ming agwantaën ig mapagpaurayamu ra ka tung kumpurming pagpaliwag tung numyu ang nunut da ka ta masadyang kinaisipan mi.

12 Gustu ka yamën ang pirmiamu ra ilëm ang magpasalamat tung Ama tang Dios natëtëngëd tanyay nagpabag̓ay tung numyung magpalg̓ud tung mga kaayënan ang tung uri ya ra kay ipamakdul na tung tanan ang binuat nang mga tauan na ang durug kasusulaw yang malg̓uran tang tanan.

13 Yang Dios ya kay nagpalibri tung yatën tung dating pinagtiniran tang durug kiklëp ang ita ra rin agkëmkëmay ta mupia ni Satanas ang yay pinakamalain tung tanan.

Ilinaktërita ra ka dayun anya tung kagaëman yang pag̓aningën nang Ana Nang nag̓amaal na.

14 Ay ëkël tung pagpatumbas na yang linawa na,

asanita ra ngaipalibriay yang Dios tung sintinsia na tung kadiaduan ang anday katapusan,

bilang asanita ra nga patawaray na tung mga kasalanan ta.

15-20 Yang tanan ang atiang binuat na para tung yatën,

uyun ang pisan tung planu na ay natëtëngëd gustu na kang lag̓i ang ëkël tung pag̓aningën nang Ana Na,

asan da nga paulikay na yang pagkarabëtangën yang tanan ang inimu na ang ya ray nadiadu yang katuyuan nirang atiing primiru^b.

Ay yang katuyuan na tia ay ug̓ud tung uri,

maskin taa tung katanëkan,

maskin duun man tung kalangitan,

luw̓us sing magturunuan dang mamag̓atu tung anyang nag̓imu tung nira ëkël tung pagpaturuk yang Ana Na yang dug̓u na atiing pagpalansang na tung krus.

Dispuis tung Ana Nang atia,

duun ëngëd nga bilug̓ay ta yang pagkadios yang Dios ang indig dakatën ta mata.

Talagang matuud tia ay kipurki uyun ang pisan tung kalëlyag̓an yang Dios ang kung ya pa ag̓ari yang pagkadios na,

asan tung Ana Na nga këën ang andang pisan ay pagkakulang na^c.

Tanyay pinakalandaw tung tanan ang inimu ay luw̓us tung anya ipinaimu yang Dios,

mag̓ing tung kalangitan,

mag̓ing tung kaliw̓utan man,

maskin agdakatën ta mata man,

maskin indi man.

Lug̓ud asan yang tanan ang kinalasi-kalasi ta mga taung indi nag̓aita.

Yang tanan ang bag̓ay,

anday inaning,

luw̓us tung anya ipinaimu yang Dios ug̓ud maskin unu pay gustu nang uniën,

ikadëngëg na ka ëngëd agyapun tanirang tanan^d.

Tanya asan da kang lag̓i baklu namansiëyang yang tanan ang bag̓ay.

Dispuis yang tanan ang bag̓ay tung anya ka nag̓ipaëpëtay yang Dios ang para dayun-dayun yang pagkarabëtangën nirang tanan ang anday kaumanan.

Kidispuis pa katulad ka tung kulu yang sasang tau ang yay pagmangulu tung intirung tinanguni na,

tanya kay pagmangulu tung intirung kabilug̓an yang tanan ang kumpurming pagtalig tung anya ang ya kay maning pa tung tinanguni na taa tung katanëkan.

Tanya kay nagpaëyang tung nira yang ipagpangabui nirang baklu ay kipurki tanya kay nanukawan tung nirang nagbungkaras ang nanliit tung kamatayën ug̓ud tanyay mag̓ing pinakalandaw tung tanan,

mag̓ing atiing dating inimu na,

mag̓ing ita man ang pinaëyangan na ta ipagpangabui tang baklu.

21 Bëlag̓an ilëm yang tanan ang inimu yang Dios may kaministiran ang maulikan yang rilasyun nira tung Dios^e,

kung indi,

pati yamu,

ya ka.

Ay kipurki atii kanay,

alalawiramu tung Dios,

pagpasuag̓amu ka nganing tung kalëlyag̓an na.

Bistu tia ay yang palaksu yang mga pag̓irisipën mi pirmi ra ilëm tung mga malalain pati mga pag̓urubraën mi.

22 Piru maskin maning da ka man tii yang nabtangan mi,

simanyan,

pinaulikamu ra yang Dios ang rinisibi ëkël tung pagkuat na tung pinagsangkëlan na ang indiamu ra rin paulikën na.

Yang pagkuat nang atia,

duun da ipatiëlay na tung pagpakugmatay yang pag̓aningën nang Ana Na ang yang tinanguni na mismu maning pa tung ya idasag̓ay na.

Yang katuyuan nang nagpaulik tung numyu ay ug̓ud tung uras ang duunamu ra tung katalungaan na,

limpiuamu rang pisan tung pagtërëlëngën na ang anda ra kang pisan ay mabangdan na tung numyu.

23 Talagang yay mabtangan mi basta idayun mi yang pagparanangërën mi tung Matinlung Balita natëtëngëd tung ni Jesu-Cristo pati yang pagtaralig̓ën mi tung anya.

Kaministiran kang pirming matëntën yang isip ming pagpadayun tung pagpakbat mi tung sasang kaayënan ang inding pisan mapakdingan ang ya ray nabalitaan mi atiing primirung pagkagngël mi yang balitang atia.

Ay kipurki yang balitang atia,

bëlag da ilëm tung numyu ipinagpakaw̓ut,

kung indi,

ipinagpakaw̓ut da ka tung mga tau tung maskin ay pang banwaay^f.

Kung natëtëngëd tung balitang atia,

yuu mismung ti Pablo nagyari rang sasang manigparakaw̓utun.

24 Numanyan ag̓ikasadyaw ra ka ëngëd yang mga kaliwag̓an ang naang nag̓apasaranu tani gatëd maskin nag̓aliwag̓anaw ra ka man,

basta para tung ikaayën mi,

yay masadya tung yëën.

Kipurki ëkël tung mga kaliwag̓an ang naa,

asanaw rag pagkumplitu tung ilinug̓ut da kang lag̓i ni Jesu-Cristo tung yëën ang yay dapat ang mapasaranu para tung ikaayën yang intirung kabilug̓an yang mga tumatalig ang yang kaalimbawaan nirang tanan,

maning pa tung yay tinanguni na taa tung katanëkan^g.

25 Sipurki ta yuu,

nag̓ing sasang manigpanirbian tung nirang tanan ay natëtëngëd piniaranaw ra yang Dios ang magparasanag̓ënaw ta maayën tung maning tung numyu ëngëd ang bëlag̓an mga Judio kung unu pa ëngëd ay kamtangan yang bitalang naang liit tung anya.

26 Yang bitalang naang nag̓ianingu,

inëgtëman pa rin yang Dios tung mga tauan na tung namagtukaw pang mga panimpu,

piru simanyan ipinagpabunayag na ra tung mga taung baklung binuat nang mga tauan na.

27 Bilang inëngëd na rang paskëën tanira kung unu pay kamtangan yang planung atiing inëgtëman na pa rin ang tukaw ang atia pala,

pati yang maning tung numyung bëlag̓an mga Judio,

pakaayënënamu ra ka anya ta mupia.

Bilang ti Jesu-Cristo mismu magtinir da tung numyung pagtalig da tung anya ang asanamu ra ka ngaëyangay ta ipagpakisëw̓at mi ang malg̓uramu ra ka man tung katinluan ang inding pisan mapasiring-siringan.

28 Ta yamën,

yang balitang naa natëtëngëd tung ni Jesu-Cristo,

yay nag̓ipagpakaw̓ut yamën tung maskin tinu pang tauay.

Nag̓apaamanan yamën ta maayën ang nunut da ka ta matinlung pagpasanag.

Kada sang klasi tung nira,

kung unu pay nira-nirang nag̓apgësan,

yag patëng-patëngay yamën ta maayën ang para duun da ipalëngtay yamën yang nag̓ipagpakaw̓ut yamën ang naa tung nira^h.

Yang pag̓asikad yamën asan ang yang kumpurming tinu pay napagtalig da yang sadili na tung ni Jesu-Cristong nagpasirung,

mas pang mag̓atu rang mag̓atu yang mga ug̓ali nira tung ug̓ali na ug̓ud kung kaw̓utun da nganing yang uras ang ipagprisintar da yamën tung nira duun tung katalungaan yang Dios,

timlat dang pisan ang anda ray pagkakulang yang pagkatau nira.

29 Ang para may pakaw̓utun na ëngëd ang matinlu yang pagparakaw̓utunung naa,

ya rag paawatayu ta mupiang nag̓apakabëdlayan ang yuu rag paktëlay ta mupia ni Jesu-Cristo.